ઈરાન-ઈઝરાયેલ યુદ્ધનો અંત અને યુક્રેન-રશિયા વચ્ચે સમાધાનની આશા, ડોનાલ્ડ ટ્રમ્પના આશ્વાસન અને ચોમાસાની સારી પ્રગતિથી બજારમાં તેજી જોવા મળી. ક્રૂડ ઓઈલના ભાવ ઘટવાથી અને એશિયન બજારોમાં ઉછાળાની અસર ભારતીય શેરબજાર પર પણ પડી. જિઓ-પોલિટિકલ ટેન્શન ઘટતા ડોલર સામે રૂપિયો મજબૂત થયો. BSE મીડકેપ અને સ્મોલકેપ ઈન્ડેક્સ વધ્યા, જ્યારે રિયલ્ટી અને IT શેરોમાં વેચવાલી જોવા મળી. સેન્સેક્સમાં Asian Paints અને UltraTech Cement વધ્યા, જ્યારે Trent Ltd અને Zomato Ltd ઘટ્યા. જૂનમાં રિટેલ રોકાણકારો ફરી સક્રિય થયા છે. Tariff Warની બજાર પર અસર જોવા મળી રહી છે.

26 જૂન ગુરુવારના દિવસે સેન્સેક્સ 1000 પોઈન્ટનો ઉછાળો સાથે 83,755 પર બંધ થયો, જ્યારે નિફ્ટી 304 પોઈન્ટ વધીને 25,549 પર બંધ થયો. સેન્સેક્સના 30 શેરમાંથી 22 શેરો વધ્યા, 8 શેરો ઘટ્યા. મેટલ, ફાઇનાન્શિયલ અને એનર્જી શેરોમાં વધારો જોવા મળ્યો, જ્યારે ઓટો અને આઇટી સેક્ટરમાં દબાણ નોંધાયું. 25 જૂન બુધવારે, સેન્સેક્સ 700 પોઈન્ટ વધીને 82,756 પર બંધ થયો અને નિફ્ટી 200 પોઈન્ટ વધીને 25,245 પર બંધ થયો. આ દિવસે ટાઇટન, મહિન્દ્રા, ઇન્ફોસિસ સહિત 16 શેરો વધ્યા અને NSEના બધા સેક્ટર તેજી સાથે બંધ થયા, જેમાં ઓટો, IT, મીડિયા અને કન્ઝ્યૂમર ડ્યુરેબલ્સમાં 2% સુધીનો વધારો જોવા મળ્યો.

24 જૂને સેન્સેક્સ 900 પોઈન્ટ (1.1%) વધીને 82,800 પર ટ્રેડ કરી રહ્યો છે અને નિફ્ટી 280 પોઈન્ટ (1.10%) વધીને 25,250 પર છે. સેન્સેક્સના 30 શેરોમાંથી 29 વધ્યા છે જેમાં અદાણી પોર્ટ્સ, બજાજ ફિનસર્વ અને એશિયન પેઇન્ટ્સ 3% સુધી વધ્યા છે. નિફ્ટીના 50માંથી 16 શેર તેજી પર છે. NSEના PSU બેંકિંગ, IT, ઓઇલ એન્ડ ગેસ અને મેટલ-ઓટો સેક્ટરમા તેજી જોવા મળી છે. વિદેશી રોકાણકારોએ 5,592 કરોડ રૂપિયાની ખરીદી કરી છે. સોમવાર, 23 જૂને સેન્સેક્સ 511 પોઈન્ટ ઘટીને 81,897 પર અને નિફ્ટી 141 પોઈન્ટ ઘટીને 24,972 પર બંધ થયા હતા.

જીઓ-પોલિટિકલ ટેન્શન વચ્ચે તાજેતરમાં વ્યાજ દર સ્થિર રહેતા ભારતીય અર્થતંત્ર મજબૂત રહયુ છે. ભારતીય શેરબજારમાં બીએસએમીડકેપ અને સ્મોલકેપ ઈન્ડેક્સમાં વધારો થયો, જ્યારે ટેલિકોમ્યુનિકેશન, રિયલ્ટી, ફાઈનાન્શિયલ સર્વિસીસ સહિત ઘણા સેક્ટરલ શેરોમાં સુધારો નોંધાયો. નિફ્ટી ફ્યુચર 25111 પોઈન્ટ પર બંધ થયો, જેમાં 25202 અને 25232 પોઈન્ટ વિષે મહત્વપૂર્ણ ટેકનિકલ સ્તરો છે. એસબીઆઈ લાઈફ, ગ્લેનમાર્ક, એચડીએફસી બેન્ક અને એચસીએલ શેરોમાં ટેકનિકલ મૂડ સકારાત્મક અને સતર્ક છે. યુએસ ફેડરલ રિઝર્વ વ્યાજ દર 4.25%થી 4.5% જાળવ્યો છે, અને ટેરિફ અસર બજારમાં ધીમે-ધીમે થશે. ભારતીય શેરબજારમાં આગળ વધારા સાથે સાવધાની જરૂરી છે.

અમદાવાદમાં 12 જૂનના બપોરે 1.38 વાગ્યે બનેલી પ્લેન ક્રેશ દુઘર્ટનામાં મૃત્યુ પામેલા મહેન્દ્ર વાઘેલાના મૃતદેહને આજે આણંદ તાલુકાના રામનગર ગામમાં સુથાર ફળીયા સ્થિત તેમના ઘરે લાવવામાં આવ્યો હતો. અહીં મૃતદેહ આવતાં જ સૌ કોઈની આંખમાં આંસુ હતા. વાઘેલા પરિવાર હિબકે ચડ્યો હતો. મહેન્દ્રભાઈના અંતિમ સંસ્કાર માટે તેમના પત્ની અને પુત્ર લંડનથી પરત આવ્યાં હતાં. અંતિમયાત્રામાં મોટી સંખ્યામાં લોકો જોડાયા હતા. સુથાર ફળીયાથી સ્મશાન સુધી તેમની અંતિમયાત્રા કાઢવામાં આવી હતી અને તેમના અંતિમ સંસ્કાર કરવામાં આવ્યા છે. રામનગર ગામ હિબકે ચડ્યું હતું. સાંસદ, ધારાસભ્ય તેમજ અધિકારીઓએ શ્રદ્ધાંજલિ અર્પી.

