વિશ્વની દિગ્ગજ ઈ-કોમર્સ કંપની એમેઝોનના સીઈઓ એન્ડી જેસીએ વડાપ્રધાન નરેન્દ્ર મોદી સાથેની મુલાકાત બાદ ભારતમાં વર્ષ ૨૦૨૬થી ૨૦૩૦ વચ્ચે ૪૮ અબજ ડૉલરનું મોટું રોકાણ કરવાની જાહેરાત કરી છે. અગાઉ કંપનીએ આ સમયગાળા માટે ૩૫ અબજ ડૉલરના રોકાણની યોજના બનાવી હતી, જેમાં હવે વધારો કરાયો છે. આ સાથે ૨૦૧૦થી ૨૦૩૦ સુધીમાં ભારતમાં એમેઝોનનું કુલ રોકાણ ૮૮ અબજ ડૉલર સુધી પહોંચી જશે. આ રકમ ઈ-કોમર્સ નેટવર્ક, કોમર્શિયલ ઓપરેશનલ અને ટેકનોલોજી ઈન્ફ્રાસ્ટ્રક્ચર જેવા મહત્વના સેક્ટરોમાં રોકાણ કરવામાં આવશે, જે ભારતની ડિજિટલ અર્થવ્યવસ્થાને વધુ મજબૂત બનાવશે.

ભારતીય ક્રિકેટ ટીમ ૨૬ જૂનથી આયર્લેન્ડ પ્રવાસ પર બે મેચોની T20 સિરીઝ રમશે, પરંતુ તેની શરૂઆતના એક દિવસ પહેલા મેચના સમયમાં મોટો ફેરફાર કરાયો છે. ૨૮ જૂને રમાનારી ભારત અને ઓસ્ટ્રેલિયા વચ્ચેની મહિલા T20 વર્લ્ડ કપ મેચને કારણે આ નિર્ણય લેવાયો છે. અગાઉ સાંજે ૭ વાગ્યે શરૂ થનારી બંને T20 મેચો હવે ભારતીય સમય અનુસાર સાંજે ૬ વાગ્યે શરૂ થશે. આ બંને મેચ બેલફાસ્ટમાં રમાશે. આ સિરીઝ દરમિયાન આઈપીએલમાં શાનદાર પ્રદર્શન કરનાર ૧૫ વર્ષીય વૈભવ સૂર્યવંશી ભારત માટે સૌથી નાની ઉંમરે ઇન્ટરનેશનલ ડેબ્યૂ કરવાનો રેકોર્ડ બનાવી શકે છે.             

ઝારખંડથી ચૂંટાયેલા રાજ્યસભા સાંસદ પરિમલ નથવાણીએ ગુરુવારે ચોથી વખત સાંસદ તરીકે અને ત્રીજી વાર ઝારખંડનું પ્રતિનિધિત્વ કરવા માટે શપથ લીધા છે. ૧૮ જૂનની ચૂંટણીમાં ૩૦માંથી ૨૮ માન્ય મતો મેળવી વિજેતા બનેલા નથવાણીએ આ ક્ષણને ગર્વ અને સન્માનની ગણાવી હતી. તેમણે ઝારખંડને પોતાની ‘કર્મભૂમિ’ ગણાવી ‘જૌહાર ઝારખંડ’ મેસેજ સાથે એનડીએ (NDA) નેતૃત્વ અને જનતાનો આભાર માન્યો હતો. તેમણે રાજ્યમાં ગ્રામીણ માળખાગત સુવિધાઓ, આરોગ્ય અને કૌશલ્ય વિકાસને મજબૂત કરવાની કટિબદ્ધતા દર્શાવી હતી. બીજી તરફ, ગુજરાતમાંથી ભાજપના ચાર ઉમેદવારો પણ બિનહરીફ ચૂંટાયા છે.

