રાજકોટ મહાનગરપાલિકા સંચાલિત પ્રદ્યુમન પાર્ક પ્રાણીઉદ્યાનમાં વધુ એક ખુશીનો પ્રસંગ આવ્યો છે, જ્યાં સિંહણ ધરતીએ ત્રણ સુંદર એશિયાઈ સિંહબાળને જન્મ આપ્યો છે. માતા અને ત્રણેય બચ્ચાં હાલ સંપૂર્ણ સ્વસ્થ છે અને ઝૂ તંત્ર દ્વારા તેમની સતત દેખરેખ રાખવામાં આવી રહી છે. આ નવા આગમન સાથે, રાજકોટ ઝૂમાં એશિયાઈ સિંહોની કુલ સંખ્યા વધીને 20 થઈ ગઈ છે. અત્યાર સુધીમાં, આ પ્રાણીઉદ્યાનમાં કુલ 58 એશિયાઈ સિંહબાળનો સફળતાપૂર્વક જન્મ નોંધાયો છે, જે એક મોટી સિદ્ધિ છે. અહીંનું કુદરતી વાતાવરણ અને આધુનિક સુવિધાઓને કારણે, ઝૂ 70 પ્રજાતિઓના 614 વન્યપ્રાણી-પક્ષીઓ સાથે પ્રવાસીઓ માટે એક આકર્ષણનું કેન્દ્ર બન્યું છે.