અમદાવાદ પ્લેન ક્રેશની ઘટનાની વૈશ્વિક સ્તરે સંયુક્ત તપાસ થઇ રહી છે. DGCAની સાથો સાથ અમેરિકા અને બ્રિટનની એજન્સીઓ પણ તપાસમાં જોડાઇ છે. એજન્સીના અધિકારીઓએ ક્રેશ સાઇટની મુલાકાત લીધી હતી. બોઇંગ કંપનીની ટેકનિકલ ટીમ પણ સાથે રહી હતી. ભારત અને વિદેશની અલગ અલગ એજન્સીઓ તપાસમાં જોડાઇ. ઘટના સ્થળે પહોંચેલી એજન્સીમાં અમેરિકાની નેશનલ ટ્રાન્સપોર્ટ સેફ્ટી બોર્ડ (NTSB), ફેડરલ એવિએશન એડમિનિસ્ટ્રેશન (FAA), ઇન્ટરનેશનલ સિવિલ એવિએશન ઓર્ગેનાઇઝેશન (ICAO) પણ છે. બોઇંગ કંપનીના અધિકારીઓ પણ તપાસમાં સાથે જોડાયા છે. બોઇંગ ટીમ ફ્યૂઅલ સિસ્ટમ, એન્જિન અને હાઇડ્રોલિક સિસ્ટમની તપાસ કરશે. અમેરિકાની એજન્સી 85 વર્ષ જૂનીઆ તપાસ એજન્સીઓમાં અમેરિકાની નેશનલ ટ્રાન્સપોર્ટ સેફ્ટી બોર્ડ (NTSB) સૌથી જૂની છે. જેની સ્થાપના વર્ષ 1940માં થઇ હતી. ભારત સરકારે 2012 માં એર ક્રાફ્ટ એક્સિડન્ટ ઇન્વેસ્ટિગેશન બ્યૂરો (AAIB) ની રચના કરી હતી. આ એજન્સી પ્લેન ક્રેશની ઘટનાની તપાસ કરે છે.

અમદાવાદ ખાતે થયેલી એર ઈન્ડિયા વિમાન દુર્ઘટનામાં જીવ ગુમાવનાર દિવંગતોના પરિજનોના DNA સેમ્પલ મેચ થયા બાદ નશ્વર દેહને સોંપવાની કામગીરી ચાલી રહી છે. આ દુર્ઘટનામાં વડોદરાના 28 હતભાગી યાત્રિકો પૈકી 6 પાર્થિવ દેહની ઓળખ થતા આજે અમદાવાદ સિવિલ હોસ્પિટલ તંત્ર તરફથી તેમના પરિજનોને સોંપવામાં આવ્યા હતા. DNA સેમ્પલિંગની પ્રક્રિયાથી લઈને પાર્થિવ દેહ સોંપવાની અને અંતિમ સંસ્કાર પૂર્ણ થાય ત્યાં સુધીની તમામ ક્રિયાઓમાં જિલ્લા વહીવટી તંત્રના નિયુક્ત અધિકારીઓ મૃતકોના પરિજનો સાથે સહાનુભૂતિપૂર્વક ઊભા રહ્યા હતા. આ દુ:ખદ સમયે રાજ્ય સરકાર મૃતકોના પરિવારોની સાથે છે અને શક્ય તમામ મદદ કરવા માટે કટિબદ્ધ છે. ત્યારે મૃતકોના પરિજનોએ રાજ્ય સરકાર અને જિલ્લા વહીવટી તંત્રએ કરેલી વિશેષ વ્યવસ્થા અને સંવેદના પ્રત્યે સંતોષભાવ વ્યક્ત કર્યો હતો. મૃતદેહોની ઓળખ થયેથી પાર્થિવ દેહને સ્વ-ગૃહે પરત લાવવાની અને ત્યારબાદ અંતિમ સંસ્કાર પૂર્ણ થાય ત્યાં સુધી કરવામાં આવેલી સંવેદનશીલ વ્યવસ્થાથી મૃતકોના સ્વજનોને થોડી પણ તકલીફ ન પડે તેનું તંત્ર દ્વારા વિશેષ ધ્યાન રાખવામાં આવ્યું હતું.

અમદાવાદના મેઘાણીનગર વિસ્તારમાં એર ઇન્ડિયાના એઆઈ ૧૭૧ વિમાન દુર્ઘટનામાં મૃત્યુ પામેલા મુસાફરો માટે શ્રદ્ધાંજલિ કાર્યક્રમ યોજાયો હતો. શ્રી કોટયર્ક ખડાયત સમિતિના સભ્યો અને શ્રદ્ધાળુ પરિવારજનો દ્વારા આ પ્રાર્થના સભાનું આયોજન કરવામાં આવ્યું હતું. સમિતિના પ્રમુખ વિજયભાઈ શાહ (ઠેકડી)ના નેતૃત્વમાં યોજાયેલા આ કાર્યક્રમમાં મૃતકોના આત્માની શાંતિ માટે પ્રાર્થના કરવામાં આવી હતી. કાર્યક્રમમાં ખડાયતા સમાજની વિવિધ સામાજિક, શૈક્ષણિક અને ધાર્મિક સંસ્થાઓના અગ્રણીઓ અને પદાધિકારીઓ ઉપસ્થિત રહ્યા હતા. પ્રાર્થના સભામાં અમેરિકા અને કેનેડા સહિતના દેશોમાં વસતા ખડાયતા સમાજના સભ્યો પણ જોડાયા હતા. સમાજના અગ્રણીઓએ શ્રદ્ધાંજલિ અર્પણ કરી હતી. રવિવારે સાંજે દેશ-વિદેશમાં વસતા ખડાયતા સમાજના પરિવારજનોએ તેમના ઘરે દીવો પ્રગટાવી મૃતકોના આત્માની સદ્ગતિ માટે પ્રાર્થના કરવાનો સંકલ્પ લીધો હતો.

