ક્યારેક નાનકડા લાભ કે ફાયદા માટે લીધેલો નિર્ણય આગળ જતાં જિંદગીને નવીન અને અણધારી સિદ્ધિના શીખરે પહોંચાડી દે છે. કઠોર પરિશ્રમનો તો કોઈ વિકલ્પ નથી અને તેના જ સહારે ગમે તે દિશામાં સાતત્ય સાથે આગેકૂચ કરવામાં આવે તો તેના ફળ સમયાંતરે મળતા જ રહે છે. તેની સાથે સર્જાતો ઈતિહાસ વ્યક્તિને ઈતિહાસના ગૌરવમય સ્વર્ણિમ પ્રકરણ તરીકે અમીટ સ્થાન પણ અપાવી દે છે. તેનું જીવંત ઉદાહરણ ભારતની ૨૯ વર્ષની એથ્લીટ પ્રિયંકા ગોસ્વામી છે. ભારતની ૨૯ વર્ષની એથ્લીટ પ્રિયંકા ગોસ્વામીએ ખુબ જ ઓછી જાણીતી વોક રેસની સ્પર્ધામાં આંતરરાષ્ટ્રીય સ્તરે આગવી ઓળખ ઉભી કરી છે. ટોકિયો અને ત્યાર બાદ પેરિસમાં યોજાયેલા ઓલિમ્પિકમાં પણ તેણે રાષ્ટ્રીય ટીમ તરીકે પ્રભાવશાળી દેખાવ કરવાની સિદ્ધિ તો હાંસલ કરી જ છે, સાથે સાથે કોમનવેલ્થ ગેમ્સ ૨૦૨૨માં ૧૦૦૦૦ મીટરની વોક રેસમાં તેની રજત સિદ્ધિ ભારતીય એથ્લેટિક્સમાં અનન્ય છે.