વાઘોડિયા : વાઘોડિયા વિદ્યોતેજક મિત્ર મંડળ દ્વારા વાઘોડિયાની પ્રાથમિક શાળામાં અભ્યાસ કરતા બાળકો પૈકી વાર્ષિક પરીક્ષામાં પ્રથમ, દ્રિતીય ક્રમાંક મેળવનાર અને ગણિત, વિજ્ઞાન, અંગ્રેજી જેવા મુખ્ય વિષયો તેમજ સંસ્કૃતમાં સર્વાધિક ગુણ મેળવનાર વિદ્યાર્થીઓને ઈનામ વિતરણ કરી સન્માનવાનો કાર્યક્રમ યોજાયો હતો, જેમાં મંડળના પદાધિકારીઓ ઉપસ્થિત રહ્યા હતા.

નસવાડીઃ નસવાડી તાલુકા કક્ષાનો 80મો સ્વાતંર્ત્ય પર્વ જામલી પ્રાથમિક શાળા ખાતે દેશભક્તિ અને ઉત્સાહભેર ઉજવવામાં આવ્યો હતો. કાર્યક્રમમાં નસવાડી મામલતદારના હસ્તે રાષ્ટ્રધ્વજ ફરકાવી ધ્વજવંદન કરવામાં આવ્યું હતું. આ પ્રસંગે જામલી ગામના સરપંચ લીલાબેન જનકભાઈ રાઠવા, વહીવટી તંત્રના અધિકારીઓ, કર્મચારીઓ તેમજ તાલુકા કક્ષાનો સ્ટાફ્ ઉપસ્થિત રહ્યો હતો. ધ્વજવંદન બાદ જામલી પ્રાથમિક શાળા, ઝેર પ્રાથમિક શાળા અને નવગામ પ્રાથમિક શાળાના બાળકો દ્વારા દેશભક્તિથી સભર કાર્યક્રમો રજૂ કરવામાં આવ્યા હતા.

નસવાડી : નસવાડી ગામે આવેલ ગાયત્રી શક્તિપીઠ વિદ્યાપીઠ ખાતે તા. 16ના રોજ દ્વિતીય એક દિવસીય મૌન શિબિરનું આયોજન કરવામાં આવ્યું હતું. ગાયત્રી શક્તિપીઠ ખાતે યોજાયેલી આ મૌન શિબિરમાં કુલ 63 ભાવિક ભક્તોએ ભાગ લીધો હતો, જેમાં 23 બહેનો અને 40 પુરુષો જોડાયા હતા. શિબિર દરમિયાન ઉપસ્થિત સાધકોએ મૌનનું પાલન કરી ધ્યાન, આત્મચિંતન તથા આધ્યાત્મિક સાધનાના માધ્યમથી આંતરિક શાંતિનો અનુભવ કર્યો હતો.

ડભોઈ : ડભોઈના એસ.ટી. ડેપો પરિસરમાં મુસાફરો અને વિદ્યાર્થીઓની સુવિધા માટે અને સ્વચ્છતા ઝુંબેશના ભાગરૂપે મૂકવામાં આવેલી તમામ ડસ્ટબિન (કચરાપેટીઓ) અચાનક ગાયબ થઈ જતાં ગંદકીનું સામ્રાજ્ય ફેલાવાની ભીતિ સેવાઈ રહી છે, દૈનિક હજારો મુસાફરો અને 200થી વધુ બસોની અવરજવર છતાં ડસ્ટબીન ગાયબ થતાં મુસાફરો જાહેરમાં જ કચરો ફેંકી દેતાં નજરે પડે છે.

છોટાઉદેપુર નજીક નેશનલ હાઈવે 56 પર મધ્યપ્રદેશને જોડતા ઓરસંગ નદીના બ્રિજ પર ચોમાસા દરમિયાન મોટા ખાડા પડવાની સમસ્યાથી વાહનચાલકો હેરાન પરેશાન હતા. આ કારણે અકસ્માતનો ભય રહેતો હતો. તાજેતરમાં કોન્ટ્રાક્ટર દ્વારા બ્રિજ પરના ઊંડા ખાડાઓ પુરાવાની કામગીરી શરૂ કરવામાં આવી છે. આ કામગીરી પૂર્ણ થતાં હજારો વાહનચાલકોને મોટી રાહત મળશે અને અકસ્માતનો ભય ટળશે. તેમ છતાં, 30 ટનથી વધુ વજનના વાહનો પર પ્રતિબંધ હોવા છતાં ઓવરલોડ વાહનો ખુલ્લેઆમ પસાર થઈ રહ્યા છે.

