ગુજરાત અને દેશ દુનિયાના સમાચાર સંદેશ ન્યૂઝના આ ન્યૂઝ બ્લોગ પર ક્લિક કરીને વાંચી શકશો. 07 JULY ના બ્રેકીંગ ન્યૂઝ વાંચવા માટે આ પેજ પર બનેલા રહો અને રિફ્રેશ કરતા રહો.

આણંદ શહેરના ટૂંકી ગલી વિસ્તારમાં બેસુમાર દબાણો ખડકાતા શહેરનો આ હાર્દ સમો વિસ્તાર દબાણોના પ્રશ્નો ફરી એકવાર ચર્ચામાં આવ્યો છે. ચૂંટણી પૂરી થયા બાદ પણ મનપાનું નવનિયુક્ત તંત્ર દબાણો હટાવવામાં નિષ્ફળ રહ્યું છે. અગાઉ દબાણો દૂર કરાયા હતા, પરંતુ હવે વોટ બેંકની લાલચમાં લારી-પાથરણાંવાળાઓને છૂટો દોર મળ્યો છે. જેના કારણે રસ્તાઓ સાંકડા થવાથી ટ્રાફિક સમસ્યા અને રાહદારીઓને ભારે હાલાકીનો સામનો કરવો પડે છે. ત્રણ દાયકા જૂની આ જટિલ સમસ્યાનો કાયમી ઉકેલ લાવવામાં તંત્ર નિષ્ફળ રહ્યું છે.

વડોદરાના બે મિત્રો, કમલેશભાઈ અને મનેશભાઈ, પોતાની આઈશર ગાડીઓમાં કેળા ભરીને ડીસા જઈ રહ્યા હતા. એક્સપ્રેસ હાઈવે પર પુરપાટ જતી કન્ટેનર પાછળ મનેશભાઈની આઈશર અથડાઈ હતી. અકસ્માત બાદ મનેશભાઈ ગાડીમાં ફસાઈ ગયા હતા અને મદદ માટે બૂમો પાડી રહ્યા હતા. તેમના મિત્ર કમલેશભાઈ અને હાઈવે પેટ્રોલિંગની ટીમે મનેશભાઈને બહાર કાઢવાનો પ્રયાસ કર્યો, પરંતુ તેમને ગંભીર ઈજાઓ થતાં તેમનું મોત નીપજ્યું. પોલીસે ગુનો નોંધી વધુ તપાસ હાથ ધરી છે.

પોશીના પંથકમાં લાંબા વિરામ બાદ મેઘરાજાની ધમાકેદાર એન્ટ્રી થતાં સ્થાનિકોને અસહ્ય ઉકળાટ અને બફારામાંથી મોટી રાહત મળી છે. પોશીના મુખ્ય મથક સહિત લાંબડીયા, કોટડા અને દેલવાડા જેવા ગ્રામ્ય વિસ્તારોમાં પવન સાથે ધોધમાર વરસાદ ખાબક્યો હતો. મુખ્ય બજારમાં નદી જેવી સ્થિતિ સર્જાઈ હતી અને રસ્તાઓ પાણીમાં ગરકાવ થઈ ગયા હતા. લાંબા સમયથી વરસાદની રાહ જોઈ રહેલા ધરતીપુત્રોમાં વાવણી લાયક વરસાદથી ભારે હરખ અને આનંદ જોવા મળી રહ્યો છે, જેના કારણે ખુશીની લહેર દોડી ગઈ છે.

સાબરકાંઠા જિલ્લામાં મોડેથી શરૂ થયેલા વરસાદથી આગોતર વાવેતર કરાયેલ મગફળી, કપાસને ખૂબ ફાયદો થયો છે. પોશીના તાલુકામાં દોઢ ઇંચથી વધુ વરસાદ પડતાં ખેડૂતોને વાવણી માટે અનુકૂળતા રહેશે. હિંમતનગર, વડાલી, તલોદ અને પ્રાંતિજ સહિતના વિસ્તારોમાં પણ ઝાપટાં પડ્યા હતા, જોકે બાફ અને ઉકળાટમાં ખાસ ઘટાડો થયો નથી. તલોદમાં 1 ઇંચથી વધુ અને પ્રાંતિજમાં અડધો ઇંચ વરસાદ નોંધાયો હતો. જિલ્લામાં વધુ વરસાદની શક્યતા નકારી શકાતી નથી.