પ્લેન ક્રેશના 70 કલાક પછી વિજય રૂપાણીના DNA મેચિંગ થતા તેમના મૃત્યુની પુષ્ટિ થઈ છે. તેમના પાર્થિવ દેહને આવતીકાલે પરિવારને સોંપવામાં આવશે અને રાજકોટમાં રાજકીય સન્માન સાથે અંતિમવિધિ યોજાશે. અત્યાર સુધી 42 મૃતદેહોમાંથી 16 ઓળખાઈ ગયા છે અને 14 પરિવારોને સોંપવામાં આવ્યા છે. મૃતકના પરિવારજનો માટે કાઉન્સેલિંગ ટીમ પણ તહેનાત કરવામાં આવી છે. USની એજન્સીઓ દુર્ઘટનાની તપાસ માટે ગુજરાત પહોંચી છે.

અમદાવાદમાં થયેલી વિમાન દુર્ઘટનામાં મૃત્યુ પામેલા લોકોને શ્રદ્ધાંજલિ આપવામાં આવી છે. મંગલ નવકાર ફાઉન્ડેશન ટ્રસ્ટ દ્વારા સંચાલિત હેમ મહેક બાળ સંસ્કાર કેન્દ્રના બાળકોએ મૃતકોની આત્માની શાંતિ માટે પ્રાર્થના કરી હતી. બાળકોએ દુર્ઘટનામાં ઘાયલ થયેલા લોકોના જલદી સ્વસ્થ થવા માટે પણ પ્રાર્થના કરી. આ દુર્ઘટનાએ અનેક પરિવારોની ખુશીઓ છીનવી લીધી છે. કેન્દ્રના બાળકોએ પ્રાર્થના કરી કે ભગવાન મૃતકોને પોતાના ચરણોમાં સ્થાન આપે. જે ઘરોમાં દીવા બુઝાઈ ગયા છે, ત્યાં કરુણાની જ્યોત પ્રગટે. દુર્ઘટનામાં અસહ્ય પીડા ભોગવી રહેલા પરિવારોને ભગવાન શક્તિ આપે. ઘાયલ થયેલા લોકો જલદીથી સ્વસ્થ થાય અને તેમના પરિવાર પાસે પાછા ફરે તેવી પ્રાર્થના કરવામાં આવી.

લંડનના સાઉથ ઑક્ઝી વિસ્તારમાં અમદાવાદની વિમાન દુર્ઘટનામાં મૃત્યુ પામેલા લોકો માટે શ્રદ્ધાંજલિ સભાનું આયોજન કરવામાં આવ્યું હતું. 12 જૂન 2025ના રોજ અમદાવાદમાં થયેલી વિમાન દુર્ઘટનામાં 264 લોકોના મૃત્યુ થયા હતા. કારપેન્ડર્સ પાર્ક કોમ્યુનિટી હોલમાં 13 જૂનના રોજ યોજાયેલી શોકસભામાં સ્થાનિક ગુજરાતી સિનિયર સિટિઝન્સે હાજરી આપી હતી. આ પ્રસંગે સહુએ મૌન પાળી મૃતકોને શ્રદ્ધાંજલિ અર્પણ કરી હતી. કાર્યક્રમમાં સ્થાનિક કાઉન્સિલર વિશાલભાઈ પટેલ અને એમ.પી. ગગન મોહિન્દ્રા ખાસ ઉપસ્થિત રહ્યા હતા. સ્થાનિક રહેવાસીઓએ કેન્ડલ પ્રગટાવી મૃતકોને શ્રદ્ધાંજલિ આપી હતી. કોમ્યુનિટી હોલના સંચાલકોએ આ શોકસભા માટે વિનામૂલ્યે હોલની સુવિધા પૂરી પાડી હતી. ઉલ્લેખનીય છે કે સાઉથ ઑક્ઝી વિસ્તારમાં વસતા ગુજરાતી સિનિયર સિટિઝન્સ રોજ સવાર-સાંજ એકબીજાને મળી ગુજરાતી સંસ્કૃતિને જીવંત રાખવાનો પ્રયાસ કરે છે.

અમદાવાદના નારોલ વિસ્તારમાં આવેલી રાહે પબ્લિક સ્કૂલના વિદ્યાર્થીઓએ તાજેતરમાં અમદાવાદમાં થયેલી વિમાન દુર્ઘટનામાં મૃત્યુ પામેલા લોકોને શ્રદ્ધાંજલિ અર્પણ કરી હતી. શાળાના વિદ્યાર્થીઓએ દુર્ઘટનામાં ઘાયલ થયેલા લોકો જલદીથી સાજા થાય તે માટે પ્રાર્થના કરી હતી. આ કાર્યક્રમમાં શાળાના શિક્ષકો અને વિદ્યાર્થીઓએ મૌન પાળી દુર્ઘટનાગ્રસ્તોને શ્રદ્ધાંજલિ આપી હતી. વિદ્યાર્થીઓએ આ દુર્ઘટનામાં અસરગ્રસ્ત પરિવારો પ્રત્યે સંવેદના વ્યક્ત કરી હતી.

અમદાવાદમાં થયેલી વિમાન દુર્ઘટનાએ સમગ્ર વિશ્વને હચમચાવી નાખ્યું છે. આ દુર્ઘટનામાં ગુજરાત, બ્રિટન અને કેનેડાના નાગરિકોના મૃત્યુ થયા છે. વિશ્વ ઉમિયા ફાઉન્ડેશને માનવતાની મિસાલ પૂરી પાડી છે. ફાઉન્ડેશને અમદાવાદ સિવિલ હોસ્પિટલમાં પીડિત પરિવારો માટે ભોજન, નાસ્તા, ઠંડા પીણા અને પાણીની વ્યવસ્થા કરી છે. વિશ્વ ઉમિયાધામ ખાતે મૃતકોની આત્માની શાંતિ માટે વિશેષ પૂજા અને આરતીનું આયોજન કરવામાં આવ્યું હતું. ફાઉન્ડેશનના પ્રમુખ આર.પી. પટેલના જણાવ્યા અનુસાર, દુર્ઘટનાના દિવસે ઉમા સેવકોની ટીમ તાત્કાલિક સિવિલ હોસ્પિટલ પહોંચી હતી. આરોગ્ય વિભાગના કર્મચારીઓ સાથે મળીને ટીમે દુર્ઘટના સ્થળેથી મૃતદેહોને હોસ્પિટલ પહોંચાડવામાં મદદ કરી હતી. ઇજાગ્રસ્તોને ત્વરિત મેડિકલ સારવાર મળે તે માટે પણ ટીમે સેવા આપી હતી.

