મુંબઈમાં સતત ત્રણ દિવસથી મુશળધાર વરસાદને કારણે શહેર પરિવહન વ્યવસ્થા ઠપ થઈ ગઈ છે. મુંબઈ-પુણે એક્સપ્રેસવે, મુંબઈ-અમદાવાદ હાઈવે અને મુંબઈ-કોંકણ રોડ પર પાણી ભરાવા, ભૂસ્ખલન અને ટ્રાફિક જામને કારણે હજારો મુસાફરો કલાકો સુધી ફસાયેલા રહ્યા. પુણે-મુંબઈ એક્સપ્રેસવેની કેટલીક લેન ફરી ખોલવામાં આવી છે, જ્યારે મુંબઈ-પુણે ટ્રેન સેવાઓ પણ ભૂસ્ખલનને કારણે પ્રભાવિત થઈ છે. હવામાન વિભાગે આગામી બે દિવસ ભારે વરસાદની ચેતવણી જાહેર કરી છે, નાસિક અને ત્ર્યંબકેશ્વર માટે રેડ એલર્ટ જારી કરાયું છે.

આણંદ શહેરના ટૂંકી ગલી વિસ્તારમાં બેસુમાર દબાણો ખડકાતા શહેરનો આ હાર્દ સમો વિસ્તાર દબાણોના પ્રશ્નો ફરી એકવાર ચર્ચામાં આવ્યો છે. ચૂંટણી પૂરી થયા બાદ પણ મનપાનું નવનિયુક્ત તંત્ર દબાણો હટાવવામાં નિષ્ફળ રહ્યું છે. અગાઉ દબાણો દૂર કરાયા હતા, પરંતુ હવે વોટ બેંકની લાલચમાં લારી-પાથરણાંવાળાઓને છૂટો દોર મળ્યો છે. જેના કારણે રસ્તાઓ સાંકડા થવાથી ટ્રાફિક સમસ્યા અને રાહદારીઓને ભારે હાલાકીનો સામનો કરવો પડે છે. ત્રણ દાયકા જૂની આ જટિલ સમસ્યાનો કાયમી ઉકેલ લાવવામાં તંત્ર નિષ્ફળ રહ્યું છે.

વડોદરાના બે મિત્રો, કમલેશભાઈ અને મનેશભાઈ, પોતાની આઈશર ગાડીઓમાં કેળા ભરીને ડીસા જઈ રહ્યા હતા. એક્સપ્રેસ હાઈવે પર પુરપાટ જતી કન્ટેનર પાછળ મનેશભાઈની આઈશર અથડાઈ હતી. અકસ્માત બાદ મનેશભાઈ ગાડીમાં ફસાઈ ગયા હતા અને મદદ માટે બૂમો પાડી રહ્યા હતા. તેમના મિત્ર કમલેશભાઈ અને હાઈવે પેટ્રોલિંગની ટીમે મનેશભાઈને બહાર કાઢવાનો પ્રયાસ કર્યો, પરંતુ તેમને ગંભીર ઈજાઓ થતાં તેમનું મોત નીપજ્યું. પોલીસે ગુનો નોંધી વધુ તપાસ હાથ ધરી છે.

હિંમતનગર નજીક નવાઘરા ઉબરીયા ગામમાં ખેતરનો શેઢો ખેડી નાખવાના ઝઘડા બાદ થયેલી મારામારીમાં એક ખેડૂતને ઇજા થવાનો બનાવ બન્યો છે. ઇશ્વર નાથાજી પટેલે નોંધાવેલી ફરિયાદ મુજબ, કાન્તિભાઇ ભીમાજીએ તેમના ખેતરનો શેઢો ખેડી નાખ્યો હતો. જ્યારે આ બાબતે કહેવા જતાં કાન્તિભાઇએ અપશબ્દો બોલી લાકડીથી હુમલો કરી ઇજા પહોંચાડી હતી અને જાનથી મારી નાખવાની ધમકી આપી હતી. પોલીસે ગુનો નોંધી કાયદેસર કાર્યવાહી હાથ ધરી છે.

