છેલ્લા પાંચ વર્ષમાં ગુજરાતમાંથી ₹13,600 કરોડના ડ્રગ્સ ઝડપાયા છે, તેમ છતાં યુવાનોમાં નશાખોરીનું પ્રમાણ ચિંતાજનક રીતે વધી રહ્યું છે. પંજાબ, રાજસ્થાન અને દિલ્હીથી ચાલતા ડ્રગ્સના નેટવર્કમાં ગુજરાતના દરિયાકાંઠાનો ઉપયોગ રોકવામાં સફળતા મળી હોવા છતાં, સ્થાનિક સ્તરે ડ્રગ્સનું વેચાણ અને સેવન વધી રહ્યું છે. છેલ્લા 10 વર્ષમાં ડ્રગ્સ-દારૂના દુરુપયોગથી 711 લોકોએ આત્મહત્યા કરી છે અને 37 લોકોના ઓવરડોઝથી મૃત્યુ થયા છે. ડ્રગ્સ ફ્રી સ્ટેટ બનાવવા માટે રાજ્ય પોલીસ દ્વારા છ એન્ટિ નાર્કોટિક્સ ટાસ્ક ફોર્સની રચના કરાઈ છે, જે સ્થાનિક વેચાણ પર નિયંત્રણ મેળવશે.

રાજ્યમાં અસહ્ય ગરમી વચ્ચે હવામાન વિભાગે રાહતના સમાચાર આપ્યા છે. 'અપર એર સાયક્લોનિક સર્ક્યુલેશન' સિસ્ટમ સક્રિય થતાં ગુજરાતમાં ચોમાસું પુનઃ સક્રિય થયું છે. આગામી ત્રણ કલાકમાં દક્ષિણ ગુજરાતના ઉમરગામ, દમણ, વલસાડ, સુરત, બીલીમોરા જેવા વિસ્તારોમાં ભારે વરસાદની સંભાવના છે. પડોશી મુંબઈમાં પણ અતિભારે વરસાદની ચેતવણી છે, જેની અસર વલસાડ પર પડશે. અરબી સમુદ્રમાં નવી સિસ્ટમથી સૌરાષ્ટ્રમાં પણ સાર્વત્રિક ભારે વરસાદ પડી શકે છે.

આગામી સીમાંકન અને નારી શક્તિ વંદન અધિનિયમના અમલ બાદ ગુજરાતના રાજકીય નકશામાં મોટા ફેરફારો થઈ શકે છે. રાજ્યમાં લોકસભાની બેઠકો 26થી વધીને 39-40 અને વિધાનસભાની બેઠકો 182થી વધીને આશરે 273 થવાની શક્યતા છે. અમદાવાદ, સુરત, ગાંધીનગર, રાજકોટ સહિત મોટા શહેરોમાં નવી બેઠકો ઉમેરાઈ શકે છે. મહિલા અનામત અમલમાં આવતાં લોકસભા અને વિધાનસભાની 33 ટકા બેઠકો મહિલાઓ માટે અનામત થશે. જોકે અંતિમ નિર્ણય વસ્તી ગણતરી, સીમાંકન આયોગની ભલામણો અને સંસદની મંજૂરી બાદ લેવાશે.

'ઓપરેશન ડેલ્ટા હન્ટ' હેઠળ ગુજરાત પોલીસે ઝડપાયેલા બાંગ્લાદેશી ઘૂસણખોરોના કિસ્સાઓમાં ચોંકાવનારા ખુલાસા થયા છે. એજન્ટોના નેટવર્કની મદદથી યુવતીઓ વિઝા-પાસપોર્ટ વિના ભારત પ્રવેશી નકલી નામ અને ઓળખ સાથે ગુજરાત સહિત વિવિધ શહેરોમાં ડાન્સ બાર, મજૂરી અને ઇમિટેશન જ્વેલરીના કારખાનામાં કામ કરતી હતી. કેટલીકએ સ્થાનિકો સાથે લગ્ન પણ કર્યા, જ્યારે એક યુવતીએ કિન્નરોના ટોળા સાથે બોર્ડર પાર કરી હતી. પોલીસ તપાસમાં ગેરકાયદે નાણાં ટ્રાન્સફર નેટવર્ક અને ઘૂસણખોરીની સમગ્ર મોડસ ઓપરેન્ડીનો પર્દાફાશ થયો છે.

