Instagram પર પણ હવે WhatsAppની જેમ લાઈવ લોકેશન શેર કરી શકાય છે. તેના માટે એપમાં સંબંધિત વ્યક્તિની ચેટ ખોલી '+' અથવા Attachment વિકલ્પમાંથી Location પસંદ કરી Share Live Location પર ટેપ કરવું પડે છે. જરૂરી પરમિશન આપ્યા બાદ તમારું રિયલ-ટાઇમ લોકેશન નિર્ધારિત સમય સુધી શેર થાય છે અને પછી આપમેળે બંધ થઈ જાય છે. જરૂર પડે ત્યારે Stop Sharing દ્વારા તેને રોકી શકાય છે. સુરક્ષા માટે ફક્ત વિશ્વાસપાત્ર વ્યક્તિ સાથે જ લોકેશન શેર કરવું જોઈએ.

મહારાષ્ટ્ર અને દક્ષિણ ગુજરાતમાં થયેલ ભારે વરસાદને કારણે રેલ અને હવાઈ સેવા પર તેની વ્યાપક અસર પડી છે. મહારાષ્ટ્રના પાલઘર રેલવે સ્ટેશન નજીક ટ્રેક પર પાણી ભરાતા મુંબઈ-અમદાવાદ રેલ વ્યવહાર ખોરવાયો છે. વાપી-મુંબઈ વચ્ચે છેલ્લા બે કલાકથી ટ્રેનો અટવાઈ છે, જેના કારણે અનેક મુસાફરો અટવાયા છે. મુંબઈ એરપોર્ટ પર ખરાબ હવામાનને કારણે 13 ફ્લાઈટ્સને સુરત એરપોર્ટ પર ડાયવર્ટ કરાઈ છે. કેટલીક ફ્લાઈટ્સ રદ અને અન્ય મોડી પડી છે, જેના કારણે મુસાફરોને હાલાકીનો સામનો કરવો પડી રહ્યો છે.

બનાસકાંઠા જિલ્લાના દાંતા અને અંબાજી વિસ્તારમાં થયેલા વરસાદથી વાતાવરણમાં ઠંડક પ્રસરી છે અને ખેડૂતોમાં આનંદની લાગણી છવાઈ છે. રવિવારે સવારથી જ આકાશ કાળા ડિબાંગ વાદળોથી ઘેરાઈ ગયું હતું, જેના કારણે દિવસ દરમિયાન અંધારપટ જેવો માહોલ સર્જાયો હતો. પવન સાથે થયેલા વરસાદથી દાંતાના અનેક માર્ગો પર પાણી વહેવા લાગ્યા હતા. યાત્રાધામ અંબાજીના કેટલાક વિસ્તારોમાં થયેલા વરસાદી ઝાપટાંથી ગરમીમાંથી રાહત મળી છે. ખેડૂતો હવે વાવણીની કામગીરીમાં વ્યસ્ત થઈ ગયા છે.

બનાસકાંઠાના સરહદી વાવ અને થરાદ પંથકમાં શનિવાર રાત્રે અચાનક વાતાવરણમાં પલટો આવતાં ભારે પવન, વરસાદ અને વીજળી સાથે કુદરતી આફત આવી હતી. આ તોફાનને કારણે ખેડૂતોના રહેણાંક મકાનો અને પશુઓના શેડના પતરા ઉડી ગયા, જેનાથી ખેડૂત પરિવારો મુશ્કેલીમાં મુકાયા. થરાદના આજાવાડા ગામે ક્કનર્મદેશ્વર ગૌશાળાના શેડ પણ તૂટી પડ્યા, જેનાથી મોટાપાયે આર્થિક નુકસાન થયું. જોરડીયાળી, તખતપુરા સહિતના વિસ્તારોમાં વીજપોલ અને ડીપી ધરાશાયી થતાં અંધારપટ છવાયો. જોકે, કોઈ મોટી જાનહાનિ થઈ નથી.

