રામ મંદિર દાન ચોરીમાં ભક્તોની ભાવનાઓને ઠેસ પહોંચાડનાર દાન ચોરીના મામલે VHPના આંતરરાષ્ટ્રીય અધ્યક્ષ આલોક કુમારે કડક પ્રતિક્રિયા આપી છે. તેમણે આ ઘટનાને દુઃખદ ગણાવી અને ભક્તોની લાગણીઓને મહત્વ આપ્યું. VHP, RSS કે મોદી સરકાર સાથે આ વિવાદને જોડવાના પ્રયાસોને તેમણે ફગાવી દીધા. ચંપત રાયની ભૂમિકા અંગે તેમણે સ્પષ્ટતા કરી કે તેઓ VHPનું પ્રતિનિધિત્વ કરતા નથી. આ મામલે તપાસ અને દોષિતોને 4-5 મહિનામાં જેલ ભેગા કરવાની માંગ કરી છે.

અયોધ્યા રામ મંદિર ટ્રસ્ટની મહત્ત્વની બેઠક આજે રામ મંદિર પરિસરમાં બપોરે 3 વાગ્યે યોજાશે. આ બેઠકમાં ટ્રસ્ટના મહાસચિવ ચંપત રાય અને સભ્ય અનિલ મિશ્રાના રાજીનામા અંગે નિર્ણય લેવાશે. દાન ચોરી વિવાદ અને SIT રિપોર્ટ સાથે જોડાયેલી બાબતો પર પણ ચર્ચા થશે. 2025-26 ના ઓડિટ રિપોર્ટની પણ સમીક્ષા કરવામાં આવશે. ટ્રસ્ટ બંને પક્ષકારોનો જવાબ સાંભળીને નિર્ણય લેશે. બંને હોદ્દેદારોની ભૂમિકા સામે અનેક આરોપો વચ્ચે ટ્રસ્ટ પોતાની છબી સુધારવાનો પ્રયાસ કરશે.

થરા પોલીસને વડાગામ નજીક નેશનલ હાઇવે પર પેટ્રોલિંગ દરમિયાન બાતમી મળી હતી કે એક ઇન્ડિયન ગેસના ટેન્કરમાંથી ગેરકાયદેસર રીતે ઘરેલું રાંધણ ગેસ ચોરી કરીને સિલિન્ડરોમાં ભરવામાં આવી રહ્યો છે. પોલીસે તાત્કાલિક દરોડો પાડી સ્થળ પરથી પાંચ ભરેલા અને 11 ખાલી સિલિન્ડર, ગેસ રિફિલિંગ માટે વપરાતા સાધનો અને એક છોટા હાથી વાહન સહિતનો મુદ્દામાલ કબજે કર્યો છે. પોલીસે ટેન્કર ચાલક અને અન્ય બે શખ્સોની પૂછપરછ કરતાં આ ગેંગ દ્વારા કાળા બજારમાં ઊંચા ભાવે ગેસ વેચી નફો કમાવવાનો પર્દાફાશ થયો છે.

ભરૂચ જિલ્લામાં થયેલા વરસાદ બાદ, ચોમાસામાં ફેલાતા રોગચાળાને રોકવા અંકલેશ્વર નગરપાલિકા દ્વારા યુદ્ધના ધોરણે સ્વચ્છતા અભિયાન હાથ ધરાયું છે. ચીફ ઓફિસરના માર્ગદર્શન હેઠળ આરોગ્ય અને સફાઈ વિભાગની ટીમો નીચાણવાળા અને વરસાદથી પ્રભાવિત વિસ્તારોમાં સફાઈ કરી રહી છે. વરસાદી પાણીના નિકાલ, કચરાનો નિકાલ અને જંતુનાશક દવાનો છંટકાવ પણ કરવામાં આવી રહ્યો છે. ચોમાસાની પરિસ્થિતિને પહોંચી વળવા અને નાગરિકોની સુખાકારી જાળવવા પાલિકા તંત્ર સંપૂર્ણપણે સજ્જ છે.