મુંબઈમાં દક્ષિણ-પશ્ચિમ ચોમાસાની ધમાકેદાર એન્ટ્રી સાથે છેલ્લા ૨૪ કલાકમાં ૩૦૦ મીમીથી વધુ મુશળધાર વરસાદ ખાબકતાં જનજીવન અને વાહનવ્યવહાર ખોરવાયો છે. હવામાન વિભાગે દિલ્હી-એનસીઆર, ઉત્તર પ્રદેશ અને ગુજરાત સહિત દેશના ૧૭ રાજ્યોમાં આગામી ૩ થી ૪ દિવસ માટે ભારે વરસાદ અને વાવાઝોડાનું ‘ઓરેન્જ અને યલ્લો એલર્ટ’ જારી કર્યું છે. આ પવનોથી લોકોને ગરમીથી રાહત મળશે. બીજી તરફ, અરુણાચલ પ્રદેશમાં સતત વરસાદ અને પૂરના કારણે ભૂસ્ખલન થતાં એક શિક્ષિકાનું મોત નીપજ્યું છે, જ્યારે ચાર લોકો ગુમ થયા છે અને અનેક ઘરોને નુકસાન પહોંચ્યું છે.

કર્મચારી ભવિષ્ય નિધિ સંગઠન (EPFO) દ્વારા ઓનલાઈન સિસ્ટમના ટેકનિકલ અપગ્રેડેશન અને ડેટાબેઝ કન્સોલિડેશનને કારણે ઓનલાઈન સેવાઓ થોડા દિવસો માટે બંધ રહેશે. સત્તાવાર નોટિસ મુજબ, પીએફ (PF) દાવા સબમિટ કરવા અને તેની પ્રક્રિયાની સેવાઓ ૨૬ જૂન, ૨૦૨૬ ના રોજ બપોરે ૧૨:૦૦ વાગ્યાથી ૨૮ જૂન, ૨૦૨૬ ના રોજ રાત્રે ૧૧:૫૯ વાગ્યા સુધી અસ્થાયી રૂપે બંધ રહેશે, જે ૨૯ જૂને પુનઃ શરૂ થશે. આ ઉપરાંત, ઉમંગ એપ પર EPFO સંબંધિત સેવાઓ આગામી ૨ જુલાઈ, ૨૦૨૬ સુધી ઉપલબ્ધ રહેશે નહીં. આથી ખાતાધારકોને વહેલી તકે પોતાના કામ પૂર્ણ કરવા જણાવાયું છે.

રાજસ્થાનના ટોંકના વતની ઓલરાઉન્ડર જય મૂંદડા ભારત સામેની આગામી આયર્લેન્ડ ટી20 શ્રેણીથી આંતરરાષ્ટ્રીય ક્રિકેટમાં ડેબ્યૂ કરવા જઈ રહ્યા છે. ઉચ્ચ અભ્યાસ માટે આયર્લેન્ડ ગયેલા જયએ ત્યાંની નાગરિકતા મેળવી ક્રિકેટ કારકિર્દી આગળ વધારી હતી. તેમની પ્રતિભાના આધારે આયર્લેન્ડની રાષ્ટ્રીય ટીમમાં સ્થાન મળ્યું છે. તેઓ સિમી સિંહ બાદ આયર્લેન્ડ તરફથી રમનાર બીજા ભારતીય મૂળના ક્રિકેટર બન્યા છે. જયની આ સિદ્ધિથી તેમના પરિવારજનો તેમજ ક્રિકેટપ્રેમીઓમાં આનંદ અને ગૌરવની લાગણી જોવા મળી રહી છે.

દેશની અગ્રણી જ્વેલરી કંપની રાજેશ એક્સપોર્ટ્સ અને તેની સહયોગી કંપનીઓ પર EDએ FEMA હેઠળ બેંગલુરુ અને મુંબઈમાં દરોડા પાડ્યા છે. તપાસમાં શેરબજાર હેરાફેરી, સોનાના સ્ટોકમાં 40% વિસંગતતા, શંકાસ્પદ વિદેશી વ્યવહારો અને 600 કરોડ રૂપિયાથી વધુની ગેરરીતિના આક્ષેપો સામે આવ્યા છે. કંપની જરૂરી દસ્તાવેજો રજૂ કરવામાં નિષ્ફળ રહી હોવાનું પણ EDએ જણાવ્યું છે. અગાઉ SEBIએ પણ કંપની પર નાણાકીય ગેરરીતિઓના ગંભીર આરોપો લગાવ્યા હતા.

