બોટાદ/ભાવનગર : બોટાદ જિલ્લામાં દિવસ દરમિયાન ગરમી, બફારા બાદ સાંજે વાતાવરણમાં આવેલા પલટાના કારણે બોટાદ શહેરમાં સવા ઈંચ, બરવાળામાં અર્ધો અને રાણપુરમાં પા ઈંચ પાણી વરસી ગયું હતું. જેના કારણે લોકોને ગરમી અને ઉકળાટમાં રાહત મળી હતી. ભાવનગરમાં પણ રાત્રે કેટલાક વિસ્તારમાં ઝાપટા અને કેટલાક વિસ્તારમાં માત્ર છાંટા જ વરસ્યા હતા. હજુ ચોમાસાની ઋતુનું સત્તાવાર આગમન નથી થયું ત્યાં સવા ઈંચ જેટલા વરસાદમાં જ વીજ તંત્રની પોલ ખુલી ગઈ હોય તેમ અનેક વખત વીજળી ડૂલ થઈ હતી.