અગ્રણી IT કંપની Cognizant માં 15,000 થી વધુ કર્મચારીઓની છટણી (Layoff) ની તૈયારી છે, જેની અસર ભારતમાં વધુ જોવા મળશે. Oracle અને Amazon પછી આ વર્ષની આ સૌથી મોટી Layoff હશે. AI ને કારણે જૂના મોડલ બદલાઈ રહ્યા છે. કંપની નાણાકીય અંદાજ મુજબ, Layoff પાછળ 230-320 મિલિયન ડોલર ખર્ચ થશે, જે મોટાભાગે ભારતીય કર્મચારીઓને આવરી શકે છે.

આંતરરાષ્ટ્રીય બજારમાં ક્રૂડ ઓઇલના ભાવ વધઘટ વચ્ચે, દેશમાં સ્થાનિક ઇંધણના ભાવ સ્થિર છે. સરકાર અને તેલ કંપનીઓએ ફુગાવાનો બોજ ઘટાડવા ભાવમાં હાલ કોઈ વધારો કર્યો નથી. WTI ક્રૂડ ઓઇલ $100.941 અને બ્રેન્ટ ક્રૂડ $108.587 પ્રતિ બેરલ છે. નવી દિલ્હીમાં પેટ્રોલ ₹94.72, ડીઝલ ₹87.62; મુંબઈમાં પેટ્રોલ ₹104.21, ડીઝલ ₹92.15.

કેન્દ્ર મંત્રિમંડળે વાડીનારમાં આધુનિક શિપ રિપેર ફેસિલિટીને મંજૂરી આપી, ₹1570 કરોડના PPP મોડેલ રોકાણ સાથે. આ પ્રોજેક્ટ દીનદયાળ પોર્ટ અને કોચીન શિપયાર્ડ દ્વારા સંયુક્ત રીતે વિકસાવવામાં આવશે. આ સુવિધા દેશના મેરિટાઈમ સેક્ટરને મજબૂત બનાવશે, મેક ઈન ઈન્ડિયા અને આત્મનિર્ભર ભારતને વેગ આપશે, અને લગભગ 1100 પરોક્ષ નોકરીઓનું સર્જન કરશે.

વૈશ્વિક બજારમાં ભૌગોલિક-રાજકીય તણાવમાં ઘટાડો થવાના સંકેતો વચ્ચે ભારતીય કોમોડિટી માર્કેટ (MCX) માં સોના અને ચાંદીના ભાવમાં અત્યંત આક્રમક તેજી જોવા મળી છે. માત્ર એક જ દિવસમાં ચાંદીના ભાવમાં ₹7,684 અને સોનામાં ₹2,429 સુધીનો જંગી વધારો નોંધાયો છે.ચાંદીમાં રેકોર્ડબ્રેક તેજી.

ડોનાલ્ડ ટ્રમ્પે હોર્મુઝ સ્ટ્રેટમાં 'પ્રોજેક્ટ ફ્રીડમ' બંધ કરવાની જાહેરાત કરી છે, જેના કારણે જાપાન, કોરિયા અને ભારતીય શેરબજારોમાં તેજી આવી છે. GIFT નિફ્ટીમાં પણ ઉછાળો જોવા મળ્યો. ઓટો, PSU બેંક અને મેટલ ક્ષેત્રોમાં સૌથી વધુ વૃદ્ધિ નોંધાઈ, જ્યારે FMCG, રિયલ્ટી અને હેલ્થકેર ક્ષેત્રો નબળા રહ્યા. ક્રૂડ ઓઇલના ભાવમાં ઘટાડો અને અમેરિકા-ઈરાન વચ્ચે સંભવિત કરારની આશાએ બજારને વેગ આપ્યો.

પંજાબ નેશનલ બેંક (PNB) નો ચોથા ક્વાર્ટરમાં ચોખ્ખો નફો 14% વધીને ₹5,225 કરોડ થયો. નાણાકીય વર્ષ 2026 માટે શેર દીઠ ₹3 ના ડિવિડન્ડની ભલામણ કરવામાં આવી છે. વ્યાજમાંથી થતી આવક 4% ઘટી છે, પરંતુ NPAમાં સુધારો જોવા મળ્યો છે. ગ્લોબલ અને ડોમેસ્ટિક બિઝનેસમાં વૃદ્ધિ નોંધાઈ છે.

