અમદાવાદ શહેરમાં સાંજે 6 વાગ્યા પછી અચાનક ભારે વરસાદ શરૂ થયો, જેના કારણે આશ્રમ રોડ, ચાંદખેડા, મેમનગર અને ગુજરાત યુનિવર્સિટી સહિત અનેક વિસ્તારોમાં પાણી ભરાયા. બોડકદેવમાં ટાઇટેનિયમ વર્લ્ડ ટાવર પાસે રોડ બેસી ગયો, જ્યાં મ્યુનિસિપલ કોર્પોરેશન દ્વારા સમારકામ શરૂ કરાયું છે. નીચાણવાળા વિસ્તારો અને ચાર રસ્તાઓ પર પાણી ભરાતા વાહનચાલકોને મુશ્કેલી પડી. બાકરોલ ખાતે સૌથી વધુ વરસાદ નોંધાયો.

વડોદરામાં ચોમાસા દરમિયાન પાણી ભરાવાની સમસ્યા નિવારવા મ્યુનિ. કોર્પોરેશને ૭૪ ડ્રેનેજ પમ્પિંગ સ્ટેશન (APS) અને ૧૪ સુવેજ ટ્રીટમેન્ટ પ્લાન્ટ (STP) માટે ખાસ વ્યવસ્થા કરી છે. ભારે વરસાદમાં ડ્રેનેજ લાઈનો પરનું ભારણ ઘટાડવા ૧૨ સ્થળોએ બાયપાસ વાલ્વ સિસ્ટમ લગાવવામાં આવી છે, જેથી વધારાનું પાણી સીધું નદી કે કાંસમાં છોડી શકાય. ૧૬ મુખ્ય પમ્પિંગ સ્ટેશનો પર વધારાના બાયપાસ પંપ અને વિવિધ ઝોનમાં હાઈ-કેપેસિટી પંપ ગોઠવાયા છે. ૩૭ પમ્પિંગ સ્ટેશનો પર ડીજી સેટ અને ૨૧ મોબાઇલ ડીજી સેટ પણ સ્ટેન્ડબાય રાખવામાં આવ્યા છે, જેથી વીજ પુરવઠો ખોરવાવા છતાં સિસ્ટમ કાર્યરત રહે.

મહારાષ્ટ્રના નાસિકમાં વાદળ ફાટવા જેવો અતિભારે વરસાદ થવાની આશંકા છે. હવામાન વિભાગ (IMD) એ 7 જુલાઈએ ત્ર્યંબકેશ્વર, ઇગતપુરી અને નાસિકના પશ્ચિમ વિસ્તારોમાં ભારે વરસાદનું એલર્ટ જાહેર કર્યું છે. આ ગંભીર સ્થિતિને ધ્યાનમાં રાખીને, સાવચેતીના ભાગરૂપે જિલ્લા પ્રશાસને મંગળવારે તમામ શાળાઓ અને કોલેજો બંધ રાખવાનો આદેશ આપ્યો છે. ભગવાન ત્ર્યંબકેશ્વર મંદિર અને માતા સપ્તશૃંગી મંદિર પણ ભક્તોની ભીડને કારણે બંધ રહેશે. પ્રવાસી સ્થળો પર સખત નજર રાખવામાં આવશે અને આરોગ્ય વિભાગના તમામ કર્મચારીઓની રજાઓ રદ કરવામાં આવી છે.

સુરત શહેરમાં સોમવારે બપોર બાદ થયેલા અતિભારે વરસાદને કારણે જનજીવન અસ્તવ્યસ્ત થયું હતું. માત્ર બે કલાકમાં ૪.૪૧ ઇંચ વરસાદ પડતાં અનેક વિસ્તારોમાં ઘૂંટણસમા પાણી ભરાઈ ગયા હતા. મુખ્ય માર્ગો પર ટ્રાફિક જામ સર્જાયો હતો અને ઘણા વાહનો પાણીમાં ફસાઈ ગયા હતા. અડાજણ, સલાબતપુરા, કતારગામ, વરાછા, પાલનપુર અને ઉધના જેવા વિસ્તારોમાં જળબંબાકારની સ્થિતિ નિર્માણ પામી હતી, જેના કારણે લોકોને ભારે મુશ્કેલીનો સામનો કરવો પડ્યો હતો.

