વડોદરાના છાણી ખાતે જ્વેલર્સની દુકાનમાં નોકરી કરતો ૨૧ વર્ષનો યશ અગ્રવાલ ગઈકાલે સવારે દાંડિયાબજાર વિસ્તારમાં આઈસ્ક્રિમ લેવા માટે એક્ટિવા પાર્ક કરી ગયો હતો, પરત આવતા એક્ટિવા ચોરી થયાનું જાણવા મળ્યું હતું. રાવપુરા પોલીસે ગણતરીના કલાકોમાં આરોપી અઝરૃદ્દીન ઉર્ફે અજ્જુ મુસ્તાકએહમદ શેખ (રહે.કાગદીવાડ, મચ્છીપીઠ)ને ચોરીની એક્ટિવા સાથે ઝડપી પાડી ગણતરીના કલાકોમાં ગુનાનો ભેદ ઉકેલ્યો હતો. આરોપી સામે અગાઉ વાહનચોરીનો ગુનો નોંધાયો છે.

અમદાવાદના વાસણા વિસ્તારમાં BSNLના ડક્ટમાંથી લાખો રૂપિયાના કોપર વાયરની ચોરી કરતી એક ગેંગને પોલીસે ઝડપી પાડી છે. આ ગેંગ AMCના નકલી કર્મચારી હોવાનો ડોળ કરીને, ક્રેન, હેલ્મેટ અને રિફ્લેક્ટર જેકેટનો ઉપયોગ કરીને, તેમજ ટ્રાફિક ડાયવર્ટ કરીને ચોરી કરતી હતી. BSNLના કર્મચારીને શંકા જતાં પોલીસને જાણ કરવામાં આવી હતી, જેના પગલે પોલીસે સ્થળ પર પહોંચી 4 આરોપીઓને ક્રેન અને ચોરાયેલા મુદ્દામાલ સાથે ઝડપી પાડ્યા છે. અન્ય 5-7 શખસો ફરાર છે, જેમની શોધખોળ ચાલુ છે.

અમદાવાદના કૃષ્ણનગર વિસ્તારમાં સ્પેશિયલ ઓપરેશન ગ્રુપ (SOG) દ્વારા દરોડા પાડીને 672 ગ્રામ હાઇબ્રીડ ગાંજો અને મોટી માત્રામાં રોકડ જપ્ત કરવામાં આવી છે. પોલીસે 25 વર્ષીય રાહુલ પ્રદીપભાઈ સદાશિવરાવ ગાડે નામના આરોપીને રૂ. 23,52,500ના હાઇબ્રીડ ગાંજા અને રૂ. 20,98,500ની રોકડ સાથે ઝડપી પાડ્યો છે. કુલ રૂ. 45,25,500નો મુદ્દામાલ જપ્ત કરવામાં આવ્યો છે. આ કાર્યવાહી ચોક્કસ બાતમીના આધારે કરવામાં આવી હતી.

સુરત સિવિલ હોસ્પિટલના રેસિડેન્ટ ડોક્ટર હર્ષ પંડ્યાના આપઘાત મામલે FSL રિપોર્ટ આવ્યો છે. રિપોર્ટ મુજબ, ડો. હર્ષનું મોત ગળેફાંસો ખાવાથી થયું છે. જોકે, તેમને આત્મહત્યા કરવા કોણે મજબૂર કર્યા તે પોલીસ માટે મોટો પ્રશ્ન છે. મૃતકના પિતાએ ચાર સિનિયર ડોક્ટરો સામે એટ્રોસિટી અને દુષ્પ્રેરણાની ફરિયાદ નોંધાવી છે. આરોપ છે કે SC જાતિના હોવાથી તેમને નિશાન બનાવવામાં આવતા હતા અને અસહ્ય માનસિક ત્રાસ આપવામાં આવતો હતો. 7 જુનિયર ડોક્ટરોએ પણ સિનિયરોની દાદાગીરીની પુષ્ટિ કરી છે.

