SMCની કાર્યવાહીને લઈને જિલ્લા પોલીસવડા ગીરીશ પંડ્યા દ્વારા PI આઈ.બી.વલવી ચોટીલા પોસ્ટે, UHC છગનભાઈ માયાભાઈ ગમારા, APC હિતેશભાઈ ગોરધનભાઈ, UPC ભરતભાઇ રણુભાઇ, UPC રવિરાજ મેરૂભાઇ ખાચર અને UPC હરેશભાઈ શાંતુભાઈ ખાવડ ચોટીલા પોલીસ સ્ટેશનને સસ્પેન્ડ કરવામાં આવ્યાં છે. પોલીસવડાની કાર્યવાહીથી પોલીસ બેડામાં ખળભળાટ મચી જવા પામ્યો છે.

Pharmacy council of india(PCI) ના અધ્યક્ષ મોન્ટુ પટેલના દિલ્હી અને અમદાવાદ સ્થિત ઝુંડાલ બંગલોમાં CBIના દરોડા પાડ્યા. ૫૦૦૦ હજાર કરોડ રૂપિયાનો ભ્રષ્ટાચાર કરીને મોન્ટુ પટેલ ફરાર. મોન્ટુ પટેલના અંડરમાં દેશની ૧૨૦૦૦ ફાર્મસી કોલેજો આવે છે. મોન્ટુ પટેલ ચાર વર્ષ પહેલા જ આ કાઉન્સિલના અધ્યક્ષ બન્યા હતા. તપાસકર્તાઓએ ખુલાસો કર્યો કે ગુજરાત પબ્લિક સર્વિસ કમિશન (GPSC) સિસ્ટમમાં નકલી ઇનવર્ડ નંબરો, જૂની તારીખની એન્ટ્રીઓ અને ચેડાં કરેલી ફાઇલોનો ઉપયોગ મોન્ટુ પટેલ અને તેમના સહયોગીઓને PCI માં વરિષ્ઠ હોદ્દાઓ પર બઢતી આપવા માટે કરવામાં આવ્યો હતો. નોંધનીય વાત એ છે કે મોન્ટુ પટેલ ભાજપના યુવા મોરચા સાથે સંકળાયેલા છે.

2018 માં, હસીન જહાંએ મોહમ્મદ શમી પર ઘરેલુ હિંસા, દહેજ ઉત્પીડન અને મેચ ફિક્સિંગનો આરોપ લગાવ્યો હતો. કોલકાતા હાઈકોર્ટે ભારતીય ફાસ્ટ બોલર મોહમ્મદ શમીને તેની અલગ રહેતી પત્ની હસીન જહાં અને પુત્રીને દર મહિને ₹4 લાખ ચૂકવવાનો આદેશ આપ્યો છે. જસ્ટિસ અજોય કુમાર મુખર્જીની બેન્ચે હસીન જહાં દ્વારા દાખલ કરવામાં આવેલી અરજી પર આ આદેશ આપ્યો હતો અને ભારતીય ક્રિકેટરને તેની પત્નીને ₹1.5 લાખ અને તેની પુત્રીને ₹2.5 લાખ માસિક ચૂકવવાનો નિર્દેશ આપ્યો છે.

IPL 2025માં રોયલ ચેલેન્જર્સ બેંગલુરુની જીતની ઉજવણી દરમિયાન બેંગલુરુમાં થયેલી નાસભાગમાં 11 લોકોના મોત થયા હતા. આ મામલે સેન્ટ્રલ એડમિનિસ્ટ્રેટિવ ટ્રિબ્યુનલે (CAT) RCB ને જવાબદાર ઠેરવ્યું છે. CATએ કહ્યું કે, ‘આરસીબીએ પોલીસની મંજૂરી વિના સોશિયલ મીડિયા પર વિક્ટ્રી પરેડ માટે આમંત્રણ પોસ્ટ કર્યું હતું. જેના કારણે મોટી ભીડ એકઠી થઈ ગઈ હતી અને પોલીસ પાસે સુરક્ષા વ્યવસ્થા કરવા માટે પૂરતો સમય નહોતો. પોલીસ માત્ર 12 કલાકમાં સંપૂર્ણ વ્યવસ્થા કરે તેવી અપેક્ષા રાખી શકાય નહીં. પોલીસકર્મીઓ પણ માણસ છે, તે ભગવાન કે જાદુગર નથી કે, એક જ વારમાં બધી વ્યવસ્થા કરી શકે.

પંચમહાલના હાલોલ નજીક તાજપુરા ગામ પાસે બાઈક અને એક્ટિવા વચ્ચે અકસ્માતમાં બે લોકોના મોત થયા અને એક વ્યક્તિ ઈજાગ્રસ્ત થયો. મોડી રાત્રે બનેલી આ ઘટનામાં, એક્ટિવા પર સવાર દંપતીનું ઘટનાસ્થળે જ મોત થયું. સ્થાનિકોએ પોલીસને જાણ કરી, અને પોલીસે 108 ambulance દ્વારા ઈજાગ્રસ્તોને હોસ્પિટલ ખસેડ્યા. પ્રાથમિક તપાસમાં જાણવા મળ્યું કે પુરઝડપે આવતા બાઈક ચાલકે એક્ટિવાને ટક્કર મારી હતી. પોલીસે CCTV ફૂટેજ તપાસીને વધુ તપાસ હાથ ધરી છે અને કાયદેસરની કાર્યવાહી કરશે. મૃત્યુ પામનાર દંપતી તાજપુરાના રહેવાસી હતા.

