અમરેલી અને વડોદરા સહિત રાજ્યભરમાં ચકચાર જગાવનારા રૂ.635 કરોડના ‘SD Pay’ એપ્લિકેશન ફ્રોડના મુખ્ય સૂત્રધાર નારાયણ અશોક કાંગને મહારાષ્ટ્રના ઔરંગાબાદથી ઝડપી પાડવામાં આવ્યો છે. ઊંચા વળતરની લાલચ આપી ગુજરાત સહિત દેશભરના 1.75 લાખથી વધુ લોકોને છેતરનારા આ ગેંગના કુલ 10 આરોપીઓની ધરપકડ કરાઈ છે. આરોપી નારાયણ અશોક કાંગ ‘SD Pay’ નામની બોગસ એપ્લિકેશનનું નેટવર્ક ઔરંગાબાદથી ઓપરેટ કરતો હતો અને રોકાણકારોના પૈસા તેના અંગત અને બેનામી બેંક ખાતાઓમાં ટ્રાન્સફર કરતો હતો.

ODI World Cup 2027 ને ધ્યાનમાં રાખીને, હેડ કોચ ગૌતમ ગંભીરે કહ્યું છે કે શુભમન ગિલ નસીબદાર છે કે તેને રોહિત શર્મા અને વિરાટ કોહલી જેવા અનુભવી ખેલાડીઓનું માર્ગદર્શન મળી રહ્યું છે. ગંભીરે સ્પષ્ટ કર્યું કે હાર્દિક પંડ્યા અને જસપ્રીત બુમરાહ 2027 વર્લ્ડ કપમાં ટીમ ઈન્ડિયાના મુખ્ય આધારસ્તંભ હશે. હાર્દિક જેવો ઓલરાઉન્ડર અને બુમરાહ જેવો બોલર દુર્લભ છે. ખેલાડીઓને વર્લ્ડ કપ પહેલા પૂરતો ગેમ-ટાઇમ અને મેચ પ્રેક્ટિસ મળે તે અત્યંત જરૂરી છે.

જાપાનના આઈચી-નાગોયા ખાતે 20મી Asian Games 2026 માં મેન્સ ક્રિકેટ ઈવેન્ટ 24 સપ્ટેમ્બરથી શરૂ થશે. આ ટૂર્નામેન્ટમાં કુલ 10 ટીમો ભાગ લેશે. આંતરરાષ્ટ્રીય રેન્કિંગના આધારે ભારત, પાકિસ્તાન, શ્રીલંકા અને બાંગ્લાદેશને સીધી ક્વાર્ટર ફાઈનલમાં સ્થાન મળ્યું છે. જો ભારત અને પાકિસ્તાન બંને પોતાની ક્વાર્ટર ફાઈનલ અને સેમિફાઈનલ મેચ જીતી લેશે, તો 3 ઓક્ટોબરે ગોલ્ડ મેડલ મેચમાં તેમની ટક્કર થશે. આ ઉપરાંત, જો બંને પોતપોતાની સેમિફાઈનલમાં હારી જાય, તો પણ 3 ઓક્ટોબરે બ્રોન્ઝ મેડલ મેચમાં તેઓ આમને-સામને આવી શકે છે.

સેન્ટ્રલ બોર્ડ ઓફ સેકન્ડરી એજ્યુકેશન (CBSE) એ 2027 માં યોજાનારી ધોરણ 10 અને 12ની બોર્ડ પરીક્ષાઓ માટે સેમ્પલ ક્વેશ્ચન પેપર જાહેર કર્યા છે. ધોરણ 10 માટે 61 વિષયોના અને ધોરણ 12 માટે 79 વિષયોના સેમ્પલ પેપર ઉપલબ્ધ કરાવવામાં આવ્યા છે. આ સાથે, 2027 બોર્ડ પરીક્ષાની અસેસમેન્ટ અને માર્કિંગ સ્કીમ પણ જાહેર કરાઈ છે, જેમાં કોઈ ફેરફાર કરવામાં આવ્યો નથી. વિદ્યાર્થીઓ આ સેમ્પલ પેપર ડાઉનલોડ કરીને પરીક્ષાની પેટર્ન અને ટાઈમ મેનેજમેન્ટ સુધારી શકે છે.

