અમદાવાદ સહિત ગુજરાતમાં આગામી દિવસોમાં આકરી ગરમી અને ભારે ઉકળાટ યથાવત રહેવાની હવામાન વિભાગે આગાહી કરી છે. શહેરમાં તાપમાન 40થી 43 ડિગ્રી સેલ્સિયસ આસપાસ રહેવાની શક્યતા છે, જ્યારે 15થી 20 કિમી પ્રતિ કલાકની ઝડપે પવન ફૂંકાઈ શકે છે. હવામાન વિભાગના જણાવ્યા અનુસાર આગામી 7 દિવસ સુધી વાતાવરણ મુખ્યત્વે સૂકું રહેશે, જોકે ત્યારબાદ તાપમાનમાં 2થી 3 ડિગ્રીનો સામાન્ય ઘટાડો થઈ શકે છે. રાજ્યમાં વેસ્ટર્ન ડિસ્ટર્બન્સ સક્રિય છે. બીજી તરફ ચોમાસાની સ્થિતિ અનુકૂળ બની રહી છે અને કેરળમાં 26 મે આસપાસ ચોમાસું બેસવાની શક્યતા વ્યક્ત કરવામાં આવી છે.

વડોદરા પોલીસે ગુજરાતમાં દારૂબંધીના કાયદાનો ભંગ કરતા મોટા રેકેટનો પર્દાફાશ કર્યો છે. વડોદરા પોલીસની LCB ઝોન-3 ટીમે જાંબુવા નજીક નેશનલ હાઈવે પરથી હરિયાણાથી દવાની આડમાં લાવવામાં આવેલો વિદેશી દારૂનો મોટો જથ્થો ઝડપી પાડ્યો હતો. પોલીસે 11 હજારથી વધુ દારૂની બોટલો સાથે હરિયાણાના રહેવાસી એક આરોપીની ધરપકડ કરી છે. તપાસ દરમિયાન ખુલ્યું કે દારૂ અન્ય વાહનોમાં ખસેડવાની તૈયારી ચાલી રહી હતી. પોલીસે વડોદરાના કુખ્યાત બુટલેગર સહિત ત્રણ આરોપીઓને વોન્ટેડ જાહેર કરીને વધુ તપાસ શરૂ કરી છે.

રાજકોટના જંગ્લેશ્વર વિસ્તારમાં 15 વર્ષની કિશોરી પર સામૂહિક દુષ્કર્મની ચોંકાવનારી ઘટના સામે આવી છે. સોશિયલ મીડિયા દ્વારા ઓળખાણ વધારી મુખ્ય આરોપી ડેવિલે કિશોરીને પ્રેમજાળમાં ફસાવી હતી. ત્યારબાદ અલગ-અલગ આરોપીઓએ હોટલ, ઘર અને ચાલતી કારમાં લઈ જઈ દુષ્કર્મ આચર્યું હોવાની ફરિયાદ નોંધાઈ છે. એક આરોપીએ પોતે પોલીસ હોવાનું ખોટું કહી ધમકીઓ આપી હતી, જ્યારે અન્યોએ છરી બતાવી જાનથી મારી નાખવાની ધમકી આપી ગેંગરેપ કર્યો હતો. ભક્તિનગર પોલીસે એક સગીરા સહિત કુલ 8 આરોપીઓ સામે BNS અને POCSO એક્ટ હેઠળ ગુનો નોંધી તપાસ શરૂ કરી છે.

