પઢાર સમુદાય માટે સેવા કેમ્પ: લીંબડી તાલુકાના 4 ગામોમાં 23થી 30 જૂન સુધી આધાર, આયુષ્માન કાર્ડ સહિતની સેવાઓ પૂરી પડાશે
Published on: 15th June, 2025
સુરેન્દ્રનગર જિલ્લાના લીંબડી તાલુકામાં પઢાર સમુદાય માટે વિશેષ સેવા કેમ્પનું આયોજન કરવામાં આવ્યું છે. આ કેમ્પ 23 થી 30 જૂન દરમિયાન યોજાશે. તેમાં આધાર કાર્ડ, આયુષ્માન કાર્ડ, જનધન એકાઉન્ટ, જાતિ પ્રમાણપત્ર અને આરોગ્ય તપાસ જેવી સેવાઓ પૂરી પાડવામાં આવશે. લીંબડી તાલુકાના કુલ આઠ ગામો માં પઢાર સમુદાય વસવાટ કરે છે. જેમાં રાણાગઢ, નાની કઠેચી, આનંદપુર, જસમતપર, રળોલ, ગેડી, પરનાળા અને પરાલીનો સમાવેશ થાય છે. ગ્રામ પંચાયતની ચૂંટણીને કારણે ચાર ગામોમાં આદર્શ આચાર સંહિતા લાગુ હોવાથી ત્યાં કેમ્પનું આયોજન કરવામાં આવ્યું નથી. કેમ્પનું સમયપત્રક નક્કી કરવામાં આવ્યું છે. રળોલ ગામમાં 23 થી 26 જૂન સુધી, ગેડી અને પરનાળામાં 27 અને 28 જૂન તેમજ પરાલી ગામમાં 29 અને 30 જૂન દરમિયાન કેમ્પ યોજાશે. દરેક ગામમાં પ્રાથમિક શાળા ખાતે આ કેમ્પનું આયોજન કરવામાં આવ્યું છે. આ કેમ્પ પ્રધાનમંત્રી જનજાતિ આદિવાસી ન્યાય મહાઅભિયાન (પીએમ જનમન) અંતર્ગત યોજાઈ રહ્યો છે. આ અભિયાન હેઠળ કોલધા, કાથોડી, કોટવાળીયા, પઢાર અને સિદ્દી જેવી આદિમજૂથની જાતિઓને વિકાસની મુખ્ય ધારામાં લાવવાનો પ્રયાસ કરવામાં આવી રહ્યો છે. આ અભિયાન આખું વર્ષ ચાલશે
