ભારતના રાષ્ટ્રીય સુરક્ષા સલાહકાર (NSA) અજીત ડોભાલ અને ભારતીય મુસ્લિમ સમુદાયના લોકો વચ્ચે વડાપ્રધાન કાર્યાલયમાં ગત 18 એપ્રિલે એક મહત્વની બેઠક થઈ હતી. આ મીટિંગમાં મુસ્લિમ સમુદાયના અલગ-અલગ ક્ષેત્રોના લોકો સામેલ હતા. આ બેઠક દરમિયાન NSAએ કહ્યું કે ભારતમાં રહેતા હિન્દુ અને મુસલમાન એક જ જહાજના મુસાફરો જેવા છે. તમને જણાવી દઈએ કે આ બેઠકનો ઉદ્દેશ્ય પરંપરાગત વોટ-બેંકના રાજકારણથી દૂર રહીને મુસ્લિમ સમુદાયના વિકાસ, શિક્ષણ અને ઉદ્યોગસાહસિકતાના ભવિષ્ય પર ચર્ચા કરવાનો હતો.

AAPના રાજ્યસભાના સાંસદ રાઘવ ચઢ્ઢાએ એક અત્યંત ચોંકાવનારો નિર્ણય લેતા જાહેર કર્યું છે કે તેઓ ભાજપમાં સામેલ થવા જઈ રહ્યા છે. દિલ્હીમાં સંદીપ પાઠક અને અશોક મિત્તલ સાથે એક પ્રેસ કોન્ફરન્સને સંબોધતા તેમણે જણાવ્યું હતું કે, રાજ્યસભામાં AAPના બે તૃતીયાંશ(2/3) સભ્યોએ ભારતીય બંધારણની જોગવાઈઓનો ઉપયોગ કરીને BJP સાથે જોડાવાનો નિર્ણય કર્યો છે. રાજ્યસભામાં આમ આદમી પાર્ટીના 10 સાંસદો છે, જેમાંથી બે-તૃતીયાંશ, એટલે કે 7 અમારી સાથે છે. તેમના નામ રાઘવ ચઢ્ઢા સંદીપ પાઠક, રાજેન્દ્ર ગુપ્તા, વિક્રમ સાહની, સ્વાતિ માલીવાલ, હરભજન સિંહ અને અશોક મિત્તલ છે.

એસેટ મેનેજમેન્ટ સેક્ટરની મુખ્ય કંપની UTI Asset Management Companyએ કારોબારી વર્ષ 2025-26ના ચોથા ક્વાર્ટરના પરિણામ જાહેર કરી દીધા છે. આ ક્વાર્ટરમાં કંપનીના નફામાં ભારે ઘટાડો જોવા મળ્યો છે, જોકે કમાણીમાં સામાન્ય વૃદ્ધિ નોંધવામાં આવી છે. Q4માં તેનો ચોખ્ખો નફો વાર્ષિક આધાર પર 124 કરોડથી ઘટીને 33.7 કરોડ થઈ ગયો, જ્યારે, કંપનીની કૂલ કમાણી 316.9 કરોડથી વધીને 317 કરોડ થઈ ગઈ છે. UTI AMCના બોર્ડે રોકાણકારોને રાહત આપતા કારોબારી વર્ષ 31 માર્ચ 2026ના રોજ 40 રૂપિયા પ્રતિ ઈક્વિટી શેરનું ફાઈનલ ડિવિડન્ડ આપવાની ભલામણ કરી છે.

ભારત અને ઈરાન વચ્ચેના વ્યૂહાત્મક સંબંધોમાં એક મોટો વળાંક આવ્યો છે. સૂત્રોના જણાવ્યા અનુસાર, ભારત ઈરાનના ચાબહાર બંદરમાં પોતાની હિસ્સેદારી ઈરાનની જ એક સ્થાનિક કંપનીને વેચવાની તૈયારી કરી રહ્યું છે. આ નિર્ણય પાછળનું મુખ્ય કારણ અમેરિકા દ્વારા ઈરાન પર લાદવામાં આવેલા આકરા પ્રતિબંધો છે. ભારતની આ કામગીરીને મળેલી છૂટની મુદત 26 એપ્રિલ 2026ના રોજ પૂર્ણ થઈ રહી છે, જેને ધ્યાનમાં રાખીને ભારત સરકાર 'ઈન્ડિયા પોર્ટ્સ ગ્લોબલ ચાબહાર ફ્રી ઝોન'(IPGCFZ)માં પોતાની હિસ્સેદારી ઈરાની કંપનીને ટ્રાન્સફર કરવાનો પ્રસ્તાવ તૈયાર કરી રહી છે.