નવસારીના ચીખલી તાલુકાના અંબાચ ગામમાં હૃદયદ્રાવક ઘટના બની, જ્યાં પિતાએ પત્ની સાથેના ઝઘડામાં વચ્ચે પડેલા પોતાના જ પુત્રની છરી મારી હત્યા કરી. પત્ની ભારતીબેનને બચાવવા વચ્ચે પડેલા પુત્ર સુરજ પર પિતા નીલેશભાઈએ ગુસ્સામાં આવી જીવલેણ હુમલો કર્યો, જેમાં પુત્રનું ઘટનાસ્થળે જ મોત થયું. આ હુમલામાં ભારતીબેન પણ ગંભીર રીતે ઘાયલ થયા અને સારવાર હેઠળ છે. એક મહિના પહેલાં જ પૂર્વ પત્ની સાથે રહેવા આવેલો નીલેશભાઈ ગુસ્સામાં ગુનો કરીને ફરાર થયો હતો, પરંતુ ચીખલી પોલીસે ગણતરીના કલાકોમાં તેને ઝડપી પાડી કાયદેસરની કાર્યવાહી હાથ ધરી છે.

બનાસકાંઠાના સાંસદ ગેનીબેન ઠાકોરે ગુજરાત સરકારની નીતિઓ પર આકરા પ્રહારો કર્યા છે. તેમણે જણાવ્યું કે, ખેડૂતોને યુરિયા ખાતર મેળવવા કલાકો સુધી લાઈનોમાં ઊભા રહેવું પડે છે, છતાં મળતું નથી. બીજી તરફ, દારૂ અને ડ્રગ્સની જરૂર હોય તો એક ફોન કોલ પર હોમ ડિલિવરી મળે છે. પોલીસને આ ગેરકાયદે પ્રવૃત્તિઓની જાણ હોવા છતાં કોઈ કાર્યવાહી થતી નથી. આ હપ્તા ગાંધીનગર અને દિલ્હી સુધી પહોંચે છે, જેના કારણે યુવાનો બરબાદ થઈ રહ્યા છે. કોંગ્રેસ આવા બુટલેગરો અને ડ્રગ્સ વેચનારાઓનો સર્વે કરાવી ગૃહમંત્રીને જાણ કરશે અને જો સરકાર કાર્યવાહી નહીં કરે તો 'જનતા રેડ'ની ચીમકી ઉચ્ચારી છે.

ડિરેક્ટોરેટ ઓફ રેવન્યુ ઇન્ટેલિજન્સ (DRI)એ SAFTA હેઠળ બાંગ્લાદેશી મૂળની ખોટી જાહેરાત કરીને ગેરકાયદેસર સોપારી આયાતનું મોટું નેટવર્ક ઉજાગર કર્યું છે. આ દ્વારા ₹2,500 કરોડથી વધુની કસ્ટમ ડ્યુટીની છેતરપિંડી થઈ હોવાનો અંદાજ છે. આંતરરાષ્ટ્રીય સિન્ડિકેટ્સ દક્ષિણ-પૂર્વ એશિયાઈ સોપારીને બાંગ્લાદેશી દર્શાવીને EUS (SAFTA) લાભો મેળવી રહ્યા હતા. DRI એ કોલકાતા અને વિશાખાપટ્ટનમમાં દરોડા પાડીને કસ્ટમ બ્રોકર્સ અને IEC ધારકો પાસેથી ગેરકાયદે દસ્તાવેજો અને રોકડ જપ્ત કરી છે. આ કૌભાંડમાં 9 લોકોની ધરપકડ કરાઈ છે.

જામનગર જિલ્લામાં પોલીસે 24 કલાકમાં જુગારના ચાર દરોડા પાડી 26 શખ્સોને રૂ.39,300 રોકડા અને ગંજીપતા સાથે ઝડપી પાડ્યા છે. લાલપુરના રીઝપર ગામમાં 4, જામજોધપુરના બુટાવદર ગામમાં 5, હિંગળાજ ચોકમાં 10 અને ગોકુલનગર રડાર રોડ પર 7 મળી કુલ 26 આરોપીઓ ઝડપાયા. પોલીસે તેમની પાસેથી જુદી જુદી રકમમાં કુલ રૂ.39,300 રોકડા અને ગંજીપતાના 208 પાના કબજે કરી જુગારધારા કલમ-12 મુજબ કાર્યવાહી હાથ ધરી છે.

