રાજ્યમાં મેઘરાજાની ધમાકેદાર એન્ટ્રી થઈ છે, ખાસ કરીને સૌરાષ્ટ્ર અને દક્ષિણ ગુજરાતના વિસ્તારોમાં ધોધમાર વરસાદ પડી રહ્યો છે. હવામાન વિભાગે આગામી 6 દિવસ રાજ્યમાં ભારેથી અતિભારે વરસાદની આગાહી કરી છે. 7 જુલાઈ સુધી સૌરાષ્ટ્ર અને દક્ષિણ ગુજરાતના 15 જેટલાં જિલ્લામાં ગાજવીજ અને પવન સાથે ભારે વરસાદનું એલર્ટ જાહેર કર્યું છે. 2 જુલાઈના રોજ સુરત, નવસારી, ડાંગ અને વલસાડમાં રેડ એલર્ટ, જ્યારે અમરેલી, ભાવનગર, ભરૂચ, નર્મદા, તાપીમાં ઓરેન્જ એલર્ટ રહેશે.

અમદાવાદ મ્યુનિસિપલ કોર્પોરેશને જૂન મહિનામાં 709 ખાદ્ય પદાર્થોના નમૂના તપાસતાં 46 નમૂના અસુરક્ષિત અથવા હલકી ગુણવત્તાના હોવાનું બહાર આવ્યું છે. બે કેસમાં કોર્ટ કાર્યવાહી અને 44 કેસમાં કાયદેસરની કાર્યવાહી થશે. શહેરમાં 1,877 ખાદ્ય એકમોની તપાસ દરમિયાન 545ને નોટિસ ફટકારાઈ, 2,748 કિલો અને 1,269 લીટર બિનઆરોગ્યપ્રદ ખાદ્ય જથ્થો નાશ કરાયો તેમજ ₹10.29 લાખનો દંડ વસૂલાયો. ગંદકી અને જીવાત મળતાં ચાર એકમોને સીલ કરવામાં આવ્યા.

પુણેના ઉદ્યોગપતિ કેતન અગ્રવાલના લોહગઢ કિલ્લા પરથી પડવાથી થયેલા મોતને પોલીસે કાવતરાપૂર્વકની હત્યા ગણાવી છે. તપાસમાં સામે આવ્યું કે મંગેતર સિયા ગોયલ અને તેના કથિત પ્રેમી ચેતન ચૌધરીએ મળીને હત્યાની યોજના બનાવી હતી. બંને વચ્ચે હત્યા પહેલાં 2,004 કોલ અને 238 કલાક વાતચીત થઈ હતી તેમજ ઓનલાઈન હત્યાની રીતો પણ શોધી હતી. પોલીસે ડિજિટલ પુરાવા, ડિલીટ કરેલી ચેટ્સ અને ક્રાઈમ સીનના આધારે તપાસ તેજ કરી છે.

'કાલા હિરણ' ફિલ્મ વિવાદ અંગે દિલ્હી હાઈકોર્ટમાં થયેલી સુનાવણીમાં સલમાન ખાનના 'પર્સનાલિટી રાઈટ્સ' ના ઉલ્લંઘનનો મામલો ચર્ચામાં આવ્યો. કોર્ટે ફિલ્મ મેકર્સ પાસેથી સોમવાર સુધી ફિલ્મ રિલીઝ ન કરવાની અને સેન્સર બોર્ડ (CBFC) પાસે સર્ટિફિકેશન માટે ન મોકલવાની ખાતરી લીધી. મેકર્સના વકીલે દલીલ કરી કે કેસ માત્ર એક પોસ્ટરના આધારે કરાયો છે, જ્યારે ફિલ્મ રિલીઝથી દૂર છે. કોર્ટે બંને પક્ષોની દલીલો સાંભળીને આગામી સુનાવણી સોમવાર પર મુલતવી રાખી.

બેંગલુરુના એક જાણીતા IT પાર્કના ડે-કેર સેન્ટરમાં માસૂમ બાળકો પર અમાનવીય અત્યાચારનો ચોંકાવનારો કિસ્સો સામે આવ્યો છે. સ્ટાફ બાળકોને સજા તરીકે વૉશિંગ મશીનમાં મૂકી ચાલુ કરતો અને અંધારા બાથરૂમમાં બંધ રાખતો હોવાના આક્ષેપો થયા છે. બાળકોના વર્તનમાં બદલાવ અને ઈજાના નિશાન બાદ CCTV ફૂટેજમાં સમગ્ર ઘટના સામે આવી હતી. વાલીઓની ફરિયાદને આધારે પોલીસે પાંચ આયાની ધરપકડ કરી વધુ તપાસ શરૂ કરી છે.