ગુજરાતી ફિલ્મ લાલોને લઈને અભિનેત્રી નેહલ વડોલિયા અને અભિનેતા કરણ જોષી વચ્ચેનો વિવાદ ફરી ચર્ચામાં આવ્યો છે. નેહલે કરણ જોષી પર ઇન્સ્ટાગ્રામ પર અભદ્ર મેસેજ મોકલવાના આરોપ લગાવ્યા હતા, જ્યારે કરણે દાવો કર્યો કે પાંચ મહિના પહેલા તેનું સોશિયલ મીડિયા એકાઉન્ટ હેક થયું હતું. કરણ મુજબ હેકિંગ દરમિયાન અનેક લોકોને આવા મેસેજ મોકલાયા હતા. બીજી તરફ નેહલે સોશિયલ મીડિયા પર વીડિયો શેર કરીને કહ્યું કે મામલો દબાવવાનો પ્રયાસ થયો હતો. આ વિવાદ બાદ સોશિયલ મીડિયા અને ગુજરાતી ફિલ્મ ઇન્ડસ્ટ્રીમાં ભારે ચર્ચા અને વિવાદ સર્જાયો છે.

અમદાવાદ ગ્રામ્ય વિસ્તારના અગ્રણી ઔદ્યોગિક હબ ગણાતા સાણંદમાં ફરી એકવાર આગની મોટી દુર્ઘટના સામે આવી છે. સાણંદના મોરૈયા વિસ્તારમાં આવેલી કલર બનાવ કંપનીમાં અચાનક ભીષણ આગ ફાટી નીકળતાં સમગ્ર વિસ્તારમાં અફરાતફરી મચી ગઈ હતી. આગની તીવ્રતા એટલી વધારે હતી કે તેના ધુમાડાના ગોટેગોટા દૂર-દૂર સુધી જોવા મળ્યા હતા.

'વન નેશન-વન ઈલેક્શન' મુદ્દે સંયુક્ત સંસદીય સમિતિ (JPC) ટીમ ગુજરાત આવી રહી છે. પ્રિયંકા ગાંધી, સંબિત પાત્રા, બાંસુરી સ્વરાજ સહિત 39 સભ્યો ત્રણ દિવસીય પ્રવાસે છે. તેઓ મુખ્યમંત્રી, અધિકારીઓ અને રાજકીય પક્ષોના નેતાઓ સાથે ચર્ચા કરશે. ભાજપ સમર્થન કરે છે, કોંગ્રેસ ચિંતાઓ રજૂ કરશે. JPC અધ્યક્ષ પી.પી. ચૌધરી છે.

અમરેલી જિલ્લામાં પેટ્રોલ અને ડીઝલની ભારે અછત સર્જાતા વાહનચાલકો અને ખેડૂતો મુશ્કેલીમાં મુકાયા છે. સાવરકુંડલા, બાબરા અને વડીયા સહિતના વિસ્તારોમાં પેટ્રોલ પંપો પર લાંબી કતારો લાગી છે અને મોટાભાગના પંપોએ ‘નો સ્ટોક’ના બોર્ડ લગાવી દીધા છે. ખેડૂતોને 200 લીટર ડીઝલ આપવાના નિયમ હોવા છતાં માત્ર મર્યાદિત જથ્થો આપવામાં આવતા રોષ ફેલાયો છે. ખેતીની સીઝન દરમિયાન ડીઝલની અછતને કારણે ટ્રેક્ટર અને કૃષિ સાધનોનું કામ પ્રભાવિત થઈ રહ્યું છે. લોકો કલાકો સુધી રાહ જોઈ રહ્યા છે અને તંત્ર સામે ભારે અસંતોષ વ્યક્ત કરી રહ્યા છે.

NEET Paper Leak કૌભાંડ સામે NSUI દ્વારા ગાંધીનગરમાં શાંતિપૂર્ણ ઉપવાસનું આયોજન હતું. પરંતુ, આંદોલન શરૂ થાય તે પહેલાં જ પોલીસે NSUIના મુખ્ય કાર્યકરોની વિરમગામ ખાતે અટકાયત કરી લીધી. કાયદો-વ્યવસ્થા જાળવવા અને આંદોલનને ઉગ્ર બનતું અટકાવવા આ પગલું લેવાયું. કાર્યકરોની અટકાયત થતાં અને પોલીસ દમનના ડરથી વાલીઓ પણ જોડાઈ શક્યા ન હોવાથી હાલ પૂરતું આંદોલન સ્થગિત કરાયું.

