ગુજરાત સરકારના સામાન્ય વહીવટ વિભાગે IAS અધિકારીઓની બદલી, વધારાના ચાર્જ અને નવી નિમણૂકો અંગે જાહેરનામું બહાર પાડ્યું છે. IAS બી.એ. શાહને કમિશનર ઓફ લેન્ડ રિફોર્મ્સ અને મહેસૂલ વિભાગના એક્સ-ઓફિસિયો સેક્રેટરી તરીકે કાયમી નિમણૂક આપવામાં આવી છે. IAS આર્દ્રા અગ્રવાલને સેટલમેન્ટ કમિશનર અને ડાયરેક્ટર ઓફ લેન્ડ રેકોર્ડ્સનો વધારાનો ચાર્જ સોંપાયો છે. ડૉ. રતનકંવર ગઢવીચરણને કમિશનર, ન્યુટ્રિશન મિશનનો વધારાનો ચાર્જ મળ્યો છે. ઉપરાંત IAS અરવિંદ વી.ને નાણાં વિભાગ (બજેટ)ના સંયુક્ત સચિવ તરીકે નવી નિમણૂક આપવામાં આવી છે.

સાબરકાંઠાના તલોદ તાલુકાના રૂપાલ ગામમાં અનુસૂચિત સમાજના લોકો સાથે ભેદભાવ અને ઉત્પીડનના ગંભીર આક્ષેપો સામે આવ્યા છે. પીડિતોનો આરોપ છે કે ગામના કેટલાક અસામાજિક તત્વો તેમને બંધારણીય અધિકારોથી વંચિત રાખી સામાજિક, આર્થિક અને ધાર્મિક સ્તરે ભેદભાવ કરી રહ્યા છે. એટ્રોસિટી એક્ટ હેઠળ છ ફરિયાદો અને અનેક રજૂઆતો છતાં યોગ્ય કાર્યવાહી ન થતાં પીડિતોએ ગામ છોડીને હિજરત કરવાની ચીમકી આપી છે. આ મામલે હિંમતનગર જિલ્લા કચેરી ખાતે નિવાસી અધિક કલેક્ટરને આવેદનપત્ર પાઠવી ન્યાયની માંગ કરવામાં આવી છે. અગાઉ સમાધાનના પ્રયાસો થયા હતા, છતાં ગામમાં ફરી તણાવનું વાતાવરણ સર્જાયું છે.

ભારતની મહત્વાકાંક્ષી મુંબઈ-અમદાવાદ બુલેટ ટ્રેન પ્રોજેક્ટનો ફર્સ્ટ લુક સત્તાવાર રીતે જાહેર કરવામાં આવ્યો છે. Ministry of Railwaysએ નવી દિલ્હીમાં પોતાના ગેટ નંબર 4 પર હાઈ-સ્પીડ ટ્રેન સેટનો ફોટો પ્રદર્શિત કર્યો છે, જેમાં ટ્રેનની આધુનિક એરોડાયનેમિક ડિઝાઇન જોવા મળે છે. મુંબઈ-અમદાવાદ હાઈ-સ્પીડ રેલ કોરિડોર કુલ 508 કિલોમીટર લાંબો છે અને તેનો પ્રારંભ 15 ઓગસ્ટ 2027 સુધી થવાની શક્યતા વ્યક્ત કરવામાં આવી છે. આ બુલેટ ટ્રેનથી હાલમાં કલાકો લેતી મુસાફરી માત્ર આશરે 2 કલાકમાં પૂર્ણ થઈ શકશે, જે મુસાફરો માટે મોટી રાહત સાબિત થશે.

અમદાવાદના સેટેલાઇટ વિસ્તારમાં એક દુઃખદ ઘટના સામે આવી છે, જ્યાં 48 વર્ષીય સીમાબેન દવેએ રહેણાંક ટાવરના સાતમા માળેથી કૂદી આત્મહત્યા કરી હતી. પોલીસની પ્રાથમિક તપાસ મુજબ મહિલા લાંબા સમયથી માનસિક બીમારીથી પીડાઈ રહી હતી. ઘટનાસ્થળેથી મળેલી સુસાઇડ નોટમાં મહિલાએ પોતાના મોત માટે પરિવાર કે પતિને જવાબદાર ન ગણાવી કંટાળાને કારણે આ પગલું ભર્યાનું લખ્યું હતું. પોલીસે સાતમા માળેથી મહિલાના ચંપલ પણ કબજે કર્યા છે. હાલ મૃતદેહને પોસ્ટમોર્ટમ માટે મોકલી વધુ તપાસ હાથ ધરવામાં આવી રહી છે.

