અલીગઢ મુસ્લિમ યુનિવર્સિટી (AMU) માં 8 વર્ષ બાદ 5 નવેમ્બર, 2026ના રોજ વિદ્યાર્થી સંઘની ચૂંટણી યોજાશે. યુનિવર્સિટી પ્રશાસન અને 20 દિવસથી વિરોધ પ્રદર્શન કરી રહેલા વિદ્યાર્થીઓ વચ્ચે થયેલી વાતચીત બાદ આ નિર્ણય લેવાયો છે. વિદ્યાર્થીઓની મુખ્ય માંગણી સ્વીકારીને પ્રોક્ટર પ્રોફેસર મોહમ્મદ નવીદ ખાનને પદ પરથી હટાવી દેવાયા છે અને તેમના સ્થાને પ્રોફેસર નફીસ અહમદ અન્સારીની નિમણૂક કરાઈ છે. ચૂંટણીની જાહેરાત અને પ્રોક્ટરને દૂર કરવાના નિર્ણય બાદ વિદ્યાર્થીઓએ ફટાકડા ફોડી, સરઘસ કાઢી ઉજવણી કરી હતી. 21 સપ્ટેમ્બરથી ચાલી રહેલું આંદોલન સમાપ્ત કરાયું છે અને ભૂખ હડતાળ પર બેઠેલા વિદ્યાર્થી યાસિર ફહાદે પણ ઉપવાસ તોડ્યો હતો.