અયોધ્યાના રામ મંદિરમાં ચડાવા અને ચંદાની ચોરીના મામલે પોલીસ અને SITની ટીમે આરોપીઓના ઘરે દરોડા પાડ્યા હતા. આ કાર્યવાહીમાં લાખો રૂપિયાની રોકડ, અમેરિકી ડૉલર, સોના-ચાંદીના દાગીના અને કિંમતી ધાતુ મળી આવી છે. વિવિધ આરોપીઓ પાસેથી કુલ 20,39,220 રૂપિયાથી લઈને 1,00,000 રૂપિયા સુધીની રોકડ રિકવર થઈ છે, સાથે જ વિદેશી કરન્સી અને ચાંદીની ધાતુ પણ જપ્ત કરાઈ છે. આ વિવાદ વચ્ચે શ્રી રામ જન્મભૂમિ તીર્થ ક્ષેત્ર ટ્રસ્ટની આગામી 6 જુલાઈએ બેઠક યોજાશે, જેમાં સંભવિત રાજીનામા અંગે નિર્ણય લેવાશે.

અમદાવાદમાં ED અને CBI જેવી કેન્દ્રીય એજન્સીઓમાં 'સેટિંગ' કરાવી આપવાના બહાને કરોડો રૂપિયા પડાવનાર મહાઠગ પિયુષકુમાર ઉર્ફે સુનિલ પટેલની ક્રાઈમ બ્રાન્ચ દ્વારા ધરપકડ કરાઈ. આરોપીએ ED દ્વારા જપ્ત કરાયેલા રૂપિયા 11.90 કરોડ છોડાવવાની લાલચ આપી ફરિયાદી પાસેથી 3.98 કરોડ પડાવી લીધા. નાણાં સગેવગે કરવા 3.32 કરોડનો બોગસ લોન કરાર કર્યો. દેશ છોડી વનુઆતુ નાગરિકત્વ મેળવ્યું, ત્યારબાદ OCI કાર્ડ ધારક તરીકે ભારતમાં રહ્યો. તેનો મોટો ક્રિમિનલ ટ્રેક રેકોર્ડ છે, અને અનેક રાજ્યોમાં છેતરપિંડીના ગુના નોંધાયેલા છે.

WhatsApp દ્વારા નવા Username ફીચરને કારણે સુરક્ષાના પ્રશ્નો ઊભા થયા છે. મોબાઈલ નંબર વગર વાત કરવાની સુવિધા પ્રાઈવસી વધારશે તેવો દાવો હોવા છતાં, કેન્દ્ર સરકાર આ ફીચરની તપાસ કરી રહી છે. સરકારને ચિંતા છે કે આનાથી ઓનલાઈન ફ્રોડ અને ફેક આઈડીના કેસ વધી શકે છે, જે સાયબર ગુનેગારો માટે ફાયદાકારક બની શકે છે. મેટાને નોટિસ પણ મોકલી શકાય છે જો કોઈ ગંભીર ખામી જણાય. આ ફીચર ટેલિગ્રામ જેવું જ કામ કરશે.

વડોદરાના ફતેગંજ બ્રિજ પર ટ્રાફિક જામ દરમિયાન એક વિચિત્ર અકસ્માત થયો, જેમાં ઓછામાં ઓછા ચાર વાહનોને ભારે નુકસાન થયું. અમદાવાદથી માલેગાવ જતી મહારાષ્ટ્ર પાસિંગની બસના ચાલક દ્વારા બ્રેક નિષ્ફળ જતાં બેકાબુ બસ પહેલા એક કારમાં અથડાઈ, જેના કારણે કારનો કચ્ચરઘાણ વળી ગયો અને એરબેગ્સ ખુલી ગઈ. ત્યારબાદ બસ બીજી કાર, એક ટેમ્પો અને અન્ય વાહનો સાથે અથડાઈ. આ ઘટનાને પગલે ફરી ટ્રાફિક જામ થયો અને પોલીસે કાર્યવાહી હાથ ધરી.