ભાવનગરના ખરકડી ગામમાં લઠ્ઠાકાંડ સર્જાયો છે, જેના કારણે એક યુવાન ઉપેન્દ્રસિંહ ગોહિલનું મોત થયું છે અને અન્ય ચાર મિત્રો સારવાર હેઠળ છે. પોલીસમાં નોકરી મળતા ઉજવણી માટે ગોઠવેલી દારૂ પાર્ટીમાં આ દુર્ઘટના બની. આ ઘટનાથી સમગ્ર ગામમાં શોકનો માહોલ છવાયો છે. સરપંચે યુવાનોને આ સ્થિતિ જોઈને સમજવા અપીલ કરી છે. નકલી દારૂના કારણે કુલ 7 લોકોના મોત અને 18 લોકો સારવાર હેઠળ છે, જેમાં કેટલાકની હાલત ગંભીર છે. પોલીસે આ મામલે તપાસ હાથ ધરી વધુ કાર્યવાહી કરી રહી છે.

'તરતું સોનું' ગણાતા એમ્બરગ્રીસની લાલચમાં લાખોની ઠગાઈનો પર્દાફાશ થયો છે. આ ગેરકાયદે વેપાર ગુજરાત સહિત દક્ષિણ ભારતના રાજ્યો અને જકાર્તા સુધી ફેલાયેલો છે. ગ્રાહક બનીને કરાયેલી તપાસમાં ડામર, રબર અને ડુક્કરની ચરબી જેવી વસ્તુઓમાંથી બનાવેલા નકલી એમ્બરગ્રીસનું વેચાણ થતું હોવાનું બહાર આવ્યું છે. સોશિયલ મીડિયા દ્વારા ગ્રાહકો શોધીને, બનાવટી લેબ રિપોર્ટ્સ બતાવી લોકોને છેતરવામાં આવી રહ્યા છે. ભારતમાં સ્પર્મ વ્હેલ સંરક્ષિત હોવાથી તેના અંગોનો વેપાર ગેરકાયદે છે.

ગુજરાતમાં, લુણાવાડાની 6 વર્ષની બાળકી, જેને દિવસમાં 200 વખત ખેંચ (epilepsy) આવતી હતી, તેના પર VNS (વેગસ નર્વ સ્ટીમ્યુલેશન) સર્જરી સફળતાપૂર્વક કરવામાં આવી છે. જન્મના 6 મહિના પછી શરૂ થયેલી આ ગંભીર બીમારીને કારણે બાળકીના મગજના વિકાસ પર પણ અસર થતી હતી. દવાઓ અને અન્ય સારવાર નિષ્ફળ ગયા બાદ, આ અત્યંત જટિલ સર્જરી દ્વારા તેને 30 થી 80% રાહત મળી છે. આ પ્રકારની VNS સર્જરી ગુજરાતમાં 16 વર્ષથી નાના બાળકમાં પ્રથમ વખત થઈ છે, જે મેડિકલ ક્ષેત્રે એક મહત્વપૂર્ણ સિદ્ધિ છે.

નસવાડી તાલુકાના ધારસિમેલ ગામે DDO દ્વારા યોજાયેલી બેઠકમાં વિવિધ વિકાસકામો, સરકારી યોજનાઓની પ્રગતિ અને સ્થાનિક જરૂરિયાતોની વિસ્તૃત સમીક્ષા કરાઈ. DDOએ શાળા, આંગણવાડી અને PHCની મુલાકાત લઈને વિદ્યાર્થીઓ, બાળકો અને સ્થાનિકો સાથે સંવાદ કર્યો. શિક્ષણ, આરોગ્ય અને પોષણ જેવી સેવાઓની ગુણવત્તા સુધારવા સૂચનો અપાયા. મનરેગા અને પ્રધાનમંત્રી આવાસ યોજના હેઠળના કામોની પણ સમીક્ષા કરવામાં આવી. ધારસિમેલ ધોધની મુલાકાત લઈને વિસ્તારના વિકાસની શક્યતાઓ ચકાસાઈ.