રાજકોટ મહાનગરપાલિકા દ્વારા જંગલેશ્વર વિસ્તારમાં કરાયેલા મેગા ડિમોલિશન બાદ અધિકારીઓ હવે 27 લાખના ભોજન બિલના વિવાદમાં ઘેરાયા છે. આ બિલમાં સમોસા, કાજુકતરી જેવી વાનગીઓનો સમાવેશ થાય છે. નવાઈની વાત એ છે કે, 12 લાખ રૂપિયાના મિનરલ વોટરના ખર્ચને આ બિલમાંથી છુપાવવામાં આવ્યો હતો. ભાસ્કર ઇન્વેસ્ટિગેશન દ્વારા પાણીના આ તોતિંગ બિલના પુરાવા સાથે આ ગોઠવણનો પર્દાફાશ થયો છે. આ સમગ્ર મામલો હાલ સ્ટેન્ડિંગ કમિટીમાં અટકાવવામાં આવ્યો છે.

ચૈતર વસાવાને વનકર્મીઓ પર હુમલાના કેસમાં 7 વર્ષની સજા થતાં તેમના ધારાસભ્યપદ પર સંકટ ઊભું થયું છે. સ્ટે ન મળે તો સભ્યપદ રદ થઈ શકે છે, જ્યારે આમ આદમી પાર્ટી હાઈકોર્ટ અને સુપ્રીમ કોર્ટ સુધી લડવાની તૈયારીમાં છે. રાજકીય વિશ્લેષકો આ ઘટનાને મધ્ય ગુજરાતના રાજકારણમાં મોટું વળાંક ગણાવી રહ્યા છે. જો બેઠક ખાલી થશે તો પેટાચૂંટણી યોજાશે. આ સમગ્ર મામલો 2027ની વિધાનસભા ચૂંટણી પહેલાં આદિવાસી પટ્ટાના રાજકારણ પર લાંબા ગાળાની અસર કરી શકે છે.

છોટાઉદેપુરના નસવાડીમાં યોજાયેલા શાળા પ્રવેશોત્સવ દરમિયાન રાજ્યસભાના સાંસદ મુકેશભાઈ રાઠવાનું પ્રાથમિક શિક્ષક સંઘ દ્વારા સન્માન કરવામાં આવ્યું હતું. આ પ્રસંગે શિક્ષક સંઘે TET પરીક્ષા મુદ્દે આવેદનપત્ર આપી સુપ્રીમ કોર્ટના તાજેતરના ચુકાદાથી સેવારત શિક્ષકોમાં અસંતોષ હોવાનું રજૂ કર્યું હતું. સંઘે જણાવ્યું કે ફરજિયાત TETના નિર્ણયથી અનુભવી શિક્ષકોની નોકરી અને બઢતી પર અસર થશે. સરકારે તાત્કાલિક નીતિગત ઉકેલ લાવી શિક્ષકોના હિતોનું રક્ષણ કરે તેવી માંગ કરવામાં આવી.

વડોદરાના સાવલી નગરપાલિકાના વોર્ડ નં. 1માં ગટરના દૂષિત પાણી વરસાદી કાંસમાં છોડાતા ભારે દુર્ગંધ અને રોગચાળાની ભીતિ વચ્ચે સ્થાનિકોએ વિરોધ નોંધાવ્યો હતો. રહીશોએ નગરપાલિકા સામે નારેબાજી કરી તાત્કાલિક યોગ્ય નિકાલની માંગ કરી હતી. ગંદા પાણીથી મચ્છરોનો ઉપદ્રવ વધ્યો હોવાનો પણ આક્ષેપ કરવામાં આવ્યો. અનેક રજૂઆતો છતાં કાર્યવાહી ન થતાં લોકોમાં ભારે અસંતોષ છે અને સમસ્યાનો ઉકેલ નહીં આવે તો આંદોલનની ચીમકી ઉચ્ચારવામાં આવી છે.

પાવીજેતપુર તાલુકાના રતનપુર ગામની સીમમાંથી વન વિભાગે એક વર્ષીય માદા દીપડીનું સફળ રેસ્ક્યુ કર્યું છે. છેલ્લા કેટલાક દિવસોથી દીપડીની અવરજવરથી ગ્રામજનોમાં ભય ફેલાયો હતો અને 20 જૂને એક 11 વર્ષની બાળકી પર હુમલો થતાં વન વિભાગે ખાસ કાર્યવાહી શરૂ કરી હતી. પાંજરું ગોઠવી દીપડીને સુરક્ષિત રીતે પકડી યોગ્ય સ્થળે ખસેડવામાં આવી છે. આ કામગીરી બાદ સ્થાનિક લોકો અને ખેડૂતોમાં રાહતની લાગણી ફેલાઈ છે.