QUAD દેશો (ભારત, અમેરિકા, જાપાન, ઓસ્ટ્રેલિયા) ના વિદેશ મંત્રીઓની વોશિંગ્ટન ડીસીમાં બેઠક યોજાઈ હતી. જેમાં 22 એપ્રિલે જમ્મુ કાશ્મીરના પહલગામમાં થયેલા આતંકી હુમલાની સખત નિંદા કરવામાં આવી હતી, જેમાં 26 નિર્દોષ લોકો માર્યા ગયા હતા. QUAD દેશોએ આતંકવાદી હુમલાના આયોજકોને ન્યાયના કઠેડામાં ધકેલવાની વાત કરી હતી અને સરહદ પારના આતંકવાદ સહિત તમામ પ્રકારની હિંસાનો વિરોધ કર્યો હતો. તેઓએ UN ના સભ્ય દેશોને તપાસમાં સહયોગ કરવા અપીલ કરી હતી. QUAD એ ઇન્ડો પેસિફિક ક્ષેત્રમાં સ્વતંત્રતા અને કાયદાના શાસન માટે પ્રતિબદ્ધતા દર્શાવી હતી.

ભારતીય ક્રિકેટ ટીમ ના પૂર્વ કેપ્ટન મહેન્દ્ર સિંહ ધોનીએ ‘કેપ્ટન કૂલ’ નામે ટ્રેડમાર્ક રજીસ્ટર કરાવવા માટે રજિસ્ટ્રી પોર્ટલ પર અરજી કરી છે. ધોનીએ આ ટ્રેડમાર્ક ખાસ કરીને રમતગમત તાલીમ, તાલીમ માટેની સુવિધાઓ અને રમતગમત કોચિંગ સેવાઓ માટે નોંધાવ્યો છે. ધોનીને દુનિયાભરમાં તેમના શાંત સ્વભાવ અને કુશળ નેતૃત્વ માટે ઓળખવામાં આવે છે, અને ‘કેપ્ટન કૂલ’ નામ તે માટે ખૂબ લોકપ્રિય છે. હવે આ નામધારી સેવાઓ ધોનીના બ્રાન્ડ સાથે સાંકળાયેલી રહેશે. રમતગમત ક્ષેત્રે તેમના અનુભવ અને લોકપ્રિયતાને ધ્યાનમાં રાખીને આ ટ્રેડમાર્ક વ્યવસાયિક રીતે મહત્વપૂર્ણ બની રહેશે. આનાથી તેમની બ્રાન્ડ વેલ્યુમાં પણ વધારો થશે.

બનાસકાંઠા જિલ્લામાં વરસાદથી ખેડૂતોને મોટું નુકસાન થયું છે. ઉનાળામાં કરેલ બાજરી અને મગફળીનું વાવેતર લેવાના સમયે વરસાદ પડતા પાક બગડી ગયો છે. મગફળીનો તૈયાર પાક નુકસાનીમાં ગયો છે. ઘાસ પણ બગડતા પશુઓને નિભાવવા મુશ્કેલ બન્યા છે. ખેડૂતોએ મોંઘા બિયારણો લાવી મગફળીનું વાવેતર કર્યું હતું, પરંતુ વરસાદથી તે પાક પણ બગડી ગયો. ખેડૂતો માગ કરી રહ્યા છે કે સરકાર દ્વારા જે ખેડૂતોને નુકસાન થયું છે તેમને વળતર ચૂકવવામાં આવે. નહિંતર, આ અણધારી કુદરતી આફતને કારણે તેમને ભારે આર્થિક નુકસાન થશે.

રશિયાની રાજધાની મોસ્કોના કોલોમ્ના જિલ્લામાં યાક-18T ટ્રેનર વિમાન ક્રેશ થયું, જેમાં તમામ 4 લોકોના કરુણ મોત નિપજ્યા છે. વિમાન એરોબેટિક્સ અભ્યાસ દરમિયાન નિયંત્રણ બહાર થઇ ગયું હતુ. અકસ્માતનું મુખ્ય કારણ એન્જિન ફેઇલ્યોર અને આગ હોવાનું મનાઇ રહ્યું છે. વિમાન જમીન પર પટકાયું અને તરત જ આગ લાગી હતી. વિમાનને ઉડાન માટે સત્તાવાર પરવાનગી ન હતી, જેના આધારે મોસ્કો પ્રોસિક્યુટર ઓફિસે તપાસ શરૂ કરી છે. વિમાનમાં ક્રૂ મેમ્બર્સ અને તાલીમાર્થી પાઇલટ્સ સવાર હતા, અને દુર્ઘટનામાં કોઈ જમીન પર નુકસાન થયું નથી. યાક-18T વિમાનનો ઉપયોગ પૂર્વ સોવિયેત દેશોમાં નાગરિક પાઇલટ તાલીમ માટે થાય છે.