સંજેલી તાલુકાના કોટા ડુંગર પર વન વિભાગ દ્વારા 68 લાખના ખર્ચે બનેલા રેસ્ટ હાઉસમાં ઉદઘાટન પહેલાં જ તિરાડો દેખાઈ છે. દિવાલો, પગથિયાં અને ટાઇલ્સમાં હલકી ગુણવત્તાના મટીરીયલના ઉપયોગથી બાંધકામની ગુણવત્તા પર ગંભીર પ્રશ્નો ઉભા થયા છે. વન વિભાગે તપાસ કરતાં ક્ષતિ જણાઈ આવી હતી. સ્થાનિક લોકો નિષ્પક્ષ અને ટેકનિકલ તપાસની માંગ કરી રહ્યા છે, જ્યાં સુધી યોગ્ય કામગીરી ના થાય ત્યાં સુધી કોન્ટ્રાક્ટરને પેમેન્ટ રોકવા અને જવાબદાર સામે કાર્યવાહી કરવા રજૂઆત કરાઈ છે.

મોરવા હડફ તાલુકાના મોરા ખાતે મુખ્ય માર્ગ પર થયેલા કાચા-પાકા અને ગેરકાયદે દબાણો દૂર કરવાની કામગીરી તંત્ર દ્વારા શરૂ કરવામાં આવી છે. ટ્રાફિક સમસ્યાને ધ્યાનમાં રાખીને, માર્ગ મકાન વિભાગે દબાણ કર્તાઓને નોટિસ આપી સાત દિવસમાં દબાણ દૂર કરવા જણાવ્યું હતું. પ્રથમ દિવસે, રેખાંકન કરીને દબાણ કર્તાઓને સ્વેચ્છાએ દબાણ હટાવવાની તક આપવામાં આવી હતી. પોલીસ બંદોબસ્ત હેઠળ, જેસીબી મશીનની મદદથી વૃક્ષની ડાળીઓ સહિતના દબાણો દૂર કરાયા હતા, અને ઘણા દબાણ કર્તાઓએ સ્વૈચ્છિક રીતે દબાણ હટાવવાનું શરૂ કર્યું છે.

ભરૂચ : મકતમપુર ખાતે આવેલી લીટલ સ્ટાર્સ હાઈસ્કુલમાં વિદ્યાર્થીઓમાં નશામુકિત અંગે જાગૃતિ ફેલાવવાના હેતુથી નશામુકિત જાગૃતિ કાર્યક્રમનું આયોજન કરવામાં આવ્યુ હતુ. આ કાર્યક્રમ દરમયાન બ્રહ્માકુમારી સંસ્થા તરફથી ઉપસ્થિત બહેનોએ વિદ્યાર્થીઓને નશાના દુષ્પરિણામો અંગે વિસ્તૃત માહિતી આપી હતી. કાર્યક્રમના માધ્યમથી વિદ્યાર્થીઓમાં નશામુકિત પ્રત્યે જાગૃતિ સાથે સ્વસ્થ જીવનશૈલી અને સામાજીક જવાબદારીની ભાવના વિકસાવવાનો મહત્વપુર્ણ પ્રયાસ કરવામાં આવ્યો હતો.

દેડિયાપાડા : દેડિયાપાડા ખાતે આવેલા મહાબળેશ્વર મહાદેવના પ્રાંગણમાં પરમ પૂજ્ય સુરેશ મહારાજ દ્વારા શ્રાવણ સુદ સાતમ શિતળા સાતમ નિમિત્તે બહેનો દ્વારા શિતળા માતાજીની માટીની મૂર્તિની પૂજા અર્ચના કરવામાં આવી હતી. શિતળા માતાજીને નાળિયેર અક્ષત અબીલ ગુલાલ કંકુ અને અન્ય પૂજાની સામગ્રી દા્વર પૂજા અર્ચના કરવામાં આવી હતી. આ પ્રસંગે બહેનો એ શિતળા માતાજી પાસે કુટુંબ પરિવાર ઉપર તંદુરસ્તી સારી રહે દુઃખ, દર્દ દૂર થાય એવી પ્રાર્થના કરી હતી.