અમદાવાદ સ્થિત Zydus Lifesciences અને Apollo Hospitals એ Shield Multi-Cancer Detection (MCD) નામનો એક બ્લડ ટેસ્ટ ભારતમાં રજૂ કર્યો છે. આ ટેકનોલોજી Guardant Health દ્વારા વિકસાવવામાં આવી છે, જે એક જ બ્લડ સેમ્પલથી 10 સામાન્ય કેન્સરના સંકેતો શોધી શકે છે. આ MCED ટેકનોલોજી 45 વર્ષથી વધુ ઉંમરના, સરેરાશ જોખમ ધરાવતા લોકો માટે છે. તે DNA મેથિલેશન પેટર્નનું વિશ્લેષણ કરીને કેન્સર કોષો દ્વારા છોડવામાં આવતા DNA ના ટુકડાઓ શોધે છે. આ નવી ટેકનોલોજી કેન્સર સ્ક્રીનિંગમાં ક્રાંતિ લાવી શકે છે, જોકે તે પરંપરાગત સ્ક્રીનિંગનો વિકલ્પ નથી.

ન્યૂ બ્રાઇટ એજ્યુકેશન ટ્રસ્ટ દ્વારા સ્વ. જયેન્દ્રભાઈ આર. શાહની પાંચમી પુણ્યતિથિ નિમિત્તે હરણી બ્રાઇટ સ્કૂલમાં સેવા સંકલ્પ-5 કાર્યક્રમ યોજાયો. કાર્યક્રમમાં નિઃશુલ્ક મેડિકલ અને હેલ્થ ચેકઅપ કેમ્પ યોજાયો હતો. બરોડા યુથ ફેડરેશનના સહયોગથી જરૂરિયાતમંદ બાળકોને શૈક્ષણિક કિટ, કર્મચારીઓને રેઇનકોટ અને છત્રી તેમજ જરૂરિયાતમંદ પરિવારોને કપડાંનું વિતરણ કરાયું. સમાજસેવા કરનાર તબીબો અને સમાજસેવકોનું સન્માન પણ થયું.

વડોદરાના ફતેગંજ સિનીયર સિટીજન્સ એસોસિએશન 60થી90 વર્ષના સભ્યો દ્વારા જીવનના અંતિમ પડાવને ઉત્સવ તરીકે ઉજવવામાં આવે છે. વર્ષભર વિવિધ રાષ્ટ્રીય, ધાર્મિક, સામાજિક અને સેવાકીય કાર્યક્રમો, મેડિકલ કેમ્પ, સંગીત સંધ્યાનું આયોજન થાય છે. પ્રમુખ નંદકુમાર ડી ચાવડા મુજબ, તેઓ મોર્નિંગ વોક, યોગા, ભજન-કીર્તનથી દિવસની શરૂઆત કરે છે. રવિવારે યોજાયેલી સંગીત સંધ્યામાં ઓલ્ડ ફિલ્મોના ગીતો અને ભજન-કીર્તન માણ્યા હતા. શહેરના તમામ સંગઠનો એક મંચ પર આવે તો હજારો સિનીયર સિટીજન્સ એકબીજાને સહાયરૂપ બની શકે.

મહીસાગર જિલ્લાના નળ સે જળ અભિયાન હેઠળ થયેલા રૂ.123 કરોડના ભ્રષ્ટાચાર મામલે CID ક્રાઈમે બાલાસિનોર તાલુકાના જનોડ ગામના સરપંચ રમેશભાઈ રત્નાભાઈ માછીની ધરપકડ કરી છે. સરકારી નીતિ-નિયમોને નેવે મૂકી પાણી સમિતિના સરકારી એકાઉન્ટમાંથી રૂ.1.05 લાખ પોતાના નામે ચેક બનાવી ઉચાપત કરવાનો આરોપ છે. આ ધરપકડ સાથે કૌભાંડમાં કુલ 44 આરોપીઓની ધરપકડ થઈ છે. CID ક્રાઈમ દ્વારા તપાસ તેજ કરવામાં આવી રહી છે.

