વલસાડ જિલ્લામાં પશુઓને વધુ દૂધ આપવા માટે ઉપયોગમાં લેવાતા પ્રતિબંધિત ઇન્જેક્શનનો મોટો જથ્થો ઝડપાયો છે. વલસાડ ગ્રામ્ય પોલીસે પેટ્રોલિંગ દરમિયાન ઉત્તર પ્રદેશના એક શખ્સને 720 બોટલ ઇન્જેક્શન સાથે ઝડપી પાડ્યો હતો. આ કાર્યવાહીથી પશુપાલન ક્ષેત્રે ચાલતી ગેરકાયદેસર પ્રવૃત્તિનો પર્દાફાશ થયો છે. વલસાડ ગ્રામ્ય પોલીસની ટીમ મુંબઈ-અમદાવાદ સર્વિસ રોડ પર અતુલ ફર્સ્ટ ગેટ પાસે પેટ્રોલિંગ કરી રહી હતી. તે સમયે એક શંકાસ્પદ વ્યક્તિ મીણિયા થેલા સાથે નજરે પડ્યો હતો. પોલીસે તેને અટકાવીને તપાસ કરતા થેલામાંથી પ્રવાહી ભરેલી ઇન્જેક્શનની બોટલો મળી આવી હતી.