વડોદરાના ડભોઇ તાલુકા સ્થિત સુપ્રસિદ્ધ યાત્રાધામ કરનાળી ખાતે શ્રી કુબેર ભંડારી મહાદેવ મંદિરે ભાદરવા મહિનાની સર્વપિતૃ અમાસ અને શનિવારના સંયોગ નિમિત્તે હજારો ભક્તો ઉમટી પડ્યા હતા. ગુજરાત ઉપરાંત મહારાષ્ટ્ર, મધ્યપ્રદેશ અને ઉત્તરપ્રદેશ જેવા રાજ્યોમાંથી આવેલા ભક્તોએ વહેલી સવારથી જ દર્શન માટે લાંબી કતારો લગાવી હતી. અમાસના દિવસે કુબેરદાદાના દર્શનનું વિશેષ ધાર્મિક મહત્વ હોવાથી, ભક્તોને દર્શન માટે લગભગ પાંચ કલાક સુધી રાહ જોવી પડી હતી. ડભોઇના ધારાસભ્ય શૈલેષ મહેતાએ રાત્રે મંદિરના કપાટ ખોલ્યા બાદ ભક્તોએ દર્શનનો લાભ લીધો હતો. નવરાત્રિ પૂર્વે ધાર્મિક માહોલ વચ્ચે મંદિર ટ્રસ્ટ દ્વારા દર્શનાર્થીઓ માટે વ્યવસ્થા ગોઠવાઈ હતી.