નેશનલ ટેસ્ટિંગ એજન્સીએ 4 મેના રોજ યોજાયેલી દેશની સૌથી મોટી મેડિકલ પ્રવેશ પરીક્ષા NEET UG 2025 નું પરિણામ જાહેર કર્યું છે. રાજકોટ સહિત દેશભરના લાખો મેડિકલના ઉમેદવારો માટે રાહત અને ઉત્સાહનો સમય છે. કેટલાક વિદ્યાર્થીની આંખોમાં ચમક છે, તો કેટલાકના ચહેરા પર મહેનતની જીતનું સ્મિત છે. NEET પરીક્ષાના પરિણામની સાથે, NEET ઓવરઓલ ટોપર લિસ્ટ પણ જાહેર કરાયું છે. રાજકોટનો વિદ્યાર્થી નમ્ય પાનેલિયા ઓલ ઇન્ડિયા રેન્ક 55 સાથે સૌરાષ્ટ્રમાં ટોપર રહ્યો છે જ્યારે AIR 57 સાથે રુદ્ર બાવીસી સૌરાષ્ટ્રમાં બીજા ક્રમે રહ્યો છે. નમ્ય પાનેલિયાએ કહ્યું કે, મારે NEET UGમાં ઓલ ઇન્ડિયા રેન્ક 55 આવ્યો છે. રાજકોટની એલન ઇન્સ્ટિટ્યૂટમાં છેલ્લા ત્રણ વર્ષથી તાલીમ લીધી છે. સૌરાષ્ટ્ર ફર્સ્ટ આવ્યો અને 720માંથી 655 માર્ક્સ આવ્યાં છે. પરિવારમાં ઘણા સભ્યો તબીબી ક્ષેત્રમાં હોવાથી આ ક્ષેત્રમાં જવાનું પસંદ કર્યું. MBBS બાદ કઈ બ્રાંચમાં જવું તે હજુ નક્કી નથી. રુદ્ર બાવીસીએ જણાવ્યું હતું કે, 720માંથી 654 માર્ક્સ આવ્યા છે. પિતા બિઝનેસમેન અને માતા શિક્ષક છે. પ્રીમિયર સ્કૂલના વિદ્યાર્થી સિદ્ધ વોરાએ NEET UGની પરીક્ષામાં 646 માર્ક્સ મેળવ્યા છે. જેમનો ઓલ ઇન્ડિયા રેન્ક 93 અને જનરલ કેટેગરી રેન્ક 65 છે.