સુરેન્દ્રનગરના ધ્રાંગધ્રા તાલુકાના કોંઢ ગામમાંથી પસાર થતી વીજલાઇન સામે ખેડૂતોએ યોગ્ય વળતરની માંગણી કરી હતી. સરકાર દ્વારા માર્કેટ ભાવ પ્રમાણે વળતરની જાહેરાત બાદ પણ, ખેડૂતોએ રાજસ્થાન પોલીસી મુજબ 400% વળતર અને ટાવર માટે ચોરસ મીટર દીઠ નક્કી થયેલા ભાવના 30% વળતરની માંગ સાથે ડેપ્યુટી કલેક્ટરને આવેદનપત્ર સુપરત કર્યું છે. આ મુદ્દે સરકારની આગામી કાર્યવાહી પર સૌની નજર રહેશે.

સુરેન્દ્રનગરના લીંબડી તાલુકામાં આવેલ મોટી કઠેચી ગામમાં પીવાના પાણીની સમસ્યાનો ઉકેલ લાવવા ગ્રામજનોએ જાતે જહેમત ઉઠાવી છે. ગામની 2 હજારથી વધુની વસ્તી માટે વિઠ્ઠલગઢથી પાણી સમ્પમાં ઠલવાય છે. પરંતુ પાણી પુરવઠા વિભાગના વાસ્મો યુનીટ દ્વારા કરાયેલા ઝોનિંગના કારણે ભરવાડવાસ વિસ્તારમાં પૂરતું પાણી પહોંચતું ન હતું. આ સમસ્યાના નિરાકરણ માટે ગામના સામાજિક આગેવાન ખલીલભાઈ સમાના પ્રયાસોથી 30થી વધુ પરિવારોએ 100, 200 અને 500 રૂપિયાનો લોકફાળો આપી 50 હજારના ખર્ચે 600 ફુટ લાંબી PVC પાઈપ લાઈન નાખીને પાણીની સમસ્યા હલ કરી છે.

સુરેન્દ્રનગર LCB PI બી.એચ.શીંગરખીયાની સૂચના બાદ, LCB ટીમે દસાડાના આદરીયાણા ગામમાં જુગાર રમતા 9 શખ્સોને 44,500 રોકડા, 8 મોબાઈલ અને 7 બાઈક, આમ કુલ 2.20 લાખનો મુદ્દામાલ સાથે ઝડપી પાડ્યા. જોકે, 6 આરોપી ફરાર થવામાં સફળ રહ્યા. આ ઉપરાંત, સાયલાના સુદામડા ગામે પણ LCBએ જુગાર પર રેડ કરી, 2 આરોપીઓને 1410 રૂપિયા રોકડા સાથે ઝડપી લીધા, જ્યારે એક ફરાર થઈ ગયો. બંને કિસ્સાઓમાં પોલીસે ગુનો નોંધી વધુ તપાસ હાથ ધરી છે.

BAPS સંસ્થા દ્વારા પ.પૂ. મહંત સ્વામી મહારાજ રચિત ગ્રંથ સત્સંગ દીક્ષાના 315 સંસ્કૃત શ્લોકોનો એકસાથે મુખપાઠ કરીને અનોખો વિશ્વવિક્રમ સર્જાયો, જેની નોંધ ગિનિસ બુક ઓફ્ વર્લ્ડ રેકોર્ડમાં લેવાઈ છે. આ વિશ્વવિક્રમમાં વડોદરા જિલ્લાના ગ્રામ્ય વિસ્તારના 759થી વધુ બાળ-બાલિકાઓએ પણ ભાગ લીધો. ચાણસદ ખાતે યોજાયેલા વિશેષ સન્માન સમારોહમાં આ તમામ બાળ-બાલિકાઓને ગિનિસ બુક ઓફ્ વર્લ્ડ રેકોર્ડના પ્રમાણપત્રો એનાયત કરી સન્માનિત કરાયા. આ સિદ્ધિ ભારતીય સંસ્કૃતિ અને સંસ્કારનું જીવંત ઉદાહરણ છે.

