અયોધ્યાના રામ મંદિરમાં દાનની ચોરીનો મુદ્દો ગરમાયો છે. કોંગ્રેસ નેતા પવન ખેડાએ આરોપ લગાવ્યો છે કે ધાર્મિક સ્થળો પર ચોરીની એક ખાસ પેટર્ન બની ગઈ છે, જેનો ઉપયોગ BJP અને RSS રાજકીય સત્તા અને પોતાના લાભ માટે કરી રહ્યા છે. તેમણે RSS પર જવાબદારી ટાળવાનો અને પોતાના એકાઉન્ટ બુક્સ જાહેર ન કરવાનો પણ આરોપ મૂક્યો. આ ઘટનાઓ રામ મંદિર ટ્રસ્ટની મહત્વની બેઠક પહેલાં ચર્ચામાં આવી છે.

શ્રીરામ જન્મભૂમિ તીર્થ ક્ષેત્ર ટ્રસ્ટના અધ્યક્ષ મહંત નૃત્ય ગોપાલ દાસે રામ મંદિરમાં થયેલી દાન ચોરીની ઘટના પર ઊંડું દુઃખ વ્યક્ત કર્યું છે. તેમણે મુખ્યમંત્રી યોગી આદિત્યનાથ અને વડાપ્રધાન નરેન્દ્ર મોદી પર ભરોસો વ્યક્ત કરતાં કહ્યું કે ગુનેગારોને સખત સજા મળશે. આ ઘટનાને લઈને થઈ રહેલી રાજનીતિ પર પણ તેમણે નારાજગી વ્યક્ત કરી છે અને અંગત લાભ માટે રાજનીતિ ન કરવાની અપીલ કરી છે. આ મહત્વની બેઠકમાં ટ્રસ્ટની પ્રતિષ્ઠાને થયેલા નુકસાન અંગે પણ ચર્ચા થશે.

રામ મંદિર દાન ચોરીમાં ભક્તોની ભાવનાઓને ઠેસ પહોંચાડનાર દાન ચોરીના મામલે VHPના આંતરરાષ્ટ્રીય અધ્યક્ષ આલોક કુમારે કડક પ્રતિક્રિયા આપી છે. તેમણે આ ઘટનાને દુઃખદ ગણાવી અને ભક્તોની લાગણીઓને મહત્વ આપ્યું. VHP, RSS કે મોદી સરકાર સાથે આ વિવાદને જોડવાના પ્રયાસોને તેમણે ફગાવી દીધા. ચંપત રાયની ભૂમિકા અંગે તેમણે સ્પષ્ટતા કરી કે તેઓ VHPનું પ્રતિનિધિત્વ કરતા નથી. આ મામલે તપાસ અને દોષિતોને 4-5 મહિનામાં જેલ ભેગા કરવાની માંગ કરી છે.

અયોધ્યા રામ મંદિર ટ્રસ્ટની મહત્ત્વની બેઠક આજે રામ મંદિર પરિસરમાં બપોરે 3 વાગ્યે યોજાશે. આ બેઠકમાં ટ્રસ્ટના મહાસચિવ ચંપત રાય અને સભ્ય અનિલ મિશ્રાના રાજીનામા અંગે નિર્ણય લેવાશે. દાન ચોરી વિવાદ અને SIT રિપોર્ટ સાથે જોડાયેલી બાબતો પર પણ ચર્ચા થશે. 2025-26 ના ઓડિટ રિપોર્ટની પણ સમીક્ષા કરવામાં આવશે. ટ્રસ્ટ બંને પક્ષકારોનો જવાબ સાંભળીને નિર્ણય લેશે. બંને હોદ્દેદારોની ભૂમિકા સામે અનેક આરોપો વચ્ચે ટ્રસ્ટ પોતાની છબી સુધારવાનો પ્રયાસ કરશે.