અયોધ્યા બાદ હવે મિર્ઝાપુરના વિશ્વ પ્રસિદ્ધ મા વિંધ્યવાસિની ધામમાં દાનમાં મળતા સોના-ચાંદીના આભૂષણોના રેકોર્ડ અંગે સવાલો ઊભા થયા છે. પૂર્વ પંડા સમાજ પ્રમુખે આરોપ લગાવ્યો છે કે દાનમાં મળતા દાગીનાની વિગતવાર નોંધ કે જાહેર ઇન્વેન્ટરી તૈયાર થતી નથી. મંદિર પ્રશાસને તમામ પ્રક્રિયા મેજિસ્ટ્રેટ અને CCTV દેખરેખ હેઠળ પારદર્શક રીતે થતી હોવાનો દાવો કર્યો છે તેમજ દાગીના ડબલ લોકર સિસ્ટમમાં સુરક્ષિત રાખવામાં આવતા હોવાનું જણાવ્યું છે.

અમેરિકન પ્રમુખ ડોનાલ્ડ ટ્રમ્પે દાવો કર્યો છે કે ઈરાન અમેરિકા સાથેની વાટાઘાટોમાં મહત્વપૂર્ણ રાહતો આપી રહ્યું છે અને ચર્ચા હકારાત્મક દિશામાં આગળ વધી રહી છે. જોકે તેમણે ચેતવણી આપી કે વાટાઘાટો નિષ્ફળ જશે તો અમેરિકા લશ્કરી કાર્યવાહી માટે પણ તૈયાર છે. ટ્રમ્પે હોર્મુઝ સ્ટ્રેટ પર ઈરાનને કોઈ ટેક્સ વસૂલવાની મંજૂરી નહીં આપવાની સ્પષ્ટતા કરી હતી. નાટોના મહાસચિવ માર્ક રૂટેએ પણ ઈરાનને પરમાણુ હથિયારોથી દૂર રાખવા ટ્રમ્પની નીતિને સમર્થન આપ્યું હતું.

વૈશ્વિક બજારમાં સોના-ચાંદીના ભાવમાં સતત ઘટાડો થતાં જાણીતા લેખક રોબર્ટ કિયોસાકી તેને રોકાણ માટેની મોટી તક ગણાવી રહ્યા છે. તેમણે કહ્યું કે, સસ્તા ભાવમાં ખરીદી કરતા પહેલાં બજારના ટ્રેન્ડ અને અર્થવ્યવસ્થાની સ્થિતિનું વિશ્લેષણ કરવું જરૂરી છે. તેમના મતે, સોનું, ચાંદી અને બિટકોઇન જેવી હાર્ડ એસેટ્સ લાંબા ગાળે વધુ સુરક્ષિત રોકાણ છે. હાલ જિયોપોલિટિકલ તણાવમાં ઘટાડો અને મજબૂત ડોલરના કારણે કિંમતી ધાતુઓના ભાવ ત્રણ મહિનાના નીચલા સ્તરે પહોંચ્યા છે.

ભારત સાથેના આર્થિક અને પ્રવાસન સંબંધો મજબૂત કરવા અઝરબૈજાને અમદાવાદથી બાકુ વચ્ચે સીધી ફ્લાઇટ શરૂ કરવાની યોજના જાહેર કરી છે અને ભારત સરકાર પાસે મંજૂરી માગી છે. મંજૂરી મળ્યા બાદ શરૂઆતમાં અઠવાડિયામાં ચાર ફ્લાઇટ શરૂ થશે. બાકુ ભારતીય પ્રવાસીઓ, ડેસ્ટિનેશન વેડિંગ અને મેડિકલ અભ્યાસ માટે લોકપ્રિય બની રહ્યું છે. પાકિસ્તાનનો નજીકનો સહયોગી હોવા છતાં અઝરબૈજાન ભારત સાથે સંબંધો સુધારવા અને ભારતીય પ્રવાસીઓને આકર્ષવા આ પગલું ભરી રહ્યું છે.