ભરૂચ જિલ્લાના આમોદ, જંબુસર અને હાંસોટ તાલુકાના 56 ગામોમાં રૂ. 7.30 કરોડના મનરેગા કૌભાંડમાં તાજેતરમાં મહત્ત્વપૂર્ણ કાર્યવાહી થઈ છે. 26 જૂને કોંગ્રેસના ઉપપ્રમુખ હીરા જોટવાને ગીર સોમનાથથી અને 27 જૂને તેમના પુત્ર દિગ્વિજય જોટવાને ભરૂચ એલસીબી દ્વારા ધરપકડ કરવામાં આવી છે. આ સાથે હાંસોટ તાલુકા પંચાયતના ઓપરેટર રાજેશ ટેલરની પણ ધરપકડ થઈ છે. પોલીસના જણાવ્યા અનુસાર, હીરા જોટવા અને તેમના પરિવારજનોના ખાતામાં ખોટા જોબકાર્ડ અને મટીરીયલ વિના રકમ ટ્રાન્સફર કરાઈ હતી. હીરા જોટવાના નામે જલારામ અને મુરલીધર એન્ટરપ્રાઇઝ નામની એજન્સીઓ મનરેગાનું કામ સંભાળતી હતી. દિગ્વિજય જોટવા તાજેતરમાં જ સુપાસી ગ્રામ પંચાયતના સરપંચ તરીકે ચૂંટાયા હતા, અને બે દિવસ પહેલાં જ તેઓએ વિજયની ઉજવણી પણ કરી હતી. આરોપીઓ સામે કોર્ટમાં રજૂઆત બાદ છ દિવસના રિમાન્ડ મંજૂર કરાયા છે.

આમ આદમી પાર્ટી (AAP) સરકારમાં મંત્રી રહેલા સત્યેન્દ્ર જૈન અને સૌરભ ભારદ્વાજ સામે ભ્રષ્ટાચાર વિરોધી બ્યુરોએ(ACB) કેસ નોંધ્યો છે. દિલ્હીમાં ૫૫૯૦ કરોડ રૂપિયાના હોસ્પિટલ બાંધકામ કેસમાં આ કાર્યવાહી કરવામાં આવી છે. ભાજપના નેતા અને વિધાનસભા અધ્યક્ષ વિજેન્દ્ર ગુપ્તાની ફરિયાદ બાદ આ તપાસ શરૂ કરવામાં આવી હતી, જેમાં અનિયમિતતાઓ, મંજૂરી વિના બાંધકામ અને પૈસાનો દુરુપયોગ જેવા મુદ્દાઓનો સમાવેશ કરવામા આવ્યો છે. ૨૦૧૮-૧૯માં, દિલ્હી સરકારે ૨૪ હોસ્પિટલ પ્રોજેક્ટ્સ (૧૧ નવી હોસ્પિટલો અને ૧૩ જૂની હોસ્પિટલોનું વિસ્તરણ) માટે ૫૫૯૦ કરોડ રૂપિયા મંજૂર કર્યા હતા.

ચંદીગઢ થી લખનૌ જતી ઈન્ડિગો ફ્લાઈટ નંબર 6E146 ટેકનિકલ ખામીના કારણે કેન્સલ થઈ છે. ફ્લાઈટ સવારે 8 વાગ્યે ચંદીગઢથી લખનૌ માટે ઉડવાની હતી, પરંતુ ટેક ઓફ સમયે ટેકનિકલ ખામી આવતાં તેને રોકવી પડી. અમદાવાદમાં પ્લેન ક્રેશની ઘટના પછી, જ્યાં 241 લોકોના મૃત્યુ થયા હતા, ફ્લાઈટ્સમાં વધુ સાવચેતી અપનાવવામાં આવે છે. આ ઘટનાએ લોકોમાં વિમાન મુસાફરીનો વિનાશકારક ડર ઉભો કર્યો છે. યાત્રીઓ હવે સલામતી મુદ્દે વધારે જાગૃત બન્યા છે અને પ્રત્યેક ઉડાન પહેલા ચકાસણી જોરદાર બનાવવામાં આવી છે.

ગોધરા મામલતર કચેરીમાં લાંચ લેતાં ઝડપાયેલા નાયબ મામલતદારની ચાર્જશીટ બાદની રેગ્યુલર જામીન અરજી પંચમહાલ જિલ્લાની સ્પેશયલ એ.સી.બી.કોર્ટ દ્વારા ના મંજુર કરી હતી. નાયબ મામલતદાર મોહમંદ નઇમે રૂા. અઢી લાખની લાંચ માગી, જે અંતે રૂ 1 લાખનો સોદો થયો. એસીબી દ્વારા લાંચનું છટકું ગોઠવાઈ, જેમાં એક લાખની લાંચ આઉટ સોર્સ સેવક ગણપતભાઇ પટેલે સ્વીકારી ઝડપાયા. દાહોદ એસીબીની તપાસમાં બંને આરોપીઓને રિમાન્ડ મેળવી જયુડિશિયલ કસ્ટડીમાં મોકલવામાં આવ્યા.