ગોધરા સ્થિત શ્રી ગોવિંદ ગુરુ યુનિવર્સિટી ખાતે ઓલિમ્પિક ડેની ઉજવણીના ભાગરૂપે એક ભવ્ય ઓલિમ્પિક ડે રન કાર્યક્રમ યોજાયો હતો. કુલપતિ પ્રો. હરિભાઈ કાતરીયાના હસ્તે ફ્લેગ ઓફ્ કરાયેલી આ રેલીમાં વિદ્યાર્થીઓ અને સ્ટાફે ઉત્સાહભેર ભાગ લીધો હતો. આ પ્રસંગે ભારતના ઓલિમ્પિક ઇતિહાસ, 1900 થી અત્યાર સુધીના મેડલ વિજેતાઓ, અને 2036માં ભારત ઓલિમ્પિક ગેમ્સનું યજમાન બનવાની સંભાવના અંગે ચર્ચા થઈ હતી. રજિસ્ટ્રાર ડો. અનિલ સોલંકી સહિત અન્ય અધ્યાપકો અને મોટી સંખ્યામાં વિદ્યાર્થીઓ હાજર રહ્યા હતા.

દાહોદ જિલ્લામાં શાળા પ્રવેશોત્સવના અંતિમ દિવસે સંજેલી તાલુકાના માંડલી ગામની સરકારી પ્રાથમિક શાળા ખાતે જિલ્લા વિકાસ અધિકારી (DDO) સ્મિત લોઢાની અધ્યક્ષતા હેઠળ ભવ્ય ઉજવણી કરવામાં આવી. આ કાર્યક્રમનું સંચાલન શાળાની વિદ્યાર્થીનીઓએ કર્યું હતું. DDO એ આંગણવાડીના ભૂલકાઓને તિલક કરી શાળામાં પ્રવેશ અપાવ્યો. વિદ્યાર્થીઓએ પર્યાવરણ અને 'બેટી બચાવો' જેવા વિષયો પર વક્તવ્યો આપ્યા. તેજસ્વી વિદ્યાર્થીઓનું સન્માન પણ કરાયું. કાર્યક્રમમાં અનેક મહાનુભાવો અને વાલીઓ ઉપસ્થિત રહ્યા હતા.

સિદ્ધપુર પોલીસ સ્ટેશનમાં નોંધાયેલ અપહરણના ગુનામાં પોલીસે તપાસ હાથ ધરી હતી. બાતમીદારોની મદદથી અપહરણ થયેલી એક સગીરા અને તેને અપહરણ કરનાર સગીરને મુંબઈથી શોધી કાઢ્યા હતા. આ દરમિયાન, થરા પોલીસ સ્ટેશનમાં નોંધાયેલા ગુનાના સંબંધિત એક સગીરા અને એક યુવક પણ મળી આવતાં તેમને થરા પોલીસને સોંપ્યા હતા. સિદ્ધપુરથી ગુમ થયેલી સગીરાનો કબજો તેના માતા-પિતાને સોંપવામાં આવ્યો અને સગીર આરોપીને બાળ સુધારણા ગૃહ મોકલી આપવામાં આવ્યો.

ચાણસ્મા તાલુકાના ઝિલીયાથી કેશણી જવાના માર્ગ પર બાવળની વધેલી ડાળીઓ રોડ સુધી ફેલાતા વાહનચાલકોને ભારે મુશ્કેલી પડી રહી છે. ખાસ કરીને રાત્રિના સમયે અને વળાંકવાળા સ્થળે અકસ્માતનો ભય વધ્યો છે. આ માર્ગનો ઉપયોગ પાટણ જવા માટે મોટી સંખ્યામાં લોકો કરે છે. કેશણી ગામના સરપંચ અને સ્થાનિક વાહનચાલકોએ તંત્રને તાત્કાલિક બાવળની ડાળીઓ દૂર કરી માર્ગ સુરક્ષિત બનાવવાની માંગ કરી છે.