જામનગરના જડેશ્વર પાર્ક વિસ્તારમાં મહાનગરપાલિકાના ડિમોલિશન સામે આહિર સમાજ એકજુથ થયો છે. વૃદ્ધ દંપતી નંદુબેન અને નારણભાઈ બેરા સાથે થયેલા અન્યાય સામે સમાજે રોષ વ્યક્ત કર્યો છે. તેમણે 'નંદુમાંનો આશરો કાયમ રહેશે' તેવો સંકલ્પ કર્યો છે અને જમીન માલિકીનો દાવો કરી કાનૂની લડતની તૈયારી દર્શાવી છે. પ્રતિકાત્મક બાંધકામ દ્વારા એકતાનો સંદેશ અપાયો.

અમદાવાદ-ભાવનગરની તમામ એસટી વોલ્વો બસનો રૂટ બદલી દેવાયો છે. અગાઉ અમદાવાદથી દરરોજ બાવળા, ધોળકા, ધંધુકા થઈને ભાવનગર સુધી વોલ્વોની 12 રાઉન્ડ ટ્રિપનું સંચાલન કરાતું હતું. તેની જગ્યાએ હવે આ તમામ ટ્રિપ ધોલેરા એક્સપ્રેસવે તરફ ડાયવર્ટ કરી દેવાઈ છે. એટલે હવે ભાવનગરની તમામ વોલ્વો બસ ધોલેરા એક્સપ્રેસવે થઈને જશે. જેથી અમદાવાદ-ભાવનગર વચ્ચેનો અંતર ઘટી જતા ભાડામાં પણ 14 રૂપિયાનો ઘટાડો કરાયો છે. 351 રૂપિયાના બદલે હવે મુસાફરોએ 337 રૂપિયા ટિકિટ ભાડું ચૂકવવાનું રહેશે.

ભરૂચના ભાજપ સાંસદ મનસુખ વસાવા દેડિયાપાડામાં પોતાની પાર્ટીના સ્થાનિક હોદ્દેદારો પર જાહેરમાં આકરા થયા. તેમણે જિલ્લા ભાજપ પ્રમુખ અને મહામંત્રી પર કાર્યકર્તાઓને ડરાવવાનો અને યોજનાઓ લોકો સુધી ન પહોંચાડવાનો આરોપ લગાવ્યો. તેમણે કહ્યું કે, 'ચૈતર વસાવા ડરાવે એ બરાબર, પણ ભાજપના નેતાઓ કેમ ડરાવે છે?' આ વીડિયો વાયરલ થતાં રાજકારણમાં ગરમાવો આવી ગયો છે.

અમદાવાદ શહેર અને ગ્રામ્ય વિસ્તારોમાં ડ્રોપઆઉટ બાળકોને ફરી શિક્ષણ પ્રવાહમાં લાવવા માટે હાથ ધરાયેલ મહાસર્વે અંતિમ તબક્કામાં પહોંચ્યો છે. કુલ 83 હજારથી વધુ બાળકોના સર્વેમાં અત્યાર સુધી 9432 બાળકોને ફરી શાળામાં દાખલ કરવામાં આવ્યા છે. જોકે 26662 કેસોમાં વાલીઓએ બાળકોને શિક્ષણ આપવાનો ઇનકાર કર્યો છે, જે ચિંતાજનક બાબત છે. શહેર અને ગ્રામ્ય વિસ્તારમાં હજુ પણ હજારો બાળકો અનટ્રેસેબલ અથવા સ્થળાંતરિત હોવાનું સામે આવ્યું છે. તંત્ર દ્વારા વર્ષ 2025-26 માટે વિશેષ અભિયાન ચલાવી ડ્રોપઆઉટ રેશિયો ઘટાડવા અને વધુ બાળકોને ફરી શાળામાં જોડવાના પ્રયાસો કરવામાં આવી રહ્યા છે.