અમરેલી જિલ્લામાં મેઘમહેર યથાવત છે, જેના કારણે ઠેર-ઠેર જળબંબાકાર જોવા મળી રહ્યો છે. દામનગર અને સાવરકુંડલામાં ધોધમાર વરસાદથી નીચાણવાળા વિસ્તારો અને ખેતરો પાણીથી ભરાઈ ગયા છે. સાવરકુંડલામાં નાવલી નદીમાં ઘોડાપૂર આવતા પુલ પર પાણી ફરી વળ્યા હતા અને સુકનેરા ડેમ ઓવરફ્લો થયો હતો. લાઠી, લિલીયા અને કુકાવાવ પંથકમાં પણ સારો વરસાદ નોંધાયો છે. જાફરાબાદ પંથકમાં પૂર જેવી સ્થિતિમાં પોલીસે લોકોને સુરક્ષિત સ્થળે ખસેડ્યા હતા. ધારીમાં ખોડીયાર ડેમના દરવાજા ખોલતાં શેત્રુજી નદીમાં એક ખેડૂત તણાઈ ગયા હતા, જેમનો મૃતદેહ મળતાં શોક છવાયો હતો.

અમદાવાદમાં ચોમાસાની શરૂઆત સાથે જ શીલજ અને સાબરમતી સહિત અનેક વિસ્તારોમાં રસ્તાઓ પર મોટા ભૂવા પડતાં લોકોમાં ચિંતા ફેલાઈ છે. શીલજમાં ખોદકામ દરમિયાન જમીન ધસી પડતાં મહાકાય ભૂવો સર્જાયો, જ્યારે સાબરમતીમાં ભૂવાના કારણે આશરે 2 કિમી રસ્તો વાહનવ્યવહાર માટે બંધ કરાયો છે. સદનસીબે જાનહાનિ થઈ નથી, પરંતુ વાહનચાલકોને ભારે હાલાકી ભોગવવી પડી રહી છે. સ્થાનિકોએ માત્ર સમારકામ નહીં, પરંતુ જવાબદારો સામે કાર્યવાહી અને રસ્તાઓની ગુણવત્તાની નિષ્પક્ષ તપાસ કરવાની માંગ કરી છે.

ગુજરાતના સૌરાષ્ટ્ર અને દક્ષિણ ગુજરાત વિસ્તારોમાં ધોધમાર વરસાદ વરસ્યો છે. છેલ્લા 24 કલાકમાં અમરેલીના રાજુલા તાલુકામાં 10 ઇંચ વરસાદ નોંધાયો છે. અન્ય વિસ્તારોમાં પણ ભારે વરસાદની સ્થિતિ છે. રાજ્યમાં સિઝનનો 17% વરસાદ નોંધાયો છે, જેમાં સૌરાષ્ટ્ર ઝોનમાં સૌથી વધુ 23% વરસાદ થયો છે. સરદાર સરોવર ડેમ 65% ભરાયો છે અને કુલ 206 જળાશયોમાં પણ પાણીનો સંગ્રહ વધ્યો છે. કટોકટીને પહોંચી વળવા 777 નાગરિકોને સુરક્ષિત સ્થળે ખસેડવામાં આવ્યા છે અને NDRF-SDRFની 35 ટીમો તહેનાત કરાઈ છે.