થરા પોલીસને વડાગામ નજીક નેશનલ હાઇવે પર પેટ્રોલિંગ દરમિયાન બાતમી મળી હતી કે એક ઇન્ડિયન ગેસના ટેન્કરમાંથી ગેરકાયદેસર રીતે ઘરેલું રાંધણ ગેસ ચોરી કરીને સિલિન્ડરોમાં ભરવામાં આવી રહ્યો છે. પોલીસે તાત્કાલિક દરોડો પાડી સ્થળ પરથી પાંચ ભરેલા અને 11 ખાલી સિલિન્ડર, ગેસ રિફિલિંગ માટે વપરાતા સાધનો અને એક છોટા હાથી વાહન સહિતનો મુદ્દામાલ કબજે કર્યો છે. પોલીસે ટેન્કર ચાલક અને અન્ય બે શખ્સોની પૂછપરછ કરતાં આ ગેંગ દ્વારા કાળા બજારમાં ઊંચા ભાવે ગેસ વેચી નફો કમાવવાનો પર્દાફાશ થયો છે.

પાદરા સ્થિત કન્યા શાળા-1 ખાતે એમજીવીસીએલ પાદરા-1 પેટા વિભાગ દ્વારા વીજ સલામતી, ઊર્જા બચત, વીજ ચોરી નિવારણ અને સ્માર્ટ મીટર અંગે વિદ્યાર્થીઓમાં જાગૃતિ લાવવા એક વિશેષ કાર્યક્રમ યોજાયો. વિદ્યાર્થીઓને વીજળીના સુરક્ષિત ઉપયોગ, વીજ અકસ્માતોથી બચવાના ઉપાયો, ઊર્જા બચતનું મહત્વ, અને સૌર તથા પવન ઉર્જા જેવા કુદરતી ઉર્જા સ્ત્રોતો વિશે વિસ્તૃત માહિતી અપાઈ. સ્માર્ટ મીટરની કાર્યપદ્ધતિ અને બિલિંગમાં પારદર્શિતા અંગે પણ સમજાવવામાં આવ્યું. એમજીવીસીએલ દ્વારા ચિત્ર સ્પર્ધા યોજાઈ, જેમાં વિજેતાઓને પુરસ્કૃત કરાયા અને અન્ય વિદ્યાર્થીઓને કિટ વિતરણ કરાયું.

છોટાઉદેપુર જિલ્લા વહીવટી તંત્ર દ્વારા "સશક્ત દીકરી, કલેક્ટર ઇન ક્લાસરૂમ" અભિયાન હેઠળ, મણિબેન પટેલ કન્યા વિદ્યાલય ખાતે જિલ્લા કલેક્ટર ગાર્ગી જૈને વિદ્યાર્થિનીઓ સાથે પ્રેરણાદાયી સંવાદ સાધ્યો. આ પહેલનો મુખ્ય ઉદ્દેશ્ય કિશોરીઓમાં આત્મવિશ્વાસ, શિક્ષણ, સ્વાસ્થ્ય અને નેતૃત્વના ગુણો ખીલવવાનો હતો. કલેક્ટરે પોતાના અનુભવો અને કારકિર્દીની સફર શેર કરી, વિદ્યાર્થિનીઓને સપના પૂરા કરવા મહેનત કરવા પ્રોત્સાહિત કરી. પર્યાવરણ પ્રત્યે જાગૃતિ લાવવા પ્લાન્ટેબલ પેન્સિલનું વિતરણ કરાયું.

ગુજરાત સરકાર શિક્ષણ ક્ષેત્રે સુધારાના દાવા કરતી હોવા છતાં, કરજણ તાલુકાની 185 પ્રાથમિક શાળાઓમાં 85 શિક્ષકોની ઘટ છે. ખાસ કરીને, ધોરણ 1થી 5 ધરાવતી 11 શાળાઓમાં માત્ર એક જ શિક્ષક ફરજ પર છે. આ પરિસ્થિતિ બાળકોના પાયાના શિક્ષણ પર ગંભીર અસર કરી રહી છે. લતીપુર ટીંબી, આલમપુરા કોલોની, કલા, હીરજીપુરા, રોપા, સોમજ, દેલવાડા, કરણ, નાનીકોરલ, લીલીપુરા અને ભરથાલી ગામની શાળાઓમાં એક જ શિક્ષક વિવિધ ધોરણોના વિદ્યાર્થીઓને એક જ રૂમમાં અથવા અલગ-અલગ રૂમોમાં વારાફરતી ભણાવવા મજબૂર છે, જેનાથી ગુણવત્તાયુક્ત શિક્ષણ મળવું મુશ્કેલ બન્યું છે.