ભરૂચના બાયપાસ ચોકડી પર એર ઈન્ડિયાની લંડન જતી ફ્લાઇટ દુર્ઘટનામાં મૃત્યુ પામેલા લોકોને શ્રદ્ધાંજલિ અર્પણ કરવામાં આવી છે. આ દુર્ઘટના 12મી જૂને અમદાવાદના મેઘાણીનગર વિસ્તારમાં સર્જાઈ હતી. મુસ્લિમ સમાજના આગેવાનો અને શહેરના જાગૃત નાગરિકોએ મૃતકોને ભાવભીની શ્રદ્ધાંજલિ આપી હતી. કાર્યક્રમમાં દુર્ઘટનામાં ઈજાગ્રસ્ત લોકોની સ્વસ્થતા માટે દુઆઓ અને પ્રાર્થનાઓ કરવામાં આવી હતી. શ્રદ્ધાંજલિ કાર્યક્રમમાં સામાજિક કાર્યકર અબ્દુલ કામથી, સ્થાનિક આગેવાનો અને નાગરિકો હાજર રહ્યા હતા. સમગ્ર કાર્યક્રમ દરમિયાન દેશભરની આ દુઃખદ ઘટના પ્રત્યે શોકની લાગણી વ્યક્ત કરવામાં આવી હતી.

હિંમતનગરની 22 વર્ષીય પાયલ ખટીક, જે એર ઈન્ડિયાની લંડન જતી ફ્લાઈટમાં હતી. પાયલ બીટેક પછી એમટેક માટે સ્ટુડન્ટ વીઝા પર લંડન જઈ રહી હતી. યુવતી આ દુર્ઘટનાની હતભાગી છે. 12 જૂને અમદાવાદ એરપોર્ટથી ઉડાન ભરેલું વિમાન મેઘાણી નગર વિસ્તારમાં ક્રેશ થયું હતું. પાયલ હિંમતનગરના ગાયત્રી મંદિર રોડ પર આવેલ મીનાક્ષી વિલા ફ્લેટમાં રહેતી હતી. તેના પિતા સુરેશભાઈ DNA પ્રક્રિયા પૂર્ણ કરી આવ્યા છે. પિતા સુરેશભાઈ અમદાવાદ DNA માટે પ્રક્રિયા કરી આવ્યા આજે ત્રીજો દિવસ છે હજી મૃતદેહ આવ્યો નથી. યુવતીનો DNA મેચ થયા બાદ વધુ ખુલાસો થશે. રવિવારે સાબરકાંઠા-અરવલ્લી જિલ્લાના સાંસદ શોભનાબેન મહેન્દ્રસિંહ બારૈયા પાયલના ઘરે પહોંચ્યા હતા. તેમણે પાયલની માતા અને બહેનને મળીને સાંત્વના આપી હતી. આ પ્રસંગે પ્રાંતિજના પૂર્વ ધારાસભ્ય મહેન્દ્રસિંહ બારૈયા, શામળાજી મંદિર ટ્રસ્ટના ટ્રસ્ટી સિધ્ધાર્થભાઈ પટેલ તેમજ ભાજપ મહિલા મોરચા અને પાર્ટીના કાર્યકર્તાઓ પણ ઉપસ્થિત રહ્યા હતા.

પપ્પા ચાર મહિના પછી તમારે અમારી સાથે જ રહેવાનું છે તમારો પાસપોર્ટ બની ગયો છે હવે પછી તમને અમે લંડન લઈ જઈશું. આ શબ્દો છે અમદાવાદ પ્લેન ક્રેશ દુર્ઘટનામાં પોતાનો એકનો એક પુત્ર ગુમાવનાર પિતાના. અમદાવાદ પ્લેન ક્રેશ દુર્ઘટનામાં અમદાવાદના વેજલપુર વિસ્તારમાં અંબિકા નગર સોસાયટી વિભાગ-1 માં રહેતા અનિલભાઈ પટેલનો પુત્ર હર્ષિત અને તેમની પુત્રવધુ પૂજા પટેલ 10 દિવસ પહેલા જ લંડનથી અમદાવાદ સારવાર માટે આવ્યા હતા અને 12 જૂનના રોજ પરત કર્યા હતા ત્યારે પ્લેન ક્રેશ ઘટનાની અંદર તેમનું દુઃખદ મોત થયું છે. સિવિલ તંત્ર દ્વારા શનિવારથી મૃતદેહ સોંપવાની કામગીરી કરવામાં આવી રહી છે ત્યારે અનિલભાઈ અને તેમના પરિવારજનો DNA સેમ્પલના રિપોર્ટ મેચ થઈ જાય અને તેમને મૃતદેહ મળે તેની રાહ જોઈ રહ્યા છે.

અમદાવાદમાં ગત ગુરુવારે થયેલી પ્લેન ક્રેશ દુર્ઘટનામાં આણંદ જિલ્લાના 33 મુસાફરોનું મૃત્યુ થયું છે. આણંદના સાંસદ મિતેશ પટેલે મૃતકોના પરિવારજનોની ઘરે જઈને મુલાકાત લીધી હતી. તેમણે પરિવારજનો સાથે શોક વ્યક્ત કર્યો હતો. સાંસદે દુઃખની આ ઘડીમાં પરિવારો સાથે સંવેદના વ્યક્ત કરી. તેમણે તમામ જરૂરી સહાય અને પ્રયાસો કરવાની નિષ્ઠાપૂર્વક બાહેંધરી આપી. સાંસદે સદગતોની આત્માની શાંતિ માટે પ્રાર્થના કરી. સાંસદે જણાવ્યું કે ગુજરાત સરકાર પરિવારજનો માટે સંપૂર્ણપણે સક્રિય છે. કલેક્ટર અને લાયઝન અધિકારીઓ પરિવારજનોના સતત સંપર્કમાં છે. DNA ટેસ્ટ દ્વારા મૃતકોની ઓળખ થયા બાદ પાર્થિવ દેહ પરિવારજનોને સોંપવામાં આવી રહ્યા છે. અંતિમ સંસ્કારની વિધિ પણ કરવામાં આવશે.