વડોદરા મ્યુનિસિપલ કોર્પોરેશનની ઈલેક્ટ્રિક બસ સેવામાં ડ્રાઇવરની બેદરકારીનો વીડિયો વાયરલ થતાં વિવાદ સર્જાયો છે. વીડિયોમાં ડ્રાઇવર બસ ચલાવતી વખતે સ્ટિયરિંગ પર ધ્યાન આપવાને બદલે મોબાઈલમાં રીલ બનાવતો જોવા મળે છે, જેના કારણે મુસાફરોની સુરક્ષા અંગે ગંભીર સવાલો ઊભા થયા છે. સોશિયલ મીડિયામાં વીડિયો વાયરલ થતાં જાહેર પરિવહન તંત્રની કામગીરી પર પણ પ્રશ્નો ઉઠ્યા છે. નિષ્ણાતોનું માનવું છે કે વાહન ચલાવતી વખતે મોબાઈલનો ઉપયોગ જીવલેણ અકસ્માતનું કારણ બની શકે છે.

વેનેઝુએલામાં મર્ચન્ટ નેવી જહાજ પર ફરજ બજાવતા ઉત્તર પ્રદેશના રાકેશ ચૌહાન નામના ભારતીય નાવિકના મૃતદેહના પોસ્ટમોર્ટમ દરમિયાન આઘાતજનક ખુલાસો થયો છે. જ્યારે મૃતદેહ ભારત લાવવામાં આવ્યો, ત્યારે શરીરમાંથી મગજ, હૃદય, ફેફસા, લીવર, કિડની જેવા અનેક મુખ્ય આંતરિક અંગો ગાયબ મળી આવ્યા. પરિવારને શરૂઆતમાં નોકરી કરતી કંપની દ્વારા અલગ-અલગ કારણો જણાવી ગેરમાર્ગે દોરવામાં આવ્યા હતા. અંગો ગુમ હોવાથી મૃત્યુનું સાચું કારણ જાણવું મુશ્કેલ બન્યું છે. પરિવારે આ સમગ્ર ઘટનામાં અંગ તસ્કરીની આશંકા વ્યક્ત કરી છે અને સવાલો ઉઠાવ્યા છે.

ગુજરાત સરકાર દ્વારા યુનિયન પબ્લિક સર્વિસ કમિશન (UPSC)ની સિવિલ સર્વિસ પરીક્ષાની તૈયારી કરતા વિદ્યાર્થીઓ માટે મહત્વનો નિર્ણય લેવામાં આવ્યો છે. સરદાર પટેલ લોક પ્રશાસન સંસ્થા (SPIPA) અને તેના પ્રાદેશિક તાલીમ કેન્દ્રોમાં અભ્યાસ કરતા ઉમેદવારો માટે સ્ટાઈપેન્ડ તેમજ પરીક્ષાના વિવિધ તબક્કે મળતી પ્રોત્સાહન સહાયમાં વધારો કરાયો છે. આ યોજના હેઠળ, પ્રિલિમ પરીક્ષા પાસ કરનાર યુવકોને ₹35,000 અને યુવતીઓને ₹50,000, મુખ્ય પરીક્ષા પાસ કરનારને યુવકોને ₹45,000 અને યુવતીઓને ₹55,000, જ્યારે અંતિમ પસંદગીમાં સ્થાન મેળવનાર યુવકોને ₹75,000 અને યુવતીઓને ₹1 લાખ સુધીની સહાય આપવામાં આવશે.

અયોધ્યા રામ મંદિરના દાનમાં થયેલી કથિત ગેરરીતિની તપાસમાં પૂર્વ ટ્રસ્ટી અનિલ મિશ્રાની મુશ્કેલીઓ વધી છે. SITને શંકા છે કે તેમની ભલામણથી ભરતી થયેલા 125થી વધુ કર્મચારીઓની નિમણૂકમાં પણ ગેરરીતિ અને કમિશન લેવાયું હોઈ શકે છે. પોલીસે અત્યાર સુધી 8 આરોપીઓની ધરપકડ કરી છે. તપાસમાં CCTVથી બચીને દાનની રકમ બાથરૂમ મારફતે બહાર કાઢવાની પદ્ધતિ સામે આવી છે. અનિલ મિશ્રાની સંપત્તિ અને સમગ્ર ભરતી પ્રક્રિયાની પણ તપાસ ચાલી રહી છે.