BAPS સંસ્થા દ્વારા પ.પૂ. મહંત સ્વામી મહારાજ રચિત ગ્રંથ સત્સંગ દીક્ષાના 315 સંસ્કૃત શ્લોકોનો એકસાથે મુખપાઠ કરીને અનોખો વિશ્વવિક્રમ સર્જાયો, જેની નોંધ ગિનિસ બુક ઓફ્ વર્લ્ડ રેકોર્ડમાં લેવાઈ છે. આ વિશ્વવિક્રમમાં વડોદરા જિલ્લાના ગ્રામ્ય વિસ્તારના 759થી વધુ બાળ-બાલિકાઓએ પણ ભાગ લીધો. ચાણસદ ખાતે યોજાયેલા વિશેષ સન્માન સમારોહમાં આ તમામ બાળ-બાલિકાઓને ગિનિસ બુક ઓફ્ વર્લ્ડ રેકોર્ડના પ્રમાણપત્રો એનાયત કરી સન્માનિત કરાયા. આ સિદ્ધિ ભારતીય સંસ્કૃતિ અને સંસ્કારનું જીવંત ઉદાહરણ છે.

વાઇબ્રન્ટ ગુજરાત સમિટ 2026માં દાહોદ જિલ્લાના પરંપરાગત બામ્બુ ક્રાફ્ટે મુલાકાતીઓનું વિશેષ ધ્યાન આકર્ષ્યું છે. જ્યોત સખી મંડળ દ્વારા તૈયાર કરાયેલા વાંસમાંથી બનેલા હસ્તકલાના ઉત્પાદનોને ઉત્તમ પ્રતિસાદ મળ્યો છે. સમિટ દરમિયાન માત્ર બે દિવસમાં રૂ. 50 હજારનું વેચાણ થયું અને રૂ. 30 હજારના નવા ઓર્ડર પણ મળ્યા. મુખ્યમંત્રી ભૂપેન્દ્ર પટેલે સ્ટોલની મુલાકાત લઈ કારીગરોના પ્રયાસોની પ્રશંસા કરી હતી.

મહીસાગર જિલ્લાના ખાનપુર તાલુકામાં મુખ્યમંત્રી ગ્રામ સડક યોજના હેઠળ બનેલા ઘોઘાવાડા ગામના માર્ગ પરના કલ્વર્ટમાં ગંભીર ક્ષતિ સર્જાઈ છે. લાખોના ખર્ચે બનેલા આ માર્ગના કલ્વર્ટની બંને બાજુની માટી ધસી પડી છે અને કાંકરીટના ભાગો તૂટી ગયા છે, જેના કારણે તેની મજબૂતી સામે પ્રશ્નો ઉભા થયા છે. વરસાદી મોસમમાં આ કલ્વર્ટને વધુ નુકસાન થવાની શક્યતા છે. સમયસર સમારકામ નહિ થાય તો વાહનચાલકો, વિદ્યાર્થીઓ અને રાહદારીઓ માટે અકસ્માતનું મોટું જોખમ ઊભું થઈ શકે છે.

ગુજરાતના કૃષિ, પશુપાલન, ગૌ સંવર્ધન અને સહકાર વિભાગના મંત્રી રમેશ કટારાએ ફ્તેપુરા વિધાનસભા બેઠકના ધારાસભ્ય તરીકે પોતાના વતન હિંગલા ગામે પહોંચીને ખેતીકામમાં સીધો જ સહયોગ આપ્યો હતો. તેમણે પરંપરાગત રીતે બળદ સાથે હળ જોતરીને જાતે ખેતર ખેડ્યું અને વાવણીનું કામ કર્યું. મંત્રીના આ સરળ અને જમીન સાથે જોડાયેલા સ્વરૂપે ગ્રામજનો અને ખેડૂતોમાં આદર જગાવ્યો. તેમણે ખેતી સાથેના પોતાના વર્ષો જૂના જોડાણને તાજું કરીને ખેડૂત સમુદાય પ્રત્યેની નિષ્ઠા વ્યક્ત કરી. આ ઘટના સોશિયલ મીડિયા અને સ્થાનિક કક્ષાએ ખૂબ જ ચર્ચાઈ રહી છે.