શિવસેના (ઉદ્ધવ)ના રાજ્યસભા સાંસદ સંજય રાઉતે મુંબઈ પોલીસ કમિશનરને પત્ર લખી સાંસદ સંજય દીના પાટીલ સામે કાર્યવાહી કરવાની માંગ કરી છે. રાઉતે આરોપ લગાવ્યો કે પાટીલે વિરોધ પ્રદર્શન દરમિયાન જીવલેણ ધમકીઓ આપી અને હત્યા તથા બોમ્બથી ઉડાવી દેવાની વાત કરી હતી. આ નિવેદનોની નિષ્પક્ષ તપાસ કરી જરૂર પડે તો યુએપીએ હેઠળ કાર્યવાહી કરવાની માંગ કરવામાં આવી છે. યોગ્ય પગલાં નહીં લેવાય તો કોર્ટમાં જવાની ચેતવણી પણ આપવામાં આવી છે.

પાટણ ગોઝારીયા નેશનલ હાઇવે પર અધુરી કામગીરી વચ્ચે તંત્રની મોટી બેદરકારી છતી થવા પામી છે. જેમાં ચાણસ્માના બેચરાજી ત્રણ રસ્તા પાસે આવેલ હોટલ સીટી પોઈન્ટ પાસે વરસાદી પાણીના નિકાલ માટે નંખાયેલ નાળું બંધ હોવાથી ચોમાસામાં વરસાદી પાણી ભરાવવાની ભીતી સેવાઈ રહી છે. જેના કારણે વિસ્તારમાં વરસાદી પાણી પણ ફરી વળવાની હોટલના સંચાલક મુકેશભાઈ પટેલ (દાઢી) એ શંકા વ્યક્ત કરીહતી.

લીમખેડા તાલુકાના સી.આર.સી. ઢઢેલા ખાતે યોજાયેલા પ્રવેશોત્સવમાં ઢઢેલા, કાચલાં ફ્. ઢઢેલા અને સાર્વજનિક હાઈસ્કૂલની શાળાઓમાં નવા વિદ્યાર્થીઓનું ઉત્સાહભેર સ્વાગત કરાયું. મુખ્ય અધિકારી અમિતભાઇ સંગાડાની ઉપસ્થિતિમાં, બાળવાટિકા, ધોરણ-1 અને ધોરણ-9ના વિદ્યાર્થીઓને પ્રવેશ અપાયો. શૈક્ષણિક કીટ વિતરણ કરાયું અને ધોરણ 3 થી 8માં પ્રથમ ક્રમાંક મેળવનાર તેમજ ઉત્કૃષ્ટ સિધ્ધિ હાંસલ કરનાર વિદ્યાર્થીઓને સન્માનિત કરાયા. અધિકારીઓએ શૈક્ષણિક સુવિધાઓની મુલાકાત લીધી અને વિદ્યાર્થીઓને નિયમિત શાળાએ આવવા પ્રોત્સાહિત કર્યા.

ઉત્તર પૂર્વ મુંબઈના સાંસદ સંજય દીના પાટીલ શિવસેના (ઉદ્ધવ) છોડીને શિંદે જૂથમાં જોડાયા બાદ વિવાદમાં આવ્યા છે. વિરોધ કરનાર કાર્યકરોને બોમ્બ ફેંકવાની અને ઘરમાં ઘૂસી મારી નાખવાની ધમકી આપ્યા બાદ તેમણે આ મુદ્દે પ્રશ્ન પૂછનારા પત્રકારોને પણ અપશબ્દો બોલી માર મારવાની ધમકી આપી હતી. ઘટનાને લઈને પત્રકાર સંગઠનોએ ઉગ્ર વિરોધ નોંધાવ્યો છે અને માફી સાથે કડક કાર્યવાહી કરવાની માંગ ઉઠી છે. મામલો વિધાનસભામાં પણ ગૂંજ્યો છે.

સમી : સમીની નાયકા ચોકડી પાસે શંખેશ્વર તરફ્થી આવતી એક ઈકો ગાડીના ચાલકે રસ્તા પર અચાનક ઉતરી આવેલા બાળકને બચાવવા જતા સ્ટેરીંગ પરનો કાબુ ગુમાવી દેતાં ઈકો ગાડી સીધી રોડની સાઈડમાં ગુલાંટ મારી જવા પામી હતી. જોકે અકસ્માતમાં ઈકો ગાડીમાં સવાર 3 લોકોનો સદનસીબે આબાદ બચાવ થયો હતો પરંતુ રસ્તો ક્રોસ કરી રહેલા બાળકને સામાન્ય ઈજા પહોંચી હોવાનું જાણવા મળ્યું હતું. અકસ્માતની જાણ થતાં જ લોકોના ટોળા એકઠા થઈ ગયા હતા.

