સુરત નગર પ્રાથમિક શિક્ષણ સમિતિ સંચાલિત ઉત્રાણની એક શાળાએ અનોખી પહેલ કરી છે, જ્યાં વિદ્યાર્થીઓ જ રિપોર્ટર, ફોટોગ્રાફર અને ન્યૂઝ એન્કર બની પોતાની શાળાની પ્રવૃત્તિઓનું કવરેજ કરે છે. શાળા ક્રમાંક-334ના આચાર્ય ચેતન હીરપરાએ ટેકનોલોજીનો સર્જનાત્મક ઉપયોગ શીખવવા માટે વિદ્યાર્થી સોશિયલ મિડિયા ટીમની રચના કરી છે. આ ટીમ શૈક્ષણિક, સાંસ્કૃતિક અને રમતગમત સહિતની પ્રવૃત્તિઓનું કવરેજ કરી ન્યૂઝ બુલેટિન સ્વરૂપે સોશિયલ મીડિયા પર પ્રસારણ કરે છે. આ પ્રયોગથી વિદ્યાર્થીઓમાં સમાચાર લેખન, સંવાદ, પ્રેઝન્ટેશન, ટીમવર્ક અને નેતૃત્વ ક્ષમતા જેવી જીવન ઉપયોગી આવડતો વિકસી રહી છે, જેના કારણે શાળામાં પ્રવેશની માંગ પણ વધી રહી છે.