સુરત શહેરની સાયબર ક્રાઇમ સેલે શેર બજાર અને IPOમાં ઊંચા નફાની લાલચ આપી 99.50 લાખની ઑનલાઇન છેતરપિંડી કરનાર 6 આરોપીઓની ધરપકડ કરી છે. તેઓ બનાવટી એપ્લિકેશનો દ્વારા રોકાણકારોને છેતરપિંડી કરતા હતા. ગેંગ સામે દેશમાં 31 સાયબર ક્રાઇમના ગુનાઓ નોંધાયા છે. આરોપીઓ સોશિયલ મીડિયા પર રોજ 5-10% નફાની જાહેરાતો આપતા અને લોકોને નકલી એપ ડાઉનલોડ કરાવી અમુક નફાનું પ્રદર્શન બતાવી વધુ રોકાણ માટે પ્રેરતાં. પૈસા ટ્રાન્સફર થયા પછી પીડિતાને રકમ ઉપાડવા દેતા નહોતા. ગંભીર ગુનાહિત ઇતિહાસ ધરાવનારા મુખ્ય આરોપીઓ અજય, જલ્પેશ, વિશાલ, હિરેનકુમાર અન્ય સાયબર ક્રાઇમ કેસોમાં સંડોવાયેલા છે.