પોરબંદરના કુતિયાણાના ટીંબીનેશ ગામમાં નકલી દૂધના ઉત્પાદનના કેસમાં ફૂડ એન્ડ ડ્રગ્સ વિભાગે દૂધ અને અન્ય સામગ્રીના સેમ્પલ વડોદરા લેબોરેટરીમાં વધુ તપાસ માટે મોકલ્યા છે. પોરબંદર એલસીબીએ દરોડા દરમિયાન 30 લીટર શંકાસ્પદ દૂધ, 75 કિલો સ્કીન મિલ્ક પાઉડર અને પામોલીન તેલના ડબ્બા મળી આવ્યા હતા. ફૂડ સેફ્ટી ઓફિસરે સ્થળ પર જ શંકાસ્પદ દૂધનો નાશ કરાવ્યો હતો. લેબોરેટરીના રિપોર્ટ બાદ ભેળસેળના પ્રકાર પ્રમાણે ફોજદારી ગુનો નોંધાશે અથવા નિવાસી અધિક કલેક્ટરની કોર્ટમાં દંડની કાર્યવાહી થશે, જેમાં રૂ.5 લાખ સુધીનો દંડ થઈ શકે છે. બનાવટી દૂધના સેવનથી પાચનતંત્ર પર ગંભીર અસરો થઈ શકે છે.