થરા પોલીસને વડાગામ નજીક નેશનલ હાઇવે પર પેટ્રોલિંગ દરમિયાન બાતમી મળી હતી કે એક ઇન્ડિયન ગેસના ટેન્કરમાંથી ગેરકાયદેસર રીતે ઘરેલું રાંધણ ગેસ ચોરી કરીને સિલિન્ડરોમાં ભરવામાં આવી રહ્યો છે. પોલીસે તાત્કાલિક દરોડો પાડી સ્થળ પરથી પાંચ ભરેલા અને 11 ખાલી સિલિન્ડર, ગેસ રિફિલિંગ માટે વપરાતા સાધનો અને એક છોટા હાથી વાહન સહિતનો મુદ્દામાલ કબજે કર્યો છે. પોલીસે ટેન્કર ચાલક અને અન્ય બે શખ્સોની પૂછપરછ કરતાં આ ગેંગ દ્વારા કાળા બજારમાં ઊંચા ભાવે ગેસ વેચી નફો કમાવવાનો પર્દાફાશ થયો છે.

ગુજરાતના કૃષિ, પશુપાલન, ગૌ સંવર્ધન અને સહકાર વિભાગના મંત્રી રમેશ કટારાએ ફ્તેપુરા વિધાનસભા બેઠકના ધારાસભ્ય તરીકે પોતાના વતન હિંગલા ગામે પહોંચીને ખેતીકામમાં સીધો જ સહયોગ આપ્યો હતો. તેમણે પરંપરાગત રીતે બળદ સાથે હળ જોતરીને જાતે ખેતર ખેડ્યું અને વાવણીનું કામ કર્યું. મંત્રીના આ સરળ અને જમીન સાથે જોડાયેલા સ્વરૂપે ગ્રામજનો અને ખેડૂતોમાં આદર જગાવ્યો. તેમણે ખેતી સાથેના પોતાના વર્ષો જૂના જોડાણને તાજું કરીને ખેડૂત સમુદાય પ્રત્યેની નિષ્ઠા વ્યક્ત કરી. આ ઘટના સોશિયલ મીડિયા અને સ્થાનિક કક્ષાએ ખૂબ જ ચર્ચાઈ રહી છે.

છોટાઉદેપુરના પીઢ આદિવાસી નેતા, પૂર્વ વનમંત્રી અને ગુજરાતના અનુભવી ધારાસભ્યોમાં અગ્રણી એવા મોહનસિંહ રાઠવા (82) નું નિધન થયું છે. તેઓ લાંબા સમયથી બીમાર હતા અને સારવાર હેઠળ હતા. તેમના નિધનથી આદિવાસી સમાજ અને રાજકીય ક્ષેત્રે શોકની લાગણી ફેલાઈ છે. રાઠવાએ 1972માં રાજકારણ શરૂ કર્યું અને આદિવાસી સમાજ, ખેડૂતોના પ્રશ્નોને પ્રાધાન્ય આપ્યું. 11માંથી 10 વિધાનસભા ચૂંટણી જીતી અનેક વિકાસ કાર્યો કર્યા.

વડાપ્રધાન નરેન્દ્ર મોદીએ અમદાવાદ એરપોર્ટ પર મંત્રીઓ સાથે ટૂંકી મીટિંગ કરી, જ્યાં તેમણે 'બંધ પરબિડિયા' આપ્યા. આ મીટિંગ અને 'બંધ લિફાફા' અંગે મંત્રી પરિષદમાં ભારે ચર્ચા ચાલી રહી છે. PMO દ્વારા મંત્રીઓના સોશિયલ મીડિયા અને ગ્રાઉન્ડ વર્ક અંગેના રિપોર્ટ્સ પર આધારિત આ સૂચનાઓ, વહીવટીતંત્રમાં નવી ગતિવિધિઓ સૂચવે છે. આ ઘટનાક્રમ ગુજરાત સરકારમાં અનેક મુદ્દાઓ પર ચર્ચા જગાવી રહ્યો છે.