સુરેન્દ્રનગર જિલ્લાના સાયલામાં સરકારી ટેકાના ભાવે ઘઉંની ખરીદી શરૂ ન થતાં ખેડૂતોમાં ભારે રોષ ફેલાયો છે. 22 એપ્રિલથી ખરીદી પ્રક્રિયા શરૂ થવાની જાહેરાત છતાં એક મહિના બાદ પણ 110 નોંધાયેલા ખેડૂતોમાંથી માત્ર 4 ખેડૂતો પાસેથી જ ઘઉં ખરીદવામાં આવ્યું છે. પુરવઠા વિભાગ દ્વારા બારદાનની અછતનું કારણ દર્શાવવામાં આવી રહ્યું છે. ઘઉં વેચાણ અટવાતા ખેડૂતો આર્થિક મુશ્કેલીમાં મુકાયા છે અને ખાતર, બિયારણ તથા ચોમાસાની વાવણી માટે જરૂરી આયોજન કરવામાં પણ અસમર્થ બન્યા છે. ગરમી વચ્ચે ખેડૂતોને તંત્રની બેદરકારીનો ભોગ બનવું પડી રહ્યું છે.

અમદાવાદના નિકોલના જ્વેલર્સમાંથી 1.11 કરોડના દાગીના ચોરનાર સેલ્સગર્લ હર્ષિદા શેટ્ટી અને તેના પ્રેમીને ક્રાઇમ બ્રાન્ચે અમદાવાદથી ઝડપી પાડ્યા. સ્ટોક વેરિફિકેશનમાં 1 કિલોથી વધુ સોનું ગાયબ મળ્યું હતું, જે CCTV ફૂટેજમાં હર્ષિદા કપડાંના ગજવામાં છુપાવતી જોવા મળી. સારી લાઈફ જીવવાની લાલચમાં પ્રેમી સાથે મળીને દિલ્હી અને ઋષિકેશ ફરવા નીકળી ગઈ હતી. પોલીસે બંનેના બેન્ક ટ્રાન્ઝેક્શન અને CDRની તપાસ શરૂ કરી છે.

સુરેન્દ્રનગર જિલ્લામાં અકસ્માતે મોતના નામે ફાઇલ થયેલા એક રહસ્યમય કેસનો અમદાવાદ ક્રાઇમ બ્રાન્ચે પર્દાફાશ કર્યો છે. સુરેન્દ્રનગરની કેનાલમાંથી મળી આવેલો અજાણ્યો મૃતદેહ અકસ્માત નહીં, પરંતુ આયોજનબદ્ધ રીતે કરવામાં આવેલી હત્યા હોવાનું સામે આવ્યું છે. હ્યુમન ઇન્ટેલિજન્સ અને ટેકનિકલ તપાસના આધારે ક્રાઇમ બ્રાન્ચે ઘટસ્ફોટ કર્યો છે કે મૃતકની પત્નીએ જ પોતાના પ્રેમી સાથે મળીને પતિને રસ્તામાંથી હટાવવાનો કારસો ઘડ્યો હતો. આ મામલે પોલીસે મૃતકની પત્ની અને તેના પ્રેમીની ધરપકડ કરી જેલભેગા કર્યા છે.