રાજકોટના જાગનાથ પ્લોટમાં ગઈકાલે બે મોટરસાયકલ વચ્ચે ગમખ્વાર અકસ્માત સર્જાયો. આ ઘટના CCTVમાં કેદ થઈ ગઈ છે, જેમાં બંને બાઇક સવારો રોડ પર ફંગોળાયા હતા. સદનસીબે કોઈ જાનહાનિ નથી, પરંતુ વાહનચાલકોને ઇજાઓ પહોંચી છે. રહીશોએ અકસ્માતો રોકવા સ્પીડ બ્રેકર મૂકવા મનપાને રજૂઆત કરી છે.

ગુજરાતમાં ગરમીથી રાહત મળવાની આશા છે. આજથી તાપમાનમાં 2થી 3 ડીગ્રીનો ઘટાડો નોંધાશે. અમદાવાદમાં મે મહિનાની ગરમીએ છેલ્લા 5 વર્ષનો રેકોર્ડ તોડ્યો છે. રાજ્યમાં હીટવેવ અંગે કોઈ એલર્ટ નથી, પણ દરિયાકાંઠે ગરમ અને ભેજવાળા પવન ફૂંકાશે. અમદાવાદ 43.7°C સાથે સૌથી ગરમ રહ્યું.

મોરબી માળિયા હાઇવે પર રવિરાજ ચોકડી પાસે એલસીબી ટીમે દારૂ ભરેલી રિક્ષા ઝડપી પાડી. જુદી જુદી બ્રાન્ડની 2448 બોટલ દારૂ, રિક્ષા અને મોબાઈલ ફોન સહિત 5.88 લાખનો મુદ્દામાલ જપ્ત. સમીરશા ઉર્ફે ટીનોની ધરપકડ, અવેશભાઈ અને સલીમભાઈના નામ પણ ખુલ્યા. ફરાર બે આરોપીઓને પકડવા તપાસ ચાલુ.

અટલાદરા, વડોદરામાં માધવનગર સોસાયટીના લિફ્ટ રૂમમાંથી યુવકનો ડી કમ્પોઝ મૃતદેહ મળ્યો. લિફ્ટ મેન્ટેનન્સ દરમિયાન વીજ કરંટ લાગતા મોત થયું. પરિવાર બે દિવસથી શોધતો હતો. ફાયરબ્રિગેડે ભારે જહેમત બાદ મૃતદેહ બહાર કાઢી પોલીસને સોંપ્યો. મૃતક વિજય અમરીશભાઈ સોલંકી, પરણિત અને બે સંતાનોના પિતા હતા. GEBની મદદથી ઇલેક્ટ્રિક કનેક્શન કટ કરાવી કાર્યવાહી કરાઈ.

ડાંગના પૂર્વ પટ્ટીના જંગલમાં દાવાનળ ફાટી નીકળ્યો. સૂકા પાંદડા અને પવનથી આગ પ્રસરી, મોટા વિસ્તારને ઝપેટમાં લીધો. સ્થાનિકો અને વનકર્મીઓએ સાથે મળી ઝાડના ડાખરા વડે આગ બુઝાવી. આધુનિક સાધનોના અભાવે પરંપરાગત પદ્ધતિ અપનાવી, ભારે જહેમત બાદ આગ પર કાબૂ મેળવ્યો.

સુરતમાં સાઈદર્શન માર્કેટના વેપારી નિતેશ અગ્રવાલે દલાલો સાથે મળી 19 વેપારીઓ પાસેથી સાડી, એમ્બ્રોઇડરી, ડાયમંડ સ્ટોન વર્ક અને સિલાઈનો માલ પડાવી લીધો. તેણે 48.06 લાખનું એમ્બ્રોઈડરી જોબવર્ક કરાવી પેમેન્ટના વાયદા કર્યા. દુકાન બંધ કરી મોબાઈલ સ્વિચ ઓફ કરી રફુચક્કર થઈ જતા વેપારીઓના 1.41 કરોડ રૂપિયા સલવાયા. અમરોલી પોલીસે ગુનો નોંધી તપાસ હાથ ધરી છે.

