Padra: શાશ્વત હિંદુ પ્રતિષ્ઠાનનાં દ્વિ-દિવસીય અધિવેશનની શરૂઆત
Published on: 15th June, 2025
વડોદરાના દાદા ભગવાન મંદિર, કેલનપુરના સભાગૃહમાં શાશ્વત હિંદુ પ્રતિષ્ઠાનના 6ઠ્ઠા રાષ્ટ્રીય અધિવેશનનું ઉદ્ઘાટન કરાયું હતું. જેમાં સનાતન સંત પૂ. ચેતન દાસજી મહારાજે કહ્યું કે, આજે હિંદુઓને પોતાના મંદિરોને શક્તિ કેન્દ્ર બનાવવાની જરૂર છે. સંવાદથી સહમતિ નામના આ અધિવેશનમાં આજે ગુજરાત પ્રાંતના અમદાવાદમાં થયેલી વિમાન દુર્ઘટનાના મૃતકો અને પૂર્વ મુખ્યમંત્રી દિવંગત વિજયભાઈ રૂપાણી પ્રત્યે શ્રદ્ધાંજલિ અને શોક વ્યક્ત કરાયો હતો. રાષ્ટ્રીય સ્વયંસેવક સંઘના પશ્ચિમ ક્ષેત્ર સહસંપર્ક પ્રમુખ વિજય દેવાંગનજીએ તેઓના તેજસ્વી ભાષણમાં કહ્યું કે, શાશ્વત સંસ્કાર અપનાવીને જ હિંદુ સમાજની આવનારી પેઢીને શક્તિશાળી બનાવી શકાય છે. તેમણે સમાજના અંતિમ છેડા સુધી પ્રકાશ લઈ જવાનો સંકલ્પ વ્યક્ત કર્યો હતો. કાર્યક્રમમાં ભારતના વિવિધ રાજ્યોમાંથી પ્રતિનિધિ પધાર્યા છે. સંવાદથી સહમતિ 14 અને 15 જૂન સુધી ચાલશે. શાશ્વત હિંદુ પ્રતિષ્ઠાનના રાષ્ટ્રીય ઉપાધ્યક્ષ મેજર રમેશ ઉપાધ્યાયે જણાવ્યું કે, અમારું લક્ષ્ય પાંચ વર્ષમાં એક લાખ મંદિરોને શક્તિ કેન્દ્ર બનાવવાની યોજના છે. શાશ્વત હિંદુના રાષ્ટ્રીય મહામંત્રી સંજય શર્માએ કહ્યું કે, મંદિરોને શક્તિ કેન્દ્ર બનાવવા માટે બે કલાક મંદિરના નામે, રાષ્ટ્ર નિર્માણના કામે અભિયાનને દરેક હિંદુ સુધી પહોંચાડવું પડશે.