કચ્છના રાપર પોલીસે ગુપ્ત બાતમીના આધારે મામાદેવ મંદિર પરિસરમાંથી ગેરકાયદે ઉગાડવામાં આવેલા 14 ગાંજાના લીલા છોડ જપ્ત કર્યા છે. આશરે 2.47 કિલો વજનના આ છોડની કિંમત ₹1.23 લાખથી વધુ હોવાનું સામે આવ્યું છે. પોલીસે છેલ્લા છ વર્ષથી મંદિરમાં સેવા આપતા 61 વર્ષીય પૂજારી સામત મમુભાઈ રબારી ઉર્ફે બાલકનાથની ધરપકડ કરી છે. રાપરથી પાલનપર રોડ નજીક આવેલા મંદિરમાં સર્ચ ઓપરેશન દરમિયાન અલગ-અલગ જગ્યાએથી ગાંજાના છોડ મળી આવ્યા હતા. પોલીસે આરોપી સામે NDPS એક્ટ હેઠળ ગુનો નોંધી વધુ તપાસ શરૂ કરી છે.

સુરત શહેરમાં કાયદો અને વ્યવસ્થાની સ્થિતિ પર સવાલો ઉઠાવતી એક સનસનાટીભરી ઘટના સામે આવી છે. શહેરના ઉધના રોડ નંબર 6 ખાતે ભાજપના યુવા પદાધિકારી જય દલાલની તીક્ષ્ણ હથિયારોના ઘા ઝીંકીને જાહેરમાં ક્રૂર હત્યા કરવામાં આવતા ચકચાર મચી ગઇ છે. મૃતક જય દલાલ સુરતના લીંબાયત વિસ્તારના ધારાસભ્ય સંગીતાબેન પાટીલની અત્યંત નજીક ગણાતા મહિલા અગ્રણી જયશ્રીબેન દલાલનો પુત્ર હતો. આ ઉપરાંત તે પોતે પણ ભાજપ સંગઠન સાથે સક્રિયપણે જોડાયેલો હતો અને ડીંડોલી વોર્ડ યુવા મોરચાના ઉપપ્રમુખ તરીકે પક્ષની જવાબદારી સંભાળતો હતો.

દીવના નાગવા મેઇન રોડ પર બે ફોર-વ્હીલર ગાડીઓની ટક્કરમાં વેકેશન માણવા આવેલા પરિવારના પિતા-પુત્રનું કરુણ મોત થયું. અકસ્માતમાં અન્ય બે સભ્યોને પણ ગંભીર ઇજાઓ પહોંચતાં વધુ સારવાર માટે ઉના ખસેડાયા.

વિજાપુરમાં સાવકા પિતાએ સગીરાને બળાત્કારનો શિકાર બનાવી. માતા વેપાર કરવા જતી ત્યારે એકલતાનો લાભ ઉઠાવી, ધમકી આપી, વર્ષ 2022થી શારીરિક સંબંધ બાંધી બળાત્કાર ગુજાર્યો. સગીરાએ હિંમત ભેગી કરી ફરિયાદ નોંધાવી. પોલીસે પોક્સો એક્ટ હેઠળ ગુનો નોંધી કાર્યવાહી હાથ ધરી.

સૌરાષ્ટ્ર યુનિવર્સિટીમાં CCDC, JIO UPSC ભવન અને સ્વામી વિવેકાનંદ સ્ટડી સેન્ટર દ્વારા IAS-IPS બનવાનું વિદ્યાર્થીઓનું સ્વપ્ન સાકાર થઈ રહ્યું છે. અહી નિષ્ણાત ફેકલ્ટી દ્વારા વિનામૂલ્યે તાલીમ આપવામાં આવે છે, જેમાં રુ. 1000 થી 8000 સુધીની રિફંડેબલ ડિપોઝિટ લેવાય છે. 130 થી વધુ વિદ્યાર્થીઓ GPSC પાસ કરી ઓફિસર બન્યા છે.

ગુજરાતમાં આકરી ગરમીનો પ્રકોપ વધ્યો છે. છેલ્લા 24 કલાકમાં સરેરાશ તાપમાનમાં 2 ડિગ્રી વધારો થયો છે. 6 શહેરોમાં પારો 42°Cને પાર પહોંચ્યો છે, જેમાં 44.5°C સાથે સુરેન્દ્રનગર સૌથી ગરમ રહ્યું. અમદાવાદ, રાજકોટ, ગાંધીનગરમાં 43°C થી ઉપર તાપમાન નોંધાયું. સુરતમાં 6.2°C વધુ તાપમાનને કારણે તીવ્ર હીટવેવનો અનુભવ થયો. આગામી 2 દિવસ તાપમાન સ્થિર રહેશે, પછી 2-3 ડિગ્રી ઘટશે.