અમરનાથ યાત્રાના ચોથા દિવસે ચિંતાજનક સમાચાર સામે આવ્યા છે. બાબા બર્ફાની પીગળી રહ્યા છે અને કુદરતી રીતે નિર્મિત શિવલિંગની ઊંચાઈ જૂનમાં 7 ફૂટથી ઘટીને હવે માત્ર 1 ફૂટ રહી ગઈ છે. દર વર્ષે ગુફાની ઉપર ચૂનાના પથ્થરો અને જિપ્સમમાંથી બરફ પીગળીને બનતું આ શિવલિંગ, ઓછા તાપમાનને કારણે આકાર લે છે. દરમિયાન, યાત્રામાં શ્રદ્ધાળુઓની સંખ્યા વધી રહી છે, અને સુરક્ષા માટે RFID ટેગ, QR કોડ અને CCTV જેવી ટેકનોલોજીનો ઉપયોગ થઈ રહ્યો છે.

વડોદરા મ્યુનિસિપલ કોર્પોરેશને શહેર અને જિલ્લાના 15 વિવિધ લોકેશન પર રેઇન સેન્સર દ્વારા નોંધાયેલા વરસાદના લાઇવ આંકડા પોતાની વેબસાઇટ પર ઉપલબ્ધ કરાવ્યા છે. છેલ્લા 15 મિનિટ અને 24 કલાકમાં થયેલા વરસાદની માહિતી નાગરિકો સરળતાથી મેળવી શકશે. આજવા સરોવર, પ્રતાપપુરા, માંજલપુર સહિત કુલ 15 સ્થળોના ડેટા વેબસાઇટ પર દર્શાવાયા છે. આ સુવિધા ચોમાસા દરમિયાન વરસાદની સ્થિતિ પર નજર રાખવા અને જરૂરી આયોજન માટે ઉપયોગી બનશે. પ્રતાપપુરામાં 24 કલાકમાં સૌથી વધુ 88 મી.મી. વરસાદ નોંધાયો છે.

WMO (વર્લ્ડ મેટિઓરોલોજિકલ ઓર્ગેનાઈઝેશન) એ ચેતવણી આપી છે કે 2026 માં અલ નીનો ઘટના મજબૂત બનશે, જે વૈશ્વિક તાપમાનમાં વધારો કરશે અને હવામાનમાં અનિશ્ચિતતા લાવશે. આ ઘટના મધ્ય અને પૂર્વીય પ્રશાંત મહાસાગરમાં પાણીના અસામાન્ય ગરમીનું પરિણામ છે. આના કારણે દુષ્કાળ, પૂર, અને હીટવેવ જેવી આત્યંતિક હવામાન પરિસ્થિતિઓ સર્જાશે, જે ખાસ કરીને કૃષિ, ખાદ્ય સુરક્ષા, અને જળ સંસાધનો પર ગંભીર અસર કરશે. ભારત સહિત અનેક દેશોમાં ચોમાસું નબળું પડવાની અને પાક ઉત્પાદનમાં ઘટાડો થવાની સંભાવના છે.

મહારાષ્ટ્રમાં ભારે વરસાદના કારણે મુંબઈ અને પુણે વચ્ચેનો સંપર્ક સંપૂર્ણપણે તૂટી ગયો છે. મૂસળધાર વરસાદને કારણે અનેક સ્થળોએ ભેખડો ધસી પડતાં મુંબઈ-પુણે એક્સપ્રેસ-વે અને જૂનો હાઈવે બંને વાહનવ્યવહાર માટે આગામી સૂચના સુધી બંધ કરી દેવાયા છે. ઘાટ સેક્શનમાં ભૂસ્ખલન અને પૂરના કારણે ડેક્કન ક્વીન સહિત 16 ટ્રેનો રદ કરાતાં હજારો મુસાફરો અટવાયા છે. હવામાન વિભાગ (IMD) દ્વારા પુણે માટે રેડ એલર્ટ અને મુંબઈ માટે ઓરેન્જ એલર્ટ જારી કરાયું છે.