જામજોધપુર તાલુકાના શેઠવડાળા ગામ નજીક સુઝલોન રિન્યુએબલ ડેવલપમેન્ટ લિમિટેડની પવનચક્કીના ટાવર લોકેશન નં.505 પાસે મુકેલા કન્ટેનરમાંથી રૂ.10,84,600ની કિંમતનો કોપર કેબલ ચોરાયો છે. અજાણ્યા તસ્કરોએ રાત્રિ દરમિયાન કન્ટેનરનું તાળું તોડી અંદરથી આશરે ૩૭૪ મીટર કોપર કેબલ લઈ ગયા હતા. રાજવી સિક્યુરિટી એજન્સીના સુપરવાઇઝર યુવરાજસિંહ જુવાનસિંહ જાડેજાએ શેઠવડાળા પોલીસ મથકમાં ફરિયાદ નોંધાવી છે. શેઠવડાળા પોલીસે IPC કલમ 305(એ), 331(2), 331(3) અને 331(4) હેઠળ ગુનો નોંધી તપાસ હાથ ધરી છે.

જામનગર તાલુકાના સિક્કામાં, કારાભુંગા વિસ્તારમાં ઘર પાસેથી પસાર થવા બાબતે થયેલી બોલાચાલી બાદ એક યુવક પર ચાર લોકોએ ધોકા વડે હુમલો કર્યાની ફરિયાદ સિક્કા પોલીસ મથકમાં નોંધાઈ છે. પીડિત દીપકભાઈ ચૌહાણના જણાવ્યા મુજબ, તેઓ ૧૫ ઓગસ્ટે કામસર જઈ રહ્યા હતા ત્યારે પુષ્પાબેન, જોષ્નાબેન, સુરેશભાઈ અને ખીમીબેન નામના ચાર વ્યક્તિઓએ તેમને ત્યાંથી નહીં નીકળવા કહી અપશબ્દો બોલ્યા. બાદમાં સુરેશભાઈએ ધોકો મારતાં માથામાં ઈજા થઈ, જ્યારે ખીમીબેને શરીરના અન્ય ભાગોમાં માર માર્યો. પુષ્પાબેન અને જોષ્નાબેને ઢીકાપાટુનો માર માર્યો હતો. ચારેયે જાનથી મારી નાખવાની ધમકી પણ આપી હતી.

જામનગરમાં રૂ.5 લાખની ઉઘરાણીના મામલે એક ડ્રાઇવર પર ચાર શખ્સોએ જીવલેણ હુમલો કરી બંને પગ તથા હાથમાં ગંભીર ઇજાઓ પહોંચાડ્યાની ફરિયાદ સીટી બી. ડિવિઝન પોલીસ મથકમાં નોંધાઈ છે. ઘવાયેલા ડ્રાઇવર જયપાલસિંહ વિક્રમસિંહ ચુડાસમા હાલ જી.જી. હોસ્પિટલમાં સારવાર હેઠળ છે. આશરે એક વર્ષ પહેલાં આપેલા રૂ. 5 લાખ પરત માંગતા હોવાથી મિત્ર મહીપાલસિંહ એ. રાણાએ ભાઈ અને અન્ય બે શખ્સો સાથે મળી લોખંડના પાઇપ, લાકડાના ધોકા અને છરી વડે હુમલો કર્યો હોવાનો આક્ષેપ છે.

અમદાવાદ શહેરમાં સાયબર ક્રાઇમના બે અલગ-અલગ કિસ્સાઓમાં નાગરિકોને નિશાન બનાવવામાં આવ્યા છે. નવરંગપુરામાં એક IT એન્જિનિયર યુવતીને ₹77ના રાઇડ પેમેન્ટના વિવાદ બાદ ફેક ઇન્સ્ટાગ્રામ આઇડી બનાવી બદનામ કરવાની ધમકી આપી 77 હજાર રૂપિયા અને આઇફોનની માંગણી કરવામાં આવી. જ્યારે પાલડીમાં ખાનગી કંપનીના એકાઉન્ટન્ટ પાસેથી બોસના નામે વોટ્સએપ પર મેસેજ કરીને 30 લાખ રૂપિયાની છેતરપિંડી આચરવામાં આવી. પોલીસે બંને મામલે ગુના નોંધી તપાસ શરૂ કરી છે.