ભરૂચ જિલ્લાના વાલિયા ખાતે વહીવટી તંત્ર અને ભાજપ દ્વારા "એક દેશ, એક ધ્વજ, એક ગૌરવ" ના સૂત્ર સાથે ભવ્ય તિરંગા યાત્રાનું આયોજન કરાયું. આ યાત્રા શ્રી રંગ નવચેતન વિદ્યા મંદિરથી નીકળી ગામના મુખ્ય માર્ગો પર ફરી, જેમાં અધિકારીઓ, કર્મચારીઓ, ભાજપના આગેવાનો, શાળાઓના વિદ્યાર્થીઓ અને ગ્રામજનો મોટી સંખ્યામાં જોડાયા. દેશભક્તિના નારા, રાષ્ટ્રીય એકતાનો સંદેશ અને "ભારત માતા કી જય" ના ગગનભેદી જયઘોષથી સમગ્ર વાતાવરણ રાષ્ટ્રભક્તિમય બન્યું.

ભરૂચ ફૂડ એન્ડ ડ્રગ્સ ડીપાર્ટમેન્ટના મદદનીશ કમિશ્નર પ્રકાશ નાનકરામ પોસનાની અને મહિલા ડ્રગ્સ ઈન્સ્પેક્ટર સુરભીબેન દેસાઈને નવા દવા હોલસેલ પરવાના માટે 40 હજારની લાંચ લેતા નર્મદા એન્ટી કરપ્શન બ્યુરો (ACB) એ રંગે હાથ ઝડપી પાડ્યા. એક વેપારીએ લાંચ આપવાની ના પાડતા ACB ને જાણ કરી હતી. ACB PI ડી.ડી. વસાવા ની ટીમે ભરૂચ કચેરીમાં ટ્રેપ ગોઠવી બંને અધિકારીઓને રૂા. 40 હજારની લાંચ સ્વીકારતા જ દબોચી લીધા. કોર્ટે બંને આરોપીઓના એક દિવસના રિમાન્ડ મંજૂર કર્યા છે.

રાજપીપળા : રાજપીપળા સ્થિત પૌરાણિક શીતળા માતા મંદિર ખાતે શીતળા સાતમના મેળામાં શ્રાદ્ધાળુઓનો ઘસારો જોવા મળ્યો હતો. વહેલી સવારથી જ મોટી સંખ્યામાં શ્રાદ્ધાળુઓ દર્શનાર્થે ઉમટી પડયા હતા. માતાજીના દર્શન કરી ભક્તોએ ધન્યતા અનુભવી હતી. સમગ્ર વાતાવરણમાં માતાજી પ્રત્યેનો પ્રેમ, ભક્તિ અને માતાજી પ્રત્યેની અખૂટ શ્રાદ્ધા અને લાગણી જોવા મળી હતી.

પવિત્ર શ્રાવણ માસમાં ભરૂચ જિલ્લામાં શીતળા સાતમની ભક્તિભાવ અને શ્રદ્ધાપૂર્વક ઉજવણી કરવામાં આવી. વહેલી સવારથી જ મહિલાઓ શીતળા માતાજીના મંદિરે દર્શન અને પૂજન માટે પહોંચી હતી. પરંપરા મુજબ ઠંડુ ભોજન આરોગવા માટે મહિલાઓએ એક દિવસ અગાઉથી જ થેપલા, વડા, કઢી, ભાત, પૂરી, રોટલી, ભાખરી, મીઠાઈ જેવી વિવિધ વાનગીઓ બનાવી તૈયાર કરી હતી. ગેસના ચૂલા અને સ્ટવનું પણ પૂજન કરી તેને ઠંડા પાડી દેવામાં આવ્યા હતા.

પંચમહાલ જિલ્લાના મોરવા હડફ તાલુકાના તાજપુરી ગામે એક વિચિત્ર ઘટના બની છે. એક વર્ષીય રુદ્ર રાત્રે સૂતો હતો ત્યારે કોઈ અજાણ્યા જાનવરે તેના ડાબા હાથે બચકું ભર્યું. બાળકના હાથમાંથી લોહી નીકળતા અને સોજો આવતા પરિવાર ગભરાઈ ગયો. માતા-પિતાને ઉંદર કે ઝેરી સાપ કરડ્યો તે સ્પષ્ટ થયું નહોતું. તાત્કાલિક બાળકની મોરવા હડફ PHC અને ગોધરા સિવિલ હોસ્પિટલમાં સારવાર અપાઈ. તબીબોના જણાવ્યા મુજબ, બાળકને કોઈ ઝેરી જાનવર કરડ્યું નથી અને તેની સ્થિતિ સ્થિર છે.