લોકસભા સ્પીકર ઓમ બિરલા આગામી ચોમાસુ સત્ર પહેલાં તૃણમૂલ કોંગ્રેસ (TMC) અને શિવસેના (UBT) ના બળવાખોર કેસ પર અંતિમ નિર્ણય લેવા સજ્જ છે. બંને પક્ષોએ તેમના બળવાખોર સાંસદોને પક્ષપલટા વિરોધી કાયદા હેઠળ ગેરલાયક ઠેરવવા માંગ કરી છે. સ્પીકરે બંને પક્ષોના પ્રતિનિધિમંડળો અને અલગ થયેલા જૂથોના મંતવ્યો સાંભળ્યા છે. નિષ્ણાત ટીમ સમાન કેસોના અગાઉના નિર્ણયોનો અભ્યાસ કરી રહી છે, જેથી 20 જુલાઈ પહેલા કાયદેસર નિર્ણય જાહેર થઈ શકે. DMK એ પણ અલગ બેઠક વ્યવસ્થા માંગી છે.

પ. પૂ. ગુરુજી સ્વામી તેજોમયાનંદજીના જન્મદિવસ નિમિત્તે શહેરના ચિન્મય સાધના આશ્રમ ખાતે શ્રી ગુરુ ચરણોમાં વિશ્રામ ભજન સંધ્યા યોજાઈ હતી. ભજન મંડળીએ ભાવપૂર્ણ ભક્તિ ગીતોથી સમગ્ર વાતાવરણમાં શાંતિ, ભક્તિ અને કૃતજ્ઞતાનો માહોલ સર્જાયો હતો. સ્વામી દેવેશાનંદજી આશીર્વચન આપ્યા હતા. તેમણે સૌને સામૂહિક ભજન અને સત્સંગ દ્વારા પોતાની આધ્યાત્મિક સાધનાને વધુ ઊંડી કરવા પ્રોત્સાહિત કર્યા હતા. કાર્યક્રમનું સમાપન દિવ્ય મહાઆરતી સાથે થયું હતું.

મધ્યપ્રદેશના ધાર જિલ્લામાં સ્થિત માંડુ, 'સિટી ઓફ જોય' તરીકે જાણીતું છે, જે વિંધ્યાચલ પર્વત પર વસેલું છે. બાજ બહાદુર અને રાણી રૂપમતીના પ્રેમની ગાથા સાથે જોડાયેલું આ શહેર, જેનું જૂનું નામ 'શાદિયાબાદ' એટલે કે ખુશીઓનું નગર હતું, તે તેની અદ્ભુત વાસ્તુકલા અને 12 પ્રવેશદ્વારો માટે પ્રખ્યાત છે. 82 કિલોમીટરના વિશાળ વિસ્તારમાં ફેલાયેલો માંડુનો કિલ્લો, જેને 'અભેદ ગઢ' પણ કહેવાય છે, તે ભારતના સૌથી મોટા કિલ્લાઓમાંનો એક છે. રાણી રૂપમતીનો મહેલ, બાજ બહાદુર મહેલ, હિંડોળા મહેલ, જહાજ મહેલ અને જામા મસ્જિદ જેવી અનેક ઐતિહાસિક ઇમારતો પ્રવાસીઓને આકર્ષે છે.