વાલીયા તાલુકામાં ભારે વરસાદથી અસરગ્રસ્ત થયેલા નાગરિકોને તાત્કાલિક મદદ મળે તે માટે જિલ્લા વહીવટી તંત્ર સક્રિય થયું છે. કોંઢ અને સિલુડી ગામમાં રહેણાંક મકાનો અને ઘરવખરીને થયેલા નુકસાનનો અંદાજ મેળવવા માટે વહીવટી ટીમો દ્વારા યુદ્ધના ધોરણે સર્વેની કામગીરી શરૂ કરાઈ છે. જિલ્લા કલેક્ટર ડૉ. નવનાથ ગવ્હાણના માર્ગદર્શન હેઠળ, વાલીયા તાલુકા વિકાસ અધિકારી અને મામલતદારની દેખરેખ હેઠળ ખાસ સર્વે ટીમો દ્વારા અસરગ્રસ્ત વિસ્તારોની મુલાકાત લઈને નુકસાનીની ઝીણવટભરી વિગતો એકત્રિત કરાઈ રહી છે.

મહિસાગર જિલ્લામાં ભારે વરસાદ અને વાવાઝોડાના કારણે શામણા ક્રોસિંગ થી લુણાવાડા જવાના માર્ગ પર શુક્રવારની મોડી રાત્રે મોટું ઝાડ પડતા આ રસ્તા ઉપર વાહન વ્યવહાર ખોરવાયો હતો અને ટ્રાફિક જામની સ્થિતિ જોવા મળી હતી. તંત્રએ ભારી જહમત બાદ આ રોડ ચાલુ કરવામાં આવ્યો હતો.

ભરૂચ જિલ્લામાં થયેલા વરસાદ બાદ, ચોમાસામાં ફેલાતા રોગચાળાને રોકવા અંકલેશ્વર નગરપાલિકા દ્વારા યુદ્ધના ધોરણે સ્વચ્છતા અભિયાન હાથ ધરાયું છે. ચીફ ઓફિસરના માર્ગદર્શન હેઠળ આરોગ્ય અને સફાઈ વિભાગની ટીમો નીચાણવાળા અને વરસાદથી પ્રભાવિત વિસ્તારોમાં સફાઈ કરી રહી છે. વરસાદી પાણીના નિકાલ, કચરાનો નિકાલ અને જંતુનાશક દવાનો છંટકાવ પણ કરવામાં આવી રહ્યો છે. ચોમાસાની પરિસ્થિતિને પહોંચી વળવા અને નાગરિકોની સુખાકારી જાળવવા પાલિકા તંત્ર સંપૂર્ણપણે સજ્જ છે.

દેડિયાપાડા - ચિકદા અને સાગબારા તાલુકામાં મેઘ મહેર થતાં આદિવાસી ખેડૂતો ખુશખુશાલ થઈ ગયા છે અને ખેતરમાં વાવેતર શરૂ કરી દીધુ છે. આજના આધુનિક યુગમાં પણ નર્મદા જિલ્લાના અંતરિયાળ વિસ્તારોમાં આદિવાસી ખેડૂતો આધુનિક સાધનો નહી પરંપરાગત સાધનોથી જ ખેતી કરે છે. બળદ અને હળથી વાવણીમાં જોતરાયેલા આદિવાસી પતિ પત્ની તસ્વીરમાં નજરે પડે છે.

શહેરા તાલુકાના ઉમરપુર ગામના ચૌહાણ ફ્ળિયાનો મુખ્ય માર્ગ પાકો બનાવવા માટે સ્થાનિકો દ્વારા વર્ષોથી રજૂઆતો કરાઈ રહી છે. જાગૃત ગ્રામજન કાંતિલાલ ચૌહાણે અનેક વખત ઉચ્ચ કક્ષાએ રજૂઆત કરી છે, પરંતુ તંત્ર તરફથી માત્ર આશ્વાસનો મળ્યા છે. ચોમાસાની શરૂઆત થતાં જ આ કાચો માર્ગ કાદવ-કિચડથી ભરાઈ જાય છે, જેના કારણે વાહનચાલકો અને ગ્રામજનોને ભારે હાલાકી ભોગવવી પડે છે. મહત્વની વાત એ છે કે આ માર્ગ પર પ્રખ્યાત મોગલ માતાજીનું મંદિર આવેલું છે, જેના કારણે શ્રદ્ધાળુઓને પણ મુશ્કેલી પડે છે. આ ઘોર ઉદાસીનતાથી સ્થાનિકોમાં ભારે રોષ છે.