સુરત ક્રાઇમ બ્રાન્ચે 21 ગુનાહિત ઇતિહાસ ધરાવતા રીઢા ગુનેગાર સુબોધ રામાણીને સચિન વિસ્તારમાં પાનના ગલ્લા પર લૂંટના કેસમાં ઝડપી પાડ્યો છે. આરોપીએ મફતમાં માવો ખાઈ પૈસા માંગતા વેપારીને માર મારી 7-8 હજારની લૂંટ ચલાવી હતી. તેની સામે હત્યાનો પ્રયાસ, લૂંટ, ચોરી સહિત કુલ 21 ગુના નોંધાયેલા છે અને 3 વખત પાસા હેઠળ કાર્યવાહી થઈ ચૂકી છે.

ગુજરાત વનવિભાગ એશિયાટિક સિંહોની સુરક્ષા માટે એક્શન પ્લાન હેઠળ ભાવનગર-સોમનાથ ને.હા. પર સિંહોના અકસ્માતો અટકાવવા 'ટેકનોલોજી'નો ઉપયોગ કરશે. 'હોટસ્પોટ' સ્થળોએ રમ્બલ સ્ટ્રીપ, કેટ આઈ, સાઈન બોર્ડ અને 20 'રોડ સેવકો' દ્વારા સુરક્ષા સુનિશ્ચિત કરાશે. એક સિંહને 'રેડિયો કોલર' લગાવી નજર રખાશે.

અમદાવાદ મેટ્રો ટ્રેનના સમયમાં ફેરફાર કરાયો છે. આજથી રાત્રે 11 વાગ્યા સુધી મેટ્રોની સેવા ઉપલબ્ધ રહેશે. આ નિર્ણય ટ્રાફિક અને પ્રદૂષણ ઘટાડશે, તથા પેટ્રોલ-ડીઝલની બચત કરશે. વસ્ત્રાલ અને થલતેજથી છેલ્લી ટ્રેન 11 વાગ્યે ઉપડશે. ગાંધીનગર રૂટ પર પણ સમય લંબાવવામાં આવ્યો છે.

ગાંધીનગરના 'ટેરાનોવાસ પીઝા'માં પીરસવામાં આવેલા પીઝામાંથી જીવતો વંદો નીકળતા ગ્રાહકોમાં ભારે રોષ જોવા મળ્યો. 'Buy 1 Get 1' સ્કીમ પાછળ રેસ્ટોરન્ટ સંચાલકોએ સ્વચ્છતા (Hygiene) ને નેવે મૂકી દેતા ગ્રાહકોના સ્વાસ્થ્ય સાથે ગંભીર ચેડાં થયા છે. ગાંધીનગર મનપાના ફૂડ વિભાગની કામગીરી સામે પણ સવાલો ઉઠ્યા છે.

રાજકોટના સામા કાંઠાની ભગીરથ સોસાયટીમાં દેશી દારૂ પીધા બાદ મનસુખ ડાભી અને અલ્પેશ સાબરિયા નામના બે મિત્રોના શંકાસ્પદ સંજોગોમાં મોત નીપજ્યા છે. પોલીસને દારૂમાં કેમિકલ ભેળસેળની શંકા છે. Forensic PM બાદ સચોટ કારણ જાણી શકાશે. આ ઘટનાથી દેશી દારૂના દૂષણ સામે જનઆક્રોશ ફાટી નીકળ્યો છે.

સુરતમાં પહેલી જૂનથી કાપડ માર્કેટમાં પાર્સલ મજૂરી દરમાં રૂ.15નો વધારો થશે. પેટ્રોલ-ડીઝલના ભાવ વધારાની અસર અને વધતી મોંઘવારીને કારણે ટ્રાન્સપોર્ટ લેબર યુનિયને આ નિર્ણય લીધો છે. હાલ રૂ.100-120 દર, નવા દર રૂ.115-135 થશે. આ નિર્ણયથી ટ્રાન્સપોર્ટ અને વેપારીઓના ખર્ચમાં વધારો થશે.