પોશીના પંથકમાં લાંબા વિરામ બાદ મેઘરાજાની ધમાકેદાર એન્ટ્રી થતાં સ્થાનિકોને અસહ્ય ઉકળાટ અને બફારામાંથી મોટી રાહત મળી છે. પોશીના મુખ્ય મથક સહિત લાંબડીયા, કોટડા અને દેલવાડા જેવા ગ્રામ્ય વિસ્તારોમાં પવન સાથે ધોધમાર વરસાદ ખાબક્યો હતો. મુખ્ય બજારમાં નદી જેવી સ્થિતિ સર્જાઈ હતી અને રસ્તાઓ પાણીમાં ગરકાવ થઈ ગયા હતા. લાંબા સમયથી વરસાદની રાહ જોઈ રહેલા ધરતીપુત્રોમાં વાવણી લાયક વરસાદથી ભારે હરખ અને આનંદ જોવા મળી રહ્યો છે, જેના કારણે ખુશીની લહેર દોડી ગઈ છે.

સાબરકાંઠા જિલ્લામાં મોડેથી શરૂ થયેલા વરસાદથી આગોતર વાવેતર કરાયેલ મગફળી, કપાસને ખૂબ ફાયદો થયો છે. પોશીના તાલુકામાં દોઢ ઇંચથી વધુ વરસાદ પડતાં ખેડૂતોને વાવણી માટે અનુકૂળતા રહેશે. હિંમતનગર, વડાલી, તલોદ અને પ્રાંતિજ સહિતના વિસ્તારોમાં પણ ઝાપટાં પડ્યા હતા, જોકે બાફ અને ઉકળાટમાં ખાસ ઘટાડો થયો નથી. તલોદમાં 1 ઇંચથી વધુ અને પ્રાંતિજમાં અડધો ઇંચ વરસાદ નોંધાયો હતો. જિલ્લામાં વધુ વરસાદની શક્યતા નકારી શકાતી નથી.

ધોલેરા SIR વિસ્તારમાં L&T કંપનીના કેમ્પમાં આવેલ ઓફ્સિ કન્ટેનરમાં શોર્ટ સર્કિટથી આગ લાગી. આગની જ્વાળાઓ અને ધુમાડા દૂર સુધી દેખાતા કર્મચારીઓમાં અફરાતફરી મચી હતી. કંપનીના સ્ટાફે તાત્કાલિક ફાયર ફાઈટિંગ સાધનો વડે આગ કાબૂમાં લીધી. સમયસર કાર્યવાહીથી આગ વધુ ફેલાતી અટકી અને મોટી દુર્ઘટના ટળી. આ ઘટનામાં બે ઓફ્સિ કન્ટેનરને નુકસાન થયું છે, પરંતુ કોઈ જાનહાનિ થઈ નથી.

સુરેન્દ્રનગરના ધ્રાંગધ્રા તાલુકાના કોંઢ ગામમાંથી પસાર થતી વીજલાઇન સામે ખેડૂતોએ યોગ્ય વળતરની માંગણી કરી હતી. સરકાર દ્વારા માર્કેટ ભાવ પ્રમાણે વળતરની જાહેરાત બાદ પણ, ખેડૂતોએ રાજસ્થાન પોલીસી મુજબ 400% વળતર અને ટાવર માટે ચોરસ મીટર દીઠ નક્કી થયેલા ભાવના 30% વળતરની માંગ સાથે ડેપ્યુટી કલેક્ટરને આવેદનપત્ર સુપરત કર્યું છે. આ મુદ્દે સરકારની આગામી કાર્યવાહી પર સૌની નજર રહેશે.

સુરેન્દ્રનગરના લીંબડી તાલુકામાં આવેલ મોટી કઠેચી ગામમાં પીવાના પાણીની સમસ્યાનો ઉકેલ લાવવા ગ્રામજનોએ જાતે જહેમત ઉઠાવી છે. ગામની 2 હજારથી વધુની વસ્તી માટે વિઠ્ઠલગઢથી પાણી સમ્પમાં ઠલવાય છે. પરંતુ પાણી પુરવઠા વિભાગના વાસ્મો યુનીટ દ્વારા કરાયેલા ઝોનિંગના કારણે ભરવાડવાસ વિસ્તારમાં પૂરતું પાણી પહોંચતું ન હતું. આ સમસ્યાના નિરાકરણ માટે ગામના સામાજિક આગેવાન ખલીલભાઈ સમાના પ્રયાસોથી 30થી વધુ પરિવારોએ 100, 200 અને 500 રૂપિયાનો લોકફાળો આપી 50 હજારના ખર્ચે 600 ફુટ લાંબી PVC પાઈપ લાઈન નાખીને પાણીની સમસ્યા હલ કરી છે.