દાહોદ જિલ્લાના દેવગઢ બારીઆ અને ધાનપુર તાલુકામાં મનરેગા યોજનાના ગેરરીતિ મામલે એજન્સીઓ અને સરકારી અધિકારીઓ સામે પોલીસ ફરિયાદ નોંધાઈ હતી. તપાસ દરમ્યાન કામ અપૂર્ણ હોવા છતાં ખોટા પુરાવા રજૂ કરીને પૂર્ણ પેમેન્ટ આપવામાં આવ્યું હોવાનું આવ્યું હતું. આમાં કરાર આધારિત કર્મચારીઓ સહિત અનેકના નામ આવ્યાં, જેમાં ડીઆરડીએના તત્કાલીન ડીડીપીસી હામીદ આલમને દાહોદ પોલીસે અટકાયત કરી હતી. ચાર દિવસના રિમાન્ડ બાદ હામીદ આલમને જ્યુડિશિયલ કસ્ટડીમાં મોકલાયો છે. આ મામલે રાજ્ય મંત્રી બચુભાઈ ખાબડના પુત્રો સહિત વધુ કર્મચારીઓની ધરપકડ થઈ છે.

અરવલ્લી જિલ્લામાં શનિવાર સવાર થી મેઘરજ અને મોડાસા પંથકમાં ધોધમાર વરસાદ પડ્યો હતો, જેમાં બે કલાકમાં સાડા ત્રણ ઈંચથી વધુ વરસાદ નોંધાયો હતો. આ કારણે ઘણા વિસ્તારોમાં જળબંબાકાર જેવી સ્થિતિ સર્જાઈ હતી. હવામાન વિભાગે રવિવારે માટે ઓરેન્જ એલર્ટ બહાર પાડ્યું છે. સ્થાનીક ખેડૂતો માટે વાવણીલાયક વરસાદ મળતા ખુશીનો માહોલ છે. રાજ્યમાં રવિવારે ગ્રામ પંચાયતની ચૂંટણી યોજાનાર છે, પરંતુ ભારે વરસાદની આગાહી ચુંટણી પર અસર કરી શકે છે. મુખ્ય શહેરોમાં પાણી ભરાઈ જવાથી નાગરિકોને હાલાકીનો સામનો કરવો પડી રહ્યો છે.

સેન્ટ્રલ બ્યુરો ઓફ ઈન્વેસ્ટિગેશન (CBI) એ બિહાર અને ઝારખંડમાં 100 કરોડ રૂપિયાના નકલી GST રિફંડ કૌભાંડમાં સાત સ્થળોએ દરોડા પાડ્યા. આ કૌભાંડ નકલી નિકાસ બિલ દ્વારા ટેક્સ રિફંડ મેળવવાના આરોપોની ચકાસણીના ભાગરૂપે થયો. પાટણા, પૂર્ણિયા, જમશેદપુર, નાલંદા અને મુંગેરમાં દરોડા દરમિયાન સાત સોનાના બિસ્કિટ જપ્ત થયા. આમાં પાંચ કસ્ટમ અધિકારીઓ સહિત નકલી નિકાસ દ્વારા 100 કરોડના નકલી રિફંડ માટે માણસો જોડાયેલા હતા. આ ગેંગે નકલી ડોક્યુમેન્ટ અને ઇ-વે બિલનો ઉપયોગ કરીને નિકાસ બતાવી હતી અને આરોપી અધિકારીઓ લાંચ લઈને ફાયદો લેશે તેવો આરોપ છે.

આગામી તુવેર ઉત્પાદન માટે ખેડૂતોએ વાવણી પહેલા અને વાવણી સમયે લેવાના પગલાં માટે જિલ્લા ખેતીવાડી અધિકારીએ માર્ગદર્શિકા બહાર પાડી છે. તેમાં રોગમુક્ત બીજ અને યોગ્ય ખેતર પસંદ કરવું, પાણી ભરાતા વિસ્તારોમાં વાવેતર ન કરવું જરૂરી છે. વંધ્યત્વ રોગ રોકવા માટે આગળના વર્ષના છોડ દૂર કરવા અને બડધાં પાક ન લેવાની સલાહ છે. છાણિયું ખાતર ૨ ટન/હેક્ટર અને દિવેલા-જુયાર સાથે પાક ફેરબદલી કરો. જૈવિક તેમજ જરૂરી દવાનો જતનપૂર્વક ઉપયોગ કરવો, વાવેતરમાં રોગપ્રતિકારક જાતો અને સીમિત અંતર રાખવું મહત્વપૂર્ણ છે. વધુ માહિતી માટે ગામસેવક, ખેતી અધિકારીને સંપર્ક કરવો.