છોટાઉદેપુરના પીઢ આદિવાસી નેતા, પૂર્વ વનમંત્રી અને ગુજરાતના અનુભવી ધારાસભ્યોમાં અગ્રણી એવા મોહનસિંહ રાઠવા (82) નું નિધન થયું છે. તેઓ લાંબા સમયથી બીમાર હતા અને સારવાર હેઠળ હતા. તેમના નિધનથી આદિવાસી સમાજ અને રાજકીય ક્ષેત્રે શોકની લાગણી ફેલાઈ છે. રાઠવાએ 1972માં રાજકારણ શરૂ કર્યું અને આદિવાસી સમાજ, ખેડૂતોના પ્રશ્નોને પ્રાધાન્ય આપ્યું. 11માંથી 10 વિધાનસભા ચૂંટણી જીતી અનેક વિકાસ કાર્યો કર્યા.

ભરૂચ જિલ્લા કલેક્ટર ડૉ. નવનાથ ગવ્હાણે ઝઘડિયા તાલુકાના ખાલક ગામની આકસ્મિક મુલાકાત લીધી. આ મુલાકાતનો મુખ્ય ઉદ્દેશ્ય સરકારી યોજનાઓનું યોગ્ય અમલીકરણ અને સેવાઓ છેવાડાના નાગરિકો સુધી પહોંચે તે સુનિશ્ચિત કરવાનો હતો. કલેક્ટરે પંચાયત દફતરની તપાસ કરી, ગ્રામજનો સાથે બેઠક યોજી તેમના પ્રશ્નો સાંભળ્યા. તેમણે સરકારી યોજનાઓ, શૈક્ષણિક સ્તર અને મધ્યાહન ભોજન યોજનાની પણ સમીક્ષા કરી.

વડાપ્રધાન નરેન્દ્ર મોદીએ અમદાવાદ એરપોર્ટ પર મંત્રીઓ સાથે ટૂંકી મીટિંગ કરી, જ્યાં તેમણે 'બંધ પરબિડિયા' આપ્યા. આ મીટિંગ અને 'બંધ લિફાફા' અંગે મંત્રી પરિષદમાં ભારે ચર્ચા ચાલી રહી છે. PMO દ્વારા મંત્રીઓના સોશિયલ મીડિયા અને ગ્રાઉન્ડ વર્ક અંગેના રિપોર્ટ્સ પર આધારિત આ સૂચનાઓ, વહીવટીતંત્રમાં નવી ગતિવિધિઓ સૂચવે છે. આ ઘટનાક્રમ ગુજરાત સરકારમાં અનેક મુદ્દાઓ પર ચર્ચા જગાવી રહ્યો છે.

અમદાવાદ સ્થિત Zydus Lifesciences અને Apollo Hospitals એ Shield Multi-Cancer Detection (MCD) નામનો એક બ્લડ ટેસ્ટ ભારતમાં રજૂ કર્યો છે. આ ટેકનોલોજી Guardant Health દ્વારા વિકસાવવામાં આવી છે, જે એક જ બ્લડ સેમ્પલથી 10 સામાન્ય કેન્સરના સંકેતો શોધી શકે છે. આ MCED ટેકનોલોજી 45 વર્ષથી વધુ ઉંમરના, સરેરાશ જોખમ ધરાવતા લોકો માટે છે. તે DNA મેથિલેશન પેટર્નનું વિશ્લેષણ કરીને કેન્સર કોષો દ્વારા છોડવામાં આવતા DNA ના ટુકડાઓ શોધે છે. આ નવી ટેકનોલોજી કેન્સર સ્ક્રીનિંગમાં ક્રાંતિ લાવી શકે છે, જોકે તે પરંપરાગત સ્ક્રીનિંગનો વિકલ્પ નથી.

હવામાન વિભાગે ગુજરાતમાં ભારેથી અતિભારે વરસાદની આગાહી કરી છે. 5 જુલાઈએ ગીર સોમનાથ, અમરેલી, ભાવનગર, સુરત, તાપી, ડાંગ, નવસારી અને વલસાડ સહિત 8 જિલ્લાઓમાં રેડ એલર્ટ જાહેર કરાયું છે. આગામી દિવસોમાં પણ વરસાદ યથાવત રહેશે, જેમાં દક્ષિણ ગુજરાત અને સૌરાષ્ટ્ર પર ખાસ અસર જોવા મળશે. છેલ્લા 22 કલાકમાં 186 તાલુકાઓમાં નોંધપાત્ર વરસાદ પડ્યો છે, જેમાં અમરેલી, નવસારી અને ગીર સોમનાથ જેવા વિસ્તારોમાં જળબંબાકારની સ્થિતિ સર્જાઈ હતી.