ભારતીય હવામાન વિભાગ (IMD) એ દેશના 16 થી વધુ રાજ્યો માટે વાવાઝોડા અને ભારે પવન સાથે અતિભારે વરસાદની ચેતવણી જાહેર કરી છે. બંગાળની ખાડીના ઉત્તર-પશ્ચિમ ભાગમાં લો-પ્રેશર મજબૂત બન્યું છે, જેના કારણે ગુજરાત (સૌરાષ્ટ્ર-કચ્છ) અને મહારાષ્ટ્ર (કોંકણ-ગોવા) સહિતના રાજ્યોમાં આગામી 24 કલાકમાં ભારે વરસાદની શક્યતા છે. ઓડિશા, પશ્ચિમ બંગાળ, હિમાચલ પ્રદેશ, ઉત્તરાખંડ, દિલ્હી-NCR, ઉત્તર પ્રદેશ, બિહાર, ઝારખંડ અને રાજસ્થાનમાં પણ ભારે વરસાદની આગાહી છે. માછીમારોને દરિયો ન ખેડવા સૂચના આપવામાં આવી છે.

પશ્ચિમ એશિયામાં તણાવ અને વૈશ્વિક સપ્લાય ચેઈન ખોરવાઈ હોવા છતાં, 15 ભારતીય જહાજો ખાતર અને કાચો માલ લઈને સંવેદનશીલ 'હોર્મુઝની ખાડી' સુરક્ષિત રીતે પાર કરીને ભારત આવી રહ્યા છે. આ જહાજોમાં 3.32 લાખ MT યુરિયા, 2.57 લાખ MT ડીએપી (DAP), અને 1.11 લાખ MT સલ્ફરનો સમાવેશ થાય છે. સરકારના સઘન પ્રયાસોથી ખેડૂતો માટે ખાતરની અછતનો ખતરો ટળી ગયો છે. સ્થાનિક ઉત્પાદન પણ વેગ પકડી રહ્યું છે.

સમગ્ર ભારતમાં રવિવારે ચોમાસાની સક્રિયતા ઝડપથી આગળ વધી હતી. કેરળ, ઓડિશા અને ઝારખંડ રાજ્યોમાં હવામાન વિભાગ દ્વારા ભારે વરસાદની ચેતવણી જારી કરવામાં આવી છે. ઓડિશામાં બંગાળની ખાડીમાં સ્પષ્ટ રૂપે ચિન્હિત ઓછા દબાણનાં ક્ષેત્રને કારણે ભારે વરસાદ પડી રહ્યો છે, જેના પગલે રાજ્યનાં તમામ જિલ્લાઓમાં હાઇ એલર્ટ જારી કરાયું છે. ભારતીય હવામાન વિભાગ (IMD) અનુસાર, વરસાદ લાવવા માટેની સિસ્ટમ ઉત્તરી ઓડિશા તટને પાર કરીને ઓડિશા અને પશ્ચિમ બંગાળમાં ભારે વરસાદ લાવી શકે છે. કેરળનાં મોટા ભાગનાં વિસ્તારોમાં પણ વ્યાપક વરસાદ પડ્યો છે, જ્યાં યલો અને ઓરેન્જ એલર્ટ જારી કરાઈ છે.

બનાસકાંઠા જિલ્લાના દાંતા અને અંબાજી વિસ્તારમાં થયેલા વરસાદથી વાતાવરણમાં ઠંડક પ્રસરી છે અને ખેડૂતોમાં આનંદની લાગણી છવાઈ છે. રવિવારે સવારથી જ આકાશ કાળા ડિબાંગ વાદળોથી ઘેરાઈ ગયું હતું, જેના કારણે દિવસ દરમિયાન અંધારપટ જેવો માહોલ સર્જાયો હતો. પવન સાથે થયેલા વરસાદથી દાંતાના અનેક માર્ગો પર પાણી વહેવા લાગ્યા હતા. યાત્રાધામ અંબાજીના કેટલાક વિસ્તારોમાં થયેલા વરસાદી ઝાપટાંથી ગરમીમાંથી રાહત મળી છે. ખેડૂતો હવે વાવણીની કામગીરીમાં વ્યસ્ત થઈ ગયા છે.