રામ મંદિર, અયોધ્યામાં દાન ચોરીના મામલે રાષ્ટ્રીય સ્વયંસેવક સંઘ (RSS) ના પ્રમુખ મોહન ભાગવતે પોતાની પ્રતિક્રિયા આપી છે. તેમણે કહ્યું કે તેઓ RSS ના સરકાર્યવાહ દત્તાત્રેય હોસબાલેના નિવેદન સાથે સંપૂર્ણપણે સહમત છે. નાગપુરમાં પત્રકારો દ્વારા પૂછવામાં આવેલા એક સવાલના જવાબમાં ભાગવતે કહ્યું કે, 'દત્તાત્રેય હોસબાલે દ્વારા જાહેર કરાયેલું નિવેદન જુઓ, મારી પ્રતિક્રિયા પણ એ જ છે.' હોસબાલેએ અગાઉ કહ્યું હતું કે, આ ઘટના રામ ભક્તોની આસ્થાને ઠેસ પહોંચાડે છે અને દોષિતો સામે કડક કાર્યવાહી થવી જોઈએ.

સિંગવડ તાલુકા સામાજિક ન્યાય સમિતિના ચેરમેન તરીકે મંજુલાબેન સુરેશભાઈ ચૌહાણની નિમણૂકને કારણે સામાજિક, રાજકીય અને આગેવાન વર્ગ દ્વારા તેમનું અભિવાદન કરાયું. આ પ્રસંગે તેમનું પુષ્પહાર પહેરાવી સન્માન કરાયું હતું. ઉપસ્થિત આગેવાનોએ તેમના નવા દાયિત્વ માટે શુભકામનાઓ વ્યક્ત કરી અને સમાજના વંચિત તથા જરૂરિયાતમંદ વર્ગ માટે અસરકારક કામગીરીની આશા રાખી. તેમના જીવનસાથી સુરેશભાઈ ચૌહાણને પણ શુભેચ્છાઓ પાઠવવામાં આવી.

પંચમહાલ જિલ્લાના પ્રવાસે આવેલા ભાજપ પ્રદેશ પ્રમુખ જગદીશ વિશ્વકર્માએ શહેરા વિધાનસભા વિસ્તારની મુલાકાત લીધી. તેમણે મરડેશ્વર મહાદેવ મંદિરે દર્શન કરી લોકકલ્યાણ માટે પ્રાર્થના કરી. ત્યારબાદ, સંગઠનને મજબૂત કરવાના ઉદ્દેશ્યથી જય જલારામ હોમિયોપેથીક મેડિકલ કૉલેજ ખાતે બેઠક યોજાઈ. આ કાર્યક્રમમાં ધારાસભ્ય, સાંસદો, અને જિલ્લા-તાલુકા ભાજપ પ્રમુખો સહિત અનેક આગેવાનો ઉપસ્થિત રહ્યા હતા.

મહીસાગર જિલ્લાના નળ સે જળ અભિયાન હેઠળ થયેલા રૂ.123 કરોડના ભ્રષ્ટાચાર મામલે CID ક્રાઈમે બાલાસિનોર તાલુકાના જનોડ ગામના સરપંચ રમેશભાઈ રત્નાભાઈ માછીની ધરપકડ કરી છે. સરકારી નીતિ-નિયમોને નેવે મૂકી પાણી સમિતિના સરકારી એકાઉન્ટમાંથી રૂ.1.05 લાખ પોતાના નામે ચેક બનાવી ઉચાપત કરવાનો આરોપ છે. આ ધરપકડ સાથે કૌભાંડમાં કુલ 44 આરોપીઓની ધરપકડ થઈ છે. CID ક્રાઈમ દ્વારા તપાસ તેજ કરવામાં આવી રહી છે.

અરવલ્લી જિલ્લાના મેઘરજ તાલુકાના લીંબોદ્રાઢુંઢા ગામે ખેતરમાં કામ કરતી 21 વર્ષીય મહિલાની જગદીશ મોહનભાઈ ડામોરે છેડતી કરી. મહિલાએ બૂમાબૂમ કરતાં તેનો પતિ ત્યાં આવી પહોંચ્યો. ઠપકો આપતાં જગદીશે પતિ પર ધારીયાથી હુમલો કરી પગમાં ઈજા પહોંચાડી. આ ઘટનાની મેઘરજ પોલીસમાં ફરિયાદ નોંધાવવામાં આવી છે. પોલીસે ગુનો નોંધી આગળની કાર્યવાહી હાથ ધરી છે.