બોડેલી પંથકમાં લાંબા વિરામ બાદ શુક્રવારની રાત્રે ૨ થી સવારના ૬ વાગ્યા દરમિયાન ધોધમાર વરસાદ વરસ્યો, જે ૩૫ એમએમ જેટલો નોંધાયો હતો. આ વરસાદને કારણે જગતના તાત ગણાતા ધરતીપુત્રોમાં આનંદની લાગણી ફેલાઈ હતી. હવામાન વિભાગની આગાહી મુજબ, મધરાત્રે વાતાવરણમાં અચાનક પલટો આવતા બોડેલી અને તેની આસપાસના અનેક વિસ્તારોમાં મેઘો મન મૂકીને વરસ્યો હતો. નગરમાં દોઢ ઈંચ અને વિસાડી, પાંધરા પંથકમાં લગભગ બે ઈંચ ઉપરાંત વરસાદ વરસ્યો, જેના પગલે ખેતરોમાં પાણી ભરાયા હતા.

વડોદરાના ડેસર તાલુકામાં ચોમાસાના પ્રથમ વરસાદે જ ઉદલપુરથી ડેસર અને જાનીપુરા સુધીના માર્ગોની દયનીય સ્થિતિ ઉજાગર કરી છે. માર્ગો પર પડેલા મોટા ખાડાઓને કારણે વાહનચાલકોને હાલાકી વેઠવી પડે છે, અને રોજિંદા અવરજવર કરતા લોકો માટે તે જોખમી બન્યો છે. મહત્વના ક્વોરી ઉદ્યોગ ક્ષેત્ર હોવા છતાં માર્ગની જાળવણીમાં તંત્રની નિષ્ફળતા અંગે સ્થાનિકો આક્ષેપ કરી રહ્યા છે. આગામી વરસાદમાં પાણી ભરાવાથી અકસ્માતનો ભય વધી શકે છે. સ્થાનિકો તાત્કાલિક સમારકામની માંગ કરી રહ્યા છે.

ડભોઇમાં ચોમાસાની શરૂઆત થતાં જ નગરપાલિકાના પ્રી-મોન્સૂન પ્લાનિંગની પોલ ખુલી ગઈ છે. મહુડી ભાગોળથી પરબડી સુધીનો મુખ્ય માર્ગ માત્ર સામાન્ય વરસાદમાં જ સંપૂર્ણપણે ધોવાઈ ગયો છે. રસ્તા પર મોટા ખાડાઓ પડતાં સ્થાનિક રહીશો, વાહનચાલકો અને રાહદારીઓને ભારે હાલાકીનો સામનો કરવો પડી રહ્યો છે. આશ્ચર્યજનક રીતે, આ સમસ્યાગ્રસ્ત વિસ્તાર વોર્ડ નંબર 4 ના કાઉન્સિલર અને નગરપાલિકાના ઉપપ્રમુખનો પણ છે, તેમ છતાં સત્તાધીશો આ દુર્દશા તરફ ધ્યાન આપી રહ્યા નથી.

ગોધરા શહેરની અમન ડે સ્કૂલના કે.જી. વિભાગમાં પર્પલ ડે ની આનંદમય ઉજવણી સંપન્ન થઈ. આ ખાસ પ્રસંગે, વિદ્યાર્થીઓએ જાંબલી રંગના આકર્ષક વસ્ત્રો પહેરી શાળામાં હાજરી આપી. વર્ગખંડને જાંબલી રંગની શૈક્ષણિક સામગ્રી અને સુંદર સજાવટથી સુશોભિત કરાયો હતો. શિક્ષકોએ વિદ્યાર્થીઓને જાંબલી રંગના મહત્વ અને તેની વિવિધ વસ્તુઓની ઓળખ કરાવી. રમતો, પ્રવૃત્તિઓ અને સર્જનાત્મક કાર્યો દ્વારા વિદ્યાર્થીઓએ ઉત્સાહ સાથે નવીન જ્ઞાન મેળવ્યું. આ કાર્યક્રમનો મુખ્ય ઉદ્દેશ્ય રંગોની ઓળખ, સર્જનાત્મકતા અને આત્મવિશ્વાસ વધારવાનો હતો.