બનાસકાંઠાના સરહદી વાવ અને થરાદ પંથકમાં શનિવાર રાત્રે અચાનક વાતાવરણમાં પલટો આવતાં ભારે પવન, વરસાદ અને વીજળી સાથે કુદરતી આફત આવી હતી. આ તોફાનને કારણે ખેડૂતોના રહેણાંક મકાનો અને પશુઓના શેડના પતરા ઉડી ગયા, જેનાથી ખેડૂત પરિવારો મુશ્કેલીમાં મુકાયા. થરાદના આજાવાડા ગામે ક્કનર્મદેશ્વર ગૌશાળાના શેડ પણ તૂટી પડ્યા, જેનાથી મોટાપાયે આર્થિક નુકસાન થયું. જોરડીયાળી, તખતપુરા સહિતના વિસ્તારોમાં વીજપોલ અને ડીપી ધરાશાયી થતાં અંધારપટ છવાયો. જોકે, કોઈ મોટી જાનહાનિ થઈ નથી.

દક્ષિણ ફ્રાન્સમાં ગુરુવારે જંગલની આગ ફેલાઈ, જેમાં આશરે ૧,૨૧૦ હેક્ટર જમીન બળી ગઈ. તીવ્ર હવા અને સૂકા હવામાનને કારણે આગ ઝડપથી ફેલાઈ. ઓડે વિસ્તારમાં લાગેલી સૌથી મોટી આગે ૯૦૦ હેક્ટર જમીનને અસર કરી, જેમાં ૮૦૦ ફાયરફાયટરો અને ૧૫૦ વાહનો તૈનાત કરાયા. જોકે, આ વિનાશક આગમાં કોઈ જાનહાનિ થઈ નથી. માર્સિલે નજીક પણ અનેક આગ પર કાબુ મેળવવાનો પ્રયાસ કરાયો, જેમાં ૨૬૦ હેક્ટર જમીન બળી ગઈ. તાજેતરમાં જ પશ્ચિમી યુરોપમાં રેકોર્ડ તોડ હીટવેવની આગાહી કરાઈ હતી.

ગુજરાતના કૃષિ, પશુપાલન, ગૌ સંવર્ધન અને સહકાર વિભાગના મંત્રી રમેશ કટારાએ ફ્તેપુરા વિધાનસભા બેઠકના ધારાસભ્ય તરીકે પોતાના વતન હિંગલા ગામે પહોંચીને ખેતીકામમાં સીધો જ સહયોગ આપ્યો હતો. તેમણે પરંપરાગત રીતે બળદ સાથે હળ જોતરીને જાતે ખેતર ખેડ્યું અને વાવણીનું કામ કર્યું. મંત્રીના આ સરળ અને જમીન સાથે જોડાયેલા સ્વરૂપે ગ્રામજનો અને ખેડૂતોમાં આદર જગાવ્યો. તેમણે ખેતી સાથેના પોતાના વર્ષો જૂના જોડાણને તાજું કરીને ખેડૂત સમુદાય પ્રત્યેની નિષ્ઠા વ્યક્ત કરી. આ ઘટના સોશિયલ મીડિયા અને સ્થાનિક કક્ષાએ ખૂબ જ ચર્ચાઈ રહી છે.

વાલીયા તાલુકામાં ભારે વરસાદથી અસરગ્રસ્ત થયેલા નાગરિકોને તાત્કાલિક મદદ મળે તે માટે જિલ્લા વહીવટી તંત્ર સક્રિય થયું છે. કોંઢ અને સિલુડી ગામમાં રહેણાંક મકાનો અને ઘરવખરીને થયેલા નુકસાનનો અંદાજ મેળવવા માટે વહીવટી ટીમો દ્વારા યુદ્ધના ધોરણે સર્વેની કામગીરી શરૂ કરાઈ છે. જિલ્લા કલેક્ટર ડૉ. નવનાથ ગવ્હાણના માર્ગદર્શન હેઠળ, વાલીયા તાલુકા વિકાસ અધિકારી અને મામલતદારની દેખરેખ હેઠળ ખાસ સર્વે ટીમો દ્વારા અસરગ્રસ્ત વિસ્તારોની મુલાકાત લઈને નુકસાનીની ઝીણવટભરી વિગતો એકત્રિત કરાઈ રહી છે.