અરવલ્લી જિલ્લાના મેઘરજ તાલુકાના લીંબોદ્રાઢુંઢા ગામે ખેતરમાં કામ કરતી 21 વર્ષીય મહિલાની જગદીશ મોહનભાઈ ડામોરે છેડતી કરી. મહિલાએ બૂમાબૂમ કરતાં તેનો પતિ ત્યાં આવી પહોંચ્યો. ઠપકો આપતાં જગદીશે પતિ પર ધારીયાથી હુમલો કરી પગમાં ઈજા પહોંચાડી. આ ઘટનાની મેઘરજ પોલીસમાં ફરિયાદ નોંધાવવામાં આવી છે. પોલીસે ગુનો નોંધી આગળની કાર્યવાહી હાથ ધરી છે.

સાબરકાંઠા જિલ્લાના પ્રાંતિજ નગરપાલિકાના કોન્ટ્રાક્ટ આધારિત આરોગ્ય ઇન્સ્પેક્ટરની બાઈક ભાંખરીયા બસ સ્ટેશન પાસે આવેલ પે એન્ડ યુઝ શૌચાલય પાસેથી ચોરાઈ ગઈ. આરોગ્ય ઇન્સ્પેક્ટર શૌચાલયના ફોટા પાડવા માટે અંદર ગયા હતા અને માત્ર બે મિનિટમાં અજાણ્યો શખ્સ બાઇક લઈને ફરાર થઈ ગયો. આ ઘટના પ્રાંતિજ ભાંખરીયા પોલીસ ચોકીની બરાબર સામે બની હતી, જેણે સુરક્ષા વ્યવસ્થા પર પ્રશ્નાર્થ સર્જ્યો છે. પોલીસ ચોકીના CCTV ફૂટેજમાં ઘટના કેદ થઈ છે, જેના આધારે પોલીસે ચોરને ઝડપી પાડવા તપાસ શરૂ કરી છે.

પુરુષોમાં લો સ્પર્મ કાઉન્ટ (ઓછા શુક્રાણુઓ) ની સમસ્યા વધી રહી છે. માત્ર સિગારેટ કે તમાકુ જ નહીં, પણ મેદસ્વીપણું, તણાવ, વધુ પડતો દારૂ, નશીલા પદાર્થો, હોર્મોનલ અસંતુલન, ઇન્ફેક્શન, વેરિકોસીલ, થાઈરોઈડ અને અમુક દવાઓ પણ સ્પર્મ કાઉન્ટને અસર કરી શકે છે. વીર્યમાં સ્પર્મની સંખ્યા ઓછી થવી એ ઓલિગોસ્પર્મિયા (Oligospermia) છે, અને બિલકુલ ન હોવાને એઝૂસ્પર્મિયા (Azoospermia) કહેવાય છે. આના કારણે પિતા બનવામાં મુશ્કેલી આવી શકે છે.

ભારતીય અવકાશ સંશોધન સંસ્થા (ISRO) ના મુખ્યાલયને બોમ્બથી ઉડાવી દેવાની ધમકીભર્યો ઈમેલ મળ્યા બાદ, પોલીસે તાત્કાલિક કાર્યવાહી કરી. બેંગલુરુ સ્થિત ISRO મુખ્યાલયને ખાલી કરાવીને સર્ચ ઓપરેશન હાથ ધરવામાં આવ્યું. પોલીસ, ડોગ સ્ક્વોડ અને BDDS ટીમ ઘટનાસ્થળે પહોંચી હતી. સુરક્ષાના ભાગરૂપે, સમગ્ર પરિસરની ઝીણવટભરી તપાસ કરવામાં આવી. વરિષ્ઠ પોલીસ અધિકારીના જણાવ્યા અનુસાર, કોઈ શંકાસ્પદ વસ્તુ મળી નથી અને આ ધમકી ફેક હોવાનું જણાયું છે. ઈમેલ મોકલનારની ઓળખ માટે તપાસ ચાલુ છે, અને સુરક્ષા એજન્સીઓએ ISRO અને આસપાસના વિસ્તારોમાં સુરક્ષા વધારી દીધી છે.

પ્રાંતિજ પોલીસે માવાની મુવાડી ગામની સીમમાં ખારી નદીના કોતરોમાંથી દેશી દારૂ બનાવવા માટે તૈયાર કરાયેલો અંદાજે 4,200 લીટર વોશ કબજે કર્યો છે, જેની કિંમત રૂ. 1.05 લાખ આંકવામાં આવી છે. જોકે, ઘટના સ્થળેથી કોઈ આરોપી પકડાયો ન હતો. પોલીસે ચાર શખ્સો વિરુદ્ધ ગુનો નોંધી તેમની શોધખોળ શરૂ કરી છે. ASI મનિષકુમાર અને અ.હે.કો. વિક્રમસિંહને મળેલી બાતમીના આધારે આ કાર્યવાહી કરવામાં આવી હતી.

