રશિયાની અગ્રણી તેલ કંપની Rosneft ના પ્રમુખ Igor Sechin એ ઇરાન યુદ્ધ અને Hormuz સંકટ વચ્ચે અમેરિકી ઊર્જા કંપનીઓને મોટા ફાયદા થયાનો આરોપ લગાવ્યો છે. તેમણે જણાવ્યું કે, વોશિંગ્ટન વૈશ્વિક ઊર્જા બજારને પોતાના હિત પ્રમાણે બદલી રહ્યું છે. Hormuz Straits ના સંકટને કારણે તેલની કિંમતો અનેક વર્ષોના ઉચ્ચતમ સ્તરે પહોંચી, જેનો સીધો ફાયદો અમેરિકી કંપનીઓને થયો. જોકે, આ નીતિને કારણે વૈશ્વિક અર્થવ્યવસ્થાને મોટો ફટકો પડ્યો છે. Sechin એ ચેતવણી આપી કે, જો તંગદીલી ચાલુ રહી તો અન્ય દરિયાઈ વેપાર માર્ગો પણ જોખમમાં મુકાઈ શકે છે.

સામાન્ય માણસ માટે રાહતના સમાચાર છે. હવે કંપનીઓ 1 કિલોના નામે 850 કે 900 ગ્રામ તેલ પકડાવી શકશે નહીં. આ છેતરપિંડી અટકાવવા કેન્દ્ર સરકારે ઐતિહાસિક નિર્ણય લીધો છે. ખાદ્ય તેલના પેકિંગ માટે મનસ્વી વજન પર પ્રતિબંધ મૂકી માત્ર 9 ચોક્કસ સાઇઝ જ નક્કી કરાઈ છે. હવે કોઈ પણ કંપની પોતાની મરજીથી ગમે તેવા વજનના પેકેટ બજારમાં વેચી શકશે નહીં. ગ્રાહક બાબતોના મંત્રાલયે લીગલ મેટ્રોલોજી ફ્રેમવર્ક હેઠળ આ નવો નિયમ બહાર પાડ્યો છે.

છેલ્લા બે વર્ષમાં પહેલીવાર Bitcoin $60,000ની સપાટી તોડીને નીચે ગયું છે. અમેરિકન પ્રમુખ ડોનાલ્ડ ટ્રમ્પની જીત બાદ આસમાને પહોંચેલું Bitcoin હવે રોકાણકારોને ચિંતિત કરી રહ્યું છે. ગયા વર્ષે $126,000 ની ટોચ પર પહોંચ્યા પછી, તેની કિંમતમાં અડધાથી વધુનો ઘટાડો થયો છે. નિષ્ણાતોના મતે, આ એક કુદરતી Market Cycle છે, જેમાં મોટા રોકાણકારો AI, ડિફેન્સ જેવા સેક્ટર્સમાં રોકાણ કરી રહ્યા છે. વૈશ્વિક અનિશ્ચિતતાને કારણે સોના તરફ આકર્ષણ વધ્યું છે અને વ્યાજદરો અંગેની અસમંજસ પણ એક કારણ છે. રોકાણકારોએ SIP દ્વારા અને પોર્ટફોલિયોના 2-5% જ રોકાણ કરવું જોઈએ.

ગીરના જંગલોમાં સિંહોના મૃત્યુ પાછળ કેનાઇન ડિસ્ટેમ્પર વાઈરસ (CDV) અને 'બબેસિઓસિસ' (Babesiosis) જેવા રોગોના કારણે થયેલા મોતના મામલે વિવાદ વકર્યો છે. વનમંત્રી અર્જુન મોઢવાડિયા વાઈરસ ન હોવાનો દાવો કરી રહ્યા છે, પરંતુ ગીર પૂર્વના DCF વિકાસ યાદવની સોશિયલ મીડિયા પોસ્ટમાં 'વાઈરસ બાદ સિંહ પરિવારના દર્શન' એવો ઉલ્લેખ થતાં વન વિભાગના દાવા સામે પ્રશ્નો ઉભા થયા છે. આ ઘટનાક્રમ વન વિભાગની પારદર્શિતા પર સવાલો ઉભા કરે છે.