ઈન્ડિયન પ્રીમિયર લીગ (IPL)ની 20મી સીઝન માટે ક્રિકેટ રસિકો માટે મોટા સમાચાર છે. છેલ્લા 3 વર્ષથી વિદેશમાં યોજાતી IPL ખેલાડીઓની હરાજી ફરી ભારતમાં પરત ફરી રહી છે. IPL ના ચેરમેન અરુણ સિંહ ધૂમલે જાહેરાત કરી છે કે આગામી મિની-ઓક્શન ગોવામાં યોજાશે. આ હરાજી 15 થી 16 ડિસેમ્બરની આસપાસ થવાની શક્યતા છે અને તે માત્ર 1 દિવસમાં પૂર્ણ થશે, કારણ કે આ એક મિની-ઓક્શન છે.

રાજકોટમાં ગણેશ વિસર્જન દરમિયાન એક દુ:ખદ ઘટના બની છે, જ્યાં કુવાડવા-વાંકાનેર રોડ પરના જળાશયમાં શ્રીજીની પ્રતિમાનું વિસર્જન કરવા ગયેલા એક જ પરિવારના ત્રણ સભ્યો ઊંડા પાણીમાં ગરકાવ થતાં ડૂબી જવાથી કમકમાટીભર્યા મોતને ભેટ્યા છે. નયનભાઈ ચૌહાણ, ધીરુભાઈ ચૌહાણ અને નરેન્દ્રભાઈ ચૌહાણના આ દુ:ખદ મોતને પગલે પરિવારમાં શોકનો માહોલ છવાયો છે. પોલીસ અને ફાયર બ્રિગેડની ટીમે ઘટનાસ્થળે પહોંચી મૃતદેહોને બહાર કાઢી આગળની કાર્યવાહી હાથ ધરી છે.

ડભોઈ તાલુકાના સાઠોદ ગામના તળાવમાંથી ચાર દિવસથી ગુમ થયેલા યુવાનની લાશ હાથ-પગ બાંધેલી હાલતમાં મળી આવતા ચકચાર મચી જવા પામી છે. સ્થાનિક ગ્રામજનોને મૃતદેહ તરતો દેખાતા પોલીસને જાણ કરાઈ હતી. પોલીસ ઘટના સ્થળે પહોંચી લાશ બહાર કાઢી, જેની ઓળખ નવીનગરીના ગુરુશરણ કોઇજીભાઇ તડવી તરીકે થઈ. યુવાનની હત્યા કરી પુરાવાનો નાશ કરવા લાશને તળાવમાં ફેંકી દીધાની આશંકા સાથે પોલીસે તપાસ હાથ ધરી છે.

ગુજરાત હાઇકોર્ટે અમદાવાદ મ્યુનિસિપલ કોર્પોરેશન (AMC) ની વિવિધ કમિટીઓમાં વિપક્ષી કોર્પોરેટરોને પ્રતિનિધિત્વ આપવાની માગ કરતી કોંગ્રેસની અરજી ફગાવી દીધી છે. કોંગ્રેસના કોર્પોરેટર મોહમ્મદ ઇલ્યાસખાન પઠાણે AMC અને મેયર હિતેશ બારોટ સામે આ અરજી કરી હતી. તેમનો આરોપ હતો કે 160 સત્તાપક્ષના કોર્પોરેટરો સામે માત્ર 32 વિપક્ષના હોવા છતાં, કમિટીઓમાં વિપક્ષને યોગ્ય પ્રતિનિધિત્વ મળતું નથી. રાજ્ય સરકારે દલીલ કરી કે કાયદા મુજબ કમિટીઓમાં વિપક્ષી સભ્યોને સ્થાન આપવું ફરજિયાત નથી, તેથી હાઇકોર્ટે આ અરજી ફગાવીને કોંગ્રેસને આ મામલે કોઈ કાયદેસર રાહત આપી નથી.

