યુવાઓને ગેરમાર્ગે દોરી વિદેશી ઇન્જેક્શન અને દવા વેચનારને ક્રાઈમ બ્રાન્ચે ઝડપી પાડ્યો છે. રશિયા અને ઑસ્ટ્રિયાથી આયાત કરેલી સ્ટિરોઈડ ટેબ્લેટ અને ટેસ્ટોસ્ટેરોન હોર્મોનનાં ઇન્જેક્શન આરોપી ગેરકાયદે વેચતો હતો , જેમાં તાત્કાલિક બોડી બિલ્ડિંગ અને મસલ્સ ડેવલપ કરવાનો ભ્રામક પ્રચાર કરાતો હતો. આ દવા અત્યંત હાનિકારક હોવાનું તબીબોનું માનવું છે. પોલીસે 2.83 લાખનાં ઇન્જેક્શન-દવા જપ્ત કરી છે. ક્રાઈમ બ્રાન્ચના પીઆઇ આર.જી. જાડેજાને બાતમી મળી કે, મનુષ્ય જીવન માટે હાનિકારક અને ડોક્ટરના પ્રિસ્ક્રિપ્શન વગર ન વેચાતી દવા અને ઇન્જેક્શન ગેરકાયદે વેચાય છે. જેના આધારે પોલીસ માંજલપુર તુલસીધામ ચાર રસ્તા પાસે દેવપુષ્પ કોમ્પ્લેક્સમાં પહોંચી હતી અને સિદ્ધિ ન્યૂટ્રિશન નામની દુકાનમાં તપાસ હાથ ધરી હતી. જેમાં વિદેશથી આયાત કરેલી જુદી જુદી બ્રાન્ડની સ્ટિરોઈડ ટેબ્લેટ અને ટેસ્ટોસ્ટેરોન હોર્મોનનાં ઇન્જેક્શનનો જથ્થો મળ્યો હતો. જેથી દુકાનના સંચાલક અમીષ કોરી (જયરામનગર, મકરપુરા)ને ઝડપી દવાનાં બિલ માગ્યાં હતાં, પણ પુરાવા આપ્યા ન હતા. તપાસમાં સ્ટિરોઈડ ટેબ્લેટ અને ટેસ્ટોસ્ટેરોન હોર્મોનનાં ઇન્જેક્શન વિદેશથી લાવી વગર બિલે વેચાણ કરાતું હોવાનું જાણવા મળ્યું હતું. પોલીસે 100 ઉપરાંત સ્ટિરોઈડ ટેબ્લેટની સ્ટ્રીપ અને 90 ટેસ્ટોસ્ટેરોન હોર્મોનનાં ઇન્જેક્શન દવાના જથ્થાને જપ્ત કરીને વધુ કાર્યવાહી હાથ ધરી છે. દવાનો ઉપયોગ બંધ કરતા શરીર બેડોળ થાય છે આજકાલ સોશિયલ મીડિયા પર રાતોરાત બોડી બિલ્ડિંગ માટેની દવાઓનો પ્રચાર થાય છે. જેમાં સ્ટિરોઈડ ટેબ્લેટ અને ટેસ્ટોસ્ટેરોન હોર્મોનનાં ઇન્જેક્શન હોય છે. યુવક- યુવતીઓમાં તેનો આડેધડ ઉપયોગ થઈ રહ્યો છે. ડોક્ટરની સલાહ વગર આવી દવાઓ લઈ શકાય નહીં. આવી દવાઓનો ઉપયોગ બંધ કર્યા બાદ વ્યક્તિનો દેખાવ બગડી જાય છે. તેને લાંબા સમય સુધી લેવાથી હૃદયમાં ખરાબ કોલેસ્ટ્રોલ અને બીપી વધે છે. સાથે વધારે પડતા ઉપયોગથી રોગ પ્રતિકારક શક્તિ ઘટે છે, જે જીવલેણ પણ બની શકે છે.