12 જૂન, 2025 ભારતીય વિમાન ઈતિહાસમાં કાળો દિવસ તરીકે છપાયેલો રહેશે, જેમાં વિમાન અકસ્માતમાં ભૂતપૂર્વ મુખ્યમંત્રી વિજય રૂપાણીનું અવસાન થયુ હતુ. અગાઉ પણ ઘણાં નેતાઓ તેનો ભોગ બની ચૂક્યા છે. ભૂતપૂર્વ વડાપ્રધાન મોરારજીભાઈ દેસાઈ પણ આસામમાં જોરહાટ નજીક થયેલા વિમાન અકસ્માતમાં આબાદ બચી ગયા હતા. તેવી જ રીતે દેશના પ્રથમ ગૃહપ્રધાન સરદાર વલ્લભભાઈ પટેલ પણ વિમાન અકસ્માતમાં આબાદ બચી ગયા હતા. સરદાર પટેલ જયપુર જતીદીઠ વિમાનમાં તકલીફ આવી અને પાઈલટે સુરક્ષિત લેન્ડિંગ કરાવ્યું હતું. આ ઘટનાથી સમગ્ર દેશમાં ચિંતાનું વાતાવરણ ફેલાયું હતું, પરંતુ સરદાર સહિત બધા સલામત રહ્યા. રાજમોહન ગાંધી લિખિત 'સરદાર પટેલ - એક સમર્પિત જીવન'માં આ પ્રસંગનું વર્ણન છે.

બીજ માવજત એ પાકનું રોગથી સુરક્ષા કવચ છે, જે રોગકારકોને બીજમાં પ્રવેશ કરતા અટકાવે છે. રાસાયણિક સ્પ્રે, પ્રાકૃતિક પદ્ધતિઓ, ગરમ હવા અને જૈવિક નિયંત્રકો જેવા વિવિધ ઉપાયો દ્વારા બીજની સુરક્ષા થઈ શકે છે. બીજની સપાટી ઉપર અને અંદર રહેલી જીવાતો અને રોગકારકોને દૂર કરવા માવજત જરૂરી છે, નહીંતર ઉગવાની ક્ષમતા ઘટે છે. માવજતની રીતોમાં સીડ ડ્રેસર, સ્લરી ટ્રીટમેન્ટ, સીડ ડીપ અને બોક્ષ ટ્રીટમેન્ટ શામેલ છે. જૈવિક નિયંત્રકો પાકને જરૂરી પોષક તત્વ પૂરા કરતા હોવાને કારણે પાક ઉત્પાદન વધારી શકાય છે.

આ માહિતી બોટાદ જિલ્લા માહિતી કચેરી દ્વારા પ્રાકૃતિક કૃષિ અંતર્ગત બટેટાની ખેતી વિશે છે. બટેટા 'શાકભાજીનો રાજા' છે અને તેમાં પ્રોટીન અને વિટામિન સી ભરપૂર હોય છે. કુફરી પુંખરાજ જેવી જાતોનું વાવેતર ઓક્ટોબરની શરૂઆતમાં કરવું જોઈએ, જ્યારે કુફરી પુષ્કર જેવી જાતોનું વાવેતર આખો ઓક્ટોબર મહિનામાં કરી શકાય છે. જમીન સૂકી હોવી જોઈએ અને ઘનજીવામૃત ઉમેરવું જોઈએ. બીજ મધ્યમ કદના અને જૂના ન હોવા જોઈએ. બીજને બીજામૃતથી માવજત આપવી જોઈએ. બેડ બનાવીને 2 ફૂટના અંતરે બીજ વાવવા. પ્રથમ પિયત જીવામૃત સાથે આપવું. રોગ નિયંત્રણ માટે ખાટી છાશનો છંટકાવ કરવો. આચ્છાદન દ્વારા નિંદામણ નિયંત્રણ કરવું. કોલ્ડ સ્ટોરેજમાં 6 થી 8 ડિગ્રી સેલ્સિયસ તાપમાન અને 90 થી 95 ટકા ભેજ જાળવવો.

અમદાવાદમાં ગુરુવારે એર ઇન્ડિયાનું પ્લેન ક્રેશ થયુ હતુ. જે બાદ અનેક તર્ક વિતર્ક સર્જાયા હતા કે ઘટના માટે કયા કારણો જવાબદાર છે. અમેરિકી નેવીના પૂર્વ પાયલટ અને નેવિગેશન નિષ્ણાંત કેપ્ટન સ્ટીવે પ્લેન ક્રેશના વીડિયોનું અવલોકન કર્યુ છે. અને કારણ વર્ણવ્યા છે. કેપ્ટન સ્ટીવે જણાવ્યુ હતુ કે, પ્લેન ક્રેશ માટે એન્જિન ફેલ થવાની સંભાવના નકારી શકાતી નથી. એનો અર્થ એ છે કે, વિમાનમાં પાંખને પુરતી હવા ન મળતા આ દુર્ઘટના સર્જાઇ શકે છે. સ્ટીવે વધુમાં જણાવ્યુ હતુ કે, વિમાનમાં પૂરતી ક્ષમતા ન હતી કે તે ઉપરની તરફ ઉઠી શકે. પાયલટ ફ્લૈફ્સ લગાવવાનું ભૂલ્યા હશે બીજુ કારણ એ છે કે, વિમાનના ટેક ઓફ થયા પહેલા વિશેષ ટેક્નિકલ સેટીંગ કરવાની જરુર હોય છે. જેમાં મુખ્ય હોય છે ફ્લૈપ્સને નીચે કરવું. ફ્લૈપ્સ વિમાનના પાંખનો એ ભાગ છે જે લિફ્ટ કરવામાં મદદ કરે છે. ખોટું લીવર ખેંચવાથી પણ થઇ શકે છે દુર્ઘટના ત્રીજું કારણ એ હોઇ શકે છે કે, પાયલટે ખોટું લીવર ખેંચ્યુ હશે. જેના કારણે ટેક ઓફ થયા બાદ પાયલોટ કહે છે કે, વિમાન હવામાં ઉઠી ચુક્યુ છે. જે બાદ પાયલોટ કહે છે કે, ગિયર અપ કરો. આ સમયે પાયલોટે જો ખોટું લીવર ખેંચ્યુ હશે તો પ્લેન ક્રેશ થઇ શકે છે.