પૂજ્ય ડૉ. નિરંજનમુનિજી અને પૂજ્ય ચેતનમુનિજી મુંબઈ ચાતુર્માસ પૂર્ણ કરી લીંબડી ગુરુગાદી પર પરત ફર્યા. સુરેન્દ્રનગરના પાંચ શ્રાવકોએ લીંબડી સુધી પદયાત્રા કરી ગુરુભક્તિ વ્યક્ત કરી, જેની જૈન સમાજમાં પ્રશંસા થઈ.

જામનગર ડેન્ટલ કોલેજમાં કરોડો રૂપિયાનું નાણાકીય કૌભાંડ સામે આવ્યું છે. એક કર્મચારીએ સરકારી નાણાં અંગત ખાતામાં ટ્રાન્સફર કર્યા. ડીન ડો. નયના પટેલની ફરિયાદ પર સીટી 'બી' ડિવિઝન પોલીસ તપાસ કરી રહી છે. DYSP અને PI સ્ટાફ સહિત ઉચ્ચ અધિકારીઓ આ કેસની ઊંડાણપૂર્વક તપાસ કરી રહ્યા છે, શંકાસ્પદ કર્મચારીની પૂછપરછ અને બેંક સ્ટેટમેન્ટ્સ ચકાસવામાં આવી રહ્યા છે.

2008ના ચકચારી હત્યાકેસમાં પુરાવાનો નાશ કરવા બદલ બારડોલીના તત્કાલીન PI અને પોલીસ કોન્સ્ટેબલને એક વર્ષની કેદ અને ₹10,000 દંડ ફટકારાયો. કોર્ટે ફરજમાં બેદરકારી બદલ આ સજા ફરમાવી. ASIનું મૃત્યુ થયું છે.

ભાવનગર LCBએ ડ્રોન કેમેરાની મદદથી મોતીતળાવ પાસે જુગાર રમતા 6 શખ્સોને રંગેહાથ ઝડપી લીધા. તેમની પાસેથી ₹36,700 રોકડ, mobile ફોન અને જુગાર રમવાના સાધનો જપ્ત કરાયા. તમામ વિરુદ્ધ જુગારધારા હેઠળ ગુનો નોંધી આગળની કાર્યવાહી માટે પોલીસ મથકે સોંપાયા.

ગુજરાતમાં ગરમીથી રાહત મળવાના સંકેત છે. હવામાન વિભાગની આગાહી મુજબ, આજથી તાપમાનમાં એકથી બે ડિગ્રીનો ઘટાડો થશે. પવનોની દિશા બદલાતા રાહત મળશે. સૌરાષ્ટ્ર-કચ્છમાં ગરમીનું મોજુ ફરી વળ્યું છે, અને આવતીકાલથી તાપમાનમાં બે ડિગ્રીનો ઘટાડો થવાની શક્યતા છે. અમરેલી, સુરેન્દ્રનગર, રાજકોટમાં ગરમીનો પારો 42-43 ડિગ્રીએ પહોંચ્યો હતો. સુરેન્દ્રનગરમાં સર્વાધિક 43.3 ડિગ્રી તાપમાન નોંધાયું. સાયક્લોનિક સર્ક્યુલેશન સક્રિય થતાં ચોમાસા માટે સ્થિતિ સાનુકૂળ બની રહી છે, જેનાથી આગામી દિવસોમાં પ્રિ-મોન્સૂન એક્ટિવિટી જોર પકડી શકે છે.

મહેસાણાના દીતાસણ ગામ પંચાયતના તલાટી કમ મંત્રી પર વિધવા પેન્શન બાબતે પૂછપરછ કરવા આવેલા યુવકે 10 મિનિટ બેસવા કહેતાં ઉશ્કેરાઈ ગાડીના કાચ તોડી નાખ્યા. ત્યારબાદ તલાટી અને સ્ટાફને જાનથી મારી નાખવાની ધમકી આપી. આ અંગે લાઘણજ પોલીસ મથકમાં ફરિયાદ નોંધાઈ છે.