વડોદરા કોર્પોરેશન દ્વારા કરાર મંજૂરીમાં થયેલા વિલંબના કારણે સીટી બસ સેવા અચાનક ઠપ્પ થતાં હજ્જારો મુસાફરો, વિદ્યાર્થીઓ અને નોકરિયાત વર્ગને ભારે હાલાકીનો સામનો કરવો પડ્યો હતો. લગભગ 160 બસો બંધ રહેતાં તંત્રના સંકલનના અભાવ પર સવાલો ઉઠ્યા હતા. પરિસ્થિતિની ગંભીરતાને ધ્યાનમાં રાખી, કોર્પોરેશને વિનાયક લોજિસ્ટિક્સના કરારમાં ત્રણ મહિનાનું એક્સટેન્શન આપતાં બસ સેવા ફરી શરૂ કરવામાં આવી છે. હવે કુલ 190 બસો દોડશે.

સુરત નાસીર નગર ડિમોલિશન કેસમાં સુરત મહાનગરપાલિકા (SMC) દ્વારા મોટી કાર્યવાહી કરવામાં આવી છે. 30 મે, 2026ના રોજ નાસીર નગર ખાતે થયેલી મિલકતોના ડિમોલિશનની કામગીરીમાં વિવાદ સર્જાયો હતો. આ મામલે રચાયેલી ખાસ તપાસ સમિતિના અહેવાલ બાદ, ડિમોલિશન કામગીરી સાથે સંકળાયેલા 5 એન્જિનિયરોને તાત્કાલિક અસરથી સસ્પેન્ડ કરવામાં આવ્યા છે. આ કાર્યવાહી વહીવટી શિસ્તનો કડક સંદેશ આપે છે.

અમદાવાદના વસ્ત્રાપુરની એક પ્રતિષ્ઠિત ફૂડ કંપનીમાં પૂર્વ HR મેનેજરે 10 બોગસ કર્મચારીઓના નામે નકલી પ્રોફાઇલ બનાવી તેમના બેંક ખાતામાં પગાર ટ્રાન્સફર કરાવી ₹13.53 લાખની ઉચાપત કરી હોવાનો મામલો સામે આવ્યો છે. સપ્ટેમ્બર 2025થી મે 2026 દરમિયાન કંપની માલિકનો વિશ્વાસ જીતી તેમની સહીઓથી નાણાં ટ્રાન્સફર કરાયા હતા. નવા એકાઉન્ટન્ટના ઓડિટમાં ગોટાળો બહાર આવતા માલિકે વસ્ત્રાપુર પોલીસમાં ફરિયાદ નોંધાવી છે. પોલીસે છેતરપિંડીના મામલે તપાસ શરૂ કરી છે.

વડોદરા મ્યુનિસિપલ કોર્પોરેશનના આરોગ્ય વિભાગ હેઠળ ગુજરાત અર્બન હેલ્થ પ્રોજેક્ટ (GUHP) અંતર્ગત શહેરી સામૂહિક આરોગ્ય કેન્દ્રોમાં ફરજ બજાવતા સ્ટાફ નર્સ (વર્ગ-3)ને રાજ્ય સરકારના ધોરણે નર્સિંગ યુનિફોર્મ અને વોશિંગ એલાઉન્સનો લાભ આપવા દરખાસ્ત તૈયાર કરવામાં આવી છે. આ મુદ્દો સ્ટેન્ડિંગ કમિટી સમક્ષ રજૂ કરી સામાન્ય સભાની મંજૂરી મેળવવાની પ્રક્રિયા હાથ ધરવામાં આવી છે. આ માટેનો ખર્ચ રાજ્ય સરકાર દ્વારા ફાળવવામાં આવતી ગ્રાન્ટમાંથી કરવામાં આવનાર હોવાથી વડોદરા મહાનગરપાલિકા પર કોઈ વધારાનો આર્થિક બોજ પડશે નહીં.

અમદાવાદના જૂના સુભાષ બ્રિજના ત્રણ મહાકાય સ્પાનનું ડિમોલિશન સફળતાપૂર્વક અને સંપૂર્ણ સુરક્ષિત રીતે પૂર્ણ થયું છે. એન્જિનિયરિંગ નિષ્ણાતોની દેખરેખ હેઠળ ‘કન્ટ્રોલ્ડ ડિમોલિશન’ પદ્ધતિથી સ્પાનને નદીના પટમાં ઉતારવામાં આવ્યા હતા. સમગ્ર કામગીરી દરમિયાન આંતરરાષ્ટ્રીય સલામતી ધોરણો, બેરિકેડિંગ અને સતત મોનિટરિંગનું કડક પાલન કરાયું હતું. કોઈ અકસ્માત વિના ઓપરેશન પૂર્ણ થતાં તંત્રને મોટી રાહત મળી છે. હવે નદીના પટમાંથી કાટમાળ દૂર કરવાની અને બ્રિજના બાકીના ભાગને તબક્કાવાર તોડવાની કામગીરી શરૂ કરવામાં આવશે.