જામનગરના ગોકુલનગર વિસ્તારમાં દારૂ પીને તોફાન મચાવતા પતિને તેની પત્નીએ 112 નંબર પર ફોન કરીને પોલીસ બોલાવી હતી. પોલીસે ઘટના સ્થળે પહોંચી પતિ દિલીપભાઈ નકુમને નશાની હાલતમાં ઝડપી લીધો હતો. પોલીસ પૂછપરછમાં દિલીપભાઈ પાસે દારૂ પીવા માટે કોઈ પાસ-પરમીટ ન હોવાનું જાણવા મળ્યું હતું. આ બનાવ અંગે પોલીસે પ્રોહિબિશન એક્ટની કલમ હેઠળ ગુનો નોંધી વધુ તપાસ હાથ ધરી છે.

પશ્ચિમ બંગાળના પૂર્વ મંત્રી આશિષ બેનર્જીનો મૃતદેહ પાર્ટી ઓફિસમાં ફાંસો ખાધેલી હાલતમાં મળી આવ્યો. તેમની પાસેથી મળેલી સ્યુસાઇડ નોટમાં પાર્ટીમાં થયેલા અન્યાય અને ભ્રષ્ટાચાર સાથે સમાધાન ન કરવાનો ઉલ્લેખ છે. TRDA માં કરોડો રૂપિયાના ભ્રષ્ટાચારના આરોપો વચ્ચે, બેનર્જીએ જણાવ્યું કે તેમની પાસે કોઈ જવાબદારી નહોતી છતાં તેમનું અપમાન થયું. તેમણે કોઈ ખોટું કર્યું નથી અને ભ્રષ્ટાચાર સામે લડ્યા છે. પરિવારે રાજકારણમાં પ્રવેશ ન કરવાની સલાહ આપી હતી. પોલીસ તપાસ કરી રહી છે.

વડોદરાના સમા રોડ પર આવેલ અર્થ ઇયોન કોમ્પલેક્સના બેઝમેન્ટ પાર્કિંગમાંથી પોલીસે વિદેશી દારૂ ભરેલી કાર સાથે એક આરોપી રાજવીર રાજપૂતને ઝડપી પાડ્યો છે. પોલીસે કારમાંથી દારૂની ૨૯૮ બોટલ, એક મોપેડ અને કાર મળી કુલ રૂપિયા ૩.૬૬ લાખનો મુદ્દામાલ કબજે કર્યો છે. આરોપી રાજવીર અને પ્રેમ યાદવ કારમાં દારૂ ભરીને વેચાણ કરતા હતા. પ્રેમ યાદવને પોલીસે વોન્ટેડ જાહેર કર્યો છે.

વાડી નાની શાક માર્કેટ પાસે રહેતા અને ડ્રાઇવિંગ કરતા ભરતભાઇ બંસીલાલ કનોજીયાના મકાનમાં ગ્રાઉન્ડ ફ્લોરનું રિનોવેશન ચાલતું હોઇ તેઓ પરિવાર સાથે ઉપરના માળે રહે છે.ગત 14મી તારીખે તેઓ સવારે જાગીને નીચે આવ્યા ત્યારે જોયું તો મકાનનના દરવાજાનો નકૂચો તૂટેલી હાલતમાં હતો. ચોર ટોળકી ઘરમાંથી સોનાની બે તોલા વજનની લગડી, બુટ્ટી, વીંટી તથા ચાંદીના દાગીના અને રોકડા ૪૦ હજાર મળી કુલ 1.98 લાખની મતા લઇ ગઇ હતી. જે અંગે વાડી પોલીસે વધુ તપાસ હાથ ધરી છે.

વડોદરામાં કારના નુકસાનના 5 લાખ રૂપિયા ન ચૂકવવા બદલ સોહેલ સૈયદ સામે વધુ એક ફરિયાદ નોંધાઈ છે. હાથીખાનાના રહેવાસી ઇમરાન ઘાંચીએ જણાવ્યું કે, સોહેલે તેમની કાર માંગી હતી અને દાહોદ નજીક અકસ્માત થતાં કારને ભારે નુકસાન થયું હતું. Insurance કંપનીએ કારને Total loss ગણાવી 14.70 લાખમાં લીધી. બાકીના 5 લાખ રૂપિયા સોહેલ ચૂકવવાનો હતો, પરંતુ ન ચૂકવતાં અને વારંવાર માગણી કરવા છતાં પૈસા ન આપતાં તેણે જાનથી મારી નાખવાની ધમકી આપી.