સુરત પોલીસે વડોદરાના ૨ લાખની બેંક લૂંટના આરોપી યોગેશ પાટીલને ઝડપી પાડ્યો. આ ગેંગ રૂમાલમાં કાગળનું બંડલ અને ઉપર એક 500ની નોટ રાખી ગ્રાહકોનું ધ્યાન ભટકાવી છેતરપિંડી કરતી હતી. આરોપી સુરતમાં 9 ગુનાઓમાં પણ સંડોવાયેલો છે.

ગુજરાત રાજ્ય હાલ ભીષણ ગરમીની અસહ્ય લપેટમાં છે. સૌરાષ્ટ્રના 7 શહેરોમાં રવિવારે પારો 41°Cને પાર થયો, જેમાં સુરેન્દ્રનગર 44.5°C સાથે સૌથી ગરમ રહ્યું. રાજકોટ અને અમરેલીમાં પણ તાપમાન 43°Cથી ઉપર નોંધાયું. આગામી પાંચ દિવસ સુધી તાપમાન 40°Cથી ઉપર રહેવાની સંભાવના છે, જોકે 2-3 દિવસમાં સામાન્ય ઘટાડો થઈ શકે છે. ચોમાસુ 26 મેની આસપાસ કેરળમાં દસ્તક દઈ શકે છે.

વડોદરાથી દિલ્હી જતી ઈન્ડિગો ફ્લાઇટમાં GPU ટેકનિકલ ખામી સર્જાતા AC અને લાઇટો બંધ થઈ, મુસાફરો 25 મિનિટ અંધારપટ અને ગરમીમાં પરેશાન થયા. હાથેથી પવન નાખવાની ફરજ પડી. ટેકનિકલ ટીમે પાવર પૂર્વવત કરતાં રાહત મળી.

સુરત પોલીસે સચિન GIDC વિસ્તારમાંથી મોબાઇલ ચોરનાર જમીલ તૈલી નામના રીઢા ગુનેગારને ઝડપી પાડ્યો છે. તેની પાસેથી ૩ મોંઘા મોબાઇલ અને ચોરીમાં વપરાયેલી મોટરસાયકલ કબજે કરી, જેની કિંમત ૯૭,૦૦૦ રૂપિયા છે. આરોપી અગાઉ પણ અનેક ગુનાઓમાં સંડોવાયેલો છે. પોલીસે ગુનાનો ભેદ ઉકેલી વધુ તપાસ હાથ ધરી છે.

રાજકોટ એરપોર્ટ પરથી 400 કિલો શંકાસ્પદ ચાંદી ઝડપાઈ. 181 કિલો ચાંદી બિનહિસાબી મળી આવતા ATS, DGGI, SGST, IT, IB તપાસમાં જોડાયા. મોટા ટેક્સ ચોરીના કૌભાંડની આશંકા. હવે ED પણ તપાસમાં સામેલ થાય તેવી શક્યતા.

કેન્દ્રશાસિત પ્રદેશ દીવમાં રાત્રિના સમયે નાગવા રોડ પર બે કાર સામસામે અથડાતા મધ્યપ્રદેશના પિતા (ઉંમર 50) અને પુત્ર (ઉંમર 16)ના ઘટનાસ્થળે જ મોત થયા હતા. મૃતકના પત્ની અને ભત્રીજા ઘાયલ થતાં સારવાર માટે ખસેડાયા છે. પરિવાર જૂનાગઢથી દીવ ફરવા આવ્યો હતો. સુરતના કાર ચાલક સહિત ત્રણ ઝડપાયા, ત્રણ નાસી છૂટ્યા.

વડોદરા ક્રાઇમ બ્રાન્ચે ગેસ સિલિન્ડર ચોરતા રીઢા ગુનેગાર અનિલ મહિડાને ઝડપી પાડ્યો. મોંઘવારીનો ફાયદો ઉઠાવી, તે ચોરીની મોપેડનો ઉપયોગ કરી રહેણાંક વિસ્તારોમાંથી સિલિન્ડર ચોરી કરતો હતો. આ સિલિન્ડરો તે સ્થાનિક હોટેલો અને લારીવાળાઓને સસ્તા ભાવે વેચી દેતો હતો. પોલીસે તેની પાસેથી ૨ ચોરેલી મોપેડ અને ૫ ગેસ સિલિન્ડર કબજે કરી ૭ ગુનાઓનો ભેદ ઉકેલ્યો.