મે મહિનાના પ્રથમ અઠવાડિયામાં Vivo અને OnePlus સહિત 4 નવા સ્માર્ટફોન ભારતમાં લોન્ચ થશે. આ ફોન્સમાં AI features, 200 Megapixel કેમેરા અને 6.3-inch સ્ક્રીન જેવા ફીચર્સ હશે. તેમની કિંમત ₹25,000 થી ₹1.50 લાખ સુધી રહેશે. Vivo X300 FE, X300 Ultra, OnePlus Nord CE6 અને CE6 Lite મે મહિનાની શરૂઆતમાં આવી રહ્યા છે.

USમાં ભારતનું સીધું વિદેશી મૂડીરોકાણ(FDI) વધીને અંદાજે 16.4 અબજ ડોલર્સ થયું છે અને તે આશરે 70800 નોકરીઓ ટકાવી રાખે છે તેમ મેરીલેન્ડ રાજ્યમાં યોજાયેલી સિલેક્ટ યુએસએ ઇન્વેસ્ટમેન્ટ સમિટ દરમ્યાન CII ઇન્ડિયાના કાર્યક્રમમાં US નાયબ મંત્રી બ્રાન્ડોન રેમિંગ્ટને જણાવ્યું હતું. ભારતીય કંપનીઓએ USમાં રિસર્ચ એન્ડ ડેવલપમેન્ટ પાછળ 313 મિલિયન ડોલર્સનો ખર્ચ કર્યો હતો તેમ તેમણે ઉમેર્યું હતું.

ઓટો રિટેલ વેચાણની દ્રષ્ટિએ નાણાં વર્ષ ૨૦૨૬-૨૭નો પ્રારંભ પ્રોત્સાહક રહ્યો છે. નાણાં વર્ષના પ્રથમ જ મહિના એપ્રિલમાં ઓટો રિટેલ વેચાણ આંક ૧૩ ટકા જેટલો વધી ૨૬,૧૧,૩૧૭ વાહનો રહ્યો છે જે ગયા વર્ષના એપ્રિલમાં ૨૩,૧૨,૨૨૧ રહ્યો છે. ફેડરેશન ઓફ ઓટોમોબાઈલ ડીલર્સ એસોસિએશન (ફાડા) દ્વારા જારી કરાયેલા  અહેવાલ પ્રમાણે ઓટો વેચાણમાં ઊતારૂ વાહનોનો રિટેલ વેચાણ આંક વાર્ષિક ધોરણે ૧૨.૨૧ વધી ૪,૦૭,૩૫૫ રહ્યો છે જે ગયા વર્ષના એપ્રિલમાં ૩,૬૩,૦૨૮ રહ્યો હતો. 

ભાવ સહાય યોજના દ્વારા બજારમાં સરકારના હસ્તક્ષેપ છતાં, મોટાભાગના કઠોળના બજાર ભાવ હાલમાં લઘુત્તમ ટેકાના ભાવ કરતા નીચે છે, જેનું મુખ્ય કારણ મજબૂત પાક અને પૂરતા બફર સ્ટોક છે, એમ વેપાર સૂત્રોએ જણાવ્યું હતું. તુવેર, ચણા, અડદ, મસુર અને મગ - કઠોળના બજાર ભાવ હાલમાં એમએસપી કરતા ૪ ટકા થી ૧૪ ટકા નીચે છે.ચણા, જે કઠોળ ઉત્પાદનમાં લગભગ ૫૦% હિસ્સો ધરાવે છે, તેનો બજાર ભાવ હાલમાં સિઝન માટે રૂ. ૫૮૭૫/ક્વિન્ટલના એમએસપી સામે રૂ. ૫૨૦૦/ક્વિન્ટલ છે.

એપ્રિલ ૨૦૨૬ માં ભારતના LNG સોર્સિંગમાં મોટો ફેરફાર થયો. મુખ્ય સપ્લાયર કતાર અને UAE બાસ્કેટમાંથી બહાર નીકળી ગયા, જ્યારે ઓમાન, નાઇજીરીયા અને અંગોલાએ શિપમેન્ટમાં વધારો કર્યો. આ હોર્મુઝ સ્ટ્રેટના વિક્ષેપોને કારણે થયેલા મોટા પુન:સંકલનને દર્શાવે છે. કેપ્લરના ડેટા મુજબ, કતારનો પુરવઠો ત્રણ મહિનામાં ૧૦૦% ઘટ્યો અને UAE નો પણ શૂન્ય થઈ ગયો.

