દક્ષિણ ભારતીય ફિલ્મ ઇન્ડસ્ટ્રીના પ્રખ્યાત અભિનેતા અને કોમેડિયન ફિશ વેંકટના નામે ઓળખાતા મંગલમપલ્લી વેંકટેશનું 53 વર્ષની વયે નિધન થયું. કિડની ટ્રાન્સપ્લાન્ટ માટે 50 લાખ રૂપિયાની જરૂર હતી. આ માટે વેંકટના પરિવારે મદદની પણ અપીલ કરી હતી. તેમને નાણાકીય મદદ મળી હતી, પરંતુ યોગ્ય સમયે ડોનર ન મળતા તેમનું નિધન થયું હતુ.

અભિનેત્રી શેફાલી જરીવાલાનું 42 વર્ષની ઉંમરે અચાનક નિધન થયું હતું, જેમાં કાર્ડિયાક અરેસ્ટ કારણ હોવાનું માનવામાં આવે છે. તેની મિત્ર પૂજા ઘાઈએ ખુલાસો કર્યો કે મૃત્યુની રાત્રે શેફાલીએ નિયમિત રીતે ભોજન કર્યું અને પતિ પરાગને ડોગ વૉક પર મોકલ્યો. તે દરમિયાન તબિયત લથડી ગઈ અને હોસ્પિટલ લઈ જતી વખતે તેનું અવસાન થયું. મૃત્યુના એક દિવસ પહેલાં ઘરમાં સત્યનારાયણની પૂજા પણ રાખવામાં આવી હતી. પોસ્ટમોર્ટમ રિપોર્ટમાં કશું શંકાસ્પદ ન મળતાં પરાગ વિરુદ્ધ કોઈ કાર્યવાહી કરવામાં આવી નથી. ડોક્ટરે પોસ્ટમોર્ટમ બે વાર કર્યો હતો અને રેકોર્ડિંગ પણ કરાયું હતું.