આધુનિક યુગમાં વિખેરાઈ રહેલા પરિવારોને ફરીથી એક કરવાના ઉમદા હેતુથી પાટણમાં હેરીટેજ ગ્રુપ દ્વારા પ્રથમવાર 'પરિવારોત્સવ'નું આયોજન કરાયું. જાણીતા ટ્રાન્સફોર્મેશન સ્પીકર મનીષ વઘાસિયાએ ૩ કલાકના પ્રેરણાદાયી વક્તવ્ય દ્વારા સંબંધોનું મહત્વ સમજાવ્યું. કાર્યક્રમની સૌથી ભાવુક ક્ષણ ત્યારે આવી જ્યારે વર્ષોથી મનદુઃખ ધરાવતા ભાઈ-ભાઈ, દેરાણી-જેઠાણી અને માતા-પિતા-સંતાનો વચ્ચે સમાધાન કરાવી સ્ટેજ પર ભેટી પડાવ્યા. આ દ્રશ્ય જોઈ ઉપસ્થિત સૌની આંખો ભીની થઈ ગઈ હતી, જ્યાં અનેક સંબંધોને નવું જીવન મળ્યું.

રાધનપુર બસ સ્ટેન્ડ નજીક ગેરકાયદેસર દબાણો દૂર કરવાની નગરપાલિકાની ઝુંબેશ દરમિયાન ભારે બબાલ સર્જાઈ હતી. જ્યારે પાલિકાની ટીમ કેબિનો હટાવી રહી હતી, ત્યારે એક મહિલા અને તેના પુત્રએ કામગીરીમાં અડચણ ઊભી કરી. મહિલાના વિરોધ છતાં કર્મચારીઓએ કામગીરી ચાલુ રાખતાં મામલો બિચક્યો. કામગીરી રોકવાના પ્રયાસરૂપે મહિલાના પુત્રએ સ્થળ પર જ ફિનાઈલ પી લીધું. તેને તાત્કાલિક હોસ્પિટલમાં ખસેડાયો, જ્યાંથી વધુ સારવાર માટે ધારપુર રિફર કરાયો. આ ઘટના બાદ લોકોનું ટોળું એકત્ર થયું. પોલીસ મથકમાં કોઈ ફરિયાદ નોંધાઈ નથી.

મોરબી જિલ્લામાં હરિયાળી વધારવા વન વિભાગ દ્વારા 60 હેક્ટર પડતર જમીનમાં અંદાજે 1.50 લાખ વૃક્ષોના વાવેતરનું આયોજન કરવામાં આવ્યું છે. ટંકારા ખાતે રાજ્યકક્ષાના મંત્રી કાંતિલાલ અમૃતિયાની અધ્યક્ષતામાં 77મા વન મહોત્સવની ઉજવણી કરાઈ, જ્યાં પર્યાવરણ જાળવણી અને લોકભાગીદારી વધારવા અપીલ કરાઈ. મિયાવાકી પદ્ધતિથી ઘન જંગલ અને 'અર્બન વનકવચ' દ્વારા શહેરોમાં હરિયાળી વધારવાનું આયોજન છે. જિલ્લાની નર્સરીઓમાં 9.54 લાખ રોપાઓનો ઉછેર કરાયો છે.

રાજ્ય સરકારે ગ્રામજનોની સુવિધા માટે પાંચ વર્ષ પહેલાં સામેત્રા, પીલુદરા અને ખરોડ ગામમાં આઉટપોસ્ટ પોલીસ મથકો શરૂ કર્યા હતા. આ નવીન મકાનોનું ઉદ્ઘાટન ૨૦૨૦માં થયું હતું, પરંતુ ત્યારથી તે બંધ હાલતમાં છે. ગ્રામજનોને પોલીસ કામગીરી માટે તાલુકા મથક સુધી જવું પડે છે. દરેક આઉટપોસ્ટમાં ૮ થી ૧૦ ગામોનો સમાવેશ થાય છે. આગેવાનોએ પણ આ મથકો શરૂ કરવા રજૂઆતો કરી છે. સ્ટાફ માટે ક્વાર્ટર હોવા છતાં તેઓ ત્યાં રહેતા નથી, જેના કારણે મકાનો ખંડેર બની રહ્યા છે.