વડોદરામાં રહેતા આર્મીના નિવૃત્ત મેજર પત્ની ડો. વીણાબેન ધીલ્લોએ તેમના પતિ, જેઓ પણ આર્મીમાંથી લેફ્ટનન્ટ કર્નલ તરીકે નિવૃત્ત થયા છે અને હાલ મુરાદાબાદની યુનિવર્સિટીમાં HOD છે, તેમની સામે ઈમેઈલ દ્વારા ધમકી આપવાની ફરિયાદ નોંધાવી છે. પત્નીનો આરોપ છે કે પતિએ તેમના ત્રણ કેસો (ડોમેસ્ટિક વાયોલન્સ અને ભરણપોષણ) પાછા ખેંચવા માટે ધમકી આપી છે, જેમાં બદનક્ષી અને ડિવોર્સના કેસ દાખલ કરવાની પણ ચેતવણી આપી છે. પતિએ પુત્રીના વિદેશ અભ્યાસના પૈસા ન આપવા અને તેના બર્થ સર્ટિફિકેટ પણ પડાવી લીધાનો આક્ષેપ છે.

સેલવાસ સ્થિત નમો મેડિકલ એજ્યુકેશન એન્ડ રિસર્ચ ઈન્સ્ટીટ્યુટમાં MBBS અભ્યાસક્રમ માટે પ્રવેશ ક્ષમતામાં વધારો કરવામાં આવ્યો છે. કેન્દ્ર સરકાર દ્વારા શૈક્ષણિક વર્ષ 2026-27 થી 177 થી 200 બેઠકોને મંજૂરી આપવામાં આવી છે. આ વધારા સાથે, સેલવાસ મેડિકલ કોલેજ હવે કુલ 200 વિદ્યાર્થીઓને MBBS માં પ્રવેશ આપશે. આ નિર્ણય આરોગ્ય ક્ષેત્રે સરકારના હકારાત્મક અભિગમને દર્શાવે છે અને તબીબી શિક્ષણની પહોંચને વિસ્તૃત કરશે.

વલસાડ સેલ્ફ ફાયનાન્સ સ્કૂલ્સ ઍસોસિએશનએ સ્વનિર્ભર શાળાઓના વિવિધ પ્રશ્નોના નિરાકરણ માટે સરકારને અલ્ટીમેટમ આપ્યું છે. તેમની મુખ્ય ચાર માંગણીઓમાં FRC(ફી રેગ્યુલેટરી કમિટી)ની પ્રક્રિયા સરળ બનાવવી, RTE(રાઇટ ટુ એજ્યુકેશન)ની ફી ચૂકવણીનો પ્રશ્ન ઉકેલવો, શાળાઓની સ્વાયતત્તામાં બિનજરૂરી હસ્તક્ષેપ દૂર કરવો, અને રોજબરોજના સરકારી પરિપત્રોના ભારમાંથી મુક્તિ આપવાનો સમાવેશ થાય છે. જો આ માંગણીઓ નહીં સંતોષાય તો મોટા આંદોલનની ચીમકી ઉચ્ચારવામાં આવી છે.

સાયબર ક્રાઇમના વધતા કિસ્સાઓમાં 'ડિજિટલ એરેસ્ટ' દ્વારા સિનિયર સિટીઝનો સાથે થતી કરોડોની ઠગાઈ મામલે ગુજરાત હાઇકોર્ટે પોલીસની તપાસ પર આકરા પ્રશ્નો ઉઠાવ્યા છે. કોર્ટે જણાવ્યું કે, પોલીસ હંમેશા સિનિયર સિટીઝનોને સમજણ ન હોવાનું બહાનું કાઢે છે, પરંતુ તેઓ પોતે કેટલા સક્ષમ છે? અત્યાર સુધીમાં પીડિતોને કેટલા નાણાં પાછા અપાવ્યા છે? ₹60 લાખ ગુમાવનાર ફરિયાદીના પૈસા પરત ન મળતાં કોર્ટ નારાજ છે. મુખ્ય સૂત્રધાર સુધી પહોંચવામાં પોલીસ નિષ્ફળ રહી છે. નાણાકીય વ્યવહારોનો સંપૂર્ણ ચાર્ટ રજૂ કરવા આદેશ અપાયો છે.