અમેરિકન પ્રમુખ ડોનાલ્ડ ટ્રમ્પ દ્વારા ભારતને 'નર્ક' કહેવા અંગે આપેલા નિવેદન પર વિવાદ વકર્યો છે. આ મુદ્દે મુંબઈ સ્થિત ઈરાની કોન્સ્યુલેટે ટ્રમ્પ પર વળતો પ્રહાર કર્યો છે અને તેમને ભારતની સુંદરતા જોવાની સલાહ આપી છે. ઈરાની કોન્સ્યુલેટે સોશિયલ મીડિયા પર 16 સેકન્ડનો એક વીડિયો પોસ્ટ કર્યો છે, જેમાં મહારાષ્ટ્રના બે વિરોધાભાસી અને સુંદર પાસાંઓ દર્શાવ્યા છે. એક તરફ મુંબઈની ગગનચુંબી ઇમારત અને હાઈવેની ચમક છે, તો બીજી તરફ પહાડો અને કુદરતી સૌંદર્યના દ્રશ્યો છે. આ પોસ્ટ સાથે ટ્રમ્પને 'કલ્ચરલ ડિટોક્સ' એટલે કે પોતાની વિચારધારા બદલવાની અને એકવાર ભારત આવીને જોવાની સલાહ આપવામાં આવી છે.

રાષ્ટ્રવાદી કોંગ્રેસ પાર્ટી (NCP)ના દિગ્ગજ નેતા અજિત પવારના વિમાન દુર્ઘટનામાં થયેલા દુ:ખદ મોતના મહિનાઓ બાદ હવે આ મામલે એક ચોંકાવનારો દાવો કરવામાં આવી રહ્યો છે. NCP નેતા અને રાજ્ય વિધાન પરિષદના સભ્ય અમોલ મિટકરીએ આરોપ લગાવ્યો છે કે બારામતીમાં અજિત પવાર વિરુદ્ધ 'કાળો જાદુ' અને 'અઘોરી પૂજા' કરવામાં આવી હતી. તમને જણાવી દઈએ કે 28 જાન્યુઆરીના રોજ બારામતીમાં થયેલા વિમાન ક્રેશમાં મહારાષ્ટ્રના તત્કાલીન ડેપ્યુટી CM અને અન્ય ચાર લોકોના મોત થઈ ગયા હતા. અજિત પવારને પ્રેમથી 'દાદા' કહેવામાં આવતા હતા.

ઉનાળુ વેકેશનમાં ટિકિટ વેઇટિંગને ધ્યાનમાં રાખી રેલવે વિભાગે ગાંધીધામ અને માલદાટાઉન વચ્ચે સ્પેશિયલ ટ્રેન દોડાવવાનો નિર્ણય કર્યો છે. આ ટ્રેન 25 એપ્રિલે ગાંધીધામથી રવાના થશે. વેકેશનમાં મુસાફરોની સંખ્યા વધતી હોવાથી આ ટ્રેન દોડાવાશે. રેલવે તંત્ર દ્વારા બુકિંગ વહેલી તકે કરાવી લેવા સૂચના અપાઈ છે. જરૂર પડ્યે અન્ય સ્પેશિયલ ટ્રેનોની જાહેરાત થઈ શકે છે. આ ટ્રેનથી મુસાફરોને સીધો ફાયદો થશે.

યુપીમાં 2027ની ચૂંટણી પહેલાં દૈનિક ભાસ્કરના સર્વેમાં ભાજપ 403માંથી 256 સીટો પર આગળ છે, જ્યારે સપા 135 સીટો પર મજબૂત છે. BJPના સાથી પક્ષોને નુકસાનની શક્યતા છે. સર્વેમાં સપાની સીટો વધતી દેખાય છે, ભાજપને 2 સીટોનું નુકસાન થઈ શકે છે. મંત્રીઓની 41 બેઠકોમાંથી 32 પર BJP પહેલી પસંદ છે. અપના દળ, RLD અને સુભાસપાની બેઠકો પર પણ ભાજપ પહેલી પસંદ છે.