પાટણ નગરપાલિકાએ ઐતિહાસિક પિતાંબર તળાવ ફરતે થયેલા 104 ગેરકાયદેસર દબાણોને ચોમાસા પૂર્વે 15 દિવસમાં હટાવવા નોટિસ ફટકારી છે. ગંદા પાણી અને પૂરની સંભવિત સ્થિતિને ધ્યાનમાં રાખીને, તંત્રએ કડક પગલાં લીધા છે. દબાણકર્તાઓએ 15 દિવસમાં સ્થળાંતર કરવું પડશે, અન્યથા બુલડોઝર ફેરવાશે.

છૂટાછેડા લીધેલ મહિલાને આરોપી સંજય વણોલ દ્વારા પીછો કરવા, ગંદા ઇશારા, શારીરિક સંબંધ માટે દબાણ, અને ઝઘડામાં છેડતી. આરોપીએ મહિલા અને તેની 10 વર્ષની પુત્રી પર એસિડ ફેંકવાની ધમકી આપી. વાસણા પોલીસ સ્ટેશનમાં IPC કલમો હેઠળ ગુનો નોંધાયો. મેટ્રો કોર્ટે 2 વર્ષની કેદ અને 15 હજાર રૂપિયાનો દંડ ફટકાર્યો.

સ્થાનિક સ્વરાજ્યની ચૂંટણીના પરિણામને ત્રણ સપ્તાહનો સમય વીત્યો છે ત્યારે હજુય નગરપાલિકા અને મ્યુનિસિપલ કોર્પોરેશનમાં ભાજપ હજુ મેયર, ડેપ્યુટી મેયર, સ્ટેન્ડિંગ કમિટીના ચેરમેનની પસંદગી કરી શક્યું નથી. નવા પદાધિકારીઓની પસંદગીને લઈને ભાજપમાં મથામણ જામી છે. એટલું જ નહીં, મેયર સહિતના પદાધિકારીઓના નામની સત્તાવાર જાહેરાત માટે હજુ બે-ચાર દિવસની રાહ જોવી પડે તેમ છે. ચૂંટણીમાં ભાજપનો દબદબોસ્થાનિક સ્વરાજ્યની ચૂંટણીમાં ભાજપે જોરદાર દેખાવ કર્યો છે.

વન નેશન વન ઈલેક્શન માટે બંધારણીય સુધારાનો અભ્યાસ કરતી JPC, કર્ણાટકથી આવીને ગુજરાતમાં ત્રણ દિવસ રોકાશે. તેઓ રાજ્યના મુખ્ય સચિવ, પોલીસ વડા, CM ભૂપેન્દ્ર પટેલ, વિધાનસભાના અધ્યક્ષ, રાજકીય આગેવાનો, કાયદાવિદો અને પત્રકારો સાથે ચર્ચા કરશે.

આજે અસારવા-સાબરમતી વચ્ચે ટ્રેક કામગીરી છે. આ કારણે, મેમુ ટ્રેનો નરોડા સુધી જશે/આવશે. ટ્રેન 69246, 69243, 69252 બદલાયા છે. કાનપુર સ્પેશિયલ (01906) 2 કલાક મોડી, સવારે 10:55 વાગ્યે ઉપડશે. મુસાફરોને નોંધ લેવા વિનંતી.

દેશભરના દવાના વેપારીઓના અસ્તિત્વ અને જન આરોગ્યની સુરક્ષા માટે આગામી તા.૨૦ મે ના રોજ રાષ્ટ્રવ્યાપી બંધનું એલાન અપાયુ છે. ઓનલાઈન ફાર્મસીની અનિયંત્રીત કામગીરી અને શોષણકારી ભાવની નીતિ સામે રસ્તા પર ભાવનગર અને બોટાદ જિલ્લાના કેમીસ્ટસ રસ્તા પર  ઉતરશે. ગેરકાયદેસર ઈ-ફાર્મસી અને ડીપ ડિસ્કાઉન્ટના કારણે ૫ કરોડ આશ્રિતોની રોજીરોટી પર સંકટ છવાઈ જવા પામેલ છે.