ભારતમાં E85 ઇંધણના આગમન અંગે અફવાઓ ફેલાઈ રહી છે કે E20 પેટ્રોલ વાળી ગાડીઓ ભંગાર થઈ જશે. જોકે, કેન્દ્રીય પેટ્રોલિયમ મંત્રી હરદીપ સિંહ પુરીએ સ્પષ્ટ કર્યું છે કે E85 ઇંધણ માત્ર ફ્લેક્સ-ફ્યુઅલ વાહનો માટે જ છે. સામાન્ય E20 પેટ્રોલ વાળી ગાડીઓમાં E85 ઇંધણનો ઉપયોગ ન કરવો જોઈએ, નહીંતર એન્જિનને નુકસાન થઈ શકે છે. E20 અને E85 બે અલગ-અલગ કેટેગરીના ઇંધણ છે અને E85ના આગમનથી E20 અથવા પેટ્રોલ વાહનો બંધ નહીં થાય.

મે 2025 ના 'ઓપરેશન સિંદૂર' બાદ ચીન અને પાકિસ્તાનનો J-10C ફાઈટર જેટ પ્રોપેગેન્ડા નિષ્ફળ ગયો છે. વિયેતનામ અને ફિલિપિન્સ સાથે ભારતની બ્રહ્મોસ ડીલ ચીન અને પાકિસ્તાનની ચિંતા વધારી રહી છે. 'ઓપરેશન સિંદૂર' દરમિયાન પાકિસ્તાને ચીની ફાઈટર જેટ્સના આધારે દુષ્પ્રચાર કર્યો હતો, પરંતુ ભારતીય એર બ્લિટ્ઝ સામે પાકિસ્તાની ડિફેન્સ પડી ભાંગ્યું હતું. આ ઘટનાએ ચીની હથિયારોની વિશ્વસનીયતા પર સવાલ ઉભા કર્યા છે. જ્યારે ભારતની બ્રહ્મોસ મિસાઈલે ગ્લોબલ માર્કેટમાં ધૂમ મચાવી છે. ઇન્ડોનેશિયા, મલેશિયા અને થાઈલેન્ડ જેવા દેશો પણ બ્રહ્મોસ ખરીદવા રસ દાખવી રહ્યા છે, જે સાઉથ ચાઈના સીમાં ચીન માટે પડકાર બની રહી છે.

ગુજરાતમાં પ્રી-મોન્સૂન એક્ટિવિટીને કારણે આગામી દિવસોમાં અનેક વિસ્તારોમાં ગાજવીજ અને તેજ પવન સાથે વરસાદની સંભાવના છે. હવામાન વિભાગ મુજબ, 7 જૂને સૌરાષ્ટ્ર અને દક્ષિણ ગુજરાતના 10 જિલ્લાઓમાં ગાજવીજ સાથે હળવો વરસાદ પડી શકે છે. રાજસ્થાન અને ઉત્તર ગુજરાત પર સક્રિય સાયક્લોનિક સર્ક્યુલેશન અને ભેજને કારણે વાતાવરણ બદલાયું છે. નૈઋત્યનું ચોમાસું પણ આગળ વધી રહ્યું છે. 7 જૂને અમરેલી, ભાવનગર, ગીર સોમનાથ, છોટાઉદેપુર, નર્મદા, સુરત, ડાંગ, તાપી, નવસારી, વલસાડમાં વરસાદની શક્યતા છે. અમદાવાદમાં 42 ડિગ્રી તાપમાન રહેશે.