ભૂતપૂર્વ આર્મી ચીફ એમ.એમ. નરવણેની આત્મકથા ‘ફોર સ્ટાર્સ ઓફ ડેસ્ટિની’ હાલ વિવાદમાં છે. ૨૦૨૦ના ચીન વિવાદ અને અગ્નિવીર યોજના અંગેના લખાણોને કારણે સંરક્ષણ મંત્રાલયે હજુ સુધી આ પુસ્તકના પ્રકાશનને મંજૂરી આપી નથી. રાહુલ ગાંધીએ સંસદમાં આ પુસ્તકની નકલ સાથે સરકાર પર નિશાન સાધતા મામલો ગરમાયો હતો. નરવણેએ સ્પષ્ટ કર્યું કે ચીન સામેના નિર્ણયોમાં સરકારનો પૂર્ણ ટેકો હતો, જ્યારે પ્રકાશક પેંગ્વિને પુસ્તક સત્તાવાર રીતે બજારમાં ન આવ્યું હોવાની સ્પષ્ટતા કરી છે.

PM મોદીએ કોલકાતામાં હુગલી નદીમાં નૌકાવિહાર કર્યો, નદીના ફોટોગ્રાફ્સ લીધા, વિદ્યાસાગર સેતુ અને હાવડા બ્રિજની ઝલક જોઈ. તેમણે X પર તસવીરો શેર કરી અને ગંગાને દરેક બંગાળી માટે ખાસ ગણાવી. PM એ નાવિકો સાથે મુલાકાત કરી, તેમજ પશ્ચિમ બંગાળના વિકાસ માટે પ્રતિબદ્ધતા દર્શાવી.

અમિત શાહે મમતાના ગુંડાઓને ચેતવણી આપી અને કોંગ્રેસે ચૂંટણી પંચની નોટિસને દુર્ભાવનાથી પ્રેરિત ગણાવી. કોંગ્રેસે કહ્યું કે આ મામલે મોડેલ કોડ ઓફ કન્ડક્ટ (MCC)નું ઉલ્લંઘન થયું નથી. જયરામ રમેશે ચૂંટણી કમિશનરને પત્ર લખી નોટિસ પર સવાલ ઉઠાવ્યા. પશ્ચિમ બંગાળની 152 બેઠકો પર 92.72% અને તમિલનાડુની તમામ 234 બેઠકો પર 85.14% મતદાન થયું.

ભારતએ માલદીવ્સને ₹30 Billion Currency Swap ની મદદ કરી. આર્થિક સંકટ સામે ઝઝૂમી રહેલા માલદીવ્સને ભારતે આશરે 400 મિલિયન ડૉલરની સહાય કરી છે. માલદીવ્સની નાણાકીય સ્થિરતા માટે આ પગલું મહત્વપૂર્ણ છે. ભારત અને માલદીવ્સ વચ્ચે આર્થિક સમજૂતી મજબૂત બની છે.

માર્ચમાં નીચી સપાટી બાદ એપ્રિલમાં મેન્યુફેક્ચરિંગ સેગમેન્ટની આગેવાનીમાં દેશની વેપાર પ્રવૃત્તિમાં રિકવરી જોવા મળી રહી છે. ઉત્પાદન અને વેચાણમાં વધારો થતાં એકંદર વેપાર પ્રવૃત્તિમાં સુધારો થયો છે. એપ્રિલ મહિનાનો HSBC સંયુક્ત PMI વધીને 58.30 થયો છે, જે માર્ચમાં 57 હતો.

HSBCએ ભારતીય ઇક્વિટીને ન્યુટ્રલથી અન્ડરવેઈટ કરી છે, જે એક મહિનામાં બીજું ડાઉનગ્રેડ છે. મધ્યપૂર્વના યુદ્ધને કારણે ઊર્જાના ભાવમાં વધારાથી ભારતીય કંપનીઓની earnings recovery ટકી શકશે કે કેમ તેની શંકા છે. યુદ્ધ પછી ક્રુડ તેલના ભાવમાં ઉછાળો આવ્યો છે, જે પ્રતિ બેરલ $100ને પાર કરી ગયો છે.