ભારતીય રમતગમતના ઇતિહાસમાં, વાસુદેવન ભાસ્કરન એક એવું નામ છે જે 1980 મોસ્કો ઓલિમ્પિકમાં ભારતીય હોકી ટીમને છેલ્લો ગોલ્ડ મેડલ અપાવવા માટે જાણીતું છે. તેઓ માત્ર એક ઉત્કૃષ્ટ ખેલાડી જ નહીં, પરંતુ એક પ્રેરણાદાયી કેપ્ટન અને કુશળ કોચ પણ હતા. તમિલનાડુમાં જન્મેલા ભાસ્કરને નાનપણથી જ હોકીમાં રસ દાખવ્યો. ડિફેન્ડર તરીકે શરૂઆત કરીને, તેમની ઝડપ અને પાસિંગ ક્ષમતાને કારણે તેઓ રાષ્ટ્રીય સ્તરે ચમક્યા. 1980 માં, તેમણે ટીમને ફ્રન્ટ લાઈનથી લીડ કરી, રોમાંચક ફાઇનલમાં સ્પેનને હરાવી ગોલ્ડ મેડલ જીત્યો.

વિશ્વમાં તંગદીલી વચ્ચે, ભારત અને જાપાને શાંતિ અને સમૃદ્ધિ માટે દ્વિપક્ષીય ભાગીદારી મજબૂત કરવાનો સંકલ્પ કર્યો છે. જાપાનના PM તાકાઈચી અને ભારતના PM વચ્ચે થયેલી મંત્રણા બાદ 6 ક્ષેત્રોમાં મહત્વના કરાર થયા છે. આર્થિક સુરક્ષા, સપ્લાય ચેન, AI, સેમિકન્ડક્ટર, બાયોગેસ અને ક્રિટિકલ ટેકનોલોજીમાં સહયોગ વધારવા પર ભાર મૂકાયો છે. સંયુક્ત રક્ષા વિકાસ યોજના અને નેવલ રેડિયો એન્ટેના યુનિકોર્ન વિકસાવવા પર પણ સંમતિ થઈ છે. આ કરારો બંને દેશોની સુરક્ષા અને આર્થિક વિકાસ માટે અત્યંત મહત્વપૂર્ણ છે.

ભારતની AI નીતિ માત્ર ટેક્નોલોજી સુધી સીમિત નથી, પરંતુ શિક્ષણ, આરોગ્ય, કૃષિ જેવા ક્ષેત્રોમાં માનવકેન્દ્રિત વિકાસ પર ભાર મૂકે છે. રાષ્ટ્રીય શિક્ષણ નીતિ 2020, India AI Mission દ્વારા આ વિચારને વધુ મજબૂત બનાવાય છે. AI નો ઉપયોગ જીવનની ગુણવત્તા સુધારવા, જ્ઞાન સર્જન, નવીનતા અને કુશળ માનવબળના નિર્માણ માટે થશે. પારદર્શિતા, જવાબદારી અને માનવ અધિકારોને પ્રાધાન્ય આપી, ભારત વિશ્વને જવાબદાર AI નો માર્ગ બતાવશે.

ભારતમાં નવી શિક્ષણ નીતિ (NEP) કાગળ પર પ્રગતિશીલ અને કૌશલ્ય-આધારિત લાગે છે, જે ગોખણપટ્ટીની પરંપરાને બદલવા માંગે છે. જોકે, જમીની વાસ્તવિકતામાં અમલદારશાહીની જડ માનસિકતા, શિક્ષકોની તાલીમનો અભાવ, અને ભૌતિક માળખાની કમી જેવા અનેક અવરોધો છે. આ નીતિના સફળ અમલીકરણ માટે સરકારી તંત્ર, શિક્ષકો અને સમાજની જૂની વિચારધારામાં પરિવર્તન આવશ્યક છે.

સ્વામિનારાયણ મંદિર ધોળકા(મુખ્ય)માં પવિત્ર જેઠ સુદ પૂનમના દિવસે 200 વર્ષ ત્યોહાર અનુલક્ષી મોરલી મનોહર દેવ ત્થા સ્થાપિત દેવોને 251 કિલો ઘારીનો અન્નકૂટ ધરાવવામાં આવ્યો હતો. આ પ્રસંગે મંદિરના મહંતસ્વામી સત્યસંકલ્પદાસજીના સંકલ્પથી જરૂરિયાતમંદ 200 બાળકોને સ્કૂલ બેગનુ વિતરણ કરાયું હતું.