પંચમહાલ જિલ્લા સહકારી સંઘ, ગોધરાના ઉપક્રમે એસ.પી.પટેલ આર્ટ્સ કોલેજ, સિમલીયામાં સહકાર શિક્ષણ તાલીમ વર્ગ યોજાયો હતો. અધ્યક્ષ અને કોલેજ ટ્રસ્ટી મંડળના પ્રમુખ નટવરસિંહ ચૌહાણ, જિલ્લા સહકારી સંઘના વાઇસ ચેરમેન ખુમાનસિંહ ચૌહાણ, તાલુકા કિસાન સંઘ પ્રમુખ દશરથસિંહ સોલંકી, પ્રિન્સિપાલ ડૉ. દિલીપકુમાર અમીને પ્રાસંગિક ઉદબોધન કર્યા હતા. એકઝિક્યુટીવ ઓફ્સિર પારૂલ સોલંકીએ સહકારી શિક્ષણનો ઉદભવ અને વિકાસ, વિવિધ સહકારી પ્રવૃતિઓ અને તેના દ્વારા ઉપલબ્ધ કારકિર્દીની તકો વિશે વિગતવાર માર્ગદર્શન આપ્યુ હતું.

દાહોદના સાંસદ જસવંતસિંહ ભાભોરે લીમખેડા-ઝાલોદ હાઇવે પર આવેલા બ્રિટિશકાલીન રેલવે ગરનાળાની મુલાકાત લીધી. તેમણે પશ્ચિમ રેલવેના રતલામ ડિવિઝનના DRM સાથે સ્થળ નિરીક્ષણ કર્યું, જેનો મુખ્ય હેતુ વર્ષોથી સર્જાતી ટ્રાફ્કિ સમસ્યાનો કાયમી ઉકેલ શોધવાનો હતો. સાંકડા માર્ગને કારણે થતા ટ્રાફ્કિ જામ, અકસ્માતનું જોખમ અને ઈમરજન્સી સેવાઓમાં વિલંબ જેવી બાબતો પર ધ્યાન કેન્દ્રિત કરાયું. ગરનાળું પહોળું કરવાની માંગણી અંગે ટેકનિકલ પાસાઓ પર ચર્ચા થઈ. રેલવે વિભાગને સત્વરે કાર્યવાહીના નિર્દેશ અપાયા છે, જે વાહનવ્યવહાર સુગમ અને સુરક્ષિત બનાવશે.

શહેરની મધ્યમાં નાગરવાડા મુખ્ય રસ્તા પર આવેલી પશુપાલન શાખાની જૂની બિલ્ડિંગ પાસે ગીચ જંગલ જેવી સ્થિતિ સર્જાઈ છે. વૃક્ષારોપણ બાદ ડાળીઓ કાપવામાં ન આવતા તે જીવન સાધના શાળાના ક્લાસરૂમની બારી સુધી પહોંચી ગઈ છે. જેના કારણે ચોમાસામાં મચ્છરોનો ઉપદ્રવ અને સરિસૃપ જીવજંતુઓનો ભય રહે છે. જીવન સાધના શાળાના શિક્ષક હસમુખભાઈ પાઠકે વડોદરા જિલ્લા વિકાસ અધિકારીને આવેદનપત્ર આપી આ સમસ્યાના નિરાકરણની માગ કરી છે. જૂની બિલ્ડિંગ જર્જરિત હાલતમાં છે અને આ સ્થિતિ જિલ્લા પંચાયતના આરોગ્ય વિભાગની નિષ્ક્રિયતા દર્શાવે છે.

ન્યૂ બ્રાઇટ એજ્યુકેશન ટ્રસ્ટ દ્વારા સ્વ. જયેન્દ્રભાઈ આર. શાહની પાંચમી પુણ્યતિથિ નિમિત્તે હરણી બ્રાઇટ સ્કૂલમાં સેવા સંકલ્પ-5 કાર્યક્રમ યોજાયો. કાર્યક્રમમાં નિઃશુલ્ક મેડિકલ અને હેલ્થ ચેકઅપ કેમ્પ યોજાયો હતો. બરોડા યુથ ફેડરેશનના સહયોગથી જરૂરિયાતમંદ બાળકોને શૈક્ષણિક કિટ, કર્મચારીઓને રેઇનકોટ અને છત્રી તેમજ જરૂરિયાતમંદ પરિવારોને કપડાંનું વિતરણ કરાયું. સમાજસેવા કરનાર તબીબો અને સમાજસેવકોનું સન્માન પણ થયું.