અમદાવાદના ગોમતીપુર સુખરામનગર ચાર રસ્તા નજીક 22મી સપ્ટેમ્બરના રોજ એક સંવેદનશીલ ઘટના બની. રિક્ષામાં મુસાફરી કરી રહેલી ગર્ભવતી મહિલાને અચાનક પ્રસૂતિ પીડા શરૂ થતાં ટ્રાફિક પોલીસે તાત્કાલિક 108 ઇમરજન્સી સેવા બોલાવી. 108ની ટીમે સ્થળ પર તપાસ કરતાં જણાવ્યું કે હોસ્પિટલ પહોંચવું જોખમી છે, તેથી રિક્ષામાં જ ડિલિવરી કરવી પડશે. પરિસ્થિતિની ગંભીરતા સમજીને ટ્રાફિક પોલીસે રિક્ષાની આસપાસ ચાદરનો પડદો બાંધી સુરક્ષિત વાતાવરણ ઊભું કર્યું. તબીબી સ્ટાફ અને મહિલા પોલીસની મદદથી સફળ ડિલિવરી થઈ, અને માતા-શિશુને નજીકની હોસ્પિટલમાં દાખલ કરાયા.