ગુજરાતમાં TAT-Sની પરીક્ષા આપનારા ઉમેદવારો માટે રાજ્ય પરીક્ષા બોર્ડ તરફથી એક સૌથી મોટા સમાચાર સામે આવી રહ્યા છે.બોર્ડ દ્વારા સત્તાવાર રીતે TAT-S ના વિદ્યાર્થીઓ માટેની પ્રોવિઝનલ આન્સર કી જાહેર કરી દેવામાં આવી છે. જે ઉમેદવારોને આ આન્સર કીના પ્રશ્નો સામે કોઈ વિરોધ હોય, તેઓ આગામી 25 મે સુધી પોતાના વાંધા-સૂચનો બોર્ડ સમક્ષ રજૂ કરી શકશે. આ સમગ્ર પ્રક્રિયાને પારદર્શી બનાવવા માટે પરીક્ષા બોર્ડ દ્વારા ઓનલાઈન પોર્ટલ પર અરજી સ્વીકારવાની પ્રક્રિયા શરૂ કરી દેવામાં આવી છે.આન્સર કી જાહેર થતાં જ હવે ઉમેદવારોમાં પોતાના ગુણની ગણતરી કરવા સાથે ફાઈનલ પરિણામને લઈને ભારે ઉત્સુકતા જોવા મળી રહી છે.

દેશમાં ફાર્મસી કૉલેજોની દેખરેખના નામે ચાલતી વહીવટી હેરાનગતિ અને સત્તા બહારના દરોડા પર ફાર્મસી કાઉન્સિલ ઓફ ઇન્ડિયાએ મોટો પ્રહાર કર્યો છે. એકવાર શરૂઆતનું NOC આપ્યા બાદ રાજ્ય સરકારો આ પ્રક્રિયામાંથી સંપૂર્ણપણે કાર્યમુક્ત થઈ જાય છે. માટે હવેથી કોઈપણ ખામી જણાયે રાજ્યોએ સીધા દરોડા પાડવાને બદલે PCIને જ લેખિત ફરિયાદ કરવી પડશે. PCI દ્વારા દેશની તમામ રાજ્ય સરકારો, કેન્દ્રશાસિત પ્રદેશો અને પ્રવેશ સમિતિઓ માટે નીતિ વિષયક પરિપત્ર જાહેર કરવામાં આવ્યો છે.જેમાં સ્પષ્ટ કર્યું છે કે ઘણી યુનિવર્સિટીઓ અને રાજ્યના સત્તાધિકારીઓ ફાર્મસી કાઉન્સિલની મંજૂરી મળી ગયા પછી પણ સંસ્થાઓમાં બિનજરૂરી તપાસ અને નિરીક્ષણો હાથ ધરે છે જે સંપૂર્ણ કાયદાકીય સત્તા વિના અને ગેરકાનૂની છે.

વડોદરા-મુંબઈ એક્સપ્રેસ વે પર અકસ્માતોને રોકવા, NHAI અને RTO દ્વારા વ્હીકલ સ્પીડ ડિટેક્શન સિસ્ટમ લગાવવામાં આવી છે. 120 kmph થી વધુ ઝડપે વાહન ચલાવનાર કાર ચાલકોને ₹1500નો દંડ ઓનલાઈન મોકલવામાં આવશે. કાર માટે 120, બસ/ટ્રક માટે 100, અને મોટા વાહનો માટે 80 kmph ની સ્પીડ લિમિટ નક્કી કરાઈ છે.

સાવલી તાલુકાના ટુંડાવ ગામે રૂ.15 લાખના નવીન રોડને તોડી ગટર લાઈન નાખતા ગ્રામજનોએ વિફરી કામગીરી અટકાવી. વિકાસના વિરોધી નથી, પણ યોગ્ય આયોજન વિના રોડ તોડવા સામે વિરોધ છે. પંચાયત પર ભ્રષ્ટાચારના આક્ષેપ સાથે તપાસ અને કાર્યવાહીની માંગ. હાલ ગટરનું કામ સ્થગિત.