સાબરકાંઠા જિલ્લાના પ્રાંતિજ નગરપાલિકાના કોન્ટ્રાક્ટ આધારિત આરોગ્ય ઇન્સ્પેક્ટરની બાઈક ભાંખરીયા બસ સ્ટેશન પાસે આવેલ પે એન્ડ યુઝ શૌચાલય પાસેથી ચોરાઈ ગઈ. આરોગ્ય ઇન્સ્પેક્ટર શૌચાલયના ફોટા પાડવા માટે અંદર ગયા હતા અને માત્ર બે મિનિટમાં અજાણ્યો શખ્સ બાઇક લઈને ફરાર થઈ ગયો. આ ઘટના પ્રાંતિજ ભાંખરીયા પોલીસ ચોકીની બરાબર સામે બની હતી, જેણે સુરક્ષા વ્યવસ્થા પર પ્રશ્નાર્થ સર્જ્યો છે. પોલીસ ચોકીના CCTV ફૂટેજમાં ઘટના કેદ થઈ છે, જેના આધારે પોલીસે ચોરને ઝડપી પાડવા તપાસ શરૂ કરી છે.

મધ્યપ્રદેશના પૂર્વ મુખ્યમંત્રી દિગ્વિજય સિંહે રામ મંદિરના દાનમાં કથિત અનિયમિતતા અને તેના દુરુપયોગના મુદ્દે ભાજપ અને આરએસએસ પર આકરા પ્રહાર કર્યા. તેમણે દાવો કર્યો કે તેમના દ્વારા અપાયેલા દાનની ચોરી થઈ છે અને આ મામલે ચંપત રાય તથા અનિલ મિશ્રાને બચાવવામાં આવી રહ્યા છે. દિગ્વિજય સિંહે જાહેરાત કરી કે તેઓ 5-6 જુલાઈના રોજ અયોધ્યા જઈને પોતાના વકીલ દ્વારા કેસ દાખલ કરશે અને ટ્રસ્ટીઓને જેલમાં મોકલવાની માંગ કરશે. આ ઉપરાંત, તેમણે મહાકાલ મંદિરના દાન અંગે પણ શંકા વ્યક્ત કરી.

ભારતીય અવકાશ સંશોધન સંસ્થા (ISRO) ના મુખ્યાલયને બોમ્બથી ઉડાવી દેવાની ધમકીભર્યો ઈમેલ મળ્યા બાદ, પોલીસે તાત્કાલિક કાર્યવાહી કરી. બેંગલુરુ સ્થિત ISRO મુખ્યાલયને ખાલી કરાવીને સર્ચ ઓપરેશન હાથ ધરવામાં આવ્યું. પોલીસ, ડોગ સ્ક્વોડ અને BDDS ટીમ ઘટનાસ્થળે પહોંચી હતી. સુરક્ષાના ભાગરૂપે, સમગ્ર પરિસરની ઝીણવટભરી તપાસ કરવામાં આવી. વરિષ્ઠ પોલીસ અધિકારીના જણાવ્યા અનુસાર, કોઈ શંકાસ્પદ વસ્તુ મળી નથી અને આ ધમકી ફેક હોવાનું જણાયું છે. ઈમેલ મોકલનારની ઓળખ માટે તપાસ ચાલુ છે, અને સુરક્ષા એજન્સીઓએ ISRO અને આસપાસના વિસ્તારોમાં સુરક્ષા વધારી દીધી છે.

પ્રાંતિજ પોલીસે માવાની મુવાડી ગામની સીમમાં ખારી નદીના કોતરોમાંથી દેશી દારૂ બનાવવા માટે તૈયાર કરાયેલો અંદાજે 4,200 લીટર વોશ કબજે કર્યો છે, જેની કિંમત રૂ. 1.05 લાખ આંકવામાં આવી છે. જોકે, ઘટના સ્થળેથી કોઈ આરોપી પકડાયો ન હતો. પોલીસે ચાર શખ્સો વિરુદ્ધ ગુનો નોંધી તેમની શોધખોળ શરૂ કરી છે. ASI મનિષકુમાર અને અ.હે.કો. વિક્રમસિંહને મળેલી બાતમીના આધારે આ કાર્યવાહી કરવામાં આવી હતી.