મુંબઈ ઝવેરીબજારમાં આજે સોનાના ભાવમાં ધીમો ઘટાડો જોવા મળ્યો હતો. જ્યારે ચાંદીના ભાવ નીચા ખુલ્યા પછી ફરી વધ્યા હતા. વિશ્વબજારમાં બેતરફી ઉછળકુદ તથા ઘરઆંગણે કરન્સી બજારમાં ડોલર સામે રૂપિયો ગબડતાં ઝવેરીબજારમાં આજે મિશ્ર હવામાન તથા બેતરફી વધઘટ કિંમતી ધાતુઓમાં જોવા મળી હતી. અમદાવાદ ઝવેરીબજારમાં આજે સોનાના ભાવ ૧૦ ગ્રામના રૂ.૩૦૦ ઘટી ૯૯૫ના ભાવ રૂ.૧૫૧૯૦૦ તથા ૯૯૯ના ભાવ રૂ.૧૫૨૨૦૦ રહ્યા હતા જ્યારે અમદાવાદ ચાંદીના ભાવ કિલોના રૂ.૨૪૨૦૦૦ રહ્યા હતા. દરમિયાન, વિશ્વબજારમાં આજે સોનાના ભાવ ઔશના ૪૫૬૯થી ૪૫૭૦ ડોલરવાળા નીચામાં ભાવ ૪૫૧૩ તથા ઉંચામાં ભાવ ૪૫૭૪ થઈ ૪૫૬૩થી ૪૫૬૪ ડોલર હતા.

પશ્ચિમ બંગાળ, આસામ, પોંડિચેરીના પોઝિટીવ પરિબળો છતાં ઈરાન-અમેરિકા યુદ્ધ, ઈરાનના UAE પર મિસાઈલ હુમલા, હિઝબુલ્લાના ઈઝરાયેલ પર હુમલાથી વિશ્વ યુદ્ધના ભય વચ્ચે વૈશ્વિક બજારોની સાથે ભારતીય શેર બજારોમાં પીછેહઠ. ક્રુડ ઓઈલના ભાવ વધતાં અને ડોલર સામે રૂપિયો 95.43ના તળિયે આવતાં ઓઈલ આયાત સંકટના વાવડથી ફંડોએ શેરોમાં તેજીનો વેપાર ખંખેર્યો.

યુદ્ધને કારણે ગેસ સિલિન્ડરની અછત સર્જાતાં લોકો પરેશાન. ગાંધીનગરના વાવોલ ખાતે ગેસ એજન્સી પર સવારથી લોકો સિલિન્ડર માટે લાંબી લાઈનોમાં ઉભા રહ્યા. ઘણાને મોડી સાંજ સુધી રાહ જોવી પડી, જેના કારણે તેમને નોકરી-ધંધા છોડી બેસી રહેવાની ફરજ પડી. ઘરેલું અને કોમર્શિયલ ગ્રાહકો બંને પરેશાન છે.

ડાંગ જિલ્લાના જામલાપાડા ગામના દક્ષાબેન બિરારીએ PMEGP યોજના હેઠળ 'અંબિકા હળદર પ્રોસેસ યુનિટ' સ્થાપી, રૂ. 12.85 લાખનું ધિરાણ અને રૂ. 4,49,750ની સબસિડી મેળવી. હાલ તેઓ 30 લોકોને રોજગારી આપી, વાર્ષિક રૂ. 1.25 કરોડની આવક મેળવી રહ્યા છે. 'મિશન મંગલમ'માંથી તાલીમ મેળવી, તેમણે હળદર પેકિંગ, અનાજ-કઠોળ પ્રોસેસિંગ અને નાગલીની પાપડી વેચાણ દ્વારા સ્થાનિક ઉત્પાદનોને પ્રોત્સાહન આપ્યું છે.

૮-૯ કરોડમાં લક્ઝરી ફ્લેટ ઉપલબ્ધ નથી. અલ્ટ્રા હાઇ નેટવર્થ ધરાવનારા માટે નવા રોકાણો. ૧ મિલીયન US Dollar (લગભગ ૯.૪ કરોડ રૂપિયા) ભારતના લક્ઝરી રિયલ એસ્ટેટ માર્કેટમાં ઓછી રકમ છે. આટલામાં મુંબઈમાં ૯૬ ચોરસ મીટર, દિલ્હી/બેંગલુરુમાં ૨૦૫ ચોરસ મીટર જમીન ખરીદી શકાય.