સુરતના ઓલપાડના ભાંડુત ગામમાં 45 ફૂટ ઊંચા તાડના ઝાડ પર પીંછા ફસાઈ જતાં રાષ્ટ્રીય પક્ષી મોર ત્રણ કલાક સુધી જીવન-મરણ વચ્ચે ઝઝૂમતો રહ્યો હતો. સ્થાનિકોની જાણ બાદ ગ્રીન ગાર્ડિયન ચેરિટેબલ ટ્રસ્ટ, વન વિભાગ અને ફાયર વિભાગે સંયુક્ત રેસ્ક્યુ ઓપરેશન ચલાવી મોરને સુરક્ષિત રીતે નીચે ઉતાર્યો હતો. સારવાર બાદ મોર સંપૂર્ણ સ્વસ્થ હોવાનું જણાતા તેને તેના કુદરતી વસવાટમાં મુક્ત કરવાનો નિર્ણય લેવાયો છે. આ સફળ કામગીરીને ગ્રામજનોએ બિરદાવી હતી.

અમદાવાદમાં રહેતી 36 વર્ષીય વિધવા મહિલા ફેસબુક પર પરિચયમાં આવેલા મહેસાણાના યુવકની પ્રેમજાળમાં ફસાઈ હતી. આરોપીએ લગ્નનું ખોટું વચન આપી તેની સાથે શારીરિક સંબંધો બાંધ્યા અને ધંધાના બહાને રૂ. 19.91 લાખ તેમજ 18 તોલા સોનાના દાગીના પડાવી લીધા. લગ્નના દિવસે કોર્ટમાંથી ફરાર થઈ જતાં છેતરપિંડીનો ભાંડો ફૂટ્યો. આરોપીના ભાઈએ પણ દાગીના ગિરો મૂક્યા હતા. પીડિતાની ફરિયાદના આધારે નવરંગપુરા પોલીસે બંને ભાઈઓ સામે ગુનો નોંધી તપાસ શરૂ કરી છે.

અમદાવાદના નારોલ-વિશાલા રોડ પર પીરાણા નજીક આજે વહેલી સવારે ગમખ્વાર અકસ્માતમાં 16 વર્ષીય કિશોરનું મોત થયું છે. પીપળજનો રહેવાસી કિશોર ઈલેક્ટ્રિક ટુ-વ્હીલર પર ટ્યુશન જતો હતો ત્યારે પૂરઝડપે આવેલા ડમ્પરે તેને ટક્કર મારી હતી. ગંભીર રીતે ઈજાગ્રસ્ત કિશોરને હોસ્પિટલ ખસેડાયો હતો, જ્યાં સારવાર દરમિયાન તેનું અવસાન થયું. અકસ્માત બાદ ડમ્પરચાલક ફરાર થઈ ગયો હતો. પોલીસે ગુનો નોંધી આરોપીની શોધખોળ શરૂ કરી છે, જ્યારે પરિવાર પર શોકનું વાતાવરણ છવાયું છે.

ગુજરાતમાં ચોમાસાની જોરદાર શરૂઆત થઈ છે. છેલ્લા 24 કલાકમાં 65 તાલુકાઓમાં વરસાદ નોંધાયો છે, જેમાં સૌથી વધુ નવસારીમાં 4 ઈંચ ખાબક્યો છે. હવામાન વિભાગે આગામી પાંચ દિવસ માટે ભારે પવન અને વીજળીના કડાકા-ભડાકા સાથે ‘થંડરસ્ટોર્મ ચેતવણી’ જાહેર કરી છે, જેથી વહીવટી તંત્રોને એલર્ટ પર રહેવા સૂચના અપાઈ છે. જૂનમાં થયેલી વરસાદની ઘટ જુલાઈમાં ભરાઈ જવાની સંભાવના છે, કારણ કે ચાર મોટી સિસ્ટમ્સ સક્રિય થઈ છે. દક્ષિણ ગુજરાત અને સૌરાષ્ટ્રના અનેક વિસ્તારોમાં ભારે વરસાદ નોંધાયો છે.