હિંમતનગર બી-ડીવીઝન પોલીસ સ્ટેશન વિસ્તારમાં આવેલ વેપાર ભવનની કોમ્પ્યુટર ટાઈપની દુકાનમાંથી અંદાજે રૂ.1.50 લાખની રોકડની ચોરી થઈ હતી. આ ઘટના અંગે ઝાકીરહસેન અબ્દુરરહમાન કાબલીવાલાએ નોંધાવેલી ફરિયાદ મુજબ, ચાંદનગરમાં રહેતા શકીલશા રફીકશા દિવાને તારીખ 30 જૂનની રાત્રે તેમની દુકાનમાં પ્રવેશ કરી ઓફિસના ડ્રોવરનું તાળું તોડી ચોરી કરી હતી. આ ચોરી અંગે ઝાકીરહુસેન કાબલીવાલાએ શકીલશા દિવાન વિરુદ્ધ બી-ડીવીઝન પોલીસ સ્ટેશનમાં ફરિયાદ નોંધાવી છે.

સાબરકાંઠા જિલ્લામાં દારૂબંધીના કડક અમલ હેઠળ, તલોદ અને પ્રાંતિજ પોલીસ દ્વારા જપ્ત કરાયેલા રૂ. 2.10 કરોડથી વધુના વિદેશી દારૂનો કોર્ટના આદેશ બાદ નાશ કરવામાં આવ્યો. આ કાર્યવાહીમાં કુલ 62,804 બોટલોનો સમાવેશ થાય છે, જેમાંથી તલોદ પોલીસ સ્ટેશનના 18 ગુનાઓની 8288 બોટલો અને પ્રાંતિજ પોલીસ સ્ટેશનના 24 ગુનાઓની 54,516 બોટલોનો નાશ કરાયો. નાયબ પોલીસ મહાનિરીક્ષક અને પોલીસ અધિક્ષકના માર્ગદર્શન હેઠળ સબ-ડિવિઝનલ મેજિસ્ટ્રેટની હાજરીમાં ઉમેદની મુવાડી ગામ ખાતે આ નાશની પ્રક્રિયા પૂર્ણ કરવામાં આવી.

હિંમતનગર બી-ડીવીઝન પોલીસ સ્ટેશનમાં એક યુવકના મોત બાદ તેના પરિવારજનો, મહિલાઓ અને યુવાનોએ પોલીસ મથકે પહોંચી દેકારો મચાવ્યો હતો. મૃતકને પોલીસ સ્ટેશનમાં લાવી માર મારવામાં આવ્યો હોવાનો આરોપ છે. પરિજનોએ મૃતકના મોતની યોગ્ય તપાસ અને ન્યાયની માંગ કરી હતી. હાલ પોલીસ તંત્ર દ્વારા આ અંગે કોઈ સત્તાવાર માહિતી આપવામાં આવી નથી. પોસ્ટમોર્ટમ અને FSL રિપોર્ટ આવ્યા બાદ મોતનું સાચું કારણ સ્પષ્ટ થશે તેવું માનવામાં આવી રહ્યું છે.

હળવદ નજીક ઘુડખર અભયારણ્ય વિસ્તારમાં ગેરકાયદેસર રેતી ખનનની બાતમી મળતાં વન વિભાગે સઘન કાર્યવાહી કરી હતી. એ.સી.એફ્. મનીષ ઓડેદરાના માર્ગદર્શન હેઠળ આર.એફ્.ઓ.ની ટીમોએ એજાર, માલણિયાદ અને કોપરણી ગામોમાં કોમ્બિંગ હાથ ધર્યું હતું. આ દરમિયાન, રાત્રિના સમયે એજાર ગામ પાસે અભયારણ્ય વિસ્તારમાંથી ગેરકાયદે રેતીનું ખનન કરતા 4 ટ્રેક્ટરો ઝડપી પાડ્યા હતા. વન વિભાગે તમામ ટ્રેક્ટરો કબજે કરી આરોપીઓ સામે વન્યજીવ સંરક્ષણ અધિનિયમ-1972 હેઠળ ગુનો નોંધી કાયદેસરની કાર્યવાહી હાથ ધરી છે.