આણંદના મહેન્દ્ર વાઘેલાનું પ્લેન ક્રેશ દુર્ઘટનામાં મોત થયું છે. અમદાવાદ પ્લેન ક્રેસ દુર્ઘટનામાં મૃતકના મૃતદેહને રામનગર લવાયો હતો. મૃતક મહેન્દ્ર વાઘેલાને અંતિમ વિદાય આપવા સમગ્ર ગામ ઉમટ્યું હતું. અમદાવાદથી એમ્બ્યુલન્સમાં મૃતદેહને વતનમાં લવવામાં આવ્યો હતો. મૃતદેહને સાંસદ મિતેષ પટેલ, કલેક્ટરએ શ્રધ્ધાંજલિ આપી હતી. સરકારી અધિકારીઓ પણ અંતિમ યાત્રામાં ઉપસ્થિત રહ્યા હતા.

રાજ્ય સરકાર દ્વારા અમદાવામાં AI-171 વિમાન દુર્ઘટના બાદ યુદ્ધના ધોરણે રાહત-બચાવની કામગીરી કરવામાં આવી રહી છે. મુખ્યમંત્રી ભૂપેન્દ્ર પટેલના નેતૃત્વમાં જૂજ મિનિટોમાં આ કાર્યવાહી હાથ ધરીને સમર્પિત તંત્ર કાર્યરત કરવામાં આવ્યું છે. સંબંધિત જિલ્લાના કલેક્ટર દ્વારા વિમાન દુર્ઘટનાગ્રસ્ત મુસાફરોના પરિવારજનોનો સંર્પક કરી કાયદેસર વારસદારોને વીમા, દાવાની સહાય ચૂકવવા માટે સંબંધિત જિલ્લાનાં હિસાબી અધિકારી અન્ય અધિકારીઓની નોડલ અધિકારી તરીકે નિમણુંક કરવામાં આવી છે. જિલ્લા વહીવટી તંત્ર આ માટે અસરગ્રસ્તોને મદદરૂપ થઈ રહ્યું છે. વિમાન દુર્ઘટનામાં પ્રભાવિત થયેલા લોકોના ઇન્સ્યોરન્સ ક્લેમ પ્રોસેસ કરવામાં સરળતા રહે તે માટે IRDAIના નોટિફિકેશન અન્વયે હોસ્પિટલ ખાતે જોઇન્ટ સેલ શરૂ કરવાની સૂચના આપવામાં આવી હતી. જનરલ ઇન્સ્યોરન્સ કાઉન્સિલ વતી ન્યુ ઇન્ડિયા ઇન્સ્યોરન્સ કંપનીને લીડ ઇન્સ્યોરર તથા લાઇફ ઇન્શ્યોરન્સ કાઉન્સિલ વતી એચડીએફસી લાઇફને લીડ ઇનસ્યોરર નીમવામાં આવી છે.

સુરતના નાનપુરા વિસ્તારમાં આવેલા રામજી મંદિરના પૂજારી વિરુદ્ધ દુષ્કર્મની ગંભીર ફરિયાદ નોંધાઈ છે. 26 વર્ષીય પૂજારી વિવેક કુમાર પ્રતિહાશ પર 37 વર્ષીય પરિણીતાને લગ્નની લાલચ આપી સાડા ત્રણ વર્ષથી દુષ્કર્મ આચરવાનો આક્ષેપ છે. આ ઘટનાની ફરિયાદ અઠવાલાઈન્સ પોલીસ સ્ટેશનમાં નોંધાતા ચકચાર મચી છે. ફરિયાદમાં જણાવ્યા અનુસાર આરોપીએ વિવિધ સ્થળોએ રેપ કર્યો હતો અને લગ્નના ઇનકાર કર્યા બાદ મામલો બહાર આવ્યો. હાલ પોલીસે આરોપીની ધરપકડ કરીને આગળની તપાસ શરૂ કરી છે અને અન્ય સામેલ લોકો અંગે પણ તજવીજ હાથ ધરાઈ છે. લોકો ગુસ્સે છે અને કડક પગલાની માંગ કરી રહ્યા છે.

