છોટાઉદેપુર અને વડોદરા જિલ્લાઓમાં અનંત ચતુર્દશીના પવિત્ર અવસરે 'ગણપતિ બાપ્પા મોરિયા, પુઢચ્યા વર્ષી લવકર યા'ના મંત્રોચ્ચાર સાથે ગણેશજીની ભવ્ય વિસર્જન યાત્રાઓ નીકળી હતી. છેલ્લા દસ દિવસથી ગણેશજીની ભક્તિમાં લીન રહેલા સમગ્ર જિલ્લાએ ભારે હૈયે અને અશ્રુભીની આંખે ભગવાન શ્રીજીને વિદાય આપી. છોટાઉદેપુર, વડોદરા અને આસપાસના વિસ્તારોમાં વિવિધ સ્થળોએ, ઢોલ-નગારા અને ડીજેના સથવારે યુવાનો-યુવતીઓ ઉત્સાહભેર જોડાયા હતા. ઓરસંગ નદી અને જિલ્લાના તળાવોમાં શ્રદ્ધાળુઓએ પૂજન-અર્ચન સાથે ગણપતિજીને વિદાય આપી. આ વિસર્જન પ્રક્રિયા શાંતિપૂર્ણ અને સુરક્ષિત રીતે સંપન્ન થાય તે માટે જિલ્લા વહીવટીતંત્ર અને પોલીસ વિભાગ દ્વારા યોગ્ય સુરક્ષા વ્યવસ્થા ગોઠવવામાં આવી હતી.