દેડિયાપાડા - ચિકદા અને સાગબારા તાલુકામાં મેઘ મહેર થતાં આદિવાસી ખેડૂતો ખુશખુશાલ થઈ ગયા છે અને ખેતરમાં વાવેતર શરૂ કરી દીધુ છે. આજના આધુનિક યુગમાં પણ નર્મદા જિલ્લાના અંતરિયાળ વિસ્તારોમાં આદિવાસી ખેડૂતો આધુનિક સાધનો નહી પરંપરાગત સાધનોથી જ ખેતી કરે છે. બળદ અને હળથી વાવણીમાં જોતરાયેલા આદિવાસી પતિ પત્ની તસ્વીરમાં નજરે પડે છે.

મુંબઈના માનખુર્દ વિસ્તારમાં ભારે વરસાદ દરમિયાન એક જર્જરિત બિલ્ડિંગ ધરાશાયી થતાં મોટી દુર્ઘટના સર્જાઈ છે. જનતા નગર ખાતે ગ્રાઉન્ડ પ્લસ 3 માળની ઇમારતના 2 થી 3 યુનિટ્સ અચાનક તૂટી પડતાં 6 લોકોના મોતની આશંકા છે. ઘણા લોકો કાટમાળ નીચે ફસાયા હોવાની ભીતિ છે. મુંબઈ ફાયર બ્રિગેડ, પોલીસ અને BMCની ટીમો તાત્કાલિક ઘટનાસ્થળે પહોંચી બચાવ કાર્ય શરૂ કર્યું છે. કાટમાળ હટાવી લોકોને બહાર કાઢવાના પ્રયાસો ચાલી રહ્યા છે.

મુંબઈમાં હવામાન વિભાગ (IMD) દ્વારા ભારે વરસાદ અને તેજ પવનની આગાહી સાથે 'ઓરેન્જ એલર્ટ' જાહેર કરાયું છે. સુરક્ષાને ધ્યાનમાં રાખીને, BMC એ સોમવારે મુંબઈની તમામ સરકારી અને ખાનગી સ્કૂલો અને કોલેજો બંધ રાખવાનો નિર્ણય કર્યો છે. થાણે અને નવી મુંબઈમાં પણ શૈક્ષણિક સંસ્થાઓ બંધ રહેશે. નાગરિકોને બિનજરૂરી બહાર ન નીકળવા અને ઝાડ નીચે ન ઊભા રહેવા અપીલ કરાઈ છે. જોખમી ઈમારતો તાત્કાલિક ખાલી કરવા આદેશ અપાયો છે. મુંબઈમાં 24 કલાકમાં રેકોર્ડબ્રેક વરસાદ નોંધાયો છે, પરંતુ રેલવે સેવા સામાન્ય છે.

ગુજરાતમાં ચોમાસુ 2026 સક્રિય થતાં સર્વત્ર ધોધમાર વરસાદ વરસી રહ્યો છે. રાજ્યમાં અત્યાર સુધીમાં સરેરાશ 138.75 mm વરસાદ નોંધાયો છે, જે કુલ સરેરાશનો 15.26% છે. છેલ્લા 24 કલાકમાં 31 જિલ્લાના 196 તાલુકાઓમાં વરસાદ વરસ્યો છે. ભારે વરસાદને કારણે 6 સ્ટેટ હાઈવે બંધ અને 5 ડેમ હાઈ એલર્ટ પર છે. અમરેલી જિલ્લામાં સૌથી વધુ વરસાદ નોંધાયો છે. GUVNL મુજબ 2,457 ગામો વીજળીથી પ્રભાવિત થયા હતા, જેમાંથી મોટાભાગનામાં વીજપુરવઠો પુનઃસ્થાપિત કરાયો છે. કુલ 95 રસ્તાઓ વાહનવ્યવહાર માટે બંધ છે. નર્મદા ડેમ 64% ભરાયો છે. NDRF અને SDRF ની ટીમો રાહત કાર્યમાં લાગી છે.