ગુજરાત પોલીસના બેડામાં મોટા ફેરફાર સાથે, અમદાવાદના વર્તમાન પોલીસ કમિશનર (CP) જ્ઞાનેન્દ્ર સિંહ મલિક (જી. એસ. મલિક) ને ગુજરાત રાજ્યના નવા પોલીસ વડા (DGP) તરીકે નિયુક્ત કરવામાં આવ્યા છે. આ અંગે ગૃહ વિભાગ દ્વારા સત્તાવાર જાહેરનામું બહાર પાડવામાં આવ્યું છે. હાલના ઇનચાર્જ DGP કે.એલ.એન. રાવના નિવૃત્ત થવાને કારણે, 5 મહિના બાદ ગુજરાતને કાયમી DGP મળ્યા છે. 1993ની બેચના સિનિયર IPS અધિકારી જી. એસ. મલિક, અમદાવાદમાં તેમની પ્રશંસનીય કામગીરી બાદ હવે રાજ્ય પોલીસ તંત્રની કમાન સંભાળશે.

પશ્ચિમ એશિયામાં ચાલી રહેલા સંઘર્ષ અને વૈશ્વિક આર્થિક અસ્થિરતા વચ્ચે, વડાપ્રધાન નરેન્દ્ર મોદીએ શનિવારે આર્થિક સલાહકાર સમિતિ સાથે એક મહત્વની બેઠકની અધ્યક્ષતા કરી. આ બેઠકમાં વૈશ્વિક અનિશ્ચિતતાઓ વચ્ચે ભારતની આર્થિક ગતિ જાળવી રાખવા, બાહ્ય આંચકાઓ સામે દેશને મજબૂત કરવા, એનર્જી માર્કેટ, સપ્લાય ચેઈન, મોંઘવારી અને વૈશ્વિક વેપાર પરના જોખમોનું વિશ્લેષણ કરાયું. PM મોદીએ આ દાયકાને "આફતોનો દાયકો" ગણાવી આત્મનિર્ભર બનવાની જરૂરિયાત પર ભાર મૂક્યો, ખાસ કરીને ઉર્જા અને મહત્વપૂર્ણ ક્ષેત્રોમાં. આર્થિક પ્રવૃત્તિઓને વેગ આપવા, રોકાણ વધારવા, પ્રોડક્ટિવિટી સુધારવા અને 'ઈઝ ઓફ ડુઈંગ બિઝનેસ' માટે કાયદાકીય સુધારાઓની ચર્ચા કરાઈ.

અમદાવાદના વટવામાં પોલીસે એક મોટા નકલી ચલણી નોટોના રેકેટનો પર્દાફાશ કર્યો છે, જેમાં 28.94 લાખ રૂપિયાની નકલી નોટો જપ્ત કરવામાં આવી છે. આંતરરાજ્ય કનેક્શન ધરાવતા આ કૌભાંડમાં છ આરોપીઓની ધરપકડ કરાઈ છે. વટવાના એક મકાનમાં ચાલતા આ કારખાનામાં 500 રૂપિયાની નકલી નોટો છાપવામાં આવતી હતી. મુખ્ય આરોપીના મૃત્યુ બાદ તેના સાગરીતો અન્ય રાજ્યોમાં ભાગ્યા હતા, પરંતુ પોલીસે ઉત્તર પ્રદેશ અને રાજસ્થાનમાં દરોડા પાડી તેમને દબોચી લીધા છે. વધુ તપાસ ચાલુ છે.

અમદાવાદના મોટેરામાં ગેરકાયદે બાંધકામો પર બુલડોઝર ચાલ્યું હતું. સ્થાનિકોના વિરોધની વચ્ચે ડિમોલિશનની કામગીરી શરૂ કરવામાં આવી હતી. જૂના ગામતળમાં 36 જેટલા ગેરકાયદે બાંધકામો તોડવાની કામગીરી શરૂ કરાઈ હતી. ડિમોલિશનની કામગીરીને લઈ સ્થાનિકોમાં આક્રોશ જોવા મળ્યો હતો. મકાન ખાલી કરવાની સૂચના મળતાં જ સ્થાનિકોમાં આક્રોશ જોવા મળ્યો હતો. લોકોના વિરોધને જોતા ગામમાં પોલીસ બંદોબસ્ત ગોઠવાયો હતો. એક યુવકે આત્મવિલોપનની ચીમકી આપતા પોલીસે તેની અટકાયત કરી હતી. પોલીસે એનાઉસ કરીને 30 મિનિટમાં મકાન ખાલી કરવાની સૂચના આપી હતી.