વડોદરા શહેરમાં દુબઈના Work Permit Visa અપાવી નોકરી અપાવવાના બહાને અરવલ્લીના એક યુવક પાસેથી 1.10 લાખ રૂપિયા પડાવનાર વિઝા કન્સલ્ટન્ટ વિરુદ્ધ અકોટા પોલીસે ગુનો નોંધી કાર્યવાહી શરૂ કરી છે. યુવકને ઈન્સ્ટાગ્રામ મારફતે સંપર્કમાં લાવી, કુલ 1.30 લાખ રૂપિયા ખર્ચ થશે તેમ કહી એડવાન્સમાં રકમ લીધી હતી. બાદમાં વધુ પૈસા માંગ્યા અને ન આપતા યુવકને દુબઈ મોકલવાની ના પાડી દીધી.

વડોદરા પોલીસે ઠગાઇના ગુનામાં નાસતો ફરતો બિચ્છૂ ગેંગનો સાગરીત તનવીર ઉર્ફે તન્નુને ઝડપી લીધો છે. કર્ણાટકના વેપારીને સસ્તામાં સોનું અપાવવાના બહાને 4.92 કરોડ રૂપિયાની ઠગાઇ આ ગેંગ દ્વારા કરવામાં આવી હતી. આ ગુનામાં સંડોવાયેલો તન્નુ વર્ષ 2021 માં ગુજસીટોક કેસમાં જામીન પર છૂટ્યા બાદ ટ્રાયલ દરમિયાન હાજર રહેતો ન હતો. કોર્ટે તેના જામીન રદ્દ કરી વોરંટ ઇશ્યૂ કર્યું હતું. Police ને બાતમી મળતાં તેને ચાંપાનેર વિસ્તારમાંથી દબોચી લેવાયો.

વાપીના કરવડ વિસ્તારમાં Grindr Dating App પર થયેલી મિત્રતા જીવલેણ સાબિત થઈ. એક યુવાનને મળવા બોલાવી, ત્રણ શખ્સોએ ચપ્પુ બતાવી ₹14000ની લૂંટ ચલાવી. પોલીસે CCTV અને ટેકનિકલ એનાલિસિસની મદદથી ત્રણ આરોપીઓ શાહબાઝ, જવાહર અને ઝહીરની ધરપકડ કરી, તેમજ લૂંટાયેલી રકમ કબજે કરી. આ ઘટના અજાણ્યા લોકો સાથે ડેટિંગ એપ પર મુલાકાત કરતી વખતે અત્યંત સાવચેતી રાખવાની જરૂરિયાત દર્શાવે છે.

મહારાષ્ટ્ર FDA એ પ્રતિબંધિત પાન મસાલાના પ્રચાર બદલ અભિનેતાઓ શાહરૂખ ખાન, અજય દેવગન અને ટાઈગર શ્રોફને નોટિસ ફટકારી છે. FDA નો આક્ષેપ છે કે જાહેરાત દ્વારા આ પ્રતિબંધિત ઉત્પાદનોનો અપ્રત્યક્ષ પ્રચાર કરવામાં આવ્યો છે. કાયદા મુજબ, આવી ગેરમાર્ગે દોરતી જાહેરાતો માટે 10 લાખ રૂપિયા સુધીનો દંડ થઈ શકે છે. મહારાષ્ટ્રમાં પાન મસાલા જેવા ઉત્પાદનો પર 13 જુલાઈ 2026 સુધી પ્રતિબંધ છે. અભિનેતાઓએ આ જાહેરાતમાં તેમની ભૂમિકા અંગે સ્પષ્ટતા કરવાની રહેશે.