દિયોદર તાલુકા મથકની પોસ્ટ ઓફિસમાં છેલ્લા એક વર્ષથી પોસ્ટ માસ્ટરની જગ્યા ખાલી છે, જેના કારણે 66 ગામોની 22 બ્રાન્ચ પોસ્ટ ઓફિસના ગ્રાહકો તેમજ શહેરના મોટી સંખ્યામાં નાગરિકોને હાલાકી ભોગવવી પડે છે. પોસ્ટ માસ્ટર ન હોવાથી ફરજ પરના પોસ્ટલ આસિસ્ટન્ટ ક્લાર્ક પર કામનું ભારણ વધ્યું છે, જેના પરિણામે ગ્રાહકોના કાર્યો સમયસર પૂર્ણ થતા નથી. ખાસ કરીને વિધવા બહેનો અને ખાતેદાર ગ્રાહકોને લાંબી લાઇનમાં ઊભા રહીને કામ કરાવવું પડે છે. વહીવટી તંત્રે તાત્કાલિક આ જગ્યા ભરવાની જરૂર છે.

પાલનપુરમાં કેટરિંગ વેપારી રતનસિંહ પુરોહિત સાથે WhatsApp પર આવેલી ડિજિટલ કંકોત્રી લિંક ખોલતાં ₹68,450 ની સાયબર ઠગાઈ થઈ. લિંક પર ક્લિક કરતાં તેમનો મોબાઈલ હેક થયો અને બેંક ખાતામાંથી નાણાં ઉપડી ગયા. ઠગબાજોએ તેમના કોન્ટેક્ટ્સને પણ વાયરસ લિંક મોકલવાનું શરૂ કર્યું. વેપારીએ સાયબર ક્રાઈમ પોલીસમાં ફરિયાદ નોંધાવી. સાયબર ગઠિયા APK ફાઈલ કે લિંક મોકલી ગુપ્ત રીતે વાયરસ ઇન્સ્ટોલ કરીને બેંકિંગ વિગતો અને OTP ચોરી લે છે. અજાણી લિંક પર ક્લિક ન કરવાની અને છેતરપિંડી થાય તો 1930 પર સંપર્ક કરવાની સલાહ અપાઈ.

ભુજ નગરપાલિકા દ્વારા સુપ્રીમ કોર્ટના આદેશ મુજબ ફૂટપાથ અને ડિવાઇડર પર થયેલા દબાણોને દૂર કરવાની ઝુંબેશ શરૂ કરાઈ છે. આ ઝુંબેશ અંતર્ગત અનેક વિસ્તારોમાં રેકડી-પાથરણા ધારકોને નોટિસ ફટકારવામાં આવી છે. જોકે, વર્ષોથી ધંધો કરતા નાના વેપારીઓ વૈકલ્પિક જગ્યાની માંગ કરી રહ્યા છે, કારણ કે યોગ્ય વ્યવસ્થા વગર તેમની રોજી-રોટી પર ગંભીર અસર થશે. પાલિકા દ્વારા હોકર્સ ઝોન માટે જગ્યાની પસંદગી પર વિચારણા ચાલી રહી છે, પરંતુ જ્યાં સુધી વૈકલ્પિક વ્યવસ્થા ન થાય ત્યાં સુધી આ મુદ્દો યક્ષપ્રશ્ન બની રહેશે.

ફ્લિન્ટ ગ્રૂપ દ્વારા GMERS ગોત્રી હૉસ્પિટલમાં CSR હેઠળ 2019 થી 2025 સુધીમાં ₹3 કરોડના આધુનિક તબીબી સાધનો દાનમાં અપાયા હતા. તેનું બુધવારે ઇન્સ્પેક્શન કરાયું, જે બાદ વધુ ₹1 કરોડ ફાળવવામાં આવ્યા છે. આ ગ્રાન્ટ દ્વારા આર્થ્રોસ્કોપ, ન્યુરો સ્પાઈન એન્ડોસ્કોપ અપાશે અને પેડિયાટ્રિક વિભાગના બાળકોના પ્લે એરિયાનું નવીનીકરણ થશે. આ સાધનોને કારણે રેડિયોલોજીમાં સમય ઘટ્યો છે અને સર્જરી તથા ICUમાં દર્દીઓની મોનિટરિંગ સુધરી છે. કંપનીના CEO અને પ્રેસિડન્ટ હાઈનર ક્લોકર્સના નેતૃત્વ હેઠળ આ સહાય મળી છે.