ગુજરાતના પૂર્વ મુખ્યપ્રધાન વિજય રુપાણી અમદાવાદમાં થયેલી વિમાન દુર્ઘટનાનો શિકાર બન્યા છે, આ દુર્ઘટનામાં 270 થી વધુ લોકો જીવ ગુમાવ્યા છે અને સિવિલ હોસ્પિટલ ખાતે તમામ મૃતકોના મૃતદેહના ડીએનએ ટેસ્ટ કરવામાં આવી રહ્યા છે અને મૃતદેહને ઓળખીને તેમના પરિવારજનોને સોંપવાની પ્રક્રિયા ચાલી રહી છે. તમને જણાવી દઈએ કે પૂર્વ CM વિજય રૂપાણીનું DNA સેમ્પલ મેચ થયું છે અને 16 જૂને વિજય રૂપાણીના નશ્વરદેહને પરિવારજનો સ્વીકારશે, 11 વાગ્યે પરિવારજનો અમદાવાદ સિવિલ હોસ્પિટલ જશે અને 11:30 વાગ્યે વિજય રૂપાણીનો નશ્વરદેહ સ્વીકારશે. ત્યારબાદ બપોરે 12:30 વાગ્યે નશ્વરદેહને અમદાવાદથી રાજકોટ લઈ જવાશે. 12.30થી 2 વાગ્યાની વચ્ચે હવાઈ માર્ગે વિજય રૂપાણીના નશ્વરદેહને રાજકોટ પહોંચાડાશે. તે પછી 2.30થી 4 વાગ્યા સુધી ગ્રીન ચોકડીથી અંતિમ યાત્રા કાઢવામાં આવશે. ગ્રીનલેન્ડ ચોકડીથી રાજકોટ નિવાસસ્થાને લઈ જવાશે.

ઉત્તર પ્રદેશના અમેઠી જિલ્લાના પૂર્વાચલ એક્સપ્રેસ પર રવિવારે પિક અપ વાન અને એમ્બ્યુલન્સ વચ્ચે અકસમાત થવાથી 5 લોકોના મોત નિપજ્યા છે. અન્ય એક ખૂબ ગંભીર રીતે ઘાયલ થયું છે. આ ઘટના પર મુખ્યમંત્રી આદિત્યનાથે દુઃખ વ્યક્ત કર્યું છે. પોલીસે જણાવ્યું હતું કે આ ઘટના શુકુલ બઝાર પોલીસ સ્ટેશન ક્ષેત્રમાં પૂર્વાંચલ એક્સપ્રેસ પર બની હતી. જ્યારે હરિયાણાથી બિહારના સમસ્તીપુર મૃતદેહ લઈ જતી એમ્બ્યુલન્સે આગળ નિકળવાના પ્રયત્નમાં એક પિક અપ વાનને ટક્કર મારી દીધી હતી. પોલીસ અધિકારી અભિનેશ કુમારે જણાવ્યું હતું કે આ ઘટનામાં એમ્બ્યુલન્સમાં બેસેલા પાંચ લોકોના મોત નિપજ્યા હતા, અન્ય એક ગંભીર રીતે ઘાયલ થયો હતો જેને ગૌરીગંજ જિલ્લાની હોસ્પિટલમાં ભરતી કરવામાં આવ્યો છે. પોલીસ પાસેથી મળતી માહિતી પ્રમાણે બિહારના રહેવાસી રાજકુમાર શર્મા ઉર્ફે સતીશ શર્મા, રવિ શર્મા, પૂલો શર્મા અને હરીયાણા નિવાસી સરફરાઝ તથા આબિજના રૂપમાં થઈ છે. જેમાં ઘાયલોની ઓળખ બિહારના રહેવાસી શંભુ રાયના રૂપમાં થઈ છે.

સુરતના અઠવામાં પ્રેમીના પતિ પર જીવલેણ હુમલો કરનાર આરોપીની ધરપકડ કરવામાં આવી છે. આરોપી સંજય શિરવાડકરના ફરિયાદીની પત્ની સાથે પ્રેમ સંબંધ હતા. પતિની સાથે વાતચીતને લઈ ફરિયાદીએ આરોપી સાથે બોલાચાલ કર્યા બાદ બંને વચ્ચે ઝપાઝપી થઈ હતી. હુમલામાં ફરિયાદીને ગંભીર ઇજાઓ પહોંચતા હોસ્પિટલમાં દાખલ કરવામાં આવ્યા છે. આરોપીએ મિત્રો સાથે મળી હુમલો કર્યો હતો અઠવા વિસ્તારમાં પ્રેમીકાના પતિ પર હુમલો કરનાર આરોપીને અઠવા પોલીસે ઝડપી લીધો છે. આરોપીએ તેમના મિત્રો સાથે મળીને પ્રેમીકાના પતિ પર ચપ્પુ વળે જીવલેણ હુમલો કર્યો હતો. હાલ આ સમગ્ર મામલે પોલીસે આરોપીની ધરપકડ કરી આગળની કાર્યવાહી હાથ ધરી છે.