વારાણસીના લાલ બહાદુર શાસ્ત્રી એરપોર્ટ પર મુંબઈ જતી એર ઈન્ડિયાની ફ્લાઈટના મુસાફરની પિસ્તોલમાંથી અચાનક ગોળી છૂટી હતી. આ દુર્ઘટનામાં ફ્લોર પર અથડાયેલી ગોળી નજીકમાં ઊભેલા એક યુવકના હાથમાં અને એક મહિલાની જાંઘમાં વાગતા બંને કર્મચારીઓ ઈજાગ્રસ્ત થયા. બંને ઘાયલોને તાત્કાલિક સારવાર માટે ખાનગી હોસ્પિટલમાં ખસેડાયા. મુસાફરે નિયમ મુજબ પોતાની પિસ્તોલ અને મેગેઝીનની માહિતી અધિકારીઓને આપી દીધી હતી, પરંતુ ચેકિંગ પ્રક્રિયા દરમિયાન અચાનક ગોળી છૂટી ગઈ. તપાસ ચાલી રહી છે.

ભરૂચ ક્રાઇમ બ્રાન્ચે પ્લાસ્ટિક કેરેટની આડમાં વહન થતો રૂ. 22.55 લાખનો વિદેશી દારૂ તથા બીયરનો જથ્થો (11,916 બોટલો) ઝડપી પાડ્યો છે. દમણથી રાજપીપળા જતી આ ટ્રકમાં કુલ 32.57 લાખનો મુદ્દામાલ જપ્ત થયો છે. પોલીસ તપાસમાં ભાજપના આગેવાન દિનેશ વસાવા, જેની પુત્રી નર્મદા જિલ્લા પંચાયતમાં ભાજપ સભ્ય છે, તેનું નામ ખૂલતાં રાજકારણમાં ખળભળાટ મચી ગયો છે. ટ્રકચાલકની ધરપકડ કરાઈ છે, જ્યારે દિનેશ વસાવા સહિત અન્ય આરોપીઓ ફરાર છે. પોલીસે તેમને ઝડપી પાડવા કાર્યવાહી હાથ ધરી છે.

અમદાવાદ-મુંબઈ એક્સપ્રેસ હાઈવે પર પોલીસે વિદેશી દારૂની હેરાફેરીનો પર્દાફાશ કરી એક મહિલા સહિત ચાર શખ્સોને ઝડપી લીધા છે. સાપા ટોલનાકા નજીક ટ્રક અને તેને પાયલોટિંગ કરતી આર્ટીગા કાર રોકી તપાસ કરતાં ટ્રકમાંથી 7,632 વિદેશી દારૂની બોટલો મળી આવી હતી. આ દારૂ દમણથી ગુજરાતમાં પહોંચાડવાનો પ્રયાસ હતો. પોલીસે ટ્રક, કાર અને મોબાઇલ ફોન સહિત કુલ રૂ. 28.85 લાખથી વધુનો મુદ્દામાલ કબજે કર્યો છે.

અમેરિકામાં ગોળીબારની અલગ-અલગ ઘટનાઓએ સુરક્ષા વ્યવસ્થા પર ગંભીર સવાલો ઊભા કર્યા છે. મિશિગનમાં એક કિશોર અને ચાર પુખ્ત સહિત પાંચ લોકોના મોત નીપજ્યા છે. શંકાસ્પદ ચાડ હિકમૈન મૃત હાલતમાં મળી આવ્યો હતો. વર્જીનીયા સ્ટેટ યુનિવર્સિટીના કેમ્પસમાં નવા સત્રની શરૂઆત પહેલાં થયેલા ગોળીબારમાં પાંચ લોકો ઈજાગ્રસ્ત થયા છે. ઘટના બાદ કેમ્પસમાં લોકડાઉન લાગુ કરવામાં આવ્યું હતું. બંને ઘટનાઓએ સમુદાયમાં ચિંતા અને શોકનું વાતાવરણ ઊભું કર્યું છે.

અમરેલી જિલ્લાના જાફરાબાદ પંથકમાં એક સગીરા પર દુષ્કર્મ આચરી તેનો ગુપ્ત રીતે ગર્ભપાત કરાવવામાં આવ્યો હોવાની ચોંકાવનારી ઘટના બની છે. આ મામલે પોલીસે આરોપી અલ્પેશ વાઘેલા સામે POCSO હેઠળ ગુનો નોંધી તેની ધરપકડ માટે સઘન તપાસ શરૂ કરી છે. પોલીસમાંથી પ્રાપ્ત માહિતી અનુસાર, આરોપીએ સગીરાને જાનથી મારી નાખવાની ધમકી આપી હતી. જાફરાબાદ પોલીસે BNS અને POCSO એક્ટ હેઠળ ગુનો નોંધી કાયદેસરની કાર્યવાહી હાથ ધરી છે.