મહારાષ્ટ્રમાં સહ્યાદ્રિ પર્વતમાળામાં આવેલું ખંડાલા, મુંબઈ અને પૂણે નજીકનું લોકપ્રિય હિલસ્ટેશન છે. 550 મીટરની ઊંચાઈ પર સ્થિત આ સ્થળ તેની હરિયાળી ખીણો અને ધુમ્મસભર્યા પહાડો માટે જાણીતું છે. બોલિવૂડ ગીતોથી પ્રખ્યાત થયેલું ખંડાલા, ટાઇગર લીપ, ડ્યુક્સ નોઝ, ભુશી ડેમ, કાર્લા-ભાજા ગુફાઓ અને લોહગઢ કિલ્લો જેવા આકર્ષણો ધરાવે છે. ચોમાસામાં અહીં ધોધ અને લીલાછમ પહાડોનો નજારો અદ્ભુત હોય છે. પ્રવાસીઓ અહીંની મગફળીની ચીકી, વડાપાંઉ અને ભજિયાંનો સ્વાદ માણવાનું ચૂકતા નથી.

દિલ્હીના જંતર-મંતર પર NEET સહિતની પરીક્ષાઓમાં ગેરરીતિના વિરોધમાં CJPનું આંદોલન 11મા દિવસે પણ ચાલુ છે. ભૂખ હડતાલ પર રહેલા સોનમ વાંગચુકની તબિયત લથડતાં ચિંતા વધી છે. ભાજપના એક નેતાએ પ્રદર્શનકારીઓને 'વાયરસ' કહ્યા બાદ વિવાદ સર્જાયો છે, જ્યારે CJPએ સરકાર પર વિદ્યાર્થીઓના પ્રશ્નોની અવગણનાનો આરોપ લગાવ્યો છે. પેપર લીકના મુદ્દે દેશવ્યાપી લડત ચાલુ રાખવાની અપીલ સાથે ભારે પોલીસ બંદોબસ્ત છતાં પ્રદર્શનકારીઓ અડગ રહ્યા છે.

તાપી જિલ્લાના વ્યારા, ડોલવણ, ઉચ્છલ, નિઝર, કુકરમુંડા તાલુકામાં સોમવારે સૌભાગ્યવતી મહિલાઓએ વટ સાવિત્રીના પાવન પર્વની ઉજવણી કરી હતી. વ્યારા નર્મદેશ્વર મહાદેવ મંદિર તેમજ જુદાજુદા વિસ્તારોમાં સૌભાગ્યવતી મહિલાઓ દ્ધારા વડની પૂજા-અર્ચના કરી પતિના સારા સ્વાસ્થ્ય અને લાંબા આયુષ્યની પ્રાર્થના કરી હતી. છેવાડાના તાલુકાઓ નિઝર, ઉચ્છલ અને કુકરમુંડા તાલુકાઓના ગામોમાં વટસાવિત્રી પૂનમ નિમિત્તે મહિલાઓએ વ્રત રાખી પતિદેવોના લાંબા આયુષ્યની પ્રાર્થના કરી હતી.

દર વર્ષે 29 જૂને પ્રખ્યાત આંકડાશાસ્ત્રી (સ્વ.) પ્રો. પ્રશાંત ચંદ્ર મહાલનોબિસની જન્મજયંતિ નિમિત્તે National Statistics Day ઉજવવામાં આવે છે. ભારતીય આંકડાશાસ્ત્રના પિતા તરીકે જાણીતા પ્રો. મહાલનોબિસના અસાધારણ યોગદાનને યાદ કરવા અને નીતિ-નિર્માણ તથા રોજિંદા જીવનમાં આંકડાશાસ્ત્રના મહત્વને ઉજાગર કરવા આ દિવસ ઉજવાય છે. તેમના નવીન ગાણિતિક ખ્યાલો, Mahalanobis distance, મોટા પાયે સર્વેક્ષણો અને ભારતીય આંકડાકીય સંસ્થા (ISI) જેવી સંસ્થાઓની સ્થાપનાએ દેશના આંકડાકીય માળખાને મજબૂત બનાવ્યું છે. આ ઉજવણી અસરકારક શાસન માટે સચોટ ડેટાના મહત્વ પર ભાર મૂકે છે.