સુરેન્દ્રનગર LCB PI બી.એચ.શીંગરખીયાની સૂચના બાદ, LCB ટીમે દસાડાના આદરીયાણા ગામમાં જુગાર રમતા 9 શખ્સોને 44,500 રોકડા, 8 મોબાઈલ અને 7 બાઈક, આમ કુલ 2.20 લાખનો મુદ્દામાલ સાથે ઝડપી પાડ્યા. જોકે, 6 આરોપી ફરાર થવામાં સફળ રહ્યા. આ ઉપરાંત, સાયલાના સુદામડા ગામે પણ LCBએ જુગાર પર રેડ કરી, 2 આરોપીઓને 1410 રૂપિયા રોકડા સાથે ઝડપી લીધા, જ્યારે એક ફરાર થઈ ગયો. બંને કિસ્સાઓમાં પોલીસે ગુનો નોંધી વધુ તપાસ હાથ ધરી છે.

ભારતમાં નકલી અને ભેળસેળયુક્ત ખાદ્યપદાર્થોનો વેપાર ચિંતાજનક રીતે વધી રહ્યો છે, જે કરોડો લોકોના સ્વાસ્થ્ય અને વિશ્વાસ પર સીધો હુમલો છે. FSSAIના આંકડા દર્શાવે છે કે તપાસાયેલા લગભગ દરેક પાંચમાંથી એક ખાદ્ય નમૂનો નિર્ધારિત ધોરણો મુજબનો નથી. નફાની ભૂખે માનવતાને ભરખી ગઈ છે, જેમાં ઘી, દૂધ, મસાલા અને મીઠાઈઓ જેવી વસ્તુઓમાં ડિટર્જન્ટ, યુરિયા અને ઔદ્યોગિક રસાયણોનો ઉપયોગ થાય છે. આ લાંબા ગાળે ગંભીર આરોગ્ય સમસ્યાઓ નોતરી શકે છે.

અયોધ્યાના રામ મંદિરમાં દાનની ચોરીનો મુદ્દો ગરમાયો છે. કોંગ્રેસ નેતા પવન ખેડાએ આરોપ લગાવ્યો છે કે ધાર્મિક સ્થળો પર ચોરીની એક ખાસ પેટર્ન બની ગઈ છે, જેનો ઉપયોગ BJP અને RSS રાજકીય સત્તા અને પોતાના લાભ માટે કરી રહ્યા છે. તેમણે RSS પર જવાબદારી ટાળવાનો અને પોતાના એકાઉન્ટ બુક્સ જાહેર ન કરવાનો પણ આરોપ મૂક્યો. આ ઘટનાઓ રામ મંદિર ટ્રસ્ટની મહત્વની બેઠક પહેલાં ચર્ચામાં આવી છે.

શ્રીરામ જન્મભૂમિ તીર્થ ક્ષેત્ર ટ્રસ્ટના અધ્યક્ષ મહંત નૃત્ય ગોપાલ દાસે રામ મંદિરમાં થયેલી દાન ચોરીની ઘટના પર ઊંડું દુઃખ વ્યક્ત કર્યું છે. તેમણે મુખ્યમંત્રી યોગી આદિત્યનાથ અને વડાપ્રધાન નરેન્દ્ર મોદી પર ભરોસો વ્યક્ત કરતાં કહ્યું કે ગુનેગારોને સખત સજા મળશે. આ ઘટનાને લઈને થઈ રહેલી રાજનીતિ પર પણ તેમણે નારાજગી વ્યક્ત કરી છે અને અંગત લાભ માટે રાજનીતિ ન કરવાની અપીલ કરી છે. આ મહત્વની બેઠકમાં ટ્રસ્ટની પ્રતિષ્ઠાને થયેલા નુકસાન અંગે પણ ચર્ચા થશે.

રામ મંદિર દાન ચોરીમાં ભક્તોની ભાવનાઓને ઠેસ પહોંચાડનાર દાન ચોરીના મામલે VHPના આંતરરાષ્ટ્રીય અધ્યક્ષ આલોક કુમારે કડક પ્રતિક્રિયા આપી છે. તેમણે આ ઘટનાને દુઃખદ ગણાવી અને ભક્તોની લાગણીઓને મહત્વ આપ્યું. VHP, RSS કે મોદી સરકાર સાથે આ વિવાદને જોડવાના પ્રયાસોને તેમણે ફગાવી દીધા. ચંપત રાયની ભૂમિકા અંગે તેમણે સ્પષ્ટતા કરી કે તેઓ VHPનું પ્રતિનિધિત્વ કરતા નથી. આ મામલે તપાસ અને દોષિતોને 4-5 મહિનામાં જેલ ભેગા કરવાની માંગ કરી છે.