વલસાડ જિલ્લા ફુડ એન્ડ ડ્રગ્સ વિભાગે હોટલ અને રેસ્ટોરન્ટોમાં ફૂડ સપ્લાય અને સ્વચ્છતા અંગે દરોડા પાડ્યા હતા. આ દરમિયાન, સબજીવાલા હોટલમાં ગંદકી અને અસ્વચ્છતા મળી આવતાં તેનું લાયસન્સ સ્થગિત કરાયું. રામદેવ રેસ્ટોરન્ટ અને ચટુરા વેન્ટરને પણ અસ્વચ્છતા માટે સુધારાની નોટિસ અપાઇ છે. રેસ્ટોરન્ટ સંચાલકો જરૂરી રિપોર્ટ્સ રજૂ કરી શક્યા ન હતા. તહેવારોને ધ્યાનમાં રાખી ગુણવત્તાસભર ખાદ્ય સામગ્રી મળે તે માટે આ કાર્યવાહી કરાઈ હતી.

સુરતમાં ફૂડ પોઇઝનિંગથી બાળકીના મોત બાદ અમદાવાદ પાલિકાએ હોટલ-રેસ્ટોરન્ટના રસોડામાં CCTV લગાવવાનો આદેશ આપ્યો છે. હવે વડોદરા પાલિકા પણ આ જ માર્ગે આગળ વધી રહી છે. શહેરમાં 2500થી 3000 જેટલી હોટલોને ગ્રાહકો માટે રસોડાના લાઈવ પ્રસારણની વ્યવસ્થા ઊભી કરવા આદેશ અપાશે. તાજેતરમાં થયેલા ચેકિંગમાં 125 કિલો અખાદ્ય જથ્થો મળી આવતા તેનો નાશ કરાયો અને 25 હજારનો દંડ ફટકારાયો. આરોગ્યની બેઠકમાં આ અંગે નિર્ણય લેવાશે.

અમરેલી તાલુકાના મેડી - માંડવડા ગામ નજીક શેત્રુંજી નદીમાં રેતી ચોરી રોકવા ગયેલા ખાણ ખનિજ વિભાગના સ્ટાફ પર રેત માફિયાઓએ લોડર ચડાવી દેવાનો પ્રયાસ કર્યો અને જીવલેણ ધમકી આપી. આ ગેરકાયદે ખનન સામે અગાઉ ગ્રામજનોએ પણ કલેક્ટરને રજૂઆત કરી હતી. તંત્રની ટીમ પહોંચતા લોડર, ડમ્પર અને ટ્રેક્ટર દ્વારા રેતી ચોરી થઈ રહી હતી. ડમ્પર અને ટ્રેક્ટર ચાલકો ભાગી ગયા, જ્યારે લોડર ચાલકે હુમલો કર્યો. પોલીસે બે ડમ્પર કબજે લીધા છે.

વડોદરાની 10 થી વધુ મહિલાઓએ પુરુષપ્રધાન રિક્ષા વ્યવસાયમાં ઝંપલાવી આત્મનિર્ભરતાનું ઉત્તમ ઉદાહરણ પૂરું પાડ્યું છે. આ મહિલાઓ પોતાના સંતાનોને અંગ્રેજી માધ્યમમાં શિક્ષણ અપાવી સીએ અને તબીબ બનાવવાનું સ્વપ્ન સાકાર કરી રહી છે. મર્યાદિત આવકમાં ઉચ્ચ શિક્ષણના ખર્ચને પહોંચી વળવા તેમણે રિક્ષા ચલાવવાનો નિર્ણય કર્યો. આજે તેઓ પોતાના પતિ કરતાં પણ વધુ આવક રળીને પરિવારનો આધાર બની છે. મહિલાઓ અને વૃદ્ધો તેમની રિક્ષાને સુરક્ષિત માને છે, જેના કારણે તેઓ કાયમી મુસાફરો મેળવી રહી છે. આ મહિલાઓ સમાજ માટે પ્રેરણારૂપ બની છે.