ગુજરાત રાજ્યના શિક્ષણ વિભાગમાં ફરજ બજાવતા 2 લાખ પ્રાથમિક શિક્ષકો નવા મહિનામાં આર્થિક સંકટનો સામનો કરી રહ્યા છે. વિદ્યાર્થીઓનું ભવિષ્ય ઘડનારા શિક્ષકોના ઘરનું બજેટ મોંઘવારીમાં ખોરવાઈ ગયું છે. રાજ્યના શિક્ષણ વિભાગ દ્વારા સમયસર ગ્રાન્ટ મંજૂર ન થવાને કારણે શિક્ષકોના પગારમાં થઈ રહેલો અસહ્ય વિલંબ ચિંતાનો વિષય બન્યો છે. રેકોર્ડબ્રેક બજેટ હોવા છતાં, શિક્ષકોને સમયસર વેતન માટે વલખાં મારવા પડી રહ્યા છે. હોમ લોન, કાર લોનના હપ્તા બાઉન્સ થતાં પરિવારો ભારે આર્થિક અને માનસિક તાણ અનુભવી રહ્યા છે.

ગુજરાતમાં દારૂબંધીના કડક અમલ વચ્ચે ગાંધીનગર લોકલ ક્રાઈમ બ્રાન્ચ (LCB)-II એ ડભોડા પોલીસ સ્ટેશન હદમાં રાણાસણ ગામની સીમમાં જમીનમાં દાટેલા 26 બેરલમાં 5,200 લિટર દેશી દારૂનો આથો ઝડપી પાડ્યો છે. ગુપ્ત બાતમી અને ટેકનિકલ સર્વેલન્સના આધારે LCB II ની ટીમે દરોડો પાડ્યો ત્યારે આરોપી જસવંત ઝાલા હાજર ન હતો. પોલીસે આશરે 1.3 લાખ રૂપિયાના મુદ્દામાલનો સ્થળ પર જ નાશ કર્યો અને આરોપી વિરુદ્ધ ગુજરાત પ્રોહિબિશન એક્ટ હેઠળ FIR દાખલ કરી વધુ કાર્યવાહી હાથ ધરી છે.

ભારત અને અફઘાનિસ્તાન વચ્ચેની ઐતિહાસિક ટેસ્ટ મેચમાં યુવા લેફ્ટ-આર્મ સ્પિનર માનવ સુથારને પ્લેઇંગ ઇલેવનમાં સ્થાન મળ્યું છે. આ મેચ દ્વારા તે ભારત તરફથી ટેસ્ટ ક્રિકેટ રમનાર 319મો ખેલાડી બન્યો છે, જેની કેપ તેને સીનિયર સ્પિનર કુલદીપ યાદવે પહેરાવી હતી. 23 વર્ષીય માનવ સુથાર, જે રાજસ્થાનનો રહેવાસી છે અને IPLમાં ગુજરાત ટાઇટન્સ માટે રમે છે, તે પોતાની બોલિંગ અને ઉપયોગી બેટિંગ ક્ષમતા માટે જાણીતો છે. રણજી ટ્રોફીમાં તેના શાનદાર પ્રદર્શન બાદ તેને આ તક મળી છે.