હિંમતનગર બી-ડીવીઝન પોલીસ સ્ટેશન વિસ્તારમાં આવેલ વેપાર ભવનની કોમ્પ્યુટર ટાઈપની દુકાનમાંથી અંદાજે રૂ.1.50 લાખની રોકડની ચોરી થઈ હતી. આ ઘટના અંગે ઝાકીરહસેન અબ્દુરરહમાન કાબલીવાલાએ નોંધાવેલી ફરિયાદ મુજબ, ચાંદનગરમાં રહેતા શકીલશા રફીકશા દિવાને તારીખ 30 જૂનની રાત્રે તેમની દુકાનમાં પ્રવેશ કરી ઓફિસના ડ્રોવરનું તાળું તોડી ચોરી કરી હતી. આ ચોરી અંગે ઝાકીરહુસેન કાબલીવાલાએ શકીલશા દિવાન વિરુદ્ધ બી-ડીવીઝન પોલીસ સ્ટેશનમાં ફરિયાદ નોંધાવી છે.

ખેડબ્રહ્મા જનરલ હોસ્પિટલમાં ફરજ પરના મેડિકલ ઓફિસર સવારે તેમની ખુરશીમાં ઊંઘતા ઝડપાયા હતા. એક નાગરિકે બનાવેલો આ વીડિયો સોશિયલ મીડિયા પર વાયરલ થતાં હોસ્પિટલ તંત્રમાં ખળભળાટ મચી ગયો છે. આ ઘટના ગુરુવારે સવારે લગભગ 10:00 વાગ્યે બની હતી, જ્યારે 20 થી 25 દર્દીઓ દવા લેવા માટે રાહ જોઈ રહ્યા હતા. વીડિયો બનાવતી વખતે ડોક્ટર જાગી ગયા હતા. આ અંગે અધિક્ષક અશ્વિનભાઈ ગઢવીએ જણાવ્યું કે, ડોક્ટરને કારણ દર્શાવતી નોટિસ આપી ખુલાસો માગવામાં આવશે.

સાબરકાંઠા જિલ્લામાં દારૂબંધીના કડક અમલ હેઠળ, તલોદ અને પ્રાંતિજ પોલીસ દ્વારા જપ્ત કરાયેલા રૂ. 2.10 કરોડથી વધુના વિદેશી દારૂનો કોર્ટના આદેશ બાદ નાશ કરવામાં આવ્યો. આ કાર્યવાહીમાં કુલ 62,804 બોટલોનો સમાવેશ થાય છે, જેમાંથી તલોદ પોલીસ સ્ટેશનના 18 ગુનાઓની 8288 બોટલો અને પ્રાંતિજ પોલીસ સ્ટેશનના 24 ગુનાઓની 54,516 બોટલોનો નાશ કરાયો. નાયબ પોલીસ મહાનિરીક્ષક અને પોલીસ અધિક્ષકના માર્ગદર્શન હેઠળ સબ-ડિવિઝનલ મેજિસ્ટ્રેટની હાજરીમાં ઉમેદની મુવાડી ગામ ખાતે આ નાશની પ્રક્રિયા પૂર્ણ કરવામાં આવી.

હિંમતનગર બી-ડીવીઝન પોલીસ સ્ટેશનમાં એક યુવકના મોત બાદ તેના પરિવારજનો, મહિલાઓ અને યુવાનોએ પોલીસ મથકે પહોંચી દેકારો મચાવ્યો હતો. મૃતકને પોલીસ સ્ટેશનમાં લાવી માર મારવામાં આવ્યો હોવાનો આરોપ છે. પરિજનોએ મૃતકના મોતની યોગ્ય તપાસ અને ન્યાયની માંગ કરી હતી. હાલ પોલીસ તંત્ર દ્વારા આ અંગે કોઈ સત્તાવાર માહિતી આપવામાં આવી નથી. પોસ્ટમોર્ટમ અને FSL રિપોર્ટ આવ્યા બાદ મોતનું સાચું કારણ સ્પષ્ટ થશે તેવું માનવામાં આવી રહ્યું છે.

