રૂ.190 કરોડના ભંડોળ સાથે, IIT ગાંધીનગર ખાતે ‘સમર્થ’ (સિલિકોન એન્ડ એડવાન્સ્ડ સેમિક્ધડક્ટર મેન્યુફેક્ચરિંગ રિસર્ચ એન્ડ ટ્રેનિંગ હબ) ની સ્થાપના થવાની છે. આધુનિક સંશોધન અને ઉદ્યોગ-લક્ષી તાલીમ પર ધ્યાન કેન્દ્રિત કરીને, આ કેન્દ્ર આગામી પાંચ વર્ષમાં 10,000 થી વધુ વિદ્યાર્થીઓ, પ્રોફેસરો અને પ્રોફેશનલ્સને તાલીમ આપશે. ભારતને સેમિકન્ડક્ટર ક્ષેત્રે આત્મનિર્ભર બનાવવા અને ગુજરાતને હબ તરીકે વિકસાવવાના PM નરેન્દ્ર મોદીના વિઝનને સાકાર કરવાનો આ પ્રોજેક્ટનો ઉદ્દેશ્ય છે.

વૈજ્ઞાનિકો મુજબ સ્ત્રીઓ પુરુષો કરતાં સરેરાશ પાંચ વર્ષ વધુ જીવે છે, જેના પાછળ જૈવિક, હોર્મોનલ અને જીવનશૈલી સંબંધિત કારણો જવાબદાર છે. એસ્ટ્રોજન હૃદય અને રોગપ્રતિકારક શક્તિને સુરક્ષા આપે છે, જ્યારે બે X ક્રોમોસોમ પણ લાભદાયી બને છે. બીજી તરફ પુરુષોમાં જોખમી આદતો અને સ્વાસ્થ્ય પ્રત્યેની બેદરકારી આયુષ્ય ઘટાડે છે. જોકે લાંબું આયુષ્ય હંમેશા સારું સ્વાસ્થ્ય દર્શાવતું નથી. સંતુલિત આહાર, નિયમિત કસરત, પૂરતી ઊંઘ અને તણાવમુક્ત જીવનશૈલી બંને માટે લાંબા અને સ્વસ્થ જીવનની ચાવી છે.

દિલ્હી પોલીસના સ્પેશિયલ સેલે પાકિસ્તાનની ISI સાથે જોડાયેલા આતંકવાદી અને શસ્ત્ર નેટવર્કનો પર્દાફાશ કરીને ચાર આરોપીઓની ધરપકડ કરી છે. પંજાબ અને દિલ્હીમાં થયેલી કાર્યવાહીમાં વિદેશી પિસ્તોલ, કારતૂસ અને મોબાઇલ ફોન જપ્ત કરાયા છે. તપાસમાં સામે આવ્યું કે આરોપીઓ ISI હેન્ડલર શહઝાદ ભટ્ટીના ઇશારે ડ્રોન મારફતે શસ્ત્રો મંગાવતા અને વિદેશી નંબરથી સંપર્ક કરતા હતા. મુખ્ય આરોપી ગગનપ્રીતને દિલ્હીમાં પોલીસ સ્ટેશનો અને ધાર્મિક સ્થળોની જાસૂસી તેમજ હુમલાની જવાબદારી સોંપાઈ હતી.

અરવલ્લી જિલ્લાના શામળાજી પોલીસે રતનપુર ચેકપોસ્ટ પર રાજસ્થાન તરફથી આવતી એક શંકાસ્પદ હોન્ડા સિટી કારનો ફિલ્મી ઢબે પીછો કરી રોકી હતી. કારચાલક પોલીસને ટક્કર મારી ખેતરોમાં ફરાર થઈ ગયો હતો. પોલીસે કારમાંથી વિદેશી દારૂની 984 બોટલો અને ટીન મળી કુલ ₹1.68 લાખનો દારૂ અને ₹7.68 લાખનો મુદ્દામાલ જપ્ત કર્યો છે. પોલીસે પ્રોહિબિશન એક્ટ હેઠળ ગુનો નોંધી ફરાર બુટલેગરને ઝડપી પાડવા કાર્યવાહી હાથ ધરી છે.

અરુણાચલ પ્રદેશના નાહ આદિવાસી સમુદાયે ઉપલા સુબાનસિરી જિલ્લામાં ચીની પીપલ્સ લિબરેશન આર્મી (PLA) દ્વારા કથિત ઘૂસણખોરી અંગે ગંભીર ચિંતા વ્યક્ત કરી છે. સ્થાનિક નાહ વેલ્ફેર સોસાયટી (NWS) અનુસાર, છેલ્લા છ વર્ષમાં PLA એ તેમની પરંપરાગત જમીનો પર કબજો જમાવ્યો છે. NWS એ ઉપલા સુબાનસિરીના ડેપ્યુટી કમિશનરને સુપરત કરાયેલા મેમોરેન્ડમમાં પાંચ સ્થળોએ ચીની અતિક્રમણનો આરોપ લગાવ્યો છે, જે ટાક્સિંગ રેવન્યુ સર્કલ હેઠળ આવે છે. સંગઠનનો દાવો છે કે ચીની સરકાર વ્યૂહાત્મક સ્થળો પર કબજો કરીને પ્રદેશ પર નિયંત્રણ વધારી રહી છે.

ગુજરાતમાં શુદ્ધ આહાર સુનિશ્ચિત કરવા રાજ્ય સરકાર દ્વારા ભેળસેળખોરો સામે કડક ઝુંબેશ હાથ ધરાઈ છે. આરોગ્ય મંત્રી પ્રફુલ પાનશેરીયાના નિર્દેશન હેઠળ રાજકોટના ગોંડલ સ્થિત ‘મે. સત્યમ મસાલા’ ફેક્ટરી પર ફૂડ એન્ડ ડ્રગ્સ વિભાગે દરોડો પાડ્યો. આ કાર્યવાહીમાં 35,527 કિલોગ્રામ શંકાસ્પદ મસાલા, જેમાં ધાણા, કોર્ન, મરચું અને હળદર પાઉડરનો સમાવેશ થાય છે, જેની કિંમત અંદાજે રૂ. 1.11 કરોડ છે, તે સીઝ કરવામાં આવ્યો. આ મસાલાના નમૂના લેબોરેટરીમાં મોકલાયા છે.

રાજકોટ મહાનગરપાલિકાના આસિસ્ટન્ટ એન્જિનિયર કરણરાજસિંહ ઝાલા સાથે રૂ. ૨.૪૯ કરોડની છેતરપિંડીના કેસમાં આરોપી શિક્ષિકા દીપાબેન દેથરીયાની જામીન અરજી કોર્ટે ફગાવી દીધી છે. જમીન દલાલીમાં મોટા વળતરની લાલચ આપી દંપતીએ ફરિયાદી પાસેથી આ રકમ પડાવી લીધી હતી. ફરિયાદી દંપતી અને આરોપી દંપતી શિક્ષિકા હોવાથી ઓળખાણ વધતાં વિશ્વાસ કેળવી આ છેતરપિંડી આચરવામાં આવી હતી. આરોપીઓએ ખોટી ઓળખ ધારણ કરી સમગ્ર કાવતરું રચ્યું હતું. આ મામલે ગાંધીગ્રામ પોલીસ સ્ટેશનમાં ફરિયાદ નોંધાઇ હતી.