રાજકોટમાં એક ચોંકાવનારી ઘટના સામે આવી છે, જ્યાં 17 વર્ષીય તરુણે ઇન્સ્ટાગ્રામ પર જોયેલા ઓનલાઇન ટ્રેડિંગના ચક્કરમાં ₹31.20 લાખ ગુમાવ્યા છે. આ મામલે તરુણના પિતાએ સાયબર ક્રાઇમ પોલીસ સ્ટેશનમાં ફરિયાદ નોંધાવી છે. તપાસ દરમિયાન જાણવા મળ્યું છે કે, ઇન્સ્ટાગ્રામ પર બિઝનેસ આઇડિયા સંબંધિત રીલ્સ જોતી વખતે તરુણે એક સીએના એકાઉન્ટનો સંપર્ક કર્યો હતો. ત્યારબાદ તેને એક વોટ્સએપ ગ્રુપમાં એડ કરાયો, જ્યાં સ્ટોક માર્કેટ અને IPO માં રોકાણ અંગે માર્ગદર્શન આપવામાં આવતું હતું. આ લાલચમાં આવીને તેણે એક એપ દ્વારા મોટી રકમનું રોકાણ કર્યું, અને બાદમાં કમિશન તથા ટેક્સના નામે વધુ પૈસા માંગતા તેને છેતરપિંડીનો અહેસાસ થયો.