ભારતીય ઉડ્ડયન ક્ષેત્ર ઝડપી વિકાસ કરી રહ્યું છે, જેમાં ૧,૦૦૦થી વધુ નવા વિમાનો અને 'ઉડાન' યોજના હેઠળ ૨૦૦થી વધુ એરપોર્ટ વિકાસનો સમાવેશ થાય છે. ૨૦૨૮ સુધીમાં ૧.૫ લાખથી વધુ નવી નોકરીઓની અપેક્ષા છે, જેના કારણે ઉડ્ડયન શિક્ષણમાં વિદ્યાર્થીઓનો રસ વધી રહ્યો છે. શૈક્ષણિક સંસ્થાઓ પરંપરાગત અભ્યાસક્રમોની સાથે ઉદ્યોગલક્ષી અને કૌશલ્ય આધારિત કોર્સ શરૂ કરી રહી છે. સાયન્સ ઉપરાંત કોમર્સ અને આર્ટ્સના વિદ્યાર્થીઓ માટે પણ એવિએશન મેનેજમેન્ટ, એરપોર્ટ ઓપરેશન્સ જેવા વિશેષ અભ્યાસક્રમો ઉપલબ્ધ છે. ગુજરાતમાં અમદાવાદ, વડોદરા અને વાપી જેવા શહેરોમાં તાલીમ સંસ્થાઓ કાર્યરત છે.

ગઈ કાલે(૨૯ જૂને) સમગ્ર રાજ્યમાં અખંડ સૌભાગ્યની કામના સાથે વટ સાવિત્રી વ્રતની પરંપરાગત અને હર્ષોલ્લાસ સાથે ઉજવણી કરવામાં આવી હતી. પરિણીત મહિલાઓએ પોતાના પતિના દીર્ઘાયુ અને સુખ-સમૃદ્ધિ માટે આખો દિવસ ઉપવાસ રાખ્યો હતો. સવારથી જ વડ પૂજન માટે વહેલી સવારથી જ મંદિરો અને સોસાયટીઓમાં મહિલાઓની ભારે ભીડ જોવા મળી હતી.

અયોધ્યામાં રામ મંદિરના પ્રસાદ ચોરી કેસમાં અયોધ્યાના વકીલોએ એક મહત્વનો નિર્ણય લીધો છે. ફૈઝાબાદ બાર એસોસિએશન દ્વારા યોજાયેલી બેઠકમાં નક્કી થયું કે પ્રસાદ ચોરીના આરોપીઓનું પ્રતિનિધિત્વ કોઈ પણ વકીલ કરશે નહીં. આ કેસમાં કુલ આઠ લોકોને આરોપી બનાવવામાં આવ્યા છે, જેઓ હાલ પોલીસ કસ્ટડીમાં છે. SIT તેમની પૂછપરછ અને તપાસ કરી રહી છે, જેમાં તેમના ઘરોમાંથી મોટી રકમ મળી આવી છે.

પોરબંદરથી મુંબઈ, અમદાવાદ અને કેશોદની ફ્લાઈટ સેવા પુનઃ શરૂ થતાં મુસાફરોમાં ખુશીની લહેર છે. દોઢ મહિના બાદ બંધ થયેલી આ સેવા ફરી શરૂ કરવા માટે અનેક રજૂઆતો બાદ એલાયન્સ એર દ્વારા આ મહત્વપૂર્ણ રૂટ પર નવી હવાઈ સેવા શરૂ કરવામાં આવી છે. આ નવી સેવા પોરબંદરને મુંબઈ અને અમદાવાદ જેવા મોટા શહેરો સાથે સીધી અને વધુ સુવિધાજનક કનેક્ટિવિટી પૂરી પાડશે. વન અને પર્યાવરણ મંત્રી અર્જુનભાઈ મોઢવાડિયા સહિતના મહાનુભાવોની ઉપસ્થિતિમાં પ્રથમ ફ્લાઈટનું ઉષ્માભર્યું સ્વાગત કરાયું.