દસ્ક્રોઈ તાલુકાના બાકરોલ ગામમાં સિંચાઈ વિભાગની કેનાલ પર ગેરકાયદેસર નોનવેજ હોટેલનું બાંધકામ કરાયું છે. તેના કારણે ચોમાસામાં પાણીના નિકાલમાં અવરોધ આવવાની તેમજ ખેડૂતોને સિંચાઈ માટે પાણી પહોંચવામાં મુશ્કેલી સર્જાવાની ભીતિ છે. હોટેલમાંથી નીકળતો કચરો અને ગંદકી કેનાલમાં જતી હોવાથી સ્વચ્છતા અને આરોગ્યના પ્રશ્નો પણ ઊભા થયા છે. ખુલ્લા કુવા અને ગંદકીથી રોગચાળો વકરી શકે છે. સ્થાનિકોએ સિંચાઈ વિભાગ, ગ્રામ પંચાયત અને જિલ્લા તંત્રને તાત્કાલિક તપાસ કરી દબાણ દૂર કરવાની અને જવાબદારો સામે કાર્યવાહી કરવાની માંગ કરી છે.

પાલનપુર ખાતે બનાસકાંઠા સાંસદ ગેનીબેન ઠાકોરની અધ્યક્ષતામાં દિશા કમિટીની બેઠક યોજાઈ. આ બેઠકમાં કેન્દ્ર અને રાજ્ય સરકારની વિવિધ યોજનાઓ અંતર્ગત સંલગ્ન વિભાગો દ્વારા કરવામાં આવતી કાર્યવાહીની વિસ્તૃત સમીક્ષા કરવામાં આવી. જિલ્લાના વિવિધ વિભાગો અને તમામ નગરપાલિકાઓની કામગીરીની પણ ચર્ચા થઈ. અધિકારીઓએ સાંસદ સમક્ષ તેમની કામગીરીની વિગતવાર માહિતી રજૂ કરી.

વીરપુર પોલીસને મળેલ બાતમીના આધારે લીંબરવાળા ગામે કાર્યવાહી કરતાં એક ઇસમ વિદેશી દારૂના મોટા જથ્થા સાથે ઝડપાયો છે. જિલ્લા પોલીસ અધિક્ષક લુણાવાડા વિભાગનાઓએ પ્રોહીબીશનની અસરકારક કામગીરી કરવા સૂચના કરી હતી, જેના અનુસંધાને વીરપુર પોલીસ સ્ટેશન દ્વારા ચાંપતી નજર રાખવામાં આવી રહી હતી. લીંમ્બરવાડા ગામના રણજીતભાઈ અમરાભાઈ ઠાકોર પોતાના ઘરે દારૂ રાખી વેચાણ કરતા હોવાની બાતમી મળતાં દરોડો પાડવામાં આવ્યો હતો. તેમના ખેતરમાંથી ટીન બીયર અને રોયલ સ્ટેગ કવોટર મળી આવ્યો છે.

હિંમતનગરઃ સાબરકાંઠા જિલ્લાના હિંમતનગર સ્થિત ટ્રાફિક શાખા દ્વારા છેલ્લા એક મહિનામાં નંબર પ્લેટ ન ધરાવતા 3050 તથા બ્લેક ફિલ્મ લગાવીને ફરતા 628 મળી 3678 વાહન ચાલકો સામે ટ્રાફિક શાખાના પીએસઆઈ એ.વી.જોષી અને તેમના સ્ટાફે વાહન ચેકીંગ કરીને નિયમોનો ભંગ કરતા વાહનચાલકો વિરૂધ્ધ દંડનીય કાર્યવાહી કરી હતી.

વિરમગામ શહેરની શેઠ એમ. જે. હાઈસ્કૂલના મેદાન પાસેના હાથી તલાવડી વિસ્તારમાંથી દેશી અને વિદેશી દારૂનો ખાનગી વેપલો ચલાવતા ભાટ વાસણા ગામના રમેશજી ઉર્ફે ગુગો લક્ષ્મણજી ઠાકોરને શહેર પોલીસે દારૂના જથ્થા સાથે ઝડપી લીધો. પોલીસે વાહન કબજે કરી, જેમાં 130 વ્હિસ્કી ક્વાટર, 22 બિયર ટીન, 100 લીટર દેશી દારૂ, એક મોબાઈલ અને વાહન મળી કુલ રૂ. 5,42,840નો મુદ્દામાલ જપ્ત કર્યો. રમેશજી ઠાકોર અને દીપક સુરેશભાઈ ઠાકોર વિરૂદ્ધ ગુનો નોંધી તપાસ શરૂ કરાઈ છે.