મહારાષ્ટ્ર અને દક્ષિણ ગુજરાતમાં થયેલ ભારે વરસાદને કારણે રેલ અને હવાઈ સેવા પર તેની વ્યાપક અસર પડી છે. મહારાષ્ટ્રના પાલઘર રેલવે સ્ટેશન નજીક ટ્રેક પર પાણી ભરાતા મુંબઈ-અમદાવાદ રેલ વ્યવહાર ખોરવાયો છે. વાપી-મુંબઈ વચ્ચે છેલ્લા બે કલાકથી ટ્રેનો અટવાઈ છે, જેના કારણે અનેક મુસાફરો અટવાયા છે. મુંબઈ એરપોર્ટ પર ખરાબ હવામાનને કારણે 13 ફ્લાઈટ્સને સુરત એરપોર્ટ પર ડાયવર્ટ કરાઈ છે. કેટલીક ફ્લાઈટ્સ રદ અને અન્ય મોડી પડી છે, જેના કારણે મુસાફરોને હાલાકીનો સામનો કરવો પડી રહ્યો છે.

અયોધ્યા રામ મંદિર ટ્રસ્ટની મહત્ત્વની બેઠક આજે રામ મંદિર પરિસરમાં બપોરે 3 વાગ્યે યોજાશે. આ બેઠકમાં ટ્રસ્ટના મહાસચિવ ચંપત રાય અને સભ્ય અનિલ મિશ્રાના રાજીનામા અંગે નિર્ણય લેવાશે. દાન ચોરી વિવાદ અને SIT રિપોર્ટ સાથે જોડાયેલી બાબતો પર પણ ચર્ચા થશે. 2025-26 ના ઓડિટ રિપોર્ટની પણ સમીક્ષા કરવામાં આવશે. ટ્રસ્ટ બંને પક્ષકારોનો જવાબ સાંભળીને નિર્ણય લેશે. બંને હોદ્દેદારોની ભૂમિકા સામે અનેક આરોપો વચ્ચે ટ્રસ્ટ પોતાની છબી સુધારવાનો પ્રયાસ કરશે.

બીજી T20 મેચમાં તિલક વર્માએ 23 વર્ષ અને 238 દિવસની ઉંમરે 1500 T20I રન પૂરા કરીને એક નવો રેકોર્ડ પોતાના નામે કર્યો છે. આ સાથે, તેઓ વિરાટ કોહલી, રોહિત શર્મા અને કેએલ રાહુલ જેવા દિગ્ગજોને પાછળ છોડીને ભારત માટે T20 ઇન્ટરનેશનલમાં સૌથી નાની ઉંમરે આ સિદ્ધિ હાંસલ કરનાર પ્રથમ ખેલાડી બન્યા છે. આ રેકોર્ડ અગાઉ અભિષેક શર્માના નામે હતો, જે 25 વર્ષ અને 300 દિવસની ઉંમરે 1500 T20I રન બનાવનાર સૌથી યુવા ભારતીય હતા. તિલકના T20 કારકિર્દીમાં 50 ઇનિંગ્સમાં 1501 રન, 44.14 ની એવરેજ અને 143.49 નો સ્ટ્રાઈક રેટ નોંધાયેલો છે.

મુંબઈમાં અવિરત વરસાદ વચ્ચે માનખુર્દ વિસ્તારમાં એક ત્રણ માળની ચૉલનો ભાગ રવિવારે રાત્રે ધરાશાયી થયો. આ દુર્ઘટનામાં છ લોકોના મોત થયા છે અને એક વ્યક્તિ ઘાયલ છે. NDRF, ફાયર બ્રિગેડ, પોલીસ અને BMCની ટીમો ઘટનાસ્થળે પહોંચી ગઈ છે અને બચાવ તથા રાહત કામગીરી ચાલી રહી છે. કાટમાળ નીચે વધુ લોકો ફસાયેલા હોવાની આશંકા છે. આ અકસ્માતનું ચોક્કસ કારણ હજુ સ્પષ્ટ થયું નથી, પરંતુ ભારે વરસાદને કારણે ઇમારત નબળી પડી હોવાનું મનાય છે.