આશ્રમશાળા શિક્ષકોની બદલી મુદ્દે ગુજરાત હાઇકોર્ટમાં સુનાવણી દરમિયાન ચીફ જસ્ટિસની ખંડપીઠે રાજ્ય સરકારને ફટકાર લગાવી. તેમણે જણાવ્યું કે, 'આશ્રમશાળાઓ માટે નીતિ સ્પષ્ટ રાખો કે અહીં નિયુક્ત શિક્ષકોની અન્ય ગ્રાન્ટ ઇન શાળા (બિન-સરકારી) માં બદલી નહીં થાય. લોકોના પૈસે ચૂકવાતા પગાર પર કોઈને જલસા કરવા દેવાશે નહીં.' GSLSA દ્વારા તપાસમાં ઘટસ્ફોટ થયો કે કેટલીક NGO પૂરતા શિક્ષકો વિના જ આશ્રમશાળાઓ ચલાવી રહી છે. અંતરિયાળ વિસ્તારોમાં ભણાવવાની ના નહીં પાડી શકાય. સરકારે નવી નીતિ ઘડવા 4 અઠવાડિયાનો સમય માગ્યો, જે કોર્ટે ગ્રાહ્ય રાખી સુનાવણી એક મહિના પછી રાખી છે.

ગુજરાત સરકારની મફત પાઠ્યપુસ્તક યોજના હેઠળના પુસ્તકો ઓનલાઇન પ્લેટફોર્મ પર 160 થી 250 રૂપિયાથી વધુ કિંમતે વેચાતા હોવાનો ગંભીર આક્ષેપ ગુજરાત પ્રદેશ કોંગ્રેસે કર્યો છે. આ મુદ્દે કોંગ્રેસે રાજ્ય પાઠ્યપુસ્તક મંડળની વ્યવસ્થા સામે સવાલો ઉઠાવ્યા છે અને સમગ્ર મામલે તપાસની માગ કરી છે. ધોરણ 9 થી 12 ના વિવિધ વિષયોના પુસ્તકો વ્યાપારી ધોરણે વેચાતા હોવાનો દાવો કરાયો છે, જેના પર 'રાજ્ય સરકારની વિનામૂલ્યે યોજના હેઠળનું પુસ્તક' લખેલું હોવા છતાં કિંમત સાથે વેચાણ થઈ રહ્યું છે.

IIT બોમ્બેએ વિદ્યાર્થી સાહિલ વાકોડેના કથિત આત્મહત્યાના સંજોગોની તપાસ માટે 10 સભ્યોની ઉચ્ચ-સ્તરીય સમિતિની રચના કરી છે. આ સમિતિ પ્રોફેસર સૂર્યનારાયણ ડૂલ્લાની પણ પૂછપરછ કરી શકે છે, જેમના પર આરોપો છે. મુંબઈ પોલીસ પહેલેથી જ B.Techના બીજા વર્ષના વિદ્યાર્થી વાકોડેના મૃત્યુની તપાસ કરી રહી છે. સાહિલ 18 સપ્ટેમ્બરના રોજ તેના હોસ્ટેલ રૂમમાં મૃત મળી આવ્યો હતો, જે મિડ-સેમેસ્ટર પરીક્ષા દરમિયાન ChatGPT નો ઉપયોગ કરતા પકડાયાના થોડા કલાકો બાદ બન્યું હતું. પોલીસે જનતા અને મીડિયાને અટકળો અને ખોટી માહિતી ફેલાવવાનું ટાળવા અપીલ કરી છે.

