ગોધરા શહેરના દાહોદ હાઇવે ઉપર આવેલા સ્વામિનારાયણ મંદિર નજીક કાર ચાલકે એક્ટિવાને અડફેટે લેતાં સ્કુટર સવાર બે યુવકોના કરૂણ મોત નીપજ્યાં છે. મોપેડ લઈ થ્રિ વ્હીલરના શોરૂમમાં કામ કરતો યુવક તેના સાથી મિત્રો માટે નાસ્તો લેવા માટે એક્ટિવા લઈ બજારમાં જવા નીકળ્યો હતો તે દરમિયાન માર્ગ ઉપર આવતી કાર ચાલકે મોપેડને અડફેટે લઈ અકસ્માત સર્જી કાર મૂકી ચાલક ભાગી છૂટયો હતો. અકસ્માતમાં ગંભીર ઇજાગ્રસ્ત બંનેને સારવાર માટે ગોધરા સિવિલ હોસ્પિટલમાં ખસેડવામાં આવ્યા હતા. સારવાર દરમિયાન તબીબે મૃત જાહેર કરતાં જ મૃતકોના સ્વજનોએ હોસ્પિટલ ખાતે દોડી આવી ભારે કલ્પાંત કર્યુ હતું. અકસ્માતની જાણ થતાં ગોધરા શહેર પોલીસ ઘટના સ્થળે દોડી આવી હતી.