અમદાવાદના મેઘાણીનગર વિસ્તારમાં 12 જૂનના રોજ સર્જાયેલી વિમાન દુર્ઘટનામાં લંડન જતી ફ્લાઇટ AI171 અચાનક અતુલ્ય બિલ્ડિંગ પર તૂટી પડતાં અનેક નિર્દોષ લોકોના મોત નિપજ્યા છે. ત્યારે આ ઘટનામાં ભરૂચ જિલ્લાના જંબુસર નગરના મહાદેવનગર વિસ્તારમાં રહેતા અને હાલ એમ.બી.બી.એસ.ના બીજા વર્ષમાં અભ્યાસ કરતા વિદ્યાર્થી ધ્રુવ ગુજ્જરનો ચમત્કારિક રીતે જીવ બચાવ થયો છે. વિમાન દુર્ઘટના સમયે ધ્રુવ પણ અતુલ્ય બિલ્ડિંગની કેન્ટિનમાં જમવા માટે બેઠો હતો. એ વખતે એકધમ જોરદાર ધડાકો સાંભળાતા તેણે તરત જ પોતાની સજાગતા દાખવી અને ડાઇનિંગ ટેબલની નીચે છૂપાઈ ગયો હતો. તેની આ જ સજાગતાથી તેનો જીવ બચી ગયો હતો. બિલ્ડિંગની બારીથી કૂદીને સલામત સ્થળે ગયો હતો. માત્ર પોતાનો બચાવ જ નહીં, પરંતુ ત્યારબાદ તેણે પોતાના મિત્રોના સહયોગથી કેટલાક ઘાયલોને પણ બહાર કાઢવામાં મદદ કરી હતી. ત્યારબાદ તે પોતાના વતન જંબુસર પહોંચી માતા-પિતા અને દાદા, દાદીના ચરણ સ્પર્શ કરીને આશીર્વાદ મેળવ્યા હતાં. ધ્રુવે ઘટનાને યાદ કરતા જણાવ્યું કે, "ઘટનાની ગંભીરતા કાલ્પનિક પણ ન હતી. હજુ પણ મન ભયભીત છે. જીવ બચ્યો તે ભગવાનની કૃપા છે. દુર્ઘટનામાં જીવ ગુમાવનાર તમામ માટે હું ભાવભીની શ્રદ્ધાંજલિ પાઠવું છું અને ઘાયલ થયેલાઓ માટે પ્રાર્થના કરું છું."

આજે આખું વિશ્વ ફાધર્સ ડે સેલિબ્રેટ કરી, પિતા પ્રત્યેની લાગણીઓને વ્યક્ત કરી રહ્યું છે. કેટલાંક એવા પણ સંતાનો છે જે તેમના પિતાથી કાયમ માટે વિખૂટા પડી ગયા છે. અમદાવાદ પ્લેન ક્રેશ દુર્ઘટનામાં રાજ્યના પૂર્વ મુખ્યમંત્રી વિજય રુપાણીનું પણ નિધન થયું. વિજય રુપાણી દીકરીને મળવા માટે જ લંડન જવા નીકળ્યા હતા. જો એ ગોઝારી દુર્ઘટના ન ઘટી હોત તો આજે કદાચ વિજય રુપાણી તેમની દીકરી સાથે લંડનમાં ફાધર્સ ડે સેલિબ્રેટ કરી રહ્યા હોત. પણ ઈશ્વરને કંઈક બીજું જ મંજૂર હતું. ચાર વર્ષ પહેલા જ્યારે વિજય રુપાણીએ રાજીનામું આપ્યું, ત્યારે શરુ થયેલા રાજકીય ગણગણાટ પર દીકરી રાધિકાએ પિતાની ઢાલ બનીને બધાને જડબાતોડ જવાબ આપ્યો હતો. રાધિકાએ ફેસબુક પર એક ઈમોશનલ પોસ્ટ કરી જેમાં તેને પિતાની સંવેદનશીલતા અને સાલસતાને તેમની તાકાત ગણાવી હતી અને એક દીકરીની નજરે રુપાણી કેવા છે તે લખ્યું હતું. પણ આજે દીકરી ત્રણ ત્રણ દિવસથી પિતાના અંતિમ દર્શન માટે તરસી ગઈ છે.

અમદાવાદ હવાઈ મથકેથી લંડન જતી એર ઈન્ડિયાની ફ્લાઈટ દુર્ઘટનાગ્રસ્ત થતાં 241 મુસાફરના મોત થયા છે. આ દુખદ ઘટનાને પગલે હિંમતનગરના મહેતાપુરા વિસ્તારમાં સ્થાનિકોએ મૃતકોને શ્રદ્ધાંજલિ અર્પણ કરી હતી. મહેતાપુરા ચાર રસ્તા પર સ્વામી વિવેકાનંદ સર્કલ પાસે ગઈકાલે સાંજે સ્થાનિક રહેવાસીઓ અને અગ્રણીઓ એકત્રિત થયા હતા. તેમણે વિમાન દુર્ઘટનામાં જીવ ગુમાવનાર તમામ મુસાફરોની યાદમાં મીણબત્તીઓ પ્રગટાવી શ્રદ્ધાંજલિ આપી હતી.