ગોધરા APMCના ખેડૂત પ્રતિનિધિ કનકસિંહ પ્રભાતસિંહ પરમારને ગોધરા તાલુકા ભાજપ પ્રમુખ તરીકે નિયુક્ત કરવામાં આવ્યા છે. આ નિમણૂક બાદ APMC ખાતે એક સન્માન સમારોહ યોજાયો હતો. ચેરમેન માલવદીપસિંહ રાઉલજી, વાઇસ ચેરમેન સામંતસિંહ સોલંકી અને અન્ય કમિટી સભ્યોએ તેમનું અભિવાદન કરી, શાલ ઓઢાડી શુભકામનાઓ પાઠવી. કનકસિંહ પરમારે પ્રદેશ ભાજપા નેતૃત્વ, ધારાસભ્ય સી.કે. રાઉલજી, જિલ્લા ભાજપ પ્રમુખ, સાંસદો, માર્કેટ યાર્ડના ચેરમેન, વાઇસ ચેરમેન અને તમામ ડિરેક્ટરઓનો આભાર માન્યો. આ પ્રસંગે વેપારીઓ, કર્મચારીઓ અને અગ્રણીઓ ઉપસ્થિત રહ્યા હતા.

ગત તા.4 જૂન 2028ના રોજ ફરિયાદી પોતાના ભાભીના અવસાનના કારણે પરિવાર સાથે રાજસ્થાન ખાતે પોતાના વતનમાં ગયો હતો. તે સમયે તેઓ પોતાનું રૂ.5 લાખનું બોલેરો પીકઅપ ડાલુ ભંગારના ગોડાઉનમાં પાર્ક કરીને લોક મારીને ગયો હતો. ત્યારબાદ ગત તા.23 જૂનના રોજ જ્યારે તે વતનમાંથી પરત ફર્યા ત્યારે ગોડાઉનનો દરવાજો ખુલ્લો હતો અને અંદર પાર્ક કરેલુ ડાલુ ગાયબ હતુ. આજુબાજુના વિસ્તારમાં તપાસ કરવા છતાં ડાલુ મળી ન આવતા આખરે બાયડ પોલીસ મથકે ફરિયાદ નોંધાવી હતી. પોલીસે અજાણ્યા ચોર તસ્કરો વિરૂદ્ધ ગુનો નોંધી વધુ તપાસ ધરી છે.

લુણાવાડા નજીક નવામુવાડા ગામને જોડતા મુખ્ય રોડનું નિર્માણ સરકારી નિયમોનો ભંગ કરી અને યોગ્ય પ્રક્રિયા વિના શરૂ કરવામાં આવ્યું છે. ગ્રામજનોના જણાવ્યા મુજબ, રોડ બનાવતા પહેલાં આસપાસની સાફ-સફાઈ અને લેવલિંગ કરવું અનિવાર્ય છે, પરંતુ કોન્ટ્રાક્ટર દ્વારા આ નિયમોનું પાલન કરવામાં આવ્યું નથી. આ અંગે ચોપડા અને નવામુવાડા ગામના લોકોએ વિરોધ નોંધાવ્યો હતો તેમ છતાં કામ ચાલુ રાખવામાં આવ્યું હતું. આના કારણે ગ્રામજનોમાં ભારે રોષ જોવા મળી રહ્યો છે. તેઓએ R&B વિભાગના અધિકારીઓને તાત્કાલિક સ્થળ તપાસ કરી નિયમ મુજબ કામ થાય તેવા આદેશ આપવા અપીલ કરી છે.

સાંસદ સંજય દીના પાટીલ દ્વારા પત્રકારોને અપશબ્દો અને ધમકી આપવાના વિવાદે રાજકીય ગરમાવો વધાર્યો છે. મુખ્યમંત્રી દેવેન્દ્ર ફડણવીસે ધમકી આપનાર સામે કાયદેસર કાર્યવાહી થશે તેમ કહ્યું, જ્યારે ઉપ મુખ્યમંત્રી એકનાથ શિંદેએ પત્રકારો સાથે આવું વર્તન અયોગ્ય ગણાવી પાટીલને માફી માગવાની સલાહ આપી છે. પાટીલે પોતાના નિવેદનને તોડી-મરોડીને રજૂ કરાયું હોવાનો દાવો કર્યો છે. શિંદે જૂથના નેતાઓએ પણ ઘટનાને દુર્ભાગ્યપૂર્ણ ગણાવી પત્રકારોની માફી માગી છે.