વડાપ્રધાન નરેન્દ્ર મોદીની અધ્યક્ષતામાં મળેલી કેબિનેટ બેઠકમાં ગુજરાત માટે બે મહત્વપૂર્ણ નિર્ણય લેવામાં આવ્યા છે, જે અંતર્ગત રાજ્યમાં રૂપિયા 3,900 કરોડથી વધુના કુલ રોકાણ સાથે વધુ બે સેમિકન્ડક્ટર મેન્યુફેક્ચરિંગ યુનિટ સ્થાપવાની મંજૂરી આપવામાં આવી છે. ઉપરાંત વાડીનાર ખાતે એક આધુનિક શિપ રિપેર ફેસિલિટીની સ્થાપનાને પણ લીલીઝંડી આપવામાં આવી છે. વધુ બે સેમિકન્ડક્ટર પ્લાન્ટ પ્રોજેક્ટ્સ દ્વારા ભારત હવે કમ્પાઉન્ડ સેમિકન્ડક્ટર-આધારિત 'મિની/માઈક્રો LED' ડિસ્પ્લે ઉત્પાદન ક્ષેત્રે ડગ માંડશે. આ નવી સુવિધાઓથી રાજ્યમાં અંદાજે 2,230 કુશળ પ્રોફેશનલ્સ માટે રોજગારીની નવી તકો ઉભી થશે.

બાયોકોનના સ્થાપક કિરણ મઝુમદાર-શૉએ અંદાજિત 60 હજાર કરોડ રૂપિયાની માર્કેટ કેપ ધરાવતી આ કંપનીની કમાન યુવા પેઢીને સોંપવાની તૈયારી કરી લીધી છે. તેમણે સત્તાવાર રીતે તેમની ભત્રીજી ક્લેર મઝુમદાર(Claire Mazumdar)ને તેમના ઉત્તરાધિકારી તરીકે નામિત કર્યા છે. હવે એ સ્પષ્ટ થઈ ગયું છે કે બાયોકોન જેવી દેશની બાયોફાર્મા કંપનીની કમાન ફરી એકવાર મહિલાના હાથમાં જ રહેશે. મહત્વનું છે કે કિરણ મઝુમદાર છેલ્લા 48 વર્ષોથી કંપનીની કમાન સંભાળી રહ્યા છે.

છેલ્લા બે મહિનાથી વધુ સમયથી હોર્મુઝ સ્ટ્રેટ બંધ હોવાથી ભારત સહિત સમગ્ર વિશ્વમાં ઊર્જા સંકટ ઘેરું બન્યું છે અને ખાસ કરીને ભારતના LPG પુરવઠા પર તેની માઠી અસર પડી રહી છે. ભારત પોતાની જરૂરિયાતનો 80-90% LPG હોર્મુઝના માર્ગે આયાત કરે છે. અમેરિકન ટ્રેઝરી સેક્રેટરી સ્કોટ બેસેન્ટ અને અમેરિકન પ્રમુખ ડોનાલ્ડ ટ્રમ્પે જાહેરાત કરી છે કે, 'ઓપરેશન ફ્રીડમ' હેઠળ અમેરિકન નેવી ત્યાં ફસાયેલા જહાજોને સુરક્ષિત બહાર કાઢવામાં મદદ કરશે. અમેરિકાનું કહેવું છે કે ભારત જેવા મોટા દેશોમાં કરોડો પરિવારો રાંધણ ગેસ પર નિર્ભર છે, તેથી આ રસ્તો ખોલવો માત્ર આર્થિક જ નહીં પણ માનવતાના ધોરણે પણ અત્યંત મહત્ત્વનું છે

GIFT નિફ્ટી 165 પોઈન્ટ ઘટીને 24,041 પર ટ્રેડ થયો. સ્થાનિક બજારમાં વૈશ્વિક વિપરીતતાની અસર દેખાઈ. સેન્સેક્સ 289.21 પોઈન્ટ ઘટી 76,980.19 અને નિફ્ટી 88.3 પોઈન્ટ ઘટી 24,031.00 પર ખૂલ્યા. યુએસ-ઈરાન તણાવ અને હોર્મુઝ સ્ટ્રેટની પરિસ્થિતિ વૈશ્વિક સપ્લાય ચેઇન અને ઉર્જા બજારો માટે ચિંતાજનક છે.