પશ્ચિમ બંગાળ વિધાનસભાની ચૂંટણીમાં ૧૫૨ બેઠકો પર મતદાન થયું હતું. શરૂઆતના તબક્કે મતદાન શારૂ રહ્યું હતું, પરંતુ બપોરની ગરમી વધતા મતદારોની સંખ્યા ઓછી થઈ હતી. પશ્ચિમ બંગાળમાં તમામ પક્ષોએ ખૂબ આક્રમકતાથી પ્રચાર કર્યો હતો. ચૂંટણી કમિશનના સબ સલામતના દાવા વચ્ચે ઘણી જગ્યાએ ચૂંટણી કમિશન નિષ્ફળ હોવાના પુરાવા મળ્યા હતા. કેટલાક સ્થળે ઇવીએમ બગડી જતા મતદાન અટકી ગયું હતું અને મતદારો પાછા ફર્યા હતા. 

અમેરિકા-ઈરાન સંઘર્ષની અસરથી ક્રૂડ ઓઇલની આયાતમાં ઘટાડો થયો છે. ફેબ્રુઆરીની સરખામણીએ માર્ચમાં આયાત લગભગ 13% ઘટી છે. હોર્મુઝ સ્ટ્રેટમાં તણાવને લીધે ગલ્ફ દેશોમાંથી તેલની આયાત 61% ઘટીને 11.8 લાખ બેરલ પ્રતિ દિવસ થઈ છે. આ ઘટાડો એનર્જી સપ્લાય પર અસર કરે છે.

ટેરિફ વિવાદો છતાં, અમેરિકામાં સ્માર્ટફોનની નિકાસ વધી છે. નાણાકીય વર્ષ 2025-26માં સ્માર્ટફોનના કારણે દેશની ઈલેક્ટ્રોનિક્સ નિકાસ 24% વધીને 47.96 અબજ ડોલર થઈ, જે અગાઉ 38.56 અબજ ડોલર હતી. Production Linked Incentive Scheme (PLI) થી નિકાસ વૃદ્ધિમાં મદદ મળી રહી છે એવું સરકારનું માનવું છે.

દેશના વિવિધ ભાગોમાં લૂનો પ્રકોપ વધતા યુપી, રાજસ્થાન અને મહારાષ્ટ્રના શહેરોમાં તાપમાન 44°C ને પાર પહોંચ્યું છે. રાજસ્થાનના શ્રીગંગાનગરમાં સૌથી વધુ 44.5°C પારો નોંધાયો છે. ભીષણ ગરમીના કારણે રાજસ્થાનમાં શાળાઓના સમયમાં ફેરફાર કરી સવારના 7.30 કરાયા છે અને મનરેગાના કામના કલાકો પણ બદલાયા છે. ઓડિશામાં પણ હીટવેવની ગંભીર અસરને જોતા કટક સહિતના જિલ્લાઓમાં શાળા-કોલેજોમાં રજાઓ લંબાવવામાં આવી છે. હવામાન વિભાગે આગામી દિવસોમાં પણ ગરમીનું જોર યથાવત રહેવાની આગાહી કરી છે.

ભારતમાં ટ્રાફિકની સમસ્યા માત્ર અપૂરતા રસ્તા કે વસ્તીની નથી, પરંતુ નાગરિક શિસ્તના અભાવની છે. વર્ષ 2023માં 1.73 લાખથી વધુ લોકોએ માર્ગ અકસ્માતમાં જીવ ગુમાવ્યા છે, જે અત્યંત ચિંતાજનક છે. નિયમો તોડવાને બહાદુરી માનવી, ખોટી ઓવરટેક કરવી અને વીઆઈપી કલ્ચરનું પ્રદર્શન અકસ્માતોનું મુખ્ય કારણ છે. રસ્તા પર અતિક્રમણ અને ધાર્મિક-સામાજિક પ્રસંગો માટે જાહેર માર્ગો રોકવા એ આપણી નબળી નાગરિકતા દર્શાવે છે. સાચા નાગરિક ધર્મનું પાલન અને ટ્રાફિક શિસ્ત જ ભારતને સુરક્ષિત બનાવી શકશે.