અમદાવાદના SG Highway, મકરબા, સરખેજ, આનંદનગર અને વસ્ત્રાપુર જેવા અનેક વિસ્તારોમાં રવિવારની સાંજે અચાનક ધોધમાર વરસાદ તૂટી પડ્યો. આકાશ કાળા વાદળોથી ઘેરાઈ ગયું અને રસ્તાઓ પર પાણી ભરાઈ જતાં લોકોને પરેશાની થઈ. જોકે, લાંબા સમયના ઉકળાટ બાદ ઠંડક પ્રસરી જતાં શહેરીજનોએ ચા-ભજિયા સાથે આહલાદક વરસાદી સાંજની મજા માણી. ગઇકાલે શહેરમાં દોઢ ઇંચ વરસાદ નોંધાયો હતો, જેનાથી સિઝનનો કુલ વરસાદ 2.49 ઇંચ પર પહોંચ્યો છે.

બંગાળની ખાડીમાં સર્જાયેલા લો પ્રેશરને કારણે દેશભરમાં ચોમાસું સક્રિય બન્યું છે. હવામાન વિભાગ (IMD) એ આગામી 48 કલાક માટે 14 રાજ્યોમાં ભારેથી અતિભારે વરસાદનું એલર્ટ જાહેર કર્યું છે. મહારાષ્ટ્રના મુંબઈ, પુણે અને રત્નાગિરી સહિતના વિસ્તારોમાં રેડ એલર્ટ અપાયું છે, જ્યાં મુંબઈમાં ભારે પવનથી અનેક વૃક્ષો પડ્યા અને બે લોકોના મોત થયા. ગુજરાત અને સૌરાષ્ટ્રમાં પણ અતિ તીવ્ર વરસાદની ચેતવણી અપાઈ છે, જ્યારે છત્તીસગઢ, રાજસ્થાન, મધ્યપ્રદેશ, ઓડિશા, ઉત્તરાખંડ, હિમાચલ પ્રદેશ, ઉત્તર પ્રદેશ, દિલ્હી, હરિયાણા, બિહાર અને ઝારખંડમાં પણ ગાજવીજ અને ભારે વરસાદની સંભાવના છે.

ભારતીય હવામાન વિભાગ (IMD) દ્વારા ગુજરાત માટે આગામી 7 દિવસની નવી વરસાદની આગાહી જાહેર કરવામાં આવી છે. આગામી દિવસોમાં રાજ્યના અનેક ભાગોમાં ભારેથી અતિભારે વરસાદની શક્યતા છે. ખાસ કરીને દક્ષિણ ગુજરાત અને સૌરાષ્ટ્રના 6 જિલ્લાઓ માટે Red Alert જાહેર કરાયું છે. ડાંગ, નવસારી, વલસાડમાં અત્યંત ભારે વરસાદ ચાલુ રહેશે, જ્યારે સુરત, તાપી, ભરૂચ, ભાવનગર અને અમરેલીમાં પણ ભારેથી અતિભારે વરસાદની સંભાવના છે. 8 જુલાઈથી વરસાદનું જોર ઘટશે, છતાં નીચાણવાળા વિસ્તારો અને દરિયાકાંઠાના લોકોને સાવચેત રહેવા અપીલ છે.