આંતરરાષ્ટ્રીય રેટિંગ એજન્સી S&P એ તેના રિપોર્ટમાં આગાહી કરી છે કે ઊર્જા ક્ષેત્રે તણાવ, નબળા ચોમાસાની શક્યતા અને ધીમી વૈશ્વિક વૃદ્ધિને કારણે ચાલુ નાણાકીય વર્ષ 2027માં ભારતનો આર્થિક વિકાસ દર ઘટીને 6.6% થશે. આ વૃદ્ધિ દર નાણાકીય વર્ષ 2026માં 7.7% હતો. અલ નીનોની અસરથી વરસાદ ઓછો થવાનો અંદાજ છે, જેના કારણે સરકાર વૈકલ્પિક પાકોની ભલામણ કરી રહી છે. ક્રૂડ ઓઈલની ઊંચી આયાત અને વૈશ્વિક ભાવોમાં વધારો ફુગાવાને વેગ આપશે.

ફૂટબોલમાં ગંભીર ઈજા ખેલાડીઓની કારકિર્દી માટે મોટો ખતરો હોવાથી લિયોનેલ મેસ્સી, ક્રિસ્ટિયાનો રોનાલ્ડો, નેમાર જુનિયર જેવા સ્ટાર ખેલાડીઓ પોતાના પગ માટે કરોડો ડોલરનો ખાસ 'બોડી પાર્ટ ઇન્સ્યોરન્સ' કરાવે છે. આ કસ્ટમાઇઝ્ડ વીમો તેમને ભવિષ્યની આર્થિક સુરક્ષા આપીને નિર્ભયતાથી શ્રેષ્ઠ પ્રદર્શન કરવામાં મદદ કરે છે. કમાણીની દ્રષ્ટિએ મેસ્સી 900 મિલિયન ડોલર સાથે સૌથી આગળ છે, જ્યારે ડેવિડ બેકહામ, ગેરેથ બેલ, ક્રિસ્ટિયાનો રોનાલ્ડો અને નેમાર જુનિયર પણ મેદાન અને બ્રાન્ડ એન્ડોર્સમેન્ટથી મોટી આવક મેળવે છે.

મહારાષ્ટ્રમાં મહાવિકાસ અઘાડી (MVA) ની બેઠકમાં 23 ધારાસભ્યોની ગેરહાજરીથી રાજકીય ગરમાવો આવ્યો છે. શરદ પવાર અને જયંત પાટીલ જેવા વરિષ્ઠ નેતાઓ પણ ગેરહાજર રહ્યા. આ સ્થિતિમાં ઉદ્ધવ ઠાકરેએ MVAની એકતા પર પ્રશ્નો ઉઠાવીને કહ્યું, "આપણે ખરેખર સાથે છીએ?" તેમણે પાર્ટી છોડી ગયેલાઓને જવા દઈને સાથે રહેલા લોકો પર ધ્યાન કેન્દ્રિત કરવા કહ્યું. ઠાકરેએ આગામી વિધાનસભા સત્રમાં એકજૂથ વિપક્ષનો સંદેશ આપવા અને સંયુક્ત સભાઓ યોજવાની જરૂરિયાત પર ભાર મૂક્યો.

MCX પર ગુરુવારે સોના અને ચાંદીના ભાવમાં મોટો ઘટાડો નોંધાયો છે. સોનું પ્રતિ 10 ગ્રામ ₹1,478 ઘટીને ₹1,40,700 પર પહોંચ્યું, જ્યારે ચાંદી પ્રતિ કિલો ₹11,298 ઘટીને ₹2,10,737 થઈ છે. છેલ્લા ત્રણ દિવસમાં સોનું ₹7,482 અને ચાંદી ₹21,728 સસ્તી થઈ છે. નિષ્ણાતોના જણાવ્યા મુજબ ડોલરની મજબૂતી, વ્યાજદરમાં વધારો, વૈશ્વિક આર્થિક અનિશ્ચિતતા, ETFમાંથી વેચવાલી અને મોટી બેંકોના નબળા અંદાજોને કારણે કિંમતી ધાતુઓના ભાવ પર દબાણ વધ્યું છે.