અમદાવાદમાં 12 જૂનના બપોરે 1.38 વાગ્યે બનેલી પ્લેન ક્રેશ દુઘર્ટનામાં મૃત્યુ પામેલા કલ્પનાબેન પ્રજાપતિના મૃતદેહને આજે વડોદરાના માંજલપુર વિસ્તારમાં આવેલા ધનલક્ષ્મી કોમ્પ્લેક્સ સ્થિત તેમના ઘરે લાવવામાં આવ્યો હતો. અહીં મૃતદેહ આવતાં જ સૌ કોઈની આંખમાં આંસુ હતા. પ્રજાપતિ પરિવાર હિબકે ચડ્યો હતો. કલ્પનાબેનના સાસુ ચૌધાર આસુંએ રડી રહ્યાં હતા અને કહી રહ્યાં હતા કે, 'તું કેમ જતી રહી મારા રાજુને એકલા મુકીને, તારા વગર મારો રાજુ કેવી રીતે જીવશે, તુ પાછી આવી જા'. અંતિમયાત્રામાં મોટી સંખ્યામાં લોકો જોડાયા હતા. ધનલક્ષ્મી કોમ્પ્લેક્સથી માંજલપુર સ્મશાન સુધી તેમની અંતિમયાત્રા નીકળી હતી અને માંજલપુર સ્મશાનમાં તેમના અંતિમ સંસ્કાર કરવામાં આવ્યા હતા. અંતિમયાત્રામાં વડોદરા શહેર ભાજપ પ્રમુખ જયપ્રકાશ સોની અને સ્થાનિક કોર્પોરેટરો પણ હાજર રહ્યા હતા. વડોદરા શહેર ભાજપ પ્રમુખ જયપ્રકાશ સોનીએ જણાવ્યું હતું કે, મૃતક કલ્પનાબેનના પુત્ર વ્રજ પણ લંડનથી વડોદરા આવી ગયા હતો. ત્યાર બાદ સવારે કલ્પનાબેનની અંતિમ યાત્રા નીકળી હતી અને માંજલપુર સ્મશાન ખાતે તેમની અંતિમ વિધિ પૂર્ણ કરવામાં આવી હતી. કલ્પનાબેન ખૂબ જ સારા સ્વભાવના હતા અને તેઓ અનેક સેવા કાર્ય સાથે જોડાયેલા હતા.

બોટાદ જિલ્લાના ગઢડા તાલુકાના અડતાળા ગામના 27 વર્ષીય હાર્દિકભાઈ અવૈયાનું વિમાન દુર્ઘટનામાં નિધન થયું છે. તેમનો મૃતદેહ આજે સવારે વતન અડતાળા ગામે લાવવામાં આવ્યો હતો. આ ઘટનાથી સમગ્ર પંથકમાં શોકની લાગણી છવાઈ ગઈ છે. હાર્દિકભાઈ છેલ્લા ત્રણ વર્ષથી લંડનમાં અભ્યાસ અને નોકરી કરતા હતા. તેમના પિતા દેવરાજભાઈએ પુત્રના ઉજ્જવળ ભવિષ્ય માટે પોતાની જમીન વેચીને તેમને લંડન મોકલ્યા હતા. દેવરાજભાઈને બે પુત્રો અને ત્રણ પુત્રીઓ છે. હાર્દિકભાઈ સૌથી નાના સંતાન હતા. તાજેતરમાં જ હાર્દિકભાઈનું કામરેજ તાલુકાના વિભૂતિબેન પટેલ સાથે વેવિશાળ થયું હતું. આ પ્રસંગે તેઓ વતન આવ્યા હતા. પરિવારમાં ખુશીનો માહોલ હતો. પરંતુ વિમાન દુર્ઘટનાએ આ ખુશી માતમમાં ફેરવી નાખી. આજે સવારે હાર્દિકભાઈની અંતિમયાત્રા નીકળી ત્યારે આખું અડતાળા ગામ શોકમગ્ન બન્યું હતું. મોટી સંખ્યામાં ગ્રામજનો અને સગા-સંબંધીઓએ અંતિમ વિદાય આપી હતી. ગઢડા મામલતદાર, પોલીસ ટીમ અને મેડિકલ ટીમ પણ હાજર રહી હતી. હાર્દિકભાઈ મહેનતુ અને આશાસ્પદ યુવાન હતા. તેમના અકાળે અવસાનથી અવૈયા પરિવાર પર આભ તૂટી પડ્યું છે. સમગ્ર અડતાળા ગામ આ દુઃખની ઘડીમાં પરિવારની સાથે છે.

અમદાવાદમાં થયેલા પ્લેન ક્રેશમાં મૃત્યુ પામેલા વિસનગરના ચાર લોકોના પાર્થિવ દેહને વતન લાવવામાં આવ્યા છે. મૃતકોમાં દિનેશભાઈ પટેલ અને કૃષ્ણાબેન પટેલ તેમજ દશરથભાઈ પટેલ અને ડાહી ગૌરીબેન પટેલ - બે દંપતીનો સમાવેશ થાય છે. આ ચારેય વ્યક્તિ લંડનમાં રહેતા તેમના પુત્રને મળવા જઈ રહ્યા હતા. વહીવટી તંત્ર દ્વારા વિસનગરથી એમ્બ્યુલન્સ મોકલીને મૃતદેહોને વતન લાવવામાં આવ્યા. મૃતદેહો આવતાં જ સમગ્ર વિસનગર શહેર શોકમાં ગરકાવ થઈ ગયું. પરિવારજનો અને સમાજના લોકો મોટી સંખ્યામાં એકત્રિત થયા હતા. સાર્વજનિક સ્મશાનગૃહ ખાતે ચારેય મૃતકોના અંતિમ સંસ્કાર વિધિવત રીતે કરવામાં આવ્યા. જિલ્લા વહીવટી તંત્રમાંથી પ્રાંત અધિકારી દેવાંગ રાઠોડ, ડીવાયએસપી દિનેશસિંહ ચૌહાણ અને પોલીસ ઇન્સ્પેક્ટર ગઢવી સહિતના અધિકારીઓ ઘટનાસ્થળે હાજર રહ્યા હતા. પોલીસે સમગ્ર કાર્યવાહી દરમિયાન ચુસ્ત બંદોબસ્ત જાળવી રાખ્યો હતો.