બનાસકાંઠાના સરહદી વાવ અને થરાદ પંથકમાં શનિવાર રાત્રે અચાનક વાતાવરણમાં પલટો આવતાં ભારે પવન, વરસાદ અને વીજળી સાથે કુદરતી આફત આવી હતી. આ તોફાનને કારણે ખેડૂતોના રહેણાંક મકાનો અને પશુઓના શેડના પતરા ઉડી ગયા, જેનાથી ખેડૂત પરિવારો મુશ્કેલીમાં મુકાયા. થરાદના આજાવાડા ગામે ક્કનર્મદેશ્વર ગૌશાળાના શેડ પણ તૂટી પડ્યા, જેનાથી મોટાપાયે આર્થિક નુકસાન થયું. જોરડીયાળી, તખતપુરા સહિતના વિસ્તારોમાં વીજપોલ અને ડીપી ધરાશાયી થતાં અંધારપટ છવાયો. જોકે, કોઈ મોટી જાનહાનિ થઈ નથી.

ગુજરાતના કૃષિ, પશુપાલન, ગૌ સંવર્ધન અને સહકાર વિભાગના મંત્રી રમેશ કટારાએ ફ્તેપુરા વિધાનસભા બેઠકના ધારાસભ્ય તરીકે પોતાના વતન હિંગલા ગામે પહોંચીને ખેતીકામમાં સીધો જ સહયોગ આપ્યો હતો. તેમણે પરંપરાગત રીતે બળદ સાથે હળ જોતરીને જાતે ખેતર ખેડ્યું અને વાવણીનું કામ કર્યું. મંત્રીના આ સરળ અને જમીન સાથે જોડાયેલા સ્વરૂપે ગ્રામજનો અને ખેડૂતોમાં આદર જગાવ્યો. તેમણે ખેતી સાથેના પોતાના વર્ષો જૂના જોડાણને તાજું કરીને ખેડૂત સમુદાય પ્રત્યેની નિષ્ઠા વ્યક્ત કરી. આ ઘટના સોશિયલ મીડિયા અને સ્થાનિક કક્ષાએ ખૂબ જ ચર્ચાઈ રહી છે.

દેડિયાપાડા - ચિકદા અને સાગબારા તાલુકામાં મેઘ મહેર થતાં આદિવાસી ખેડૂતો ખુશખુશાલ થઈ ગયા છે અને ખેતરમાં વાવેતર શરૂ કરી દીધુ છે. આજના આધુનિક યુગમાં પણ નર્મદા જિલ્લાના અંતરિયાળ વિસ્તારોમાં આદિવાસી ખેડૂતો આધુનિક સાધનો નહી પરંપરાગત સાધનોથી જ ખેતી કરે છે. બળદ અને હળથી વાવણીમાં જોતરાયેલા આદિવાસી પતિ પત્ની તસ્વીરમાં નજરે પડે છે.

રામ મંદિર, અયોધ્યામાં દાન ચોરીના મામલે રાષ્ટ્રીય સ્વયંસેવક સંઘ (RSS) ના પ્રમુખ મોહન ભાગવતે પોતાની પ્રતિક્રિયા આપી છે. તેમણે કહ્યું કે તેઓ RSS ના સરકાર્યવાહ દત્તાત્રેય હોસબાલેના નિવેદન સાથે સંપૂર્ણપણે સહમત છે. નાગપુરમાં પત્રકારો દ્વારા પૂછવામાં આવેલા એક સવાલના જવાબમાં ભાગવતે કહ્યું કે, 'દત્તાત્રેય હોસબાલે દ્વારા જાહેર કરાયેલું નિવેદન જુઓ, મારી પ્રતિક્રિયા પણ એ જ છે.' હોસબાલેએ અગાઉ કહ્યું હતું કે, આ ઘટના રામ ભક્તોની આસ્થાને ઠેસ પહોંચાડે છે અને દોષિતો સામે કડક કાર્યવાહી થવી જોઈએ.