છેલ્લા બે દાયકામાં ભારતીય કંપનીઓ દ્વારા કરવામાં આવેલા મોટા સંપાદનથી શેરધારકોને ખાસ કોઈ નોંધપાત્ર લાભ થયો નથી. ૧૦ માંથી આઠ કિસ્સાઓમાં, નોંધપાત્ર સંપત્તિ પ્રાપ્ત કરવા માટે અબજો ડોલર ખર્ચ કરતી કંપનીઓના શેર સંપાદન પછી દેખાવની દ્રષ્ટિએ વ્યાપક બજાર કરતાં તે નોંધપાત્ર રીતે પાછળ રહી ગયા છે. ૧૦ સૌથી મોટી હસ્તગત કરતી કંપનીઓમાંથી, ફક્ત બે, હિન્ડાલ્કો ઇન્ડસ્ટ્રીઝ અને ભારતી એરટેલ, બજાર કરતાં વધુ સારું પ્રદર્શન કરવામાં સફળ રહી હતી.  હિન્ડાલ્કોએ ફેબુ્રઆરી ૨૦૦૭ માં નોવેલિસને ૫.૭ બિલિયન ડોલરમાં હસ્તગત કરી હતી.

અલંગ શિપ બ્રેકિંગ યાર્ડ, જે વિશ્વનું સૌથી મોટું છે, તે 44 વર્ષના ઇતિહાસમાં કપરા કાળમાંથી પસાર થઈ રહ્યું છે. GMBની નવી શિપ રીસાયકલિંગ પોલિસી નિરાશાજનક છે, ખાસ કરીને 5 વર્ષની લીઝ મુદતને 30 વર્ષ સુધી વધારવાની માંગણી પર કોઈ ધ્યાન અપાયું નથી. આનાથી બેંકિંગ અને રોકાણમાં મુશ્કેલી પડે છે. ભાગીદારના નામ બદલવા જેવી વહીવટી પ્રક્રિયાઓમાં વિલંબ થાય છે. હોંગકોંગ કન્વેન્શન મુજબ નાના પ્લોટને મોટા પ્લોટમાં મર્જ કરવાની પ્રક્રિયા પણ પારદર્શક નથી. ઉદ્યોગકારો કાયમી રાહતની માંગ કરી રહ્યા છે.

ધિરાણ વૃદ્ધિ માટે મોટેભાગે કોર્પોરેટ તથા માઈક્રો, સ્મોલ અને મીડિયમ એન્ટરપ્રાઈઝિસ (એમએસએમઈ) પર નિર્ભર રહેતી મોટી ખાનગી ક્ષેત્રની બેન્કો વર્તમાન નાણાં વર્ષમાં રિટેલ ધિરાણ ઉપાડમાં વધારો થવાની અપેક્ષા રાખી રહી છે. ગયા નાણાં વર્ષના ચોથા ત્રિમાસિકમાં રિટેલ ધિરાણ વૃદ્ધિ એક અંકમાં રહી હતી. જો કે રિટેલ ધિરાણ છૂટુ કરવામાં ભારે ઝડપ ધિરાણ ચોપડા પર અર્થપૂર્ણ વૃદ્ધિમાં પરિવર્તન જોવા મળશે તેવી ખાનગી બેન્કો અપેક્ષા રાખી રહી છે. પશ્ચિમ એશિયાની કટોકટી વચ્ચે પણ કોર્પોરેટ ધિરાણમાં સ્થિતિસ્થાપકતા જળવાઈ રહેવાની ધારણાં છે.

રૂપિયા પર દબાણ હળવું કરવા અને ફોરેકસ રિઝર્વ વધારવા RBI ડોલર પ્રવાહ વધારવાના ઉપાયો વિચારી રહી છે. ઈરાન યુદ્ધના કારણે ક્રુડ તેલના ઊંચા ભાવ અને વિદેશી રોકાણકારોના આઉટફલોસને કારણે રૂપિયો ઓલટાઈમ લો સપાટીએ છે, જેના પગલે આયાત બિલ વધશે અને ફોરેકસ રિઝર્વ પર દબાણ આવશે.

DGVCLમાં એપ્રિલમાં 358 કરોડ યુનિટ વીજ વપરાશ નોંધાયો, જે સામાન્ય રીતે દોઢ મહિનાનો છે. ગરમી વધતાં ઘરેલુ AC, કૂલરનો ઉપયોગ વધ્યો. ટેક્સટાઈલ મંદીમાં ઈન્ડસ્ટ્રિયલ વપરાશ 10% ઘટ્યો, છતાં કુલ માંગ ઊંચી રહી. દિવસે ઉદ્યોગો, રાત્રે ઘરોમાં લોડ વધતાં સિસ્ટમ પર પ્રેશર. મે મહિનામાં ડિમાન્ડ હજુ વધવાની શક્યતા.