વડોદરાના વાઘોડિયા નગર સહિત તાલુકામાં વિવિધ કલાત્મક તાજિયાના જુલૂસ નીકળ્યાં હતા. આ જુલૂસોમા આગળ અંગ કસરત અને કવાલીઓની ટુકડીઓ સાથે ઢોલ નગારા સાથે યા હુસેન યા હુસેનના ગગનભેદી સૂત્રોથી વાતાવરણ ગુંજી ઉઠયું હતું. આ વિસર્જનયાત્રા શાંતિથી કોમી એખલાસના વાતાવરણમાં સંપન્ન થઈ હતી. 

બાયડ ગાયત્રી શક્તિપીઠ ખાતે ગાયત્રી જયંતી અને ગંગા દશેરાની ઉજવણી કરવામાં આવી હતી. જેમાં ગાયત્રી મહામંત્રના જાપ, ધ્યાન અને પંચ કુંડી મહાયજ્ઞનું આયોજન કરાયું હતું. જ્યારે રાત્રિના સમયે દીપ યજ્ઞ સાથે સવા કરોડ ગાયત્રી ચાલીસા અનુષ્ઠાનની પૂર્ણાહુતિ કરવામાં આવી હતી.

મુસ્લીમ સમાજના તહેવાર તરીકે ઓળખાતા મહોરમ નિમિત્તે શુક્રવારે હિંમતનગર સહિત ઈડર અને અન્ય સ્થળે જુલુસ અંતર્ગત તાજીયા કાઢવામાં આવ્યા હતા જે મુજબ હિંમતનગરના છાપરીયા, હાજીપુરા સહિત અન્ય મુસ્લીમ વિસ્તારોમાં નિકળેલુ જુલુસ શાંતિપૂર્ણ રીતે સંપન્ન થયું હતું. દરમિયાન જિલ્લા કલેકટર અને પોલીસવડાએ રૂબરૂ મુલાકાત લીધી હતી.

ગોધરા શહેરમાં મુસ્લિમ બિરાદારો દ્વારા મોહરમ પર્વની ધામધૂમથી ઉજવણી કરવામાં આવી. 'નો જવાન હુસેની કમિટી' અને એકતા હુસેની કમિટી દ્વારા કલાત્મક રીતે શણગારવામાં આવેલા તાજીયાનું જુલુસ પોલીસ બંદોબસ્ત વચ્ચે મોડી સાંજે નીકળ્યું. 'યા હુસેન'ના નારા સાથે વાતાવરણ ગુંજી ઉઠ્યું. છકડાવાડ, ખાડી ફળિયા, સૈયદવાડા જેવા વિસ્તારોમાં અનેરો ઉત્સાહ જોવા મળ્યો. શાંતિપૂર્ણ ઉજવણી બાદ રાત્રે તાજીયાને રામસાગર તળાવમાં ઠંડા કરવામાં આવ્યા.

શહેરા નગર અને તાલુકા પંથકમાં મુસ્લિમ બિરાદરો દ્વારા મોહરમ પર્વની અદમ્ય આસ્થા અને શાંતિપૂર્ણ માહોલમાં ઉજવણી કરવામાં આવી. નગરમાં પરંપરાગત રીતે નીકળેલા ભવ્ય જુલુસમાં 'યા હુસેન... યા હુસેન...' ના ગગનભેદી નારા ગુંજી ઉઠ્યા હતા. આ વર્ષે ૧૦ થી વધુ કલાત્મક તાજિયાઓ તૈયાર કરાયા હતા. હિન્દુ-મુસ્લિમ સમાજના અગ્રણીઓની ઉપસ્થિતિમાં કોમી એકતાના માહોલમાં તાજિયાઓની સ્થાપના થઈ. વિશેષ નમાઝ બાદ તાજિયાઓનું ભવ્ય જુલુસ કાઢવામાં આવ્યું.