ફોજદારી કેસોમાં આરોપી નિર્દોષ છૂટે તો તપાસ કરનાર પોલીસ અધિકારી અને પબ્લિક પ્રોસિક્યુટરની ભૂલ કે ક્ષતિની તપાસ માટે રાજ્ય સરકારના ગૃહવિભાગ દ્વારા ડાયરેક્ટર ઓફ પ્રોસિક્યુશન અંબાલાલ આર. પટેલની અધ્યક્ષતામાં એક વિશેષ સમિતિની રચના કરવામાં આવી છે. સુપ્રીમ કોર્ટના નિર્દેશોને ધ્યાનમાં રાખી આ સમિતિ આરોપી નિર્દોષ છૂટવાના કેસોનું બારીકાઈથી મૂલ્યાંકન કરશે. જો અધિકારીઓની ગંભીર બેદરકારી જણાઈ તો નિયમો અનુસાર પગલાં લેવા ભલામણ કરાશે.

અયોધ્યા રામ મંદિર દાન ચોરી કેસ 2026 માં, તપાસ એજન્સીઓ સક્રિય થઈ છે. જેલમાં બંધ આરોપીઓની પૂછપરછમાં ચોરીની પદ્ધતિ, રકમ છુપાવવાના સ્થળો અને સુરક્ષા વ્યવસ્થાની ખામીઓ અંગે અનેક ખુલાસા થયા છે. સીસીટીવીથી બચવા માટે માનવ કવચ અને બાથરૂમનો ઉપયોગ જેવી ચોંકાવનારી પદ્ધતિઓ સામે આવી છે. આરોપીઓએ કબૂલ્યું કે તેઓ ગણતરી સમયે નોટોના બંડલ સરકાવી લેતા અને તેને મંદિર પરિસરના બાથરૂમમાં છુપાવી દેતા. બેંક ઓફ બરોડાએ સ્પષ્ટ કર્યું છે કે તેમની ભૂમિકા માત્ર ઓનલાઈન દાન સુધી મર્યાદિત છે. પોલીસે મુખ્ય આરોપીઓના ખાતાની વિગતો મેળવી છે અને ટ્રસ્ટ સાથે જોડાયેલા અનિલ મિશ્રાની ભૂમિકાની પણ તપાસ ચાલી રહી છે.

ગુજરાત હવામાન વિભાગની નવીનતમ આગાહી મુજબ, દક્ષિણ ગુજરાતમાં મેઘરાજાની તોફાની સવારી જોવા મળશે. 10 જિલ્લાઓમાં ઓરેન્જ એલર્ટ જ્યારે એક જિલ્લામાં ભારે વરસાદનું રેડ એલર્ટ જાહેર કરાયું છે. આ નાઉકાસ્ટ આગામી ત્રણ કલાક, એટલે કે સવારના 7 થી 10 વાગ્યા સુધી માટે છે. વલસાડ અને દમણમાં ભારે વરસાદનું રેડ એલર્ટ છે. ગઈકાલે નવસારીમાં 4.53 ઈંચ, સાવરકુંડલામાં 3.11 ઈંચ અને ધરમપુરમાં 2.76 ઈંચ વરસાદ નોંધાયો હતો.

દિલ્હી-મુંબઈ એક્સપ્રેસવે પર ભયાનક અકસ્માત થયો, જેમાં હરિદ્વારથી ઈન્દોર જતી એક બસ ટ્રેલર સાથે અથડાઈ અને ભીષણ આગ લાગી. આ ઘટનામાં 7 લોકોના મોત થયા છે અને 22 મુસાફરો ગંભીર રીતે ઈજાગ્રસ્ત થયા છે. કુલ 37 મુસાફરો બસમાં સવાર હતા. પોલીસ અને ફાયર બ્રિગેડ દ્વારા રાહત અને બચાવ કામગીરી હાથ ધરવામાં આવી હતી. ઈજાગ્રસ્તોને નજીકની હોસ્પિટલમાં સારવાર હેઠળ રાખવામાં આવ્યા છે, જ્યાં કેટલાકની હાલત નાજુક છે.