હળવદ નજીક ઘુડખર અભયારણ્ય વિસ્તારમાં ગેરકાયદેસર રેતી ખનનની બાતમી મળતાં વન વિભાગે સઘન કાર્યવાહી કરી હતી. એ.સી.એફ્. મનીષ ઓડેદરાના માર્ગદર્શન હેઠળ આર.એફ્.ઓ.ની ટીમોએ એજાર, માલણિયાદ અને કોપરણી ગામોમાં કોમ્બિંગ હાથ ધર્યું હતું. આ દરમિયાન, રાત્રિના સમયે એજાર ગામ પાસે અભયારણ્ય વિસ્તારમાંથી ગેરકાયદે રેતીનું ખનન કરતા 4 ટ્રેક્ટરો ઝડપી પાડ્યા હતા. વન વિભાગે તમામ ટ્રેક્ટરો કબજે કરી આરોપીઓ સામે વન્યજીવ સંરક્ષણ અધિનિયમ-1972 હેઠળ ગુનો નોંધી કાયદેસરની કાર્યવાહી હાથ ધરી છે.

દસ્ક્રોઈ તાલુકાના બાકરોલ ગામમાં સિંચાઈ વિભાગની કેનાલ પર ગેરકાયદેસર નોનવેજ હોટેલનું બાંધકામ કરાયું છે. તેના કારણે ચોમાસામાં પાણીના નિકાલમાં અવરોધ આવવાની તેમજ ખેડૂતોને સિંચાઈ માટે પાણી પહોંચવામાં મુશ્કેલી સર્જાવાની ભીતિ છે. હોટેલમાંથી નીકળતો કચરો અને ગંદકી કેનાલમાં જતી હોવાથી સ્વચ્છતા અને આરોગ્યના પ્રશ્નો પણ ઊભા થયા છે. ખુલ્લા કુવા અને ગંદકીથી રોગચાળો વકરી શકે છે. સ્થાનિકોએ સિંચાઈ વિભાગ, ગ્રામ પંચાયત અને જિલ્લા તંત્રને તાત્કાલિક તપાસ કરી દબાણ દૂર કરવાની અને જવાબદારો સામે કાર્યવાહી કરવાની માંગ કરી છે.

ધ્રાંગધ્રાના સોલડી ગામની ફળદ્રુપ જમીનમાં બાયોમેડીકલ વેસ્ટ ટ્રીટમેન્ટ પ્લાન્ટની મંજૂરી સામે ગ્રામજનો અને ખેડૂતોએ વિરોધ કર્યો છે. દેવયોગી હેલ્થકેર કંપની દ્વારા આ પ્લાન્ટ સ્થાપવાની પ્રક્રિયા પૂર્ણ થતાં, ગામના આરોગ્ય અને પર્યાવરણને નુકસાનની ભીતિ સેવાઈ રહી છે. આ બાબતે જિલ્લા પંચાયત ઉપપ્રમુખ, સરપંચ અને મોટી સંખ્યામાં ગ્રામજનો ગાંધીનગર પહોંચી વનમંત્રી અર્જુનભાઈ મોઢવાણીયા, CPCB કમીટી અને પોલ્યુશન બોર્ડના અધિકારીઓને પ્લાન્ટની મંજૂરી ન આપવા વિનંતી કરી છે.

ભાભર કોર્ટ ખાતે ઈનચાર્જ ડિસ્ટ્રિક્ટ જજ એ.જે. કાનાણીના હસ્તે આકસ્મિક આરોગ્ય સેવા કેન્દ્રનું ઉદ્ઘાટન થયું. દીપ પ્રાગટ્ય અને રીબીન કાપીને ખુલ્લા મૂકાયેલા આ કેન્દ્રનો ઉદ્દેશ્ય લોકોને ઝડપી ન્યાયની સાથે સાથે ઉત્તમ સ્વાસ્થ્ય સુવિધા પૂરી પાડવાનો છે. અહીં કોર્ટમાં આવતા પક્ષકારો, વકીલો અને સ્ટાફને ઇમરજન્સી આરોગ્ય સેવાઓ મળશે. ભાભર બાર એસોસિએશને તેમનું સ્વાગત કર્યું.

