પાલિતાણાની લુવારવાવ પ્રાથમિક શાળામાં વિદ્યાર્થીઓને મૂલ્યનિષ્ઠ શિક્ષણ આપવા માટે 'શ્રીમદ્ ભગવદ્ ગીતા'ના શ્લોક પારાયણનો નવતર પ્રયોગ હાથ ધરાયો છે. શાળાના શિક્ષકોના સહયોગથી બાળકો દરરોજ એક શ્લોક અને તેનો ભાવાર્થ શીખીને સોશિયલ મીડિયાના માધ્યમથી રજૂ કરે છે. અત્યાર સુધી ૨૮૦ શ્લોક પૂર્ણ થયા છે અને કુલ ૭૦૦ શ્લોકનો લક્ષ્યાંક છે. રાજ્ય સરકારના ગીતા શિક્ષણના અભિગમ સાથે સુસંગત આ પ્રવૃત્તિ દ્વારા વિદ્યાર્થીઓમાં સંસ્કૃત ભાષા પ્રત્યે અભિરુચિ કેળવવાની સાથે નૈતિક મૂલ્યો અને ભારતીય સંસ્કૃતિનું સિંચન કરવામાં આવી રહ્યું છે.