અમદાવાદ પ્લેન ક્રેશની ઘટનામાં રાજ્યના પૂર્વ મુખ્યમંત્રી વિજય રૂપાણીનું નિધન થયું છે. આ દુર્ઘટનામાં મૃત્યુ પામેલા લોકોના મૃતદેહ પરિવારને સોપવામાં આવી રહ્યાં છે. વિજયભાઈ રૂપાણીના સર્વન્ટ રહેલા ચંદુભાઈ સાથે સંદેશ ન્યૂઝે વાતચીત કરી હતી. ચંદુભાઈએ વિજયભાઈના માયાળુ સ્વભાવને યાદ કર્યો અને પોતાના જન્મ દિવસ નિમિત્તે વિજયભાઈએ મંત્રીમંડળની મીટિંગમાં મોડું થઈ રહ્યું હતું, ત્યારે મીઠાઈ મંગાવી ઉજવણી કરી હતી. તેમણે વધુમાં વાત કરતા જણાવ્યું કે વિજયભાઈ મંત્રી હતા તે સમયે હાઇવે ઉપર જતા હતા ત્યારે એક અકસ્માત થયેલો ત્યારે કાર અટકાવી યુવાનને મદદ કરી હતી. તેઓની 1206 કાર થી લઈને આજ સુધીના તેઓના કિસ્સાઓ સંદેશ ન્યૂઝ સાથે વાગોળ્યાં છે.

અમદાવાદમાં બનેલી પ્લેન ક્રેશની દુર્ઘટના બાદ હવે સિવિલ હોસ્પિટલમાં મૃતકોના DNA મેચ કરવાની કામગીરી ચાલી રહી છે. અત્યાર સુધીમાં કૂલ 42 મૃતદેહોના DNA મેચ થયા છે. ઓળખાયેલા અને DNA મેચ થયેલા 21 મૃતદેહ પરિવારને સોંપવામાં આવ્યા છે. જણાવી દઈએ કે અત્યાર સુધીમાં કૂલ 272 લોકોના DNA સેમ્પલ લેવામાં આવ્યા છે અને હજુ 13 બ્રિટિશ નાગરિકોના DNA સેમ્પલ લેવાના બાકી છે.

ગાંધીનગર ખાતે FSLના ડિરેક્ટર એચ.પી. સંઘવીએ અમદાવાદ ખાતેની વિમાન દુર્ઘટનાના સંદર્ભમાં DNA પ્રોફાઇલિંગ અને મેચિંગની પ્રક્રિયા વિશે વિસ્તૃત માહિતી આપી હતી. સંઘવીએ કહ્યું હતું કે, વિમાન દુર્ઘટનામાં મૃત્યુ પામેલાઓના પરિવારજનોના DNA સેમ્પલિંગથી મેચિંગ સુધીની પ્રક્રિયા સતત 24 કલાક કરવામાં આવી રહી છે. DNA ના સેમ્પલ મેળવવાની મુખ્યત્વે બે પદ્ધતિ છે. એક પદ્ધતિમાં ફ્રેશ બ્લડમાંથી સેમ્પલ લેવામાં આવે છે, જે જટિલ પ્રક્રિયા નથી. જ્યારે બીજી પદ્ધતિમાં મૃતકના અવશેષોમાંથી સેમ્પલ લેવામાં આવે છે, જે જટિલ અને વધુ ચોકસાઈ માંગી લે તેવી પ્રક્રિયા છે. મૃતકના અવશેષમાંથી લીધેલ સેમ્પલને ચીવટતાથી સાફ કરવામાં આવે છે જેથી સેમ્પલમાં કોઈ બાહ્ય અશુદ્ધિઓ ન રહે. તેમણે ઉમેર્યું કે, DNA આઇસોલેશન અને એક્સ્ટ્રેશનની પ્રક્રિયામાં જો હાડકાનું સેમ્પલ હોય તો તેનો પાવડર કરવામાં આવે છે અને જો સેમ્પલમાં દાંત હોય તો તેના નાના નાના ટુકડાઓ કર્યા બાદ પાવડર કરવામાં આવે છે. ત્યારબાદ ખાસ મશીનમાં ચોક્કસ તાપમાને DNA આઇસોલેટ કરવામાં આવે છે. આ આઇસોલેટ DNAની RTPCR મશીનમાં કોન્ટીટી અને ક્વોલિટી તપાસવામાં આવે છે. ત્યારબાદ જો DNA યોગ્ય જણાય તો જ તેની એકથી વધુ નકલો તૈયાર કરવામાં આવે છે. જેમાંથી DNA ની બંને સ્ટ્રેનને અલગ અલગ કરવામાં આવે છે. આ સ્ટ્રેનને સિક્વન્સીયર મશીન પર ચલાવવામાં આવે છે અને ત્યારબાદ DNAની પ્રોફાઈલ પ્રાપ્ત થાય છે. આ સમગ્ર પ્રક્રિયા ખૂબ જ જટિલ તથા સમય માંગી લે તેવી છે.