અરવલ્લીના બાયડ તાલુકાના વાત્રક ગામની સીમમાં અજાણ્યા તસ્કરોએ લક્ષ્મીનારાયણ પ્લાન્ટમાંથી ચાર ઇલેક્ટ્રિક મોટર અને 300 ફૂટ કેબલ વાયર સહિત રૂ.70 હજારનો મુદ્દામાલ ચોરી કર્યો હતો. તે જ રાત્રે નજીકના બે ખેડૂતોની મોટર, કેબલ વાયર અને ટોટો પાઈપની પણ ચોરી થતાં કુલ રૂ.97,500નું નુકસાન થયું છે. શોધખોળ છતાં કોઈ પત્તો ન મળતાં પ્લાન્ટ મેનેજરની ફરિયાદના આધારે બાયડ પોલીસે અજાણ્યા ચોરો સામે ગુનો નોંધી તપાસ શરૂ કરી છે.

કન્યા કેળવણી મહોત્સવ અને શાળા પ્રવેશોત્સવના અંતિમ દિવસે પંચમહાલના કાલોલ તાલુકાની વિવિધ શાળાઓમાં નવા વિદ્યાર્થીઓનું ઉત્સાહભેર સ્વાગત કરાયું. મુખ્ય અતિથિ તરીકે ઉપસ્થિત સાંસદ રાજપાલસિંહ જાદવે બાળકોને શાળામાં પ્રવેશ કરાવી ઉજ્જવળ ભવિષ્ય માટે શુભેચ્છા પાઠવી હતી. સનસોલી, ડેરોલ ગામ અને ડેરોલ સ્ટેશન ક્લસ્ટરની શાળાઓમાં આંગણવાડી, બાલવાટિકા, ધોરણ-1, ધોરણ-6 સહિત 'બેક ટુ સ્કૂલ' અભિયાન હેઠળ ડ્રોપઆઉટ બાળકોને પણ ફરી શિક્ષણની મુખ્ય ધારામાં જોડવામાં આવ્યા.

દસાડાના ખારાઘોડામાં ખાનગી કંપનીને 5 હજાર એકર જમીન ભાડે આપવાના નિર્ણય સામે અગરીયાઓનો વિરોધ ઉગ્ર બન્યો છે. આ મુદ્દે પૂર્વ અને વર્તમાન ધારાસભ્યોએ અલગ-અલગ કાર્યક્રમો યોજ્યા હતા. વર્તમાન ધારાસભ્યે અગરીયાઓ સાથે સંવાદ કરી પ્રશ્નોના ઉકેલની ખાતરી આપી, જ્યારે પૂર્વ ધારાસભ્ય નૌશાદ સોલંકીએ પ્રતીક ધરણા કરીને નાયબ કલેક્ટરને આવેદનપત્ર આપ્યું હતું. તેમણે કેન્દ્ર અને રાજ્ય સરકાર હસ્તક્ષેપ કરીને અગરીયાઓના રોજગાર અને હિતોની સુરક્ષા કરવાની માંગ કરી છે.

સુપ્રીમ કોર્ટના શિક્ષકો માટે ફરજિયાત TET પરીક્ષાના ચુકાદાના વિરોધમાં અખિલ ભારતીય રાષ્ટ્રીય શૈક્ષિક મહાસંઘ પંચમહાલ દ્વારા ગોધરાની સાંદિપની નર્સિંગ કોલેજ ખાતે ધરણા કાર્યક્રમ યોજાયો હતો. જિલ્લા અને તાલુકાના શિક્ષકો, HTAT મુખ્ય શિક્ષકો, BRC-CRC સંયોજકો સહિત મોટી સંખ્યામાં કાર્યકર્તાઓ હાજર રહ્યા હતા. કાર્યક્રમમાં વિવિધ આગેવાનોએ મુદ્દે ચર્ચા કરી અને બાદમાં રેલી યોજી જિલ્લા કલેક્ટરને આવેદનપત્ર આપી TET ફરજિયાતની જોગવાઈમાં રાહત આપવા માંગ કરી.

