વિજાપુર તાલુકાના ટીટોદણ ગામમાં જમીન વિવાદને લઈને ગંભીર ઘટના સામે આવી છે. લક્ષ્મણસિંહ સોલંકીના પિતા ભૂપતસિંહની માલિકીની સર્વે નંબર 800 માં આવેલી દોઢ વીઘા જમીન મુદ્દે વિવાદ સર્જાયો છે. આરોપીઓએ પહેલા જમીન માટે બે લાખ રૂપિયાની માગણી કરી હતી અને બળજબરીથી રકમ પડાવી લીધી હતી. ફરિયાદી જમીનનું લેવલિંગ કરવા જેસીબી મશીન લઈને ગયા, ત્યારે આરોપીઓએ તેમને ગાળો બોલી અને જાનથી મારી નાખવાની ધમકી આપી હતી. આરોપીઓએ જમીન માટે દસ લાખ રૂપિયાની નવી માગણી કરી હતી. બારડ વનરાજસિંહ ધીરુજી અને બારડ ઘનશ્યામસિંહ ધીરુજી ધારિયા લઈને ફરિયાદીની પાછળ પડ્યા હતા. ફરિયાદી ભાગી છૂટ્યા બાદ આરોપીઓએ જેસીબી મશીનને નુકસાન પહોંચાડ્યું હતું. બારડ ઘનશ્યામસિંહની પત્નીએ પથ્થરો ફેંકીને મશીનના કાચ તોડી નાખ્યા હતા. કુલ મળીને એક લાખ રૂપિયાનું નુકસાન કર્યું હતું. આ મામલે વસાઈ પોલીસ સ્ટેશનમાં ત્રણેય આરોપીઓ વિરુદ્ધ ફરિયાદ નોંધવામાં આવી છે.