અમેરિકામાં પેમેન્ટ સિસ્ટમના આધુનિકીકરણ અંગે યોજાયેલી ચર્ચામાં ભારતના UPI મોડેલના વખાણ થયા હતા. અમેરિકી સાંસદો અને ફિનટેક કંપનીઓએ જણાવ્યું કે UPI જેવી આધુનિક પેમેન્ટ વ્યવસ્થાએ ભારતમાં ડિજિટલ વ્યવહારોમાં ક્રાંતિ લાવી છે. સ્ટ્રાઇપ સહિતની કંપનીઓએ અમેરિકામાં પણ પેમેન્ટ કંપનીઓને સીધી ઍક્સેસ આપવાની માંગ કરી હતી. અમેરિકી સાંસદોએ કહ્યું કે ભારત અને બ્રાઝિલના સફળ મોડલ દર્શાવે છે કે ઝડપી, સુરક્ષિત અને મફત ડિજિટલ પેમેન્ટ સિસ્ટમથી ઇનોવેશન અને ડિજિટલ અર્થતંત્રને મોટી ગતિ મળે છે.

રામ મંદિરના દાન અને ભંડોળમાં પારદર્શિતાના અભાવ અંગે વડાપ્રધાન કાર્યાલય (PMO) દ્વારા શ્રીરામ જન્મભૂમિ તીર્થ ક્ષેત્ર ટ્રસ્ટ પાસેથી હિસાબ માંગવામાં આવ્યો હતો. સ્થાનિક ભાજપ નેતા રજનીશ સિંહે PMOને ફરિયાદ કરી હતી કે મંદિરના નાણાકીય વ્યવહારો, દાન અને સંપત્તિની વિગતો જાહેર કરવામાં આવે. જોકે, ટ્રસ્ટે SIT તપાસ ચાલી રહી હોવાનું કહીને નાણાકીય માહિતી આપવાનો ઇનકાર કર્યો હતો, જેના કારણે વિવાદ વધુ વકર્યો છે.

પાકિસ્તાનના ખૈબર પખ્તુનખ્વા પ્રાંતમાં એક ભયાવહ ઘટના સામે આવી છે, જ્યાં એક પાકિસ્તાની વ્યક્તિએ તેની ફ્રેન્ચ પત્ની સિલ્વી યાસ્મીના અને તેમના પાંચ બાળકોને ૧૦ વર્ષથી વધુ સમય સુધી ઘરમાં બંધક બનાવી રાખ્યા હતા. આ સમય દરમિયાન પરિવારને શારીરિક અને માનસિક ત્રાસ આપવામાં આવતો હતો. યાસ્મીનાના એક પુત્રના પ્રયાસોથી આ મામલો બહાર આવ્યો, જે ભાગી છૂટવામાં સફળ રહ્યો અને પોલીસમાં ફરિયાદ નોંધાવી. પોલીસે દરોડો પાડી યાસ્મીના અને બાળકોને મુક્ત કરાવ્યા. પરિવાર હવે ફ્રાન્સ પરત ફરવાની તૈયારી કરી રહ્યો છે.

નવી BS6 કાર ધરાવતા અથવા ખરીદવાનું વિચારી રહેલા લોકો માટે મોટા સમાચાર છે. સરકાર 'PUCC 3.0' નામનો નવો નિયમ લાવી રહી છે, જેના હેઠળ નવી BS6 કાર માટે PUC (પોલ્યુશન અંડર કંટ્રોલ સર્ટિફિકેટ) ની વેલિડિટી ત્રણ વર્ષ સુધી વધારવામાં આવશે. આનાથી વાહન માલિકોને દર છ મહિને PUC કઢાવવાના ધક્કામાંથી મુક્તિ મળશે. 6 વર્ષથી જૂની BS6 કાર માટે દર વર્ષે PUC રિન્યુ કરવું પડશે, જ્યારે 10 વર્ષથી વધુ જૂની કાર માટે દર છ મહિને ટેસ્ટ કરાવવો પડશે. જૂના વાહનો માટે નિયમો વધુ કડક બનશે.

મહિન્દ્રાની નવી Vision S SUV ટેસ્ટિંગ દરમિયાન જોવા મળતાં તેના ઓગસ્ટ 2026માં લોન્ચ થવાની શક્યતા વધી છે. બોક્સી ડિઝાઇન, મજબૂત રોડ પ્રેઝન્સ અને આધુનિક લુક સાથે આવનારી આ SUV નવા NU_IQ પ્લેટફોર્મ પર આધારિત હશે. તેમાં શરૂઆતમાં 1.2-લિટર ટર્બો પેટ્રોલ અને 1.5-લિટર ડીઝલ એન્જિન મળશે, જ્યારે બાદમાં હાઇબ્રિડ અને ઇલેક્ટ્રિક વર્ઝન પણ આવી શકે છે. ADAS, 360° કેમેરા, ડિજિટલ ડિસ્પ્લે સહિત અનેક પ્રીમિયમ ફીચર્સ સાથે તે Hyundai Venue, Kia Sonet અને Tata Nexon જેવી SUVને ટક્કર આપશે.

કેન્દ્ર સરકારે ફિક્સ્ડ ડોઝ કોમ્બિનેશન્સ (FDC) એટલે કે બે કે તેથી વધુ દવાઓના ઘટકો મિશ્રિત દવાઓના ઉત્પાદન, વેચાણ અને વિતરણ પર પ્રતિબંધ મૂક્યો છે. સુપ્રીમ કોર્ટના આદેશ બાદ આરોગ્ય વિભાગે આ નિર્ણય લીધો છે. પ્રતિબંધિત દવાઓમાં એન્ટિબાયોટિક્સ, ડાયાબિટીસ, સ્કિન કેર, પેટના દુખાવા અને પેઈનકિલર્સનો સમાવેશ થાય છે. આ ૧૬ કોમ્બિનેશન દવાઓ બિનઅસરકારક હોવાનું અને માનવ સ્વાસ્થ્ય માટે જોખમી હોવાનું નિષ્ણાતોની સમિતિએ શોધી કાઢ્યું છે. બિનજરૂરી કોમ્બિનેશનથી દર્દીઓનો ખર્ચ અને આડઅસરો વધે છે.

અમેરિકામાં ઉચ્ચ અભ્યાસ માટે જતા ભારતીય વિદ્યાર્થીઓ માટે એક ચેતવણીરૂપ કિસ્સો સામે આવ્યો છે. હૈદરાબાદના એક વિદ્યાર્થીને ઍમ્સ્ટરડેમ ઍરપૉર્ટ પર તેની અમેરિકાની ફ્લાઈટ માટે પહોંચ્યા બાદ જાણ થઈ કે તેના F-1 સ્ટુડન્ટ વિઝા એક વર્ષ પહેલાં જ રદ્દ થઈ ચૂક્યા હતા, જેની તેને કોઈ સત્તાવાર જાણ કરવામાં આવી નહોતી. આ કારણે તેને ફ્લાઈટમાં બેસવાની મંજૂરી મળી નહીં અને તેને હૈદરાબાદ પરત ફરવું પડ્યું. યુનિવર્સિટીના જણાવ્યા મુજબ, તેનું I-20 અને SEVIS રેકોર્ડ સક્રિય છે, પરંતુ ઇમિગ્રેશન નિષ્ણાતો મુસાફરી પહેલાં SEVIS રેકોર્ડ સક્રિય હોવાની ખાતરી કરવા અને Designated School Official (DSO) સાથે સંપર્કમાં રહેવાની સલાહ આપે છે.

NCERT એ ધોરણ 9 ના સોશિયલ સાયન્સના નવા પુસ્તકમાં 1975માં લાદવામાં આવેલી ઈમરજન્સી પર એક નવું પ્રકરણ ઉમેર્યું છે. આ પ્રકરણ ભારતીય લોકશાહીના મહત્વપૂર્ણ તબક્કા, તેના ઉતાર-ચઢાવ, અને બંધારણીય અધિકારોની સમજ વિદ્યાર્થીઓને આપશે. 'Understanding Society: India and Beyond-Part 1' પુસ્તકમાં ઈમરજન્સી, તેના કારણો, અલ્હાબાદ હાઈકોર્ટનો ચુકાદો, અને લોકશાહીની વાપસી જેવી ઘટનાઓનો સમાવેશ કરાયો છે. અત્યાર સુધી ઉચ્ચ શિક્ષણમાં ભણાવવામાં આવતો આ વિષય હવે શાળાકીય સ્તરે શીખવવામાં આવશે.

નવા પુસ્તક "Regime Change" મુજબ, અમેરિકન ઉપપ્રમુખ જેડી વાન્સે રશિયા-યુક્રેન યુદ્ધ રોકવા માટે એક યોજના સૂચવી હતી, જેમાં ભારતીય સૈનિકોનો સમાવેશ કરવાનો વિચાર હતો. જાન્યુઆરી ૨૦૨૫માં ઓવલ ઓફિસમાં ડોનાલ્ડ ટ્રમ્પ સાથેની મીટિંગમાં તેમણે આ સૂચન કર્યું હતું. જોકે, ટ્રમ્પે તેને ફગાવી દીધું હતું, એમ કહીને કે ભારતીય નેતૃત્વ, ખાસ કરીને PM મોદી, ક્યારેય આવા પગલા માટે સંમત નહીં થાય. ટ્રમ્પના મતે, ભારતીય સૈનિકો આ કાર્ય માટે કોઈ કિંમત ચૂકવવા તૈયાર નહીં થાય.

૨૦૨૧માં મુન્દ્રા પોર્ટ પરથી રૂ. ૨૧,૦૦૦ કરોડનું ૨૯૮૮.૨૧ કિલો હેરોઇન જપ્ત થયું હતું. આ મામલે એન્ફોર્સમેન્ટ ડિરેક્ટોરેટ (ઇડી)એ દિલ્હીમાં અનેક સ્થળોએ તપાસ હાથ ધરી છે. ઇડીએ પ્રિવેન્શન ઓફ મની લોન્ડરિંગ એક્ટ (PMLA) હેઠળ દિલ્હીનાં બિઝનેસમેન હરપ્રીત સિંહ તલવાર ઉર્ફે કબીર તલવાર, શમસુદ્દીન અને અન્ય કેટલાક લોકોનાં પરિસરો સહિત પાંચ જગ્યાએ દરોડા પાડ્યા હતાં. આ ડ્રગ્સ નેટવર્ક પાકિસ્તાન સ્થિત આતંકવાદી સંગઠન લશ્કરે તૈયબાને ફંડિંગ કરતું હોવાનું NIAની ચાર્જશીટમાં જણાવાયું છે.

આંતરરાષ્ટ્રીય પરમાણુ ઉર્જા એજન્સી (IAEA) ના પ્રમુખ રાફેલ ગ્રોસીએ સ્પષ્ટ કર્યું છે કે તેમની ટીમ ટૂંક સમયમાં ઇરાનના પરમાણુ સંવર્ધન કેન્દ્રનું નિરીક્ષણ કરશે. આ નિરીક્ષણ ઇરાન-યુએસ સમજૂતીનો મુખ્ય ભાગ છે. IAEA ઇરાનના પરમાણુ ભંડારની સ્થિતિ સુનિશ્ચિત કરશે. જો ઇરાન હોર્મુઝમાં કોઈપણ સ્વરૂપે ટોલ ટેક્સ લેશે તો શાંતિ મંત્રણા રદ કરવામાં આવશે તેવી ટ્રમ્પની ધમકી છે. ઇરાનના ટોચના રાજદ્વારીઓએ આ નિરીક્ષણને અંતિમ કરાર બાદની બાબત ગણાવી છે.

મધ્યપૂર્વમાં વધતા તણાવ અને રિફાઇનરીઓની મર્યાદિત ક્ષમતાને કારણે જેટ ફ્યુલના શુદ્ધિકરણ ખર્ચમાં મોટો વધારો થવાની શક્યતા છે, જેના કારણે હવાઈ મુસાફરી મોંઘી બની શકે છે. મેકકિન્સેના રિપોર્ટ મુજબ જેટ ફ્યુલનો ક્રેક સ્પ્રેડ બેરલ દીઠ 50 ડોલર સુધી પહોંચી શકે છે. IATAના અંદાજ પ્રમાણે 2026માં જેટ ફ્યુલની કિંમત પ્રતિ બેરલ 152 ડોલર થઈ શકે છે. ભારતમાં પણ એરલાઇન્સે વધતા ફ્યુલ ખર્ચને કારણે કેટલીક ફ્લાઇટ્સમાં ઘટાડો કરીને એરફેર વધારવાની શરૂઆત કરી છે.

સંયુક્ત રાષ્ટ્ર (UN)ના સ્વતંત્ર તપાસ પંચે એક ચોંકાવનારો રિપોર્ટ રજૂ કર્યો છે, જેમાં ઈઝરાયલ પર જાણીજોઈને પેલેસ્ટાઈનના બાળકોને નિશાન બનાવવાનો આરોપ મૂકવામાં આવ્યો છે. 7 ઓક્ટોબર, 2023 થી 7 ઓક્ટોબર, 2025 દરમિયાન 20,000 થી વધુ બાળકોના મોત અને 44,000 થી વધુ ઘાયલ થયાના ભયાનક આંકડા સામે આવ્યા છે. ક્વોડકોપ્ટર (ડ્રોન) અને સ્નાઈપર રાઈફલોનો ઉપયોગ કરીને બાળકોને અત્યંત ક્રૂરતાથી મારવામાં આવી રહ્યા છે. સફેદ ઝંડા લઈને ઉભેલા બાળકો, એમ્બ્યુલન્સો અને રેડ ક્રોસને પણ છોડવામાં આવી રહ્યા નથી. રિપોર્ટમાં ઈઝરાયલ પર કડક પ્રતિબંધો લાદવાની અપીલ કરવામાં આવી છે.

ગુરુવારે વિશ્વના ઘણા ભાગોમાં ધરતી ધ્રુજી, જેમાં દક્ષિણ અમેરિકાના વેનેઝુએલામાં 7.1 અને 7.5 તીવ્રતાના ભૂકંપ બાદ જાપાન, ભારત અને નેપાળમાં પણ આંચકા અનુભવાયા. વેનેઝુએલામાં 22 માળની ઇમારત ધરાશાયી થવા જેવી મોટી ઘટનાઓ બાદ, જાપાનમાં 6.9 તીવ્રતાનો ભૂકંપ આવ્યો, જોકે સુનામીનો ખતરો નથી. ભારતના જમ્મુ-કાશ્મીરમાં 3.5 અને નેપાળમાં 3.8 તીવ્રતાના આંચકા અનુભવાયા. સદનસીબે, જાપાન, ભારત અને નેપાળમાં કોઈ મોટા જાનમાલના નુકસાનના અહેવાલ નથી, જે વૈશ્વિક સ્તરે રાહતની બાબત છે.

ભારતીય ગ્રાહકો અને વાહનચાલકો માટે રાહતના સમાચાર છે. આંતરરાષ્ટ્રીય બજારમાં ક્રૂડ ઓઈલના ભાવમાં મોટો ઘટાડો નોંધાયો છે, જે અમેરિકા અને ઈરાન વચ્ચે યુદ્ધ પહેલાના સ્તર પર આવી ગયા છે. બ્રેન્ટ ક્રૂડ 70 ડોલરની નીચે ગયું છે અને અમેરિકન કાચા તેલ પણ 69.95 ડોલર પ્રતિ બેરલ પર ટ્રેડ થઈ રહ્યું છે. ઈરાનની ઓઈલ માર્કેટમાં ફરી એન્ટ્રી અને હોર્મુઝની ખાડીમાંથી સુરક્ષિત ઓઈલ ટેન્કર પસાર થવા જેવા કારણોસર ક્રૂડ સપ્લાય સામાન્ય થઈ રહ્યો છે, જે પેટ્રોલ-ડીઝલના ભાવ ઘટાડવામાં મદદરૂપ થઈ શકે છે.