ટાટા ઇવીએ દેશની પહેલી કૂપે SUV 'કર્વ EV'ની નવી X સિરીઝ ₹16.99 લાખથી શરૂ કરીને લોન્ચ કરી છે. આ car full charge પર 502km દોડશે. તેમાં 'અકમ્પ્લિશ્ડ X 55' અને 'એમ્પાવાર્ડ X 55' વેરિઅન્ટ્સ, નવો 'નાઇટ્રો ક્રિમસન' કલર અને લાઈફટાઇમ વોરંટી જેવા ફીચર્સ મળે છે.

ગુજરાતીઓ તક ઝડપવામાં માહેર છે. રાજકોટની બાલાજી વેફર્સ 'ઝાલમુરી' લોન્ચ કરીને આ વાત સાબિત કરી રહી છે. PM મોદીએ બંગાળમાં ચાખેલી ઝાલમુરી હવે રૂ. 5 અને 10માં ઉપલબ્ધ થશે. MD ચંદુભાઈ વિરાણીએ જણાવ્યું કે, હાલ યુપીથી વેચાણ થશે, અને બે-ત્રણ વર્ષમાં બંગાળમાં ફેક્ટરી ચાલુ થશે. કર્ણાટકમાં પણ ટૂંક સમયમાં ઉત્પાદન થશે.

નેપાળમાં ભારતથી આવતા સામાન પર લાદવામાં આવેલા નવા કસ્ટમ ટેક્સ અને કડક નિયમોને કારણે મોટો વિવાદ ઊભો થયો છે. નેપાળના મીડિયા રિપોર્ટ્સ અનુસાર, ત્યાંની સરકારના નવા આદેશ બાદ વેપારીઓએ વિરોધ નોંધાવતા છેલ્લા ચાર દિવસથી સામાનની આયાત અટકાવી દીધી છે. આ અચોક્કસતાને કારણે ભારત-નેપાળ બોર્ડર પર હજારો કન્ટેનરો ફસાઈ ગયા છે અને ટ્રકોની લાંબી લાઈનો લાગી છે. જો વેપારીઓ અને સરકાર વચ્ચેનો આ અવરોધ જલ્દી ઉકેલાશે નહીં, તો નેપાળના બજારોમાં જીવનજરૂરી ચીજવસ્તુઓની ભારે અછત સર્જાઈ શકે છે અને સામાન્ય જનતા માટે મોંઘવારીનો મોટો ફટકો પડવાની શક્યતા છે.

સુરતનું ટેક્સટાઈલ ક્ષેત્ર યુદ્ધ અને આર્થિક પડકારોથી પીડાઈ રહ્યું છે. યુદ્ધને કારણે 12 થી 15 હજાર કરોડ રૂપિયાના એક્સપોર્ટને અસર થઈ છે, અને 5 હજાર કરોડ રૂપિયા વેપારીઓના ફસાઈ ગયા છે. પરંપરાગત ઉત્પાદન, આયાત, અને બ્રાન્ડિંગનો અભાવ ઉદ્યોગને ટકાવી રાખવા માટે મુખ્ય ચિંતાઓ છે. લેબર ચાર્જ, કોલસા અને કાચા માલના ભાવમાં વધારો, તેમજ યુએસના ટેરિફની અસર પણ નોંધપાત્ર છે. વેપારીઓ માટે ચેક રિટર્નના કેસ વધી રહ્યા છે, જે એક ગંભીર સમસ્યા છે. ઉદ્યોગને ટકાવી રાખવા માટે ઓટોમેશન, એક્સપોર્ટ કલ્ચર, અને સરકાર તરફથી ટેકનિકલ અને મશીનરી સહાયની તાત્કાલિક જરૂર છે.

સુરતના ટેક્સટાઇલ ઉદ્યોગમાં શૂ ફેબ્રિકનું ઉત્પાદન શરૂ થયું છે, જે ચીનને ટક્કર આપશે. હાલમાં રોજ 5 થી 15 લાખ મીટર ઉત્પાદન થાય છે. MSME એકમોએ આ બદલાવ લાવ્યો છે, જેના કારણે હવે આગ્રા, દિલ્હી અને દક્ષિણ ભારતના ફૂટવેર હબને સુરતથી કાચો માલ અપાઈ રહ્યો છે. મેશ, નિટેડ અને PU કોટેડ ફેબ્રિકની માંગ વધુ છે.