દેડિયાપાડા તાલુકાના કનબુડી ગામે યોજાયેલી ખેડૂત-વૈજ્ઞાનિક ગોષ્ઠીમાં ખેડૂતોને કૃષિ ક્ષેત્રે નવા સંશોધનો, આધુનિક ટેકનોલોજી અને વૈજ્ઞાનિક ખેતી પદ્ધતિઓથી માહિતગાર કરાયા. આ કાર્યક્રમનો મુખ્ય ઉદ્દેશ્ય ખેડૂતોને ઉત્પાદન વધારવા અને આર્થિક રીતે સમૃદ્ધ બનવા પ્રોત્સાહિત કરવાનો હતો. કૃષિ નિષ્ણાતોએ બદલાતા હવામાન મુજબ પાક વ્યવસ્થાપન, ઓછા ખર્ચે વધુ ઉત્પાદન, સેન્દ્રીય ખેતી, અને ટપક સિંચાઈના લાભો સમજાવ્યા. ઉપરાંત, વૈજ્ઞાનિકોએ રોકડિયા પાકો અપનાવવા પર ભાર મૂક્યો. ખેડૂતોના પ્રશ્નોના વૈજ્ઞાનિક ઉપાયો પણ જણાવવામાં આવ્યા.

નવા ચિકદા તાલુકાના નાની બેડવાણ ગામમાં યુરિયા ખાતરની અછતને કારણે ખેડૂતોને ભારે હાલાકી પડી રહી છે. ખેતીની વ્યસ્ત સિઝનમાં, સમયસર ખાતર ન મળતાં ખેડૂતોમાં રોષ છે. તેઓ ત્રણ દિવસથી લાંબી લાઇનોમાં ઊભા રહીને પણ માત્ર 50-60 ખેડૂતોને જ ખાતર મળતું હોવાનો આક્ષેપ કરે છે. ખાતર વિતરણમાં અવ્યવસ્થા અને ઝઘડાની ઘટનાઓ પણ બની રહી છે. સ્થાનિક આગેવાનોએ ચિકદા તાલુકામાં અલગ ખાતર ડેપોની માંગ કરી છે, જેથી ખેડૂતોને સમયસર ખાતર મળી શકે. પાકના વિકાસ માટે યુરિયાની તાત્કાલિક જરૂરિયાત છે, તેથી જિલ્લા વહીવટીતંત્રને ખાતર ઉપલબ્ધ કરાવવા અને વિતરણ વ્યવસ્થા સુધારવા અપીલ કરાઈ છે.

પ્રાઇવેટ કારની છત પર લગેજ Carrier લગાવતા પહેલાં RTO નિયમો જાણવા ખૂબ જરૂરી છે. મોટર વ્હીકલ એક્ટ 1988 મુજબ, પર્સનલ કાર પર Carrier લગાવવું ગેરકાનૂની નથી અને તેના માટે કોઈ ખાસ પરમિશનની જરૂર નથી. જોકે, Carrier લગાવવા પર નહીં, પરંતુ તેના ખોટા ઉપયોગ પર ચલાન કપાય છે. સામાન ગાડીની નિર્ધારિત પહોળાઈ-લંબાઈથી બહાર ન હોવો જોઈએ, પાછળના વાહનોને ખતરો ન થવો જોઈએ અને નંબર પ્લેટ, લાઈટ્સ ઢંકાવી ન જોઈએ. પ્રાઇવેટ કારમાં ફક્ત પર્સનલ સામાન જ લઈ જઈ શકાય છે, કમર્શિયલ સામાન પર પોલીસ ગાડી સીઝ કરી શકે છે.

સંજેલી APMC ખાતે આજ રોજ ચેરમેન તેમજ વાઇસ ચેરમેનની બિનહરીફ્ વરણી કરવામાં આવી હતી, જેમાં ભાજપ તરફી પેનલમાંથી બે નામ આવતા સર્વાનુમતે નક્કી કરાયા હતાં, જેમાં વામાં આવી હતી. ચેરમેન તરીકે ખેડૂત પેનલમાંથી સુરેન્દ્રસિંહ સોલંકી અને વાઇસ ચેરમેન તરીકે વેપારી વિભાગમાંથી પંકજકુમાર કોઠારીના નામો રજૂ કરાયા હતા અને તેઓની સર્વાનુમતે બિનહરીફ્ વરણી કરાઈ હતી. આ પ્રસંગે પ્રભારી ભરતભાઈ શ્રીમાળી હાજર રહ્યા હતા.