ગુરૂવારે અમદાવાદમાં સર્જાયેલી વિમાન દુર્ઘટનાનો ભોગ બનનારાના મૃતદેહો એ હદે બળી ગયા હતા કે તેની ઓળખ કરવી પણ મુશ્કેલ હતી પણ DNA ટેસ્ટના કારણે લાશની ઓળખ શક્ય બની શકી છે. 250થી વધુ ડેડ બોડીના સેમ્પલ નેશનલ ફોરેન્સિક સાયન્સ યુનિવર્સિટી (NFSU) અને ફોરેન્સિક સાયન્સ લેબોરેટરી (FSL)માં મોકલાયા હતા. જેનો DNA ટેસ્ટ કરવા માટે કર્મચારીઓએ ખાધા પીધા વગર સતત ખડેપગે રહી પોતાની ફરજ બજાવી હતી. ટેસ્ટ માટે વધુ કેમિકલની જરૂર પડતાં દિલ્હીથી ફ્લાઇટમાં મંગાવવું પડ્યું હતું. શુક્રવારે બપોર સુધીમાં NFSUમાં 140 ડેડ બોડીના સેમ્પલ જ્યારે FSLમાં 339 જેટલા સેમ્પલ આવ્યા હતા. તમામના DNA ટેસ્ટ માટે કર્મચારીઓ આખી રાત સ્ટેન્ડ બાય હતા અને ઇક્વિપમેન્ટ તૈયાર રખાયા હતા. NFSUમાંથી રાત્રે જ કેમિકલનો ઓર્ડર આપી દીધો હતો અને દિલ્હીથી શુક્રવારે સવારે જે ફ્લાઇટ આવી હતી તેમાં કેમિકલ મંગાવી લીધું હતું. 25થી 30 ફોરેન્સિક સાયન્ટિસ (પ્રોફેસર )આના પર કામ કરી રહ્યાં છે. જ્યારે FSLમાં 36 નિષ્ણાતો સતત 24 કલાક DNA ટેસ્ટ કરી રહ્યા છે.

અમદાવાદથી લંડન જઈ રહેલી એર ઈન્ડિયાની જે ફલાઈટ ક્રેશ થઈ તે આખી ઘટનાનો વિડિયો મોબાઈલ ફોનમાં ઉતારનાર 17 વર્ષના સગીરને ક્રાઈમ બ્રાંચ પકડીને લઈ ગઈ હતી. લગભગ 3 થી 4 કલાક સુધી સગીર અને તેના પિતાની પૂછપરછ કરવામાં આવી હતી. જો કે સગીરે પહેલી વખત આટલું નીચે વિમાન જોઈને તેનો વીડિયો ઉતાર્યો હતો. જેમાં પ્લેન ક્રેશની ઘટના પણ કેદ થઈ હતી. તેમાં કશું પણ ગુનાઈત નહીં જણાતા પોલીસે સગીર અને તેના પિતાનું નિવેદન લઈને તેમને જવા દીધા હતા. જો કે આ સગીર અને તેના પિતાએ પોલીસને જણાવ્યું હતુ કે, તેમનો દીકરો અંકલેશ્વરના એક ગામમાં ધોરણ - 12 માં અભ્યાસ કરે છે. જ્યારે દંપતી મેટ્રોમાં છૂટક મજૂરી કામ કરે છે. વેકેશન હોવાથી દીકરો 3 દિવસ પહેલા જ માતા - પિતા સાથે રહેવા અમદાવાદ આવ્યો હતો. તેણે આટલી નજીકથી પહેલી જ વખત ફલાઈટ જોઈ હોવાથી કુતુહલવશ વીડિયો ઉતાર્યો હતો.

અમદાવાદ વિમાન દુર્ઘટના મામલે દિવસ રાત ચાલી રહેલા રેસ્ક્યુ ઓપરેશનને હજુ બીજા બેથી ત્રણ દિવસ લાગી શકે છે. ગુજરાત સરકારના અધિકૃત સૂત્રોએ જણાવ્યું કે, વિમાન ઉપરાંત હોસ્ટેલ અને તેની આસપાસના વિસ્તારોમાં આગ લાગી હોવાથી મૃત્યુ પામનારાં લોકોની સંખ્યા ખૂબ વધુ છે. આગને કારણે ઘણાં મૃતદેહો ક્ષતવિક્ષત અવસ્થામાં હોવાથી તે તમામ અવશેષો ભેગા કરવામાં આવી રહ્યાં છે. આ ઉપરાંત કાટમાળ હટે તેમ-તેમ તેની નીચેથી મૃતદેહો કે માનવઅંગો મળવાની શક્યતા છે, આ સ્થિતિમાં ખૂબ સંવેદનશીલતા સાથે કામ કરવાનું હોવાથી તમામ નમૂનાનું પૃથક્કરણ કરવું જરૂરી છે. સરકારના સૂત્રો જણાવે છે કે, બ્લાસ્ટને કારણે 1000 ડિગ્રી તાપમાન થઇ ગયું તેમાં મૃતદેહ ખૂબ વધુ પ્રમાણમાં સળગી ગયા હોવાથી ઘણાં નમૂનાનું વારંવાર પૃથક્કરણ કરવું પડી રહ્યું છે. જે મૃતદેહ મળી આવે છે તેના ડીએનએની ચકાસણી ઉપરાંત કાટમાળમાંથી સળગેલાં પદાર્થનું પણ જીવ રાસાયણિક પૃથક્કરણ કરવામાં આવી રહ્યું છે, જેથી તે માનવઅંગ છે કે વિમાન અથવા મકાનનો કાટમાળ તે નક્કી કરી શકાય. અત્યાર સુધીમાં શુક્રવારે હોસ્ટેલ અને મેસમાંથી મળી આવેલા 8 મૃતદેહો ડીએનએ ટેસ્ટિંગ કન્ફર્મ કરીને મૃતકના પરિવારજનને સોપાયા છે, જ્યારે શનિવારે મળેલા 11ની ઓળખ બાદ મૃતદેહ સોપવાની વ્યવસ્થા કરાઇ છે.