ભાવનગરના નાગધણીબા ગામના એક ૩૫ વર્ષિય ખેડૂતને ઇન્સ્ટાગ્રામ પર જાહેરાત જોઈને 'હેપી ફ્રેન્ડ ક્લબ' અને 'રંગીલા ક્લબ'ના નામે ૨૦.૩૬ લાખ રૂપિયાની ઓનલાઇન છેતરપિંડીનો ભોગ બન્યા છે. આરોપીઓએ મહિલાઓ સાથે દોસ્તી કરાવી મોટી કમાણીની લાલચ આપી હતી. ખેડૂતને હોટેલ બુકિંગ, મેડિકલ રિપોર્ટ અને સિક્યોરિટી ફીના બહાને આંગડિયા અને ઓનલાઇન માધ્યમથી લૂંટી લેવાયા. સતત વધુ નાણાંની માંગણી થતાં છેતરાયાનો અહેસાસ થતાં ખેડૂતે સાયબર પોલીસનો સંપર્ક કર્યો છે. પોલીસે ગુનો નોંધી તપાસ શરૂ કરી છે.

મુંબઈના બિલ્ડર કેતન અગ્રવાલે પોલીસને જણાવ્યું હતું કે તેની મંગેતર સિયા ગોયલ કોઈ અન્ય વ્યક્તિ, ચેતન ચૌધરી સાથે પ્રેમ સંબંધમાં હોવાની શંકા હતી. લગ્ન નક્કી કરતા પહેલા સિયાના ભૂતકાળની તપાસ થઈ હતી કે કેમ તે અંગે પણ તેણે પરિવારને પૂછપરછ કરી હતી. સિયા વારંવાર ચેતનનું નામ લેતી હતી અને કેતન સાથે નાની નાની વાતોમાં ઝઘડા કરતી હતી, જેણે શંકા વધુ ગાઢ બનાવી હતી. આખરે, લોહગઢ કિલ્લા પર તેની હત્યા આ શંકાઓ વચ્ચે જ થઈ.

આવતીકાલે મુખ્યમંત્રી ભૂપેન્દ્ર પટેલની અધ્યક્ષતામાં ગાંધીનગરમાં મહત્વપૂર્ણ કેબિનેટ બેઠક યોજાશે. આ બેઠકમાં ચોમાસાની વર્તમાન સ્થિતિ, ભારે વરસાદ, અતિવૃષ્ટિ અને પૂર જેવી પરિસ્થિતિને પહોંચી વળવા સરકારની તૈયારીઓની સમીક્ષા કરવામાં આવશે. ડિઝાસ્ટર મેનેજમેન્ટ, નીચાણવાળા વિસ્તારોની સજ્જતા, રાહત અને બચાવ કામગીરી તેમજ સંભવિત અતિવૃષ્ટિ માટેના એક્શન પ્લાન પર વિસ્તૃત ચર્ચા થશે. ઉપરાંત, વાઇબ્રન્ટ ગુજરાત હેઠળની પ્રાદેશિક પરિષદો, નવી યોજનાઓના અમલીકરણ અને ઔદ્યોગિક નીતિની સ્થિતિની સમીક્ષા થશે. ખેડૂતોના વીજ પોલ મુદ્દે પણ રાહત આપતી નવી નીતિ અથવા જાહેરાત થવાની શક્યતા છે.

રાજસ્થાનના દૌસા જિલ્લામાં દિલ્હી-મુંબઈ એક્સપ્રેસવે પર એક ગંભીર માર્ગ અકસ્માત થયો છે, જ્યાં બસ આગળ ચાલી રહેલા ટ્રક સાથે અથડાઈ હતી. આ અથડામણ બાદ બંને વાહનોમાં ભયાવહ આગ ફાટી નીકળી હતી, જેના પરિણામે અત્યાર સુધીમાં 7 લોકોના દુઃખદ મૃત્યુ થયા છે. પોલીસ અધિકારીઓના મતે, કોલવા પોલીસ સ્ટેશન વિસ્તારમાં મોડી રાત્રે થયેલા આ અકસ્માતમાં 5 લોકો આગમાં દાઝી ગયા અને 2 લોકોના માથામાં ગંભીર ઈજાઓ થવાથી તેમનું મૃત્યુ થયું. અકસ્માતમાં કુલ 22 મુસાફરો ઘાયલ થયા છે, જેમને દૌસા જિલ્લા હોસ્પિટલમાં સારવાર માટે દાખલ કરવામાં આવ્યા છે.