અમેરિકા-ઈરાન સંઘર્ષ અને હોર્મુઝ જળમાર્ગની નાકાબંધીને કારણે વિશ્વભરમાં ઊર્જા સંકટ સર્જાયું છે, જે ભારત માટે 'આફતને અવસરમાં' બદલવાની મોટી તક છે. ગલ્ફ દેશોમાં સપ્લાય ચેન ખોરવાતા ભારત ખાદ્ય ચીજો, દવાઓ અને આવશ્યક વસ્તુઓના મુખ્ય સપ્લાયર તરીકે ઉભરી શકે છે. ભારતની મજબૂત વિદેશ નીતિ અને ઈરાન તથા સાઉદી અરેબિયા જેવા દેશો સાથેના વ્યૂહાત્મક સંબંધો તેને વિશ્વસનીય ભાગીદાર બનાવે છે. આ કટોકટીમાં ભારત પોતાની નિકાસ ક્ષમતા દ્વારા વૈશ્વિક વેપારમાં મજબૂત પકડ જમાવી શકે તેમ છે.

બિહારમાં અમલી દારૂબંધીને કારણે દારૂના તસ્કરો દારૂની હેરાફેરી માટે અવનવા કિમીયા અજમાવી રહ્યા છે. અક્ષય અંતાણી જણાવે છે કે, હવે ઉનાળાની સીઝનમાં તરબૂચનો ઉપયોગ દારૂ છુપાવવા માટે કરવામાં આવી રહ્યો છે. તસ્કરો તરબૂચની અંદરનો ગર કાઢી નાખી, તેના પોલાણમાં દારૂના ટેટ્રાપેક સંતાડી દે છે અને ફરીથી ડગળી લગાવી તેને સીલ કરી દે છે. આમ, સામાન્ય દેખાતા તરબૂચના માધ્યમથી પોલીસની નજર ચૂકવીને ગેરકાયદેસર દારૂની હેરાફેરી કરવાનો પર્દાફાશ થયો છે.

કરોડો ખર્ચાયા છતાં મણિપુરની અશાંતિ ઠેરની ઠેર - પ્રસંગપટ- વિદેશના એજન્ટો તોફાનીઓને શસ્ત્રો અને પૈસા પૂરા પાડીને ભારતને ડામાડોળ કરવાનો પ્રયાસ કરે છેપાંચ દિવસના શટડાઉનના કારણે મણિપુરની અશાંતિ તરફ દેશનું ધ્યાન ખેંચાયું છે. ગઇ ૭ એપ્રિલે બિશનપુર જીલ્લામાં થયેલા વિસ્ફોટમાં એક પાંચ વર્ષના છોકરા અને  પાંચ માસની બાળકીનું મોત થતાં માંડ શાંત પડેલી સ્થિતિ ફરી પાછી સ્ફોટક બની ગઇ છે. કરોડો રૂપિયા શાંતિ પાછળ ખર્ચાયા હોવા છતાં સળગતું મણિપુર ઠેરનું ઠેર છે.

કેન્દ્ર- અમેરિકાએ યુદ્ધવિરામ લંબાવ્યો હોવા છતાં તંગદિલી વધી  ક્રૂડના ભાવ પ્રતિ બેરલ 70 થી વધીને 113 ડોલરે પહોંચ્યા. આંતરરાષ્ટ્રીય સ્તરે ક્રૂડ ઓઇલના ઊંચા ભાવ અને ઘરઆંગણે સ્થિર રહેલા ભાવના કારણે સરકારી ઓઇલ કંપનીઓને પેટ્રોલમાં પ્રતિ લિટર લગભગ ૨૦ રૂપિયાની અને ડીઝલમાં પ્રતિ લિટર રૂ. ૧૦૦ની ખોટ જઈ રહી છે. બંનેના ભાવ છેલ્લા ચાર વર્ષથી સ્થિર છે. ગુરુવારે સરકારે પાંચ રાજ્યોની વિધાનસભા ચૂંટણી પછી પેટ્રોલ-ડીઝલની ભાવ વધારવામાં આવશે તે વાત ફગાવી દીધી હતી.