ગુજરાતમાં RTE હેઠળ ધોરણ 1માં વિનામૂલ્યે પ્રવેશ માટેનો બીજો રાઉન્ડ પૂર્ણ થયો છે, જેમાં 4244 બાળકોનો પ્રવેશ થયો છે. જોકે, હજુ 7022 બેઠકો ખાલી હોવાથી, 6 જૂનથી ત્રીજો ઓનલાઇન રાઉન્ડ શરૂ થઈ રહ્યો છે. આ રાઉન્ડમાં વાલીઓ નવી શાળાઓ પસંદ કરી શકશે અથવા અગાઉ પસંદ કરેલી શાળાઓમાં ફેરબદલ કરી શકશે. લાયક વાલીઓને SMS દ્વારા જાણ કરવામાં આવી છે અને તેઓ 6થી 8 જૂન સુધી ઓનલાઇન સ્કૂલ પસંદગી કરી શકશે.

મહેસાણાના કડી તાલુકામાં એક ચોંકાવનારી ઘટના સામે આવી છે, જ્યાં શાળા, મંદિર, આંગણવાડી, તબેલો અને રહેણાંક મકાનો સાથે 30થી વધુ વૃક્ષો ધરાવતી જમીનના ખોટા દસ્તાવેજો રજૂ કરી વેચાણ કરવામાં આવ્યું હતું. વેચનાર અને ખરીદનાર પક્ષે સરકારી અધિકારીઓને ગેરમાર્ગે દોરવા માટે ખેતીલાયક જમીનના ખોટા ફોટોગ્રાફ્સ અને માહિતીનો ઉપયોગ કર્યો હતો. આ મામલે તરસનીયા પ્રાથમિક શાળાના આચાર્યની વાંધા અરજી બાદ થયેલી તપાસમાં ઘટસ્ફોટ થયો. કડીના સબ-રજિસ્ટ્રારે બાવલુ પોલીસ સ્ટેશનમાં ફરિયાદ નોંધાવતા બે NRI સહિત કુલ 14 લોકો સામે ગુનો દાખલ કરી તપાસ શરૂ કરવામાં આવી છે.

ગુજરાતમાં ઉનાળાની ગરમી વચ્ચે હવામાન વિભાગ દ્વારા એક મોટી આગાહી કરવામાં આવી છે. રાજ્યમાં 'સાયક્લોનિક સર્ક્યુલેશન' સક્રિય થવાને કારણે 10 જૂન સુધી અનેક જિલ્લાઓમાં તેજ પવન સાથે હળવાથી મધ્યમ વરસાદ પડશે. ઉત્તર, મધ્ય, પૂર્વીય અને દક્ષિણ ગુજરાતના બનાસકાંઠા, પાટણ, મહેસાણા, ગાંધીનગર, અમદાવાદ, આણંદ, પંચમહાલ, દાહોદ, મહીસાગર, વડોદરા, છોટાઉદેપુર, નર્મદા, ભરૂચ, સુરત, ડાંગ, તાપી, નવસારી, વલસાડ, રાજકોટ, અમરેલી, ભાવનગર અને ગીર સોમનાથ જેવા વિસ્તારોમાં ગાજવીજ સાથે વરસાદની સંભાવના છે. આ સિસ્ટમને કારણે તાપમાનમાં ઘટાડો થશે અને ગરમી તથા બફારાથી રાહત મળશે.

ગુજરાતમાં 34 જિલ્લાની ખેતીલાયક જમીનમાં નાઇટ્રોજન, ફોસ્ફરસ, પોટેશિયમ સહિત 9 મુખ્ય તત્વોની ઊણપ જોવા મળી રહી છે. સૌરાષ્ટ્ર, કચ્છ, ઉત્તર, મધ્ય અને દક્ષિણ ઝોનમાં જમીનના પ્રકાર પ્રમાણે અલગ-અલગ પોષક તત્વોની ખામી છે. ખરીફ સિઝનમાં યોગ્ય પાક ઉત્પાદન માટે વાવણી પહેલાં જમીન પરીક્ષણ કરાવી, રાસાયણિક અને જૈવિક ખાતરનો યોગ્ય ઉપયોગ કરવો અત્યંત જરૂરી છે. આનાથી જમીનની ફળદ્રુપતા વધશે અને પાકનું ઉત્પાદન સારું મળશે.

