વડોદરા શહેરમાં પાણીની નવી ફીડર લાઇનનું જોડાણ અને ફ્લો મીટર બેસાડવાની કામગીરીને કારણે 9 ઓક્ટોબરના રોજ બપોર અને સાંજના પાણી વિતરણ તેમજ 10 ઓક્ટોબરના રોજ સવારનું પાણી વિતરણ બંધ રહેશે. આ કામગીરી પોઈચાની 900 મીમી વ્યાસની મુખ્ય ફીડર લાઇન સાથે ઉંડેરા પાણીની ટાંકી, કરોડિયા બુસ્ટર તથા ગોરવા-અંકોડિયા ટી.પી.-1 બુસ્ટરની ફીડર નળિકાના જોડાણ અને ફ્લો મીટર બેસાડવા માટે હાથ ધરાઈ છે. આ કારણે શહેરના મોટા વિસ્તારની અંદાજે 7.80 લાખની વસ્તીને પાણીની કટોકટીનો સામનો કરવો પડશે, જેમાં ગોરવા, સુભાનપુરા, વડીવાડી, અકોટા, કલાલી ટાંકી અને સુભાનપુરા બુસ્ટર વિસ્તારો મુખ્યત્વે પ્રભાવિત થશે.