દિલ્હીમાં ચોમાસાના પહેલા ભારે વરસાદે જળબંબાકારની સ્થિતિ સર્જી છે, જેના કારણે અનેક વિસ્તારોમાં પાણી ભરાયા છે અને ભારે ટ્રાફિક જામ થયો છે. આ કારણે કુલ 15 ફ્લાઈટ્સ, જેમાં 5 ઇન્ટરનેશનલ ફ્લાઈટ્સનો સમાવેશ થાય છે, તેને ડાયવર્ટ કરવી પડી છે. હવામાન વિભાગ (IMD) એ આગામી દિવસોમાં પણ સતત વરસાદની સંભાવના વ્યક્ત કરી છે, જેનાથી પાણી ભરાવાની સમસ્યા વધી શકે છે. વહીવટીતંત્રે લોકોને જરૂર હોય તો જ ઘરની બહાર નીકળવા અપીલ કરી છે.

અમદાવાદમાં મધ્યરાત્રિએ થયેલા ભારે વરસાદે AMCની પ્રી-મોન્સૂન કામગીરી પર પ્રશ્નાર્થ સર્જ્યો છે. માત્ર બે કલાકમાં અનેક વિસ્તારોમાં જળબંબાકાર થયો, હેલમેટ સર્કલ જેવા વ્યસ્ત માર્ગો પર રસ્તા બેસી ગયા અને ઠેરઠેર ખાડાઓનું સામ્રાજ્ય સર્જાયું. ઓગણજમાં 4 ઇંચ વરસાદ નોંધાયો, જેના પગલે અખબારનગર, મકરબા અને મીઠાખળી અંડરપાસ બંધ કરવા પડ્યા. વિજય ચાર રસ્તાથી હેલમેટ સર્કલ વચ્ચે ડ્રેનેજ મેનહોલ પાસે રસ્તો બેસી જતાં અકસ્માતનો ભય છે. ચાંદલોડિયા અને સૈજપુરના રસ્તાઓની પણ હાલત બિસ્માર છે.

ભાવનગર જિલ્લાના મહુવા તાલુકામાં ભારે વરસાદથી ડોંગી નદીમાં પૂર આવ્યું. ઓથા ગામ નજીક એક કારચાલકે પાણીના ધસમસતા પ્રવાહ વચ્ચે કાર પસાર કરવાનો પ્રયાસ કર્યો, પરંતુ તેનું વાહન નદીમાં તણાઈ ગયું. હોડીની જેમ તરતી કારનો વીડિયો સોશિયલ મીડિયા પર વાયરલ થયો છે. સદનસીબે, સ્થાનિક ગ્રામજનોએ સમયસર પહોંચીને કારમાં સવાર તમામ મુસાફરોને સુરક્ષિત રીતે બહાર કાઢ્યા. બાદમાં, ક્રેનની મદદથી કારને પણ બહાર કાઢવામાં આવી, જેમાં જાનહાનિ ટળી હતી.

રાજ્યમાં ખેતરોમાંથી પસાર થતી વીજ લાઇન અને ટાવરના કારણે ખેડૂતોને થતા નુકશાન સામે ગુજરાત સરકારે એક મહત્વપૂર્ણ નિર્ણય લીધો છે. હવે જંત્રીના બદલે પ્રવર્તમાન બજાર ભાવ (માર્કેટ રેટ)ના આધારે વળતર ચૂકવવામાં આવશે. નવા પરિપત્ર મુજબ, ટ્રાન્સમિશન ટાવરના પાયા હેઠળ આવતી જમીન માટે બજાર કિંમતના 200% એટલે કે બમણું વળતર મળશે. તેમજ રાઈટ ઓફ વે (RoW) કોરિડોર માટે પણ ગ્રામ્ય વિસ્તારોમાં 30%, નગરપાલિકા વિસ્તારોમાં 45% અને મહાનગરપાલિકા વિસ્તારોમાં 60% મુજબ વળતર ચૂકવાશે. આ નિર્ણયથી ખેડૂતોની લાંબા સમયથી ચાલતી માંગનો અંત આવ્યો છે.