વીરપુર પોલીસને મળેલ બાતમીના આધારે લીંબરવાળા ગામે કાર્યવાહી કરતાં એક ઇસમ વિદેશી દારૂના મોટા જથ્થા સાથે ઝડપાયો છે. જિલ્લા પોલીસ અધિક્ષક લુણાવાડા વિભાગનાઓએ પ્રોહીબીશનની અસરકારક કામગીરી કરવા સૂચના કરી હતી, જેના અનુસંધાને વીરપુર પોલીસ સ્ટેશન દ્વારા ચાંપતી નજર રાખવામાં આવી રહી હતી. લીંમ્બરવાડા ગામના રણજીતભાઈ અમરાભાઈ ઠાકોર પોતાના ઘરે દારૂ રાખી વેચાણ કરતા હોવાની બાતમી મળતાં દરોડો પાડવામાં આવ્યો હતો. તેમના ખેતરમાંથી ટીન બીયર અને રોયલ સ્ટેગ કવોટર મળી આવ્યો છે.

હિંમતનગરઃ સાબરકાંઠા જિલ્લાના હિંમતનગર સ્થિત ટ્રાફિક શાખા દ્વારા છેલ્લા એક મહિનામાં નંબર પ્લેટ ન ધરાવતા 3050 તથા બ્લેક ફિલ્મ લગાવીને ફરતા 628 મળી 3678 વાહન ચાલકો સામે ટ્રાફિક શાખાના પીએસઆઈ એ.વી.જોષી અને તેમના સ્ટાફે વાહન ચેકીંગ કરીને નિયમોનો ભંગ કરતા વાહનચાલકો વિરૂધ્ધ દંડનીય કાર્યવાહી કરી હતી.

વિરમગામ શહેરની શેઠ એમ. જે. હાઈસ્કૂલના મેદાન પાસેના હાથી તલાવડી વિસ્તારમાંથી દેશી અને વિદેશી દારૂનો ખાનગી વેપલો ચલાવતા ભાટ વાસણા ગામના રમેશજી ઉર્ફે ગુગો લક્ષ્મણજી ઠાકોરને શહેર પોલીસે દારૂના જથ્થા સાથે ઝડપી લીધો. પોલીસે વાહન કબજે કરી, જેમાં 130 વ્હિસ્કી ક્વાટર, 22 બિયર ટીન, 100 લીટર દેશી દારૂ, એક મોબાઈલ અને વાહન મળી કુલ રૂ. 5,42,840નો મુદ્દામાલ જપ્ત કર્યો. રમેશજી ઠાકોર અને દીપક સુરેશભાઈ ઠાકોર વિરૂદ્ધ ગુનો નોંધી તપાસ શરૂ કરાઈ છે.

સાયલા ગામના સર્વોદય જીન વિસ્તારમાં સવારે એક જ જ્ઞાતિના બે જૂથો વચ્ચે કોઈ મુદ્દે ઉગ્ર બોલાચાલી બાદ ધીંગાણું સર્જાયું. આ મારામારીમાં બન્ને પક્ષો દ્વારા ધારીયા, લાકડીઓ અને ધોકા જેવા હથિયારોનો ઉપયોગ કરવામાં આવ્યો, જેમાં કુલ નવ લોકોને નાની-મોટી ઈજાઓ પહોંચી. ઈજાગ્રસ્તોને 108 એમ્બ્યુલન્સ દ્વારા સાયલા સરકારી હોસ્પિટલ ખસેડાયા, જ્યાં ત્રણથી ચાર લોકોને વધુ સારવાર માટે સુરેન્દ્રનગર અને એકને રાજકોટ મોકલવામાં આવ્યા. સાયલા પોલીસે ઘટનાસ્થળે અને હોસ્પિટલમાં બંદોબસ્ત ગોઠવી તપાસ હાથ ધરી.