મુંબઈ હાઈકોર્ટની નાગપુર બેન્ચે મહારાષ્ટ્ર પોલીસના સૂત્ર 'સદ્રક્ષણાય ખલનિગ્રહણાય'નો ઉલ્લેખ કરી મહત્વપૂર્ણ ચુકાદો આપ્યો છે. એક વકીલ અને નિવૃત્ત સૈનિકને જાહેરમાં ગેરકાયદે હથકડી પહેરાવી તેમની પ્રતિષ્ઠાને ઠેસ પહોંચાડવા બદલ કોર્ટે ₹૫૦,૦૦૦નું વળતર ચૂકવવાનો આદેશ કર્યો છે. બેન્ચે સ્પષ્ટ કર્યું કે હથકડીનો ઉપયોગ માત્ર ભાગી જવાની દહેશત હોય તેવા ખાસ કિસ્સામાં જ કરવો જોઈએ. સામાન્ય નાગરિકો સાથે આવું અપમાનજનક વર્તન બંધારણીય અધિકારોનું ઉલ્લંઘન છે, અને પોલીસે નાગરિકોના માન-સન્માનનું રક્ષણ કરવું અનિવાર્ય છે.

નેશનલ હાઇવે ઑથોરિટી ઓફ ઇન્ડિયા(NHAI)એ FASTag એન્યુઅલ પાસના નામે ચાલી રહેલા એક મોટા ફ્રોડ અંગે જાહેર જનતાને ચેતવણી આપી છે. આ કૌભાંડમાં ઠગ અસલી જેવી જ દેખાતી નકલી વેબસાઇટ્સ બનાવીને લોકોને છેતરી રહ્યા છે. આ નકલી પોર્ટલ્સ ગૂગલ સર્ચમાં ટોપ પર દેખાય તે માટે પેઇડ ઍડ્વર્ટાઇઝમેન્ટ અને સર્ચ એન્જિન ઓપ્ટિમાઇઝેશન જેવી યુક્તિઓનો ઉપયોગ કરવામાં આવે છે, જેના કારણે સામાન્ય યુઝર્સ આસાનીથી છેતરાઈ જાય છે. ઑથોરિટીએ સ્પષ્ટ કર્યું છે કે નાણાકીય નુકસાનથી બચવા માટે માત્ર વેરિફાઇડ ચેનલ્સનો જ ઉપયોગ કરવો જોઈએ.

પશ્ચિમ બંગાળ વિધાનસભા ચૂંટણીમાં પ્રથમ તબક્કાની 152 બેઠકો પર બમ્પર વોટિંગ થયું છે. બાકીની 142 બેઠકો પર 29 એપ્રિલે મતદાન થશે. પ્રથમ તબક્કામાં જનતા 1478 ઉમેદવારોનું ભાગ્ય નક્કી કરશે. બીજી તરફ તમિલનાડુની તમામ 234 બેઠકો પર સવારે સાત વાગ્યાથી જ મતદાન માટે લાંબી લાઈનો લાગી હતી. પશ્ચિમ બંગાળ અને તમિલનાડુમાં રેકોર્ડબ્રેક મતદાન થયું છે. સાંજે પાંચ વાગ્યા સુધીમાં તમિલનાડુમાં અંદાજે 82.24% મતદાન થયું છે. બંગાળમાં અંદાજે 89.93% મતદાન થયું છે.

પશ્ચિમ બંગાળમાં વિધાનસભા ચૂંટણીના પ્રથમ તબક્કાના મતદાન વચ્ચે પીએમ નરેન્દ્ર મોદીએ કૃષ્ણનગરમાં એક વિશાળ જનસભાને સંબોધિત કરી હતી. આ દરમિયાન તેમણે સત્તાધારી TMC પર આકરા પ્રહારો કરતા રાજ્યમાં 'પરિવર્તન'નો વિશ્વાસ વ્યક્ત કર્યો હતો. પીએમ મોદીએ તેમના સંબોધનમાં 'ઝાલમુરી'ના કિસ્સાનો ઉલ્લેખ કરતા કટાક્ષમાં કહ્યું કે, 'મેં બંગાળમાં ઝાલમુરી ખાધી હતી, પરંતુ એવું લાગે છે કે તેના મરચાંનો તીખો સ્વાદ ટીએમસીના નેતાઓને લાગ્યો છે.' તેમણે દાવો કર્યો હતો કે 4 મેના રોજ ભાજપની જીત નક્કી છે અને તે દિવસે બંગાળમાં મીઠાઈની સાથે ઝાલમુરી પણ વહેંચવામાં આવશે.