સાયલા ગામના સર્વોદય જીન વિસ્તારમાં સવારે એક જ જ્ઞાતિના બે જૂથો વચ્ચે કોઈ મુદ્દે ઉગ્ર બોલાચાલી બાદ ધીંગાણું સર્જાયું. આ મારામારીમાં બન્ને પક્ષો દ્વારા ધારીયા, લાકડીઓ અને ધોકા જેવા હથિયારોનો ઉપયોગ કરવામાં આવ્યો, જેમાં કુલ નવ લોકોને નાની-મોટી ઈજાઓ પહોંચી. ઈજાગ્રસ્તોને 108 એમ્બ્યુલન્સ દ્વારા સાયલા સરકારી હોસ્પિટલ ખસેડાયા, જ્યાં ત્રણથી ચાર લોકોને વધુ સારવાર માટે સુરેન્દ્રનગર અને એકને રાજકોટ મોકલવામાં આવ્યા. સાયલા પોલીસે ઘટનાસ્થળે અને હોસ્પિટલમાં બંદોબસ્ત ગોઠવી તપાસ હાથ ધરી.

ધ્રાંગધ્રાની રજવાડી રેસ્ટોરન્ટના મેનેજરે એક મહિલાને બીભત્સ ફોટા બતાવી બ્લેકમેઈલ કરી કટકે કટકે રૂપીયા બે લાખ પડાવી લીધાની ઘટના બની છે. આબીદ માલપરા નામનો મેનેજર મહિલાના ફોટા વાયરલ કરવાની ધમકી આપી પૈસા પડાવતો હતો. તેણે મહિલાને તેના પતિથી છૂટાછેડા લેવા માટે પણ દબાણ કર્યું હતું. આ અંગે ધ્રાંગધ્રા સિટી પોલીસ મથકે ફરિયાદ નોંધાતા પોલીસે વધુ તપાસ હાથ ધરી છે.

મહેસાણા જિલ્લામાં ઢોર ચોરીના વધતા બનાવોને ધ્યાનમાં રાખીને બાવલું પોલીસે એક આરોપીને ઝડપી પાડ્યો છે. આ આરોપી પાસેથી મણિપુર ગામની સીમમાંથી ચોરાયેલું એક ઘેટું અને તેનું તાજેતરમાં જન્મેલું બચ્ચું મળી આવ્યું છે, જેની કુલ કિંમત રૂ. 10 હજાર આંકવામાં આવી છે. પોલીસે આ ચોરીના ગુનાનો ભેદ ઉકેલી આગળની તપાસ હાથ ધરી છે. ચોરીમાં સામેલ અન્ય ત્રણ આરોપીઓને પોલીસે વોન્ટેડ જાહેર કરી તેમની શોધખોળ શરૂ કરી છે. આ ચોરીમાં કુલ રૂ. 95 હજારના પશુઓની ચોરી થઈ હોવાનું સામે આવ્યું છે.

કડી તાલુકામાં ભેંસોની લેતી-દેતીની જૂની અદાવતના કારણે એક યુવક પર તેની પત્ની અને અઢી વર્ષની પુત્રી સામે જ ચાર શખ્સોએ ધારિયા અને લાકડીઓ વડે જીવલેણ હુમલો કર્યો. આ ઘટનામાં યુવકને ગંભીર ઈજાઓ થતાં તેને સારવાર માટે હોસ્પિટલમાં ખસેડાયો છે. કડી પોલીસે ચારેય આરોપીઓ સામે ગુનો નોંધી તેમની શોધખોળ શરૂ કરી છે. આ હુમલો કલોલ ખાતે રહેતા રમેશભાઈ નારણભાઈ રબારી પર થયો હતો, જેઓ અમદાવાદની કુરિયર કંપનીમાં નોકરી કરે છે.