ધ્રાંગધ્રાની રજવાડી રેસ્ટોરન્ટના મેનેજરે એક મહિલાને બીભત્સ ફોટા બતાવી બ્લેકમેઈલ કરી કટકે કટકે રૂપીયા બે લાખ પડાવી લીધાની ઘટના બની છે. આબીદ માલપરા નામનો મેનેજર મહિલાના ફોટા વાયરલ કરવાની ધમકી આપી પૈસા પડાવતો હતો. તેણે મહિલાને તેના પતિથી છૂટાછેડા લેવા માટે પણ દબાણ કર્યું હતું. આ અંગે ધ્રાંગધ્રા સિટી પોલીસ મથકે ફરિયાદ નોંધાતા પોલીસે વધુ તપાસ હાથ ધરી છે.

મહેસાણા જિલ્લામાં ઢોર ચોરીના વધતા બનાવોને ધ્યાનમાં રાખીને બાવલું પોલીસે એક આરોપીને ઝડપી પાડ્યો છે. આ આરોપી પાસેથી મણિપુર ગામની સીમમાંથી ચોરાયેલું એક ઘેટું અને તેનું તાજેતરમાં જન્મેલું બચ્ચું મળી આવ્યું છે, જેની કુલ કિંમત રૂ. 10 હજાર આંકવામાં આવી છે. પોલીસે આ ચોરીના ગુનાનો ભેદ ઉકેલી આગળની તપાસ હાથ ધરી છે. ચોરીમાં સામેલ અન્ય ત્રણ આરોપીઓને પોલીસે વોન્ટેડ જાહેર કરી તેમની શોધખોળ શરૂ કરી છે. આ ચોરીમાં કુલ રૂ. 95 હજારના પશુઓની ચોરી થઈ હોવાનું સામે આવ્યું છે.

કડી તાલુકામાં ભેંસોની લેતી-દેતીની જૂની અદાવતના કારણે એક યુવક પર તેની પત્ની અને અઢી વર્ષની પુત્રી સામે જ ચાર શખ્સોએ ધારિયા અને લાકડીઓ વડે જીવલેણ હુમલો કર્યો. આ ઘટનામાં યુવકને ગંભીર ઈજાઓ થતાં તેને સારવાર માટે હોસ્પિટલમાં ખસેડાયો છે. કડી પોલીસે ચારેય આરોપીઓ સામે ગુનો નોંધી તેમની શોધખોળ શરૂ કરી છે. આ હુમલો કલોલ ખાતે રહેતા રમેશભાઈ નારણભાઈ રબારી પર થયો હતો, જેઓ અમદાવાદની કુરિયર કંપનીમાં નોકરી કરે છે.

મહેસાણા જિલ્લામાં પરમિટ વિના તેમજ ઓવરલોડ ખનીજ વહનની પ્રવૃત્તિને ડામવા ખાણ ખનીજ વિભાગે કડક કાર્યવાહી કરી છે. કડી પંથકમાં તપાસ દરમિયાન, બિનઅધિકૃત સાદી રેતી લઈ જતા બે ડમ્પર ઝડપાયા હતા. આ ડમ્પર અને રેતી સહિત કુલ રૂ. 80 લાખનો મુદ્દામાલ જપ્ત કરાયો છે. ડમ્પર માલિકો સામે રૂ. 2.35 લાખનો દંડ ફટકારવામાં આવ્યો છે. આ કાર્યવાહીથી ગેરકાયદે ખનીજ વહન કરતા તત્વોમાં ફફ્ડાટ પ્રસરી ગયો છે.

પાલનપુર શહેર પશ્ચિમ પોલીસે ખોદકામમાં સોનું મળ્યાની લાલચ આપી ઠગાઈ આચરતી ગેંગના બે શખ્સો લાલા રામાભાઈ સલાટ અને રતન તુલશીભાઈ સલાટને ઝડપી પાડ્યા છે. આરોપીઓએ વડગામના મફાજી ભીખાજી સોલંકીને સોનાના ઢોળ ચડાવેલા મણકા આપી વિશ્વાસ કેળવી, બચતના રોકડા રૂ. 2.20 લાખ પડાવી લીધા હતા. તપાસ કરતાં તે પિત્તળ નીકળતાં ભોગ બનનારે ફરિયાદ નોંધાવી હતી. પોલીસે તમામ રકમ રિકવર કરી આગળની કાર્યવાહી હાથ ધરી છે.