છોટાઉદેપુર જિલ્લામાં વરસાદ ખેંચાવાને કારણે ખેડૂતો દ્વારા વાવણી કરાયેલા સોયાબીન, તુવેર અને કપાસ જેવા મોંઘા બિયારણ સંપૂર્ણપણે નિષ્ફળ ગયા છે. અલનીનોની અસરને કારણે જૂન મહિનામાં થયેલા વરસાદ બાદ લાંબા સમયથી વરસાદ ન વરસતા અનેક ગામોમાં મુખ્ય પાકોના બિયારણ ઉગીને બફાઈ ગયા છે. સિંચાઈની સુવિધાના અભાવે વરસાદ આધારિત ખેતી કરતા આ વિસ્તારોના ખેડૂતોને મોટું આર્થિક નુકસાન વેઠવું પડ્યું છે. ખેડૂતોને નવેસરથી બિયારણ અને ખાતર ખરીદવા તેમજ ખેડાણ કરવા પર વધારાનો આર્થિક બોજ પડ્યો છે. બિયારણના ભાવ પણ વધ્યા છે. સરકાર પાસે સહાય પેકેજની માંગ કરી રહ્યા છે.

મધ્યપ્રદેશના ધાર જિલ્લામાં સ્થિત માંડુ, 'સિટી ઓફ જોય' તરીકે જાણીતું છે, જે વિંધ્યાચલ પર્વત પર વસેલું છે. બાજ બહાદુર અને રાણી રૂપમતીના પ્રેમની ગાથા સાથે જોડાયેલું આ શહેર, જેનું જૂનું નામ 'શાદિયાબાદ' એટલે કે ખુશીઓનું નગર હતું, તે તેની અદ્ભુત વાસ્તુકલા અને 12 પ્રવેશદ્વારો માટે પ્રખ્યાત છે. 82 કિલોમીટરના વિશાળ વિસ્તારમાં ફેલાયેલો માંડુનો કિલ્લો, જેને 'અભેદ ગઢ' પણ કહેવાય છે, તે ભારતના સૌથી મોટા કિલ્લાઓમાંનો એક છે. રાણી રૂપમતીનો મહેલ, બાજ બહાદુર મહેલ, હિંડોળા મહેલ, જહાજ મહેલ અને જામા મસ્જિદ જેવી અનેક ઐતિહાસિક ઇમારતો પ્રવાસીઓને આકર્ષે છે.

ભારતીય રમતગમતના ઇતિહાસમાં, વાસુદેવન ભાસ્કરન એક એવું નામ છે જે 1980 મોસ્કો ઓલિમ્પિકમાં ભારતીય હોકી ટીમને છેલ્લો ગોલ્ડ મેડલ અપાવવા માટે જાણીતું છે. તેઓ માત્ર એક ઉત્કૃષ્ટ ખેલાડી જ નહીં, પરંતુ એક પ્રેરણાદાયી કેપ્ટન અને કુશળ કોચ પણ હતા. તમિલનાડુમાં જન્મેલા ભાસ્કરને નાનપણથી જ હોકીમાં રસ દાખવ્યો. ડિફેન્ડર તરીકે શરૂઆત કરીને, તેમની ઝડપ અને પાસિંગ ક્ષમતાને કારણે તેઓ રાષ્ટ્રીય સ્તરે ચમક્યા. 1980 માં, તેમણે ટીમને ફ્રન્ટ લાઈનથી લીડ કરી, રોમાંચક ફાઇનલમાં સ્પેનને હરાવી ગોલ્ડ મેડલ જીત્યો.

વિશ્વમાં તંગદીલી વચ્ચે, ભારત અને જાપાને શાંતિ અને સમૃદ્ધિ માટે દ્વિપક્ષીય ભાગીદારી મજબૂત કરવાનો સંકલ્પ કર્યો છે. જાપાનના PM તાકાઈચી અને ભારતના PM વચ્ચે થયેલી મંત્રણા બાદ 6 ક્ષેત્રોમાં મહત્વના કરાર થયા છે. આર્થિક સુરક્ષા, સપ્લાય ચેન, AI, સેમિકન્ડક્ટર, બાયોગેસ અને ક્રિટિકલ ટેકનોલોજીમાં સહયોગ વધારવા પર ભાર મૂકાયો છે. સંયુક્ત રક્ષા વિકાસ યોજના અને નેવલ રેડિયો એન્ટેના યુનિકોર્ન વિકસાવવા પર પણ સંમતિ થઈ છે. આ કરારો બંને દેશોની સુરક્ષા અને આર્થિક વિકાસ માટે અત્યંત મહત્વપૂર્ણ છે.