બાલાસિનોર પાલિકા દ્વારા આંતરરાષ્ટ્રીય પર્યાવરણ દિવસની ઉજવણી કરવામાં આવી હતી. પર્યાવરણની જાળવણી અને કુદરતી સંપદાના સંવર્ધન માટે આયોજિત આ વિશેષ કાર્યક્રમ અંતર્ગત પાલિકા દ્વારા વૃક્ષારોપણ અભિયાન હાથ ધરવામાં આવ્યું હતું. આ કાર્યક્રમમાં શહેરના વિવિધ સ્તરના ચૂંટાયેલા પ્રતિનિધિઓ, પક્ષના અગ્રણી આગેવાનો, નગરપાલિકાનો વહીવટી સ્ટાફ્ અને શહેરના જાગૃત નાગરિકો મોટી સંખ્યામાં ઉપસ્થિત રહ્યા હતા અને પર્યાવરણની સુરક્ષા માટે કટિબદ્ધતા દર્શાવી હતી.

કરમસદ આણંદ મહપાલિકા (KAMC) દ્વારા વિશ્વ પર્યાવરણ દિવસની ભવ્ય ઉજવણી અખંડ ભારત ઉદ્યાન ખાતે વૃક્ષારોપણ અને પર્યાવરણ જાગૃતિ કાર્યક્રમ દ્વારા કરવામાં આવી. આ પ્રસંગે વિવિધ મહાનુભાવો, ધારાસભ્યો, મેયર, ડેપ્યુટી મેયર, કોર્પોરેટરો અને અધિકારીઓએ ઉપસ્થિત રહી પર્યાવરણ સંરક્ષણ અને હરિયાળા ગુજરાતના નિર્માણ માટે સંકલ્પ લીધો. કાર્યક્રમમાં વૃક્ષોના સંવર્ધન, સ્વચ્છ વાતાવરણ જાળવવા અને પર્યાવરણ સંરક્ષણને દૈનિક જીવનનો ભાગ બનાવવા પર ભાર મુકવામાં આવ્યો.

નડિયાદ શહેરમાં વિશ્વ પર્યાવરણ દિનના અવસરે 'એક પેડ મા કે નામ' અભિયાન હેઠળ રાજ્યના સૌ પ્રથમ 'પત્રકાર વન'નું ઉદ્ઘાટન કરવામાં આવ્યું. ખેડા જિલ્લા માહિતી કચેરી અને જિલ્લા વન વિભાગના સંયુક્ત ઉપક્રમે યોજાયેલા આ કાર્યક્રમમાં અનેક મહાનુભાવો અને પત્રકારો જોડાયા હતા. આ વનમાં પર્યાવરણ અને આયુર્વેદિક રીતે ઉપયોગી એવા 211 વિવિધ રોપા, જેમાં લીમડો, બોરડી, વડ, પીપળ જેવા વૃક્ષોનો સમાવેશ થાય છે, તેનું વાવેતર કરાયું છે.

ખેડા જિલ્લા પોલીસે નડિયાદ ડિવિઝન હેઠળના નડિયાદ ટાઉન, રુરલ, વડતાલ અને મહુધા પોલીસ સ્ટેશન વિસ્તારમાં કુલ 41 ગુનાઓમાં ઝડપાયેલા 90 લાખ રૂપિયાના વિદેશી દારુના મુદ્દામાલનો નાશ કર્યો છે. કાયદાકીય મંજૂરી બાદ, સક્ષમ અધિકારીઓની હાજરીમાં, નડિયાદ નજીક પીજ ચોકડી ખાતે 30234 બોટલોનો નાશ કરવામાં આવ્યો. આ પ્રક્રિયા નડિયાદ ડિવાયએસપી વિમલ બાજપાઈ, ચારેય પોલીસ સ્ટેશનના પી.આઈ. અને મામલતદાર સહિતના સ્ટાફની ઉપસ્થિતિમાં સંપન્ન થઈ.

દર વર્ષે 5 જૂને ઉજવાતા વિશ્વ પર્યાવરણ દિવસ નિમિત્તે છોટાઉદેપુરના બોડેલી ખાતે આવેલી નવજીવન સ્કૂલે ઉત્સાહભેર ભાગ લીધો. આ ઉજવણીનો મુખ્ય હેતુ પ્રકૃતિ પ્રત્યે જાગૃતિ ફેલાવવાનો અને પર્યાવરણીય સુરક્ષા માટે પ્રેરણા આપવાનો હતો. બોડેલી એસ.ટી. ડેપો ખાતે સ્કૂલના શિક્ષકો, વિદ્યાર્થીઓ અને કર્મચારીઓએ મળી વૃક્ષારોપણ કર્યું તથા ડેપો વિસ્તારની સફાઈ કરીને પર્યાવરણના સંરક્ષણમાં પોતાનું યોગદાન આપ્યું.

મહેમદાવાદ તાલુકાના કારછાઈથી કતકપુરા જતી માઇનોર કેનાલમાં નિર્માણ કાર્ય પૂર્ણ થયા બાદ આજ સુધી એક ટીપું પાણી આવ્યું નથી. ખેડૂતો કરોડો રૂપિયાના ખર્ચે બનેલી આ કેનાલમાં પાણી છોડ્યા પહેલા જ તૂટવા લાગી હોવાની ફરિયાદ કરી રહ્યા છે. હાલ ખેડૂતો પોતાના બોરવેલનું પાણી કેનાલમાં છોડી ખેતરો સુધી પહોંચાડવા મજબૂર છે. આ મામલે ઉચ્ચ સ્તરીય તપાસ અને જવાબદાર અધિકારીઓ સામે કાર્યવાહીની માંગ સાથે નિયમિત પાણી છોડવાની અપીલ કરાઈ છે.

કરજણ નગર ભાજપ અને યુવા ભાજપ દ્વારા પર્યાવરણ બચાવવા માટે એક પેડ મા કે નામ અંતર્ગત વૃક્ષારોપણ કાર્યક્રમ કરેલ છે. પર્યાવરણ બચાવવા માટે વધુને વધુ વૃક્ષો વાવી તેનું જતન કરવાની પ્રતિજ્ઞા લેવામાં આવેલ છે. કાર્યક્રમમાં નગર ભાજપના હોદ્દેદારો, કાર્યકરો, યુવા ભાજપ કાર્યકરો, હોદ્દેદારો સહિત પાલિકાના કોર્પોરેટરો ઉપસ્થિત રહી સંયુક્ત વિશ્વપર્યાવરણ દિન નિમિત્તે વિવિધ જગ્યાએ લગભગ 270 જેટલા વૃક્ષો વાવી પર્યાવરણ બચાવવાના પ્રયત્નો કર્યા હતા.

અરવલ્લી જિલ્લાના બાયડ તાલુકામાં જીતપુરથી આકરૂંદ રોડ પર કેશરપુરા સુધીનો માર્ગ 2017 બાદ અત્યંત બિસ્માર બન્યો છે. ભારે ટ્રકોની અવરજવરથી ધૂળ અને ચોમાસામાં ખાડાઓ સમસ્યા સર્જે છે. નવો રસ્તો બનાવવાનું કાર્ય વન વિભાગની મંજૂરી વિના વૃક્ષો કાપવાથી અટકી ગયું છે. ગ્રામજનોએ વહીવટીતંત્રને તાત્કાલિક રસ્તો બનાવવા અને અટકેલું કામ ફરી શરૂ કરવા રજૂઆત કરી છે.

પાદરા તાલુકાના ચિત્રાલ ગામ ખાતે ભાજપ કાર્યકરો દ્વારા પર્યાવરણ દિવસની ઉજવણી કરવામાં આવી. સાગર વિદ્યાલયમાં સવારે 9 કલાકે તાલુકા ભાજપના કાર્યકરોએ વૃક્ષારોપણ કર્યું. આ પ્રસંગે વડોદરા જિલ્લા ભાજપના મંત્રી બ્રિજેશ પટેલ, તાલુકા ભાજપ પ્રમુખ સંજયસિંહ પરમાર અને અન્ય અનેક આગેવાનો, સરપંચો અને સાગર વિદ્યાલયના ટ્રસ્ટીઓ હાજર રહ્યા હતા. કાર્યકરોએ લોકોને વધુ વૃક્ષો વાવવા અને તેનું જતન કરવા અપીલ કરી, જેને સારો પ્રતિસાદ મળ્યો.

વિશ્વ પર્યાવરણ દિવસની ઉજવણી અંતર્ગત છોટાઉદેપુર જિલ્લાના નસવાડી તાલુકા સ્થિત CHC ગઢબોરિયાદ ખાતે ૨૦૦ જેટલા વૃક્ષોનું વાવેતર કરવામાં આવ્યું. આ કાર્યક્રમનો મુખ્ય ઉદ્દેશ પર્યાવરણનું સંરક્ષણ અને હરિયાળીને પ્રોત્સાહન આપવાનો હતો. CHC ના તબીબી અધિકારી, આરોગ્ય કર્મચારીઓ, વનવિભાગના અધિકારીઓ, સ્થાનિક આગેવાનો અને વિવિધ સામાજિક વર્ગોના લોકો આ પ્રસંગે જોડાયા હતા. મહાનુભાવોએ પર્યાવરણના ઘટતા જતા સંતુલન અંગે ચિંતા વ્યક્ત કરી વધુ વૃક્ષારોપણ અને તેની જાળવણીની અપીલ કરી.

મોડાસાની સૂર્યોદય સ્મોલ ફાઇનાન્સ બેંક સાથે રૂ.61,59,387ની મસમોટી છેતરપિંડી આચરી છેલ્લા દોઢ વર્ષથી ફરાર મુખ્ય આરોપી રવિરાજ સોલંકીને અરવલ્લી જિલ્લા પોલીસે ઝડપી પાડ્યો છે. આ આરોપી કરણપુર ગામનો રહીશ છે અને તે બેંકમાં ફિલ્ડમાં કામ કરતો હતો. તેણે ગ્રાહકોને લોનની લાલચ આપી, જરૂરી દસ્તાવેજો મેળવી, લોનના નાણાં બેંકમાં જમા કરાવવાને બદલે પોતાના કબજામાં રાખી લીધા હતા. ગ્રાહકોના અંગૂઠાના નિશાનનો ઉપયોગ કરી બારોબાર નાણાં ઉપાડી બેંકને આર્થિક નુકસાન પહોંચાડ્યું હતું. આ અંગે મોડાસા ટાઉન પોલીસ સ્ટેશનમાં ગુનો નોંધાયો હતો.

ગોધરા શહેરમાં નર્મદા કેનાલમાં પાણીનું લેવલ ઘટવાને કારણે સતત બીજા દિવસે પણ પાણી પુરવઠો ખોરવાયો છે. શુક્રવારે સાંજે નર્મદા કેનાલમાં પૂરતું પાણી ન હોવાથી અને નગરપાલિકાની મોટર ડૂબી ન શકવાને કારણે પાણી પહોંચાડી શકાયું નહોતું. અગાઉ પાઇપલાઇન મરામતને કારણે પણ પાણી મળ્યું નહોતું, જેનાથી નાગરિકોને ભારે હાલાકીનો સામનો કરવો પડ્યો. નગરપાલિકાએ સહકારની અપેક્ષા વ્યક્ત કરી છે.