અમદાવાદના રાણીપ વિસ્તારમાં RTO ચાર રસ્તા નજીક પોલીસ ચોકી સામે જ અજય સાલ્વી નામના યુવકની છરા વડે નિર્મમ હત્યા કરવામાં આવી છે. આ ઘટનાએ સમગ્ર વિસ્તારમાં ખળભળાટ મચાવ્યો છે. પોલીસ ચોકી સામે જ આ લોહિયાળ ઘટના બનતાં કાયદો-વ્યવસ્થા પર પ્રશ્નો ઊભા થયા છે. પ્રાથમિક તપાસ મુજબ, જૂની અંગત અદાવત કે ઝઘડાને કારણે આ હત્યા કરવામાં આવી હોવાની શક્યતા છે. પોલીસે ગુનો નોંધી સીસીટીવી ફૂટેજ અને સ્થાનિક પૂછપરછના આધારે હત્યારાઓને ઝડપી પાડવા તપાસ શરૂ કરી છે.

વડોદરાના ગોરવા વિસ્તારમાં મધુનગર બ્રિજ નીચે રેલવે ફાટક પાસેથી એક યુવકનો બે ટુકડા થયેલો મૃતદેહ મળ્યો છે. આ ઘટનાથી ભારે ચકચાર મચી છે. મૃતદેહ ધડ અને કમરના ભાગેથી અલગ થયેલો હોવાથી લોકોનું ટોળું એકત્ર થયું હતું. ગોરવા અને રેલવે પોલીસ તાત્કાલિક ઘટનાસ્થળે પહોંચી ગઈ હતી. પોલીસ ટ્રેનની અડફેટે થયેલો અકસ્માત કે હત્યા બંને દિશામાં તપાસ કરી રહી છે. FSL નિષ્ણાતોની મદદ લઈને આ ઘટના પાછળનું ચોક્કસ કારણ જાણવાનો પ્રયાસ થઈ રહ્યો છે.

પશ્ચિમ બંગાળ વિધાનસભાના પૂર્વ ડેપ્યુટી સ્પીકર અને TMC ના પાંચ વખત MLA રહી ચૂકેલા વરિષ્ઠ નેતા આશીષ બેનરજીનો મૃતદેહ તેમના નિવાસસ્થાન નજીક આવેલા પાર્ટી કાર્યાલયમાંથી ફાંસીથી લટકેલી હાલતમાં મળી આવ્યો છે. આ ઘટનાથી રાજકીય વર્તુળોમાં ભારે ચકચાર મચી છે. મમતા બેનરજીના નજીકના માનવામાં આવતા બેનરજીના આ શંકાસ્પદ મોત અંગે પોલીસે તપાસ શરૂ કરી છે. મૃતદેહને પોસ્ટમોર્ટમ માટે ખસેડાયો છે. તેઓ રામપુરહાટ બેઠક પરથી સતત પાંચ વખત ચૂંટણી જીતીને ધારાસભ્ય બન્યા હતા અને રાજ્યના શિક્ષણ અને કૃષિ મંત્રી પણ રહી ચૂક્યા હતા.

ભરૂચમાં નેત્રંગ પોલીસે ૧૫મી ઓગસ્ટના ચેકિંગ દરમિયાન એક કારનો પીછો કરી આંતરરાજ્ય ચોરી ગેંગના ત્રણ સભ્યોને ઝડપી પાડ્યા છે. કારમાંથી ચાંદીના ઘરેણાં અને મૂર્તિઓ મળી આવી હતી. આરોપીઓએ કર્ણાટકના બેલાગવી જિલ્લાના કિટ્ટુર ખાતેની સોનીની દુકાનમાંથી આ મુદ્દામાલ ચોરી કર્યાની કબૂલાત કરી છે. પકડાયેલા આરોપીઓનો મોટો ગુનાહિત ઇતિહાસ છે, જેમાં હત્યાનો પ્રયાસ, NDPS એક્ટ અને POCSO એક્ટ હેઠળના ગુનાઓ નોંધાયેલા છે. બે આરોપીઓ હજુ ફરાર છે.