વિમાન દુર્ઘટનામાં ચાંદખેડાના જનતા નગરની શ્રેષ્ઠ સોસાયટીમાં ક્રિશ્ચન પરિવારના દંપતી, ક્રિશ્ચન રોઝર અને તેમનાં પત્ની ક્રિશ્ચન રચનાબેનનું મોત થયું છે. ક્રિશ્ચન રોઝરના પિતા ક્રિશ્ચન ડેવિડે પોતાના પરિવાર વિશે અને તેમના દીકરા વિશે વાત કરતાં જણાવ્યું હતું કે મારા પરિવારમાં કુલ 5 વ્યક્તિઓનો સમાવેશ થાય છે. મોટો દીકરો ઑસ્ટ્રેલિયા અને નાનો દીકરો ક્રિશ્ચન રોઝર લંડનમાં રહેતા હતા. થોડા દિવસો અગાઉ ક્રિશ્ચન રોઝર અને મારી પુત્રવધૂ એટલે કે ક્રિશ્ચન રચના રોઝર મેડિકલ ટ્રીટમેન્ટ માટે અમદાવાદમાં આવ્યા હતા. શુક્રવારે અમારો ડીએનએ રિપોર્ટ લેવામાં આવ્યો છે.

વડોદરાના માંજલપુરમાં રહેતો ભાવિક મહેશ્વરી 5 વર્ષથી લંડનમાં નર્સિંગનો અભ્યાસ કરતો હતો. કૉલેજમાં 14 દિવસનું વૅકેશન પડતાં તે વડોદરા આવ્યો હતો. ભાવિકની સગાઈ નક્કી કરી હતી. ભાવિક તથા યુવતીએ પરિવારની હાજરીમાં બુધવારે કાનૂની રીતે સાણંદ કોર્ટમાં મેરેજ કર્યાં હતાં અને સગાં-સંબંધીઓ માટે ઘરે ફંક્શન પણ રાખ્યું હતું. એ પછી ગુરુવારે અમદાવાદ-લંડનની ફલાઇટમાં તે પરત જતો હતો. પણ પ્લેન ક્રેશમાં કાળનો કોળિયો બનતાં પરિવાર પર આભ તૂટી પડ્યું હતું. વડોદરામાં વેપાર-ધંધો કરતા મુકેશ મહેશ્વરીએ ભારે હૈયે કહ્યું કે, મારા બે દીકરા પૈકી મોટો ભાવિક 5 વર્ષથી લંડનમાં નર્સિંગનો અભ્યાસ કરતો હતો. ભાવિકની કોલેજમાં 14 દિવસનું વૅકેશન પડતાં તે સૌને મળવા ઘરે આવ્યો હતો. કરમની કઠણાઇ તો જુઓ પરિવાર અને સગાંસંબંધી સાથે હર્ષોલ્લાસ કરી પરત લંડન જતો હતો, ત્યારે જ પ્લેન ક્રેશનો શિકાર બની મહેશ્વરી પરિવારને એકલો મૂકી ફાની દુનિયા છોડીને ચાલ્યો ગયો.

પ્લેન ક્રેશની ઘટનામાં 70 ટકા મુસાફરના મૃતદેહ સીટ પરથી જ મળી આવ્યા હતા. આંચકા અને આગને કારણે કોઇ મૃતદેહ આખો મળ્યો નથી. 30 ટકા મુસાફર દરવાજા સુધી પહોંચ્યા હતા, પરંતુ તેમના મૃતદેહ એક્ઝિટ પોઇન્ટ પરથી મળ્યા. આગની ઘટનામાં હોસ્ટેલનો 300 મીટરનો વિસ્તારમાં આગની જ્વાળા ફેલાઈ હતી અને 900 મીટર વિસ્તારમાં પ્લેનનાં ફુરચાં ઊડ્યાં હતાં. જોકે પ્લેન ક્રેશની ઘટનામાં કેવી રીતે બચાવ કામગીરી કરવી તેની ફાયરબ્રિગેડે પાંચ જૂને જ તાલીમ લીધી હોવાથી તેઓ પ્લેનના અલગ અલગ ભાગને સમજી શક્યા હતા. ફાયરબ્રિગેડના અધિકારી ઓમ જાડેજાએ જણાવ્યું કે, પ્લેન ક્રેશની ઘટના બનતા જ મને એરપોર્ટ ઓથોરિટીનો ફોન આવ્યો. બીજી તરફ હું મારા ફાયર જવાનો સાથે તત્કાલ પહોંચી ગયો. અમારા પહેલાં જ એરપોર્ટની ફાયરબ્રિગેડ પહોંચી ચૂકી હતી. તેમની સાથે અમે જોડાઇ ગયા. થોડી વારમાં અમારા 140-145 જેટલા ફાયરબ્રિગેડ અધિકારી-કર્મચારી સ્થળ પર પહોંચ્યા. અમારી પ્રાથમિકતા આગને બુઝાવી શક્ય તેટલા મહત્તમ નાગરિકોને બચાવવાની હતી. ફાયરબ્રિગેડને છેલ્લા કેટલાક સમયમાં ત્રણ વખત આપદામાં કેવી રીતે કામ કરવું તેની તાલીમ મળી હતી. આ તાલીમને કારણે જ અમે પ્લેનના કયા ભાગમાં મુસાફરો હોય, ક્યાં લગેજ હોય તેની સીધી સમજ મળી રહી હતી. તીવ્ર જલદ પ્રવાહીના ધુમાડાને કારણે શ્વાસ લેવામાં મુશ્કેલી પડી હતી.

અમદાવાદ એર ઇન્ડિયા વિમાન ક્રેશનો વીડિયો : 17 વર્ષીય આર્યને ઉડતા વિમાનોમાંથી એકનો વીડિયો શૂટ કરવાનું અને તેને અરવલ્લી જિલ્લાના એક ગામમાં રહેતા તેના મિત્રોને મોકલવાનું નક્કી કર્યું હતું. જેમાં તેના દ્વારા પ્લેન ક્રેશનો એક લાઇવ વીડિયો પણ શૂટ થઇ ગયો હતો. જે વૈશ્વિક સ્તરે વાયરલ થયો હતો. જે ક્રેશ નિષ્ણાતોથી લઈને પોલીસ સુધી દરેક માટે વિશ્લેષણનો વિષય બન્યો હતો.