ઉત્તર પ્રદેશમાં આગામી વર્ષોમાં યોજાનારી વિધાનસભા ચૂંટણી માટે ભાજપે અત્યારથી જ કમર કસી લીધી છે. ભાજપના રાષ્ટ્રીય અધ્યક્ષ નીતિન નવીને સ્પષ્ટ કરી દીધું છે કે, વર્ષ 2027ની ચૂંટણી કોના નેતૃત્વમાં લડવામાં આવશે. એક ખાનગી ન્યૂઝ ચેનલને આપેલા ઇન્ટરવ્યુમાં નીતિન નવીને મુખ્યમંત્રી યોગી આદિત્યનાથના નામ પર મહોર મારતા ઉત્તર પ્રદેશમાં 'સત્તાની હેટ્રિક' લગાવવાનો દાવો કર્યો છે. ચૂંટણીમાં મુખ્યમંત્રીના ચહેરા અંગે પૂછવામાં આવેલા સવાલના જવાબમાં નીતિન નવીને જણાવ્યું હતું કે, યોગી આદિત્યનાથ હાલમાં મુખ્યમંત્રી છે અને તેમના નેતૃત્વમાં જ સરકાર ચાલી રહી છે. તેથી નિશ્ચિતપણે તેઓ જ અમારો ચહેરો હશે.

ગોલ્ડ સ્મગલિંગ કેસમાં ધરપકડ કરાયેલી કન્નડ ફિલ્મ અભિનેત્રી રાન્યા રાવ ઉર્ફે હર્ષવર્ધિની રાવ એક વર્ષ બાદ બેંગલુરુ સેન્ટ્રલ જેલમાંથી બહાર આવશે. DRI(ડિરેક્ટોરેટ ઓફ રેવન્યૂ ઇન્ટેલિજન્સ)ના સૂત્રોના જણાવ્યા અનુસાર, તેની અટકાયતની મુદત 22 એપ્રિલના રોજ પૂર્ણ થતા હવે તેની જેલમુક્તિનો માર્ગ મોકળો થયો છે. ઉલ્લેખનીય છે કે રાન્યા રાવ સસ્પેન્ડેડ DGP રેન્કના પોલીસ અધિકારી રામચંદ્ર રાવની સાવકી દીકરી છે. તપાસ દરમિયાન તેની પાસેથી વિશેષ રીતે તૈયાર કરેલા બોડી જેકેટમાં છુપાવેલું 14.213 કિલો સોનું મળી આવ્યું હતું, જેની કિંમત આશરે 12.56 કરોડ રૂપિયા હતી.

અમેરિકાના રાષ્ટ્રપ્રમુખ ડોનાલ્ડ ટ્રમ્પે સોશિયલ મીડિયા પર એક લાંબો અને આક્રમક પત્ર પોસ્ટ કરીને અમેરિકામાં વસતા ઇમિગ્રન્ટ્સ અને ભારત-ચીન જેવા દેશો પર આકરા પ્રહારો કર્યા છે. ટ્રમ્પે અમેરિકાની બર્થરાઈટ સિટિઝનશિપ (જન્મના આધારે નાગરિકતા) ની નીતિની આકરી ટીકા કરતા ભારત અને ચીન માટે હેલહોલ જેવા શબ્દો વાપર્યા છે. ટ્રમ્પે પોતાના પત્રમાં લખ્યું છે કે, "અહીં જન્મેલું બાળક તરત જ અમેરિકાનું નાગરિક બની જાય છે અને પછી તેઓ ચીન, ભારત કે પૃથ્વી પરના અન્ય કોઈ 'નરક' માંથી તેમના આખા પરિવારને અહીં બોલાવી લે છે."