ધોળકા શહેરના ડમારવાડા વિસ્તારમાં પોલીસે દરોડો પાડી મકાનના ઉપરના માળે ચાલી રહેલા જુગારનો પર્દાફાશ કર્યો હતો. બાતમીના આધારે કરવામાં આવેલી કાર્યવાહીમાં મુખ્ય સંચાલક સહિત કુલ 11 ઇસમોને ઝડપી પાડવામાં આવ્યા હતા. પોલીસે સ્થળ પરથી રૂ. 18,200 રોકડ, 300 કોઈન, 4 મોબાઇલ ફોન સહિત કુલ રૂ. 29,400નો મુદ્દામાલ કબજે કર્યો હતો. તમામ આરોપીઓ વિરુદ્ધ જુગારધારા હેઠળ ગુનો નોંધી પોલીસે વધુ તપાસ હાથ ધરી છે.

દેવગઢબારીઆ શહેર અને આસપાસના ગામો માટે જીવાદોરી સમાન પાનમ નદીમાં ઉનાળાના અંતમાં પાણી સુકાઈ રહ્યું છે. આ નદી દેવગઢબારીઆના નાગરિકોને પીવાનું પાણી પૂરું પાડે છે. પાણી સુકાઈ જતાં નદીના પટમાં બંને ભૂગર્ભ કુવાઓ દેખાઈ રહ્યા છે. હાલ એક-બે દિવસના અંતરે પીવાનું પાણી મળે છે, પરંતુ વરસાદ ન આવે તો સ્થિતિ વધુ ગંભીર બની શકે છે. પાલિકા તંત્રને ટેન્કર દ્વારા બહારથી પાણી ખરીદવું પડી શકે છે. ભૂતકાળમાં નદી છલકાઈ રહેતી હતી, જે હવે રેતીથી ભરાઈ ગઈ છે.

સુરેન્દ્રનગર SOG P.I. બી.એચ.શીંગરખીયાની સુચનાથી પેટ્રોલીંગ કરી રહેલ સ્ટાફના અમરકુમાર ગઢવી સહિતનાઓને સાયલા તાલુકાના હડાળા ગામના બોર્ડ પાસે આવેલ હોટલ નાગરાજમાં છળકપટથી મેળવેલ સીમેન્ટની થેલીઓનું વેચાણ થતુ હોવાની બાતમી મળતા રેડ કરાઈ હતી. જેમાં હોટલ માલીક સાયલા તાલુકાના ઢેઢુકીનો રામકુ જેઠુરભાઈ વેગડ અને યુપીનો અચ્છેલાલ રામલાલ સીમેન્ટની 18 થેલીઓ અને ટેન્કર સહિત રૂ. 10,04,800ની મત્તા સાથે ઝડપાયા હતા. બન્નેને સાયલા પોલીસના હવાલે કરી વધુ કાર્યવાહી હાથ ધરાઈ છે.

ઉત્તર પ્રદેશ, બિહાર જેવા રાજ્યોમાંથી ભરૂચ જિલ્લાને કર્મભૂમિ બનાવનાર યાદવ સમાજે વિકાસ અને સામાજિક તાણાવાણામાં અનોખું સ્થાન મેળવ્યું છે. તેઓ માત્ર પોતાના સમાજ માટે જ નહીં, પરંતુ ભરૂચના સ્થાનિક લોકો માટે પણ મદદના દ્વાર ખુલ્લા રાખે છે. સુખ-દુઃખ, આપત્તિ કે સામાજિક કાર્યોમાં તેમની નિઃસ્વાર્થ સેવા પ્રશંસનીય છે. રોજગારી સાથે સમાજને કંઈક પાછું આપવાની ભાવના, ઉદ્યોગ-વેપારમાં સફળતા, અને સામાજિક ક્ષેત્રે યોગદાન – આ બધું જ યાદવ સમાજની ઓળખ છે. તેઓ જાતિ-ભેદભાવથી પર રહી ભાઈચારાની ભાવના સાથે ભરૂચની સંસ્કૃતિનો અભિન્ન હિસ્સો બન્યા છે. આર.પી.યાદવ અને રામસિંગ યાદવ જેવા નેતૃત્વ હેઠળ યુવાનોને દેશપ્રેમ અને સામાજિક ઉત્તરદાયિત્વની પ્રેરણા મળે છે.