અમદાવાદ શહેરમાં મોલ અને સોસાયટીઓમાંથી ગટરના ઢાંકણા તથા લોખંડની ગ્રીલ ચોરી કરતી ગેંગના એક સાગરીતને LCB ઝોન-7ની ટીમે 167 કિલો લોખંડ અને ચોરીના મુદ્દામાલ સાથે ઝડપી પાડ્યો છે. આરોપીની ધરપકડ થતાં ચોરીના 2 ગુનાઓનો ભેદ ઉકેલાયો છે. પોલીસે રૂ.4,000ની કિંમતના પાંચ લોખંડના ગટરના ઢાંકણાં અને રૂ.50,000ની કિંમતનું એક એક્સેસ સ્કૂટર સાથે કુલ રૂ.54,000નો મુદ્દામાલ જપ્ત કર્યો છે. અન્ય એક આરોપીની શોધખોળ ચાલુ છે.

ગુજરાત યુનિવર્સિટીમાં પૂર્વ કુલપતિ નીરજા ગુપ્તા અને રજિસ્ટ્રાર પિયુષ પટેલ પર કરોડો રૂપિયાના કૌભાંડના ગંભીર આક્ષેપો થયા છે. સિન્ડિકેટ સભ્યોની જાણ બહાર ખોટા બિલો પાસ કરવાના વિરોધમાં NSUI કાર્યકરોએ ઉગ્ર દેખાવો કર્યા. તેઓએ રજિસ્ટ્રારના કાર્યાલયના દરવાજા તોડી તેમની ખુરશી પર નકલી નોટોનો હાર પહેરાવ્યો. PMJVK, લિપસ્ટિક-પરફ્યુમના બિલો અને પગાર કૌભાંડના આરોપો સાથે NSUIએ 24મી સપ્ટેમ્બરના રોજ ગુજરાત યુનિવર્સિટી બંધનું એલાન આપ્યું છે.

વડોદરાના સમા-સાવલી રોડ પર કેનાલ બ્રિજની પહોળાઈ વધારવાની કામગીરી માટે રૂ.4.10 કરોડની વધારાની દરખાસ્ત મંજૂરી માટે રજૂ કરાઈ છે. મૂળ ભાવપત્ર 2025માં રૂ.1.27 કરોડનું હતું, પરંતુ પાણી પુરવઠા પ્રોજેક્ટની ફીડરલાઇન ખસેડવાના કારણે આયોજનમાં ફેરફાર થયો. આ ફેરફાર હેઠળ, વૈકલ્પિક આયોજન રૂપે પ્રિ-કાસ્ટ પદ્ધતિથી બોક્સ કલ્વર્ટ બનાવવા અને ચોમાસામાં નદીનું પાણી ન અટકાવવા દરવાજા મૂકવાની કામગીરી સૂચવાઈ છે. આ વધારાની કામગીરી માટે ઈલાઈટ એન્જિનિયર્સને રૂ.4.10 કરોડ ચૂકવવાની દરખાસ્ત છે, જેના કારણે કુલ ખર્ચમાં નોંધપાત્ર વધારો થશે.

અમદાવાદ શહેરમાં વરસાદ બંધ થયા બાદ પણ રસ્તા પર ભુવા પડવાની ઘટનાઓ ચાલુ જ છે. માણેકબાગ રોડ પર ફરી એકવાર ભુવો પડતાં બે કાર તેમાં ફસાઈ ગઈ હતી. સ્થાનિક નાગરિકો અને અન્ય વાહનચાલકોની મદદથી કારને બહાર કાઢવામાં આવી. ઘટનાસ્થળે કોર્પોરેશન દ્વારા કોઈ સુરક્ષા વ્યવસ્થા કે બેરીકેડિંગ ન હોવાને કારણે, સ્થાનિકોએ જાતે જ ટેમ્પરરી બેરીકેડિંગ કરીને વાહનચાલકોને સાવચેત કર્યા. ભૂગર્ભ ગટર લાઈનની કામગીરી સામે પણ પ્રશ્નો ઉઠી રહ્યા છે.

પશ્ચિમ એશિયામાં તણાવપૂર્ણ પરિસ્થિતિઓને કારણે, CBSE એ 2026 માં ધોરણ 12 ની મુખ્ય પરીક્ષાઓ આપી ન શકનારા વિદ્યાર્થીઓ માટે એક વિશેષ પરીક્ષા યોજવાનો ઐતિહાસિક નિર્ણય લીધો છે. આ પરીક્ષા 40 વિષયો માટે યોજાશે, જેમાં 20 એકેડેમિક અને 20 સ્કિલ સબ્જેક્ટ્સનો સમાવેશ થાય છે. જે વિદ્યાર્થીઓ અગાઉ જાહેર થયેલ 'અસેસમેન્ટ સ્કીમ'ના પરિણામથી સંતુષ્ટ નથી, તેઓ આ નવી પરીક્ષા આપી શકશે. રેગ્યુલર અને પ્રાઇવેટ બંને વિદ્યાર્થીઓ આ માટે પાત્ર ગણાશે. પરીક્ષા ફી લેવાશે નહીં અને પરીક્ષા કેન્દ્રો યથાવત રહેશે. આ પરીક્ષા માત્ર પ્રભાવિત પશ્ચિમ એશિયાના દેશોમાં જ યોજાશે.

અમદાવાદ ક્રાઈમ બ્રાન્ચે વન્યજીવન સંબંધિત ગેરકાયદે વેપાર સામે મોટી કાર્યવાહી કરી, નરોડા વિસ્તારમાંથી 1.5 કરોડ રૂપિયાની કિંમતનું 1.051 કિલોગ્રામ 'એમ્બરગ્રીસ' (વ્હેલની ઉલટી) જપ્ત કર્યું છે. ગેરકાયદે રીતે એમ્બરગ્રીસ રાખીને તેનો વેપાર કરવાનો પ્રયાસ કરી રહેલા ત્રણ શખસોની પોલીસે ધરપકડ કરી છે. 'ઓપરેશન થંડર-2026' હેઠળ આ કાર્યવાહી કરવામાં આવી હતી. સ્પર્મ વ્હેલમાંથી મળતો આ કિંમતી પદાર્થ અત્યંત માંગ ધરાવે છે. ક્રાઈમ બ્રાન્ચ તેના મૂળ સ્ત્રોત અને મોટા નેટવર્ક અંગે તપાસ કરી રહી છે.

વડોદરાના સોમા તળાવ નજીકની સોસાયટીઓમાં ગંદા પાણી, ડ્રેનેજ ચોકઅપ અને કચરાના ઢગલા જેવી સમસ્યાઓથી ત્રસ્ત નાગરિકોએ પૂર્વ વિરોધ પક્ષના નેતા ચંદ્રકાંત શ્રીવાસ્તવના નેતૃત્વ હેઠળ લોકહિતની રેલી કાઢી વિરોધ નોંધાવ્યો. વારંવાર ફરિયાદો છતાં તંત્ર દ્વારા કામગીરી ન થતા તેમણે તાત્કાલિક ઉકેલની માંગ કરી આંદોલનની ચીમકી આપી. શ્રીવાસ્તવે જણાવ્યું કે વૈષ્ણવપાર્ક, વૈષ્ણવવિલા જેવી સોસાયટીઓમાં ગંભીર સમસ્યાઓ છે. નાગરિકો વેરો ભરે છે પરંતુ સુવિધાઓ મળતી નથી. સફાઈ અને કચરાના નિકાલની નિયમિતતાના અભાવે લોકો પરેશાન છે.

સુરતમાં ગણેશોત્સવની ઉજવણીમાં વરાછાની મહારાણા પ્રતાપ પ્રાથમિક શાળાના 100 વિદ્યાર્થીઓએ અનોખી બાળ સર્જનાત્મકતા રજૂ કરી. શાળાના મેદાનમાં શિસ્તબદ્ધ ગોઠવણી અને સુમેળભરી હલનચલન દ્વારા બાળકોએ ગણેશજીની વિશાળ માનવાકૃતિનું નયનરમ્ય દ્રશ્ય સર્જ્યું. આ પ્રવૃત્તિનો મુખ્ય હેતુ ગણેશોત્સવના માધ્યમથી બાળકોમાં નાનપણથી જ એકતા, સંગઠન અને ભાઈચારાની ભાવના વિકસાવવાનો હતો. સામૂહિક પ્રયાસથી 'સૌ સાથે મળીને' આગળ વધીએ તેવો સંદેશ વ્યક્ત કરાયો.

ગુજરાતમાં 23મીથી 29મી સપ્ટેમ્બર દરમિયાન હળવાથી મધ્યમ વરસાદની સંભાવના છે. દક્ષિણ અને ઉત્તર ગુજરાતમાં ગાજવીજ સાથે 30-40 કિ.મી./કલાકની ઝડપે પવન ફૂંકાઈ શકે છે. આ આગાહીને પગલે દરિયાકાંઠાના માછીમારોને દરિયો ન ખેડવા માટે ઍલર્ટ જાહેર કરાયું છે. અમદાવાદમાં થંડર શાવર સાથે હળવો વરસાદ અને સૌરાષ્ટ્રમાં છૂટાછવાયા ઝાપટાં પડી શકે છે. કચ્છમાંથી ચોમાસાની વિદાય શરૂ થઈ છે, રાજ્યમાં સામાન્ય કરતાં 8% ઓછો વરસાદ નોંધાયો છે.

દમણમાં પ્રવાસીઓને યાદગાર બીચ અનુભવ આપવા માટે ઈ-વિક્ટોરીયા (બગી) સેવાનો પ્રારંભ થયો છે. મુંબઈના પ્રખ્યાત મરીન ડ્રાઈવની જેમ શરૂ કરાયેલી આ સેવા દમણના પ્રવાસનને વેગ આપશે. પ્રવાસીઓ સાંજના અને રાત્રિના સમયે દરિયાકિનારાના સુંદર દ્રશ્યોનો આરામથી આનંદ માણી શકશે. આ ઈ-વિક્ટોરીયામાં એકસાથે ચારથી પાંચ વ્યક્તિઓ બેસી શકે છે. વિવિધ ત્રણ રૂટો માટે ભાડુ પણ નક્કી કરાયું છે, જે પ્રવાસીઓને પરિવહનનો પર્યાવરણ અનુકૂળ અને મનોરંજક વિકલ્પ પૂરો પાડશે.

વડોદરાના હરણી ટીપી વિસ્તારમાં ફાઇનલ પ્લોટ નં.143 ખાતે નવું ફાયર સ્ટેશન અને ફાયર વિભાગના કર્મચારીઓ માટે સ્ટાફ ક્વાર્ટર્સ બનાવવાનું આયોજન હાથ ધરાયું છે. અહીં કુલ 45 સ્ટાફ ક્વાર્ટર્સ બનાવવામાં આવનાર છે. આ કામગીરી પાછળ રૂ.16.29 કરોડનો ખર્ચ થશે. ફાયર સ્ટેશન સાથે સ્ટાફ માટે રહેણાંક સુવિધા ઊભી કરવાનો આ પ્રોજેક્ટ હાથ ધરવામાં આવનાર છે. શિવમ કન્સ્ટ્રક્શનના રૂ.16.29 કરોડના ભાવપત્રકને મંજૂરી આપવા માટેની દરખાસ્ત હવે સ્થાયી સમિતિ સમક્ષ રજૂ કરવામાં આવી છે. મંજૂરી બાદ કામગીરી આગળ વધારવામાં આવશે.

વડોદરા મહાનગરપાલિકા દ્વારા વોર્ડ નંબર 11 માં ચકલી સર્કલથી નટુભાઈ સર્કલ તરફ જતા માર્ગ પર રેસકોર્સ ટાવર પાસે ડ્રેનેજ લાઈનમાં થયેલા ભંગાણનું સમારકામ રૂ.23.33 લાખમાં પૂર્ણ થયું છે. રૂ.18.52 લાખના અંદાજ સામે આ કામગીરીમાં આશરે 26 ટકા વધુ ખર્ચ થયો છે, જે રૂ.4.81 લાખ વધારે છે. તાત્કાલિક સમારકામ માટે જીપીએમસી એક્ટની કલમ 67(3)(સી) હેઠળ ઈલાઈટ એન્જિનિયર્સ દ્વારા કામગીરી કરવામાં આવી હતી. અંદાજિત રકમ કરતાં વધુ ખર્ચ થતાં કોર્પોરેશનના ખર્ચ અંગે સવાલો ઊભા થયા છે.

સુરતના કોટ વિસ્તારમાં રાણા સમાજના યુવા સંગઠને લોકમાન્ય ટિળકના લોકજાગૃતિના વિચારને સાર્થક કર્યો છે. ગણેશોત્સવની ભવ્ય ઉજવણી વચ્ચે, સમાજની જરૂરિયાતમંદ વિધવા મહિલાઓ માટે દર મહિને રાશન કીટ પહોંચાડવાનો સંકલ્પ લેવામાં આવ્યો છે. ગણેશ મંડળો પાસેથી માત્ર રૂ. 1000 ની સહાય એકત્ર કરી આ પહેલને આગળ વધારાઈ રહી છે. હાલ 150 મહિલાઓને મદદ મળી રહી છે અને ફંડ વધતાં વધુ મહિલાઓને આવરી લેવાશે. ઉત્સવની ભવ્યતા સાથે સમાજ પ્રત્યેની જવાબદારીનો સંદેશ આપતી આ પહેલને સારો પ્રતિસાદ મળી રહ્યો છે.

ભારતીય જનતા પાર્ટી (ભાજપ) એ સંગઠનાત્મક ફેરફારોના ભાગરૂપે અનેક રાજ્યો અને કેન્દ્રશાસિત પ્રદેશો માટે નવા પ્રભારીઓ અને સહ-પ્રભારીઓની નિમણૂક કરી છે. આ યાદીમાં કુલ 36 રાજ્યો અને કેન્દ્રશાસિત પ્રદેશો માટેના નામો જાહેર કરાયા છે. તરુણ ચુગ ગુજરાતના પ્રભારી બન્યા છે, જ્યારે સ્મૃતિ ઇરાની હરિયાણા અને છત્તીસગઢના પ્રભારી તરીકે નિયુક્ત થયા છે. હરીશ દ્વિવેદી બિહાર, શ્રીકાંત શર્મા હિમાચલ પ્રદેશ, અને બિપ્લવ દેવ મધ્ય પ્રદેશના પ્રભારી બન્યા છે. આ નિમણૂકો તાત્કાલિક અસરથી લાગુ પડશે.

ભારતમાં ટોચના 1% અમીરોમાં સામેલ થવા માટે રાજ્ય પ્રમાણે અલગ-અલગ આવકની જરૂર પડે છે. Ministry of Statistics and Programme Implementationના આંકડા અનુસાર, ગુજરાતમાં આ શ્રેણીમાં આવવા માટે વાર્ષિક 30 લાખ રૂપિયાની આવક જરૂરી છે, જે રાષ્ટ્રીય સરેરાશ 22 લાખ રૂપિયા કરતાં 8 લાખ રૂપિયા વધુ છે. આ ઊંચી મર્યાદા રાજ્યની મજબૂત આર્થિક પ્રવૃત્તિ, ખાસ કરીને ઉદ્યોગ, વેપાર અને પોર્ટ આધારિત અર્થતંત્રને કારણે આવકની અસમાનતા દર્શાવે છે. જ્યારે ગોવા (45 લાખ) અને દિલ્હી (42 લાખ) સૌથી આગળ છે, ત્યારે બિહાર (13 લાખ) અને ઉત્તર પ્રદેશ (20 લાખ) જેવી રાજ્યોમાં આ મર્યાદા ઘણી ઓછી છે.