સાબરકાંઠા જિલ્લાના પોશીના પોલીસે દેલવાડાથી લાંબડીયા રોડ પરથી એક કારમાંથી રૂ. 15 લાખથી વધુનો 31.550 કિલોગ્રામ ગાંજો જપ્ત કર્યો છે. પોલીસે કાર ચાલકની ધરપકડ કરીને વધુ કાર્યવાહી હાથ ધરી છે. પોશીના પોલીસ સ્ટેશનના PI ડી.એન. સાધુએ જણાવ્યું હતું કે, પોલીસ સ્ટાફ પેટ્રોલિંગમાં હતો ત્યારે દીપકકુમારને બાતમી મળી હતી. બાતમી મુજબ, એક હોન્ડા અમેઝ ગાડી (રજી.નં. GJ 02 BH 7066) દેલવાડાથી હડાદ તરફ જઈ રહી હતી અને તેમાં શંકાસ્પદ માદક પદાર્થ ભરેલો હતો. આ બાતમીના આધારે પોલીસે દેલવાડાથી લાંબડીયા રોડ પર વોચ ગોઠવી હતી. બાતમીવાળી ગાડી આવતા તેને રોકવામાં આવી હતી અને તપાસ કરતા તેમાંથી 31.550 કિલોગ્રામ સૂકો ગાંજો મળી આવ્યો હતો, જેની કિંમત રૂ. 15,77,500 આંકવામાં આવી છે. પોલીસે ગાંજા ઉપરાંત બે મોબાઈલ ફોન (કિંમત રૂ. 15,000), હોન્ડા અમેઝ કાર (કિંમત રૂ. 3,00,000) અને રોકડ રૂ. 210 સહિત કુલ રૂ. 18,92,710 નો મુદ્દામાલ જપ્ત કર્યો હતો. પકડાયેલા આરોપીની ઓળખ રીતેશ રસિકલાલ વ્યાસ (ઉં.વ. 48, રહે. ગોખરવા, તા. ચાણસ્મા, જિ. પાટણ) તરીકે થઈ છે. પોલીસે NDPS એક્ટ હેઠળ